Newsworldmarathi Pune: भारतीय जनता पक्षाच्या पुणे शहराध्यक्ष पदासाठी प्रमुख दावेदार असतानाही अंतिम क्षणी संधीपासून वंचित राहिलेले माजी गटनेते गणेश बिडकर यांच्याकडे आगामी पुणे महापालिका निवडणुकीच्या रणनीतीची मोठी जबाबदारी सोपवण्यात आली आहे. मुख्यमंत्री देवेंद्र फडणवीस यांच्या आदेशानुसार बिडकर यांच्याकडे ही जबाबदारी दिल्याचे सांगण्यात येत असून, त्यांनी तत्काळ कामाला सुरुवातही केली आहे.
महापालिकेतील माजी नगरसेवकांशी बिडकर सध्या चर्चा करत असून, प्रभाग रचना, निवडणूक तयारी आणि स्थानिक राजकीय समिकरणांचा अभ्यास सुरू आहे. पक्षाच्या रणनीतीसाठी स्थानिक पातळीवरील माहिती संकलित करून त्यानुसार पुढील दिशा ठरवण्याचे काम बिडकर करत आहेत.
भाजपच्या शहराध्यक्षपदासाठी बिडकर यांचे नाव आघाडीवर होते. त्यांचा महापालिकेतील प्रदीर्घ अनुभव, स्थायी समिती अध्यक्ष आणि २०१७ मधील सभागृह नेते या नात्याने त्यांनी बजावलेली भूमिका लक्षात घेता, त्यांची निवड निश्चित मानली जात होती. मात्र, पक्षातील अंतर्गत राजकीय समीकरणे आणि तडजोडीमुळे त्यांना संधी नाकारण्यात आली. त्यानंतर माजी शहराध्यक्ष धीरज घाटे यांच्यावरच पुन्हा जबाबदारी ठेवण्यात आली होती, ज्यामुळे अनेकांना आश्चर्याचा धक्का बसला.
दरम्यान, राज्यात महायुतीचे सरकार स्थापन झाल्यानंतर बिडकर यांना विधानपरिषदेवर संधी मिळेल, अशीही शक्यता वर्तवली जात होती. मात्र, त्या ठिकाणी देखील त्यांना संधी मिळाली नाही. त्यामुळे आता महापालिकेच्या निवडणुकीतच त्यांना निर्णायक भूमिका मिळणार असल्याचे स्पष्ट होत आहे.
महाविकास आघाडीतील शिवसेना आणि राष्ट्रवादी काँग्रेसमध्ये झालेल्या फाटफुटीनंतर हे दोन्ही पक्ष सध्या भाजपसोबत सत्तेत आहेत. पुण्यातही या तिन्ही पक्षांकडून महायुती म्हणून निवडणूक लढवली जाणार असल्याचे संकेत आहेत. त्यामुळे बिडकर यांचा स्थानिक राजकारणातील अनुभव आणि संघटन कौशल्य महत्त्वाचे ठरणार आहे.
Recent Comments