Newsworldmarathi Pune: पुणे महानगरपालिकेच्या २०१७ साली झालेल्या निवडणुकांदरम्यान कोंढवा–येवलेवाडी परिसरात मोठ्या प्रमाणात बोगस मतदार नोंद झाल्याची चर्चा नागरिकांमध्ये आजही सुरू आहे. त्या काळात मतदार यादीत बाहेरील व्यक्तींची नावे समाविष्ट झाल्याचे तसेच वास्तव्यात नसलेल्या नागरिकांची नोंद आढळल्याचे आरोप स्थानिक पातळीवर करण्यात आले होते. या पार्श्वभूमीवर यंदा होणाऱ्या महानगरपालिका निवडणुकांमध्ये अशा प्रकारांची पुनरावृत्ती होऊ नये, अशी मागणी सामाजिक कार्यकर्ते उदयसिंह मुळीक यांनी केली आहे. कोंढवा–येवलेवाडीतील सामाजिक कार्यकर्ते, नागरिक संघटना आणि जागरूक मतदारांनी पोलीस प्रशासन व निवडणूक अधिकाऱ्यांनी मतदार यादी तपासणीसह सर्व प्रक्रिया काटेकोरपणे राबवाव्यात, अशी अपेक्षा व्यक्त केली आहे. मतदार नोंदणी, पत्त्यांची पडताळणी, तसेच संशयास्पद नोंदींची सखोल चौकशी करण्यात यावी, असे मत नागरिकांचे आहे. निवडणूक प्रक्रिया पारदर्शक व विश्वासार्ह राहण्यासाठी प्रशासनाने वेळीच ठोस पावले उचलावीत, अन्यथा लोकशाहीच्या रक्षणासाठी जनतेला रस्त्यावर उतरावे लागेल, असा इशाराही काही नागरिकांनी दिला आहे. येणाऱ्या निवडणुकांत कोणताही गैरप्रकार होऊ नये यासाठी प्रशासनाने नागरिकांच्या तक्रारी गंभीरपणे घ्याव्यात, अशी सर्वसामान्य अपेक्षा व्यक्त होत आहे.

Newsworldmarathi Pune: पुणे महानगरपालिकेच्या निवडणुकीसाठी सुरू असलेल्या प्रचाराच्या तोफा मंगळवारी संध्याकाळी थंडावल्या. या संपूर्ण प्रचारकाळात केंद्रीय राज्यमंत्री आणि पुणे महापालिका निवडणुकीतील भाजपाचे ‘कॅप्टन’ मुरलीधर मोहोळ यांनी पुणे शहरात अक्षरशः प्रचाराचा धडाका उडवला. तब्बल २७ प्रभागांचा प्रत्यक्ष दौरा करत १०९ उमेदवारांच्या प्रचारात ते स्वतः मैदानात उतरले आणि पदयात्रा, बाईक रॅली, मतदारांशी गाठीभेटी, कॉर्नर सभा यांमधून संपूर्ण पुणे ढवळून काढले. या प्रचारादरम्यान मोहोळ यांनी केंद्र व राज्य सरकारच्या विकासकामांचा, पायाभूत सुविधांचा आणि पुण्याच्या बदलत्या चेहऱ्याचा प्रभावीपणे आढावा मतदारांसमोर मांडला. ‘ट्रिपल इंजिन सरकार’मुळे पुण्याला मिळालेली मेट्रो, रिंग रोड, नदी पुनरुज्जीवन, २४ तास समान पाणीपुरवठा योजना, विमानतळाचे आधुनिकीकरण अशा विविध प्रकल्पांचा उल्लेख करत त्यांनी पुण्याच्या भविष्यासाठी भाजपचाच पर्याय सक्षम असल्याचा ठाम विश्वास व्यक्त केला. प्रचाराच्या शेवटच्या टप्प्याबाबत बोलताना मुरलीधर मोहोळ म्हणाले, ‘पुणेकरांनी विकास, स्थैर्य आणि पारदर्शक प्रशासनाला पसंती दिली आहे. जनतेचा प्रतिसाद पाहता भाजपाला या निवडणुकीत १२० ते १२५ जागा मिळतील आणि पुण्याचा महापौर भाजपचाच होईल, याबाबत आम्हाला पूर्ण खात्री आहे. पुणे शहराच्या सर्वांगीण विकासासाठी केंद्र व राज्य सरकारची भक्कम साथ आगामी काळातही मिळणार आहे.” संपूर्ण प्रचारकाळात मोहोळ यांनी सामान्य नागरिकांपासून व्यापारी, महिला, युवक, ज्येष्ठ नागरिक, झोपडपट्टीवासीय, आयटी कर्मचारी अशा विविध घटकांशी थेट संवाद साधत त्यांच्या समस्या जाणून घेतल्या. वाहतूक, पाणीपुरवठा, स्वच्छता, सुरक्षा आणि पर्यावरणपूरक विकास या प्रमुख मुद्द्यांवर भाजपची ठोस भूमिका त्यांनी मतदारांसमोर स्पष्ट केली. पुणे महापालिकेच्या या निवडणुकीत भाजपने विकास, सुशासन आणि स्थिर नेतृत्वाचे मॉडेल मांडले असून मोहोळ यांच्या आक्रमक, नियोजित आणि लोकसंपर्काधारित प्रचारामुळे शहरभर भाजपचा आत्मविश्वास आणि सकारात्मक वातावरण दिसून आले. मोहोळ पुढे म्हणाले की, भाजपने संपूर्ण प्रचारकाळात सकारात्मक व विकासकेंद्रित मुद्द्यांवर भर दिला. प्रचाराची पातळी न घसरवता पुणेकरांच्या भविष्यासाठी ठोस अजेंड्यासह जनतेपर्यंत पोहोचण्याचा प्रयत्न करण्यात आला. २०१७ नंतर ट्रिपल इंजिन सरकारमुळे पुण्यात विकासाला मोठी गती मिळाली असून मेट्रोचे काम देशात सर्वाधिक वेगाने सुरू आहे, असेही त्यांनी नमूद केले. निवडणूक निकालानंतर कोणत्याही अन्य पक्षासोबत जाणार नाही, असे स्पष्ट करत पुणेकरांच्या अपेक्षांनुसार भाजप स्वतंत्रपणे जबाबदारी सांभाळेल, असा विश्वास त्यांनी व्यक्त केला.

Newsworldmarathi Pune: मंत्री चंद्रकांतदादा महापालिका निवडणुकीत प्रचाराचा झंझावात पाहायला मिळाला. १०० पेक्षा जास्त बैठका, घरोघरी भेटी ५० चौक सभांच्या माध्यमातून भारतीय जनता पक्षासाठी प्रचार केला. यामध्ये कोथरुड मधील चौक सभा ही लक्षवेधी ठरली. राज्यातील २९ महापालिकांचा प्रचाराच्या तोफा आज थंडावला आहेत. पुणे, पिंपरी-चिंचवड, सांगली, कोल्हापूर, इचलकरंजी महापालिकेची जबाबदारी ना. चंद्रकांतदादा पाटील यांच्याकडे होती. यावेळी पहिल्या दिवसापासून ना. पाटील यांचा प्रचारात सक्रिय सहभाग होता. वेळोवेळी पदाधिकाऱ्यांसोबत बैठका, १०० पेक्षा जास्त बैठका, ५० चौक सभा आणि १० पत्रकार परिषदा यामाध्यमातून भारतीय जनता पक्षासाठी प्रचार केला. या संपूर्ण काळातील कोथरुड मधील चौक सभा ही अतिशय लक्षवेधी आणि चर्चेत राहिली. कारण सभेसाठी कोणतीही व्यवस्था नसताना, गाडीच्या टपावर उभे राहुन त्यांनी नागरिकांना संबोधित केले होते.

Newsworldmarathi Pune: पुणे महानगरपालिका निवडणुकीच्या पार्श्वभूमीवर प्रभाग क्रमांक ०९ मध्ये आज पार पडलेली भव्य बाईक रॅली ही केवळ प्रचारापुरती मर्यादित नसून भाजपाच्या निश्चित विजयाची स्पष्ट नांदी असल्याचा ठाम दावा केंद्रीय राज्यमंत्री मा. श्री. मुरलीधर अण्णा मोहोळ यांनी केला. रॅलीला मिळालेला नागरिकांचा उत्स्फूर्त प्रतिसाद, तरुणांचा प्रचंड जोश आणि महिलांचा मोठ्या प्रमाणावरील सहभाग पाहता १६ तारखेला हा प्रभाग भाजपाच्याच पारड्यात ४–० ने जाणार असल्याचा विश्वास त्यांनी व्यक्त केला. रॅलीदरम्यान संपूर्ण प्रभागात उत्साहाचे आणि जल्लोषाचे वातावरण पाहायला मिळाले. ठिकठिकाणी फुलांच्या वर्षावात, घोषणांच्या गजरात आणि कमळाच्या जयघोषात भाजपाच्या चारही उमेदवारांचे नागरिकांनी जाहीर स्वागत केले. या दृश्यांमधून मतदारांनी आधीच आपला कौल दिल्याचे चित्र स्पष्टपणे जाणवत होते. “प्रभागातील चारही उमेदवारांना दिलेले प्रत्येक मत म्हणजे थेट पंतप्रधान मा. नरेंद्र मोदी आणि उपमुख्यमंत्री मा. देवेंद्र फडणवीस यांच्या नेतृत्वावर टाकलेला विश्वास आहे. हे उमेदवार केवळ निवडणूक जिंकण्यासाठी नव्हे, तर प्रभागाचा सर्वांगीण व दीर्घकालीन विकास घडवण्यासाठी मैदानात उतरले आहेत,” असे स्पष्ट शब्दांत मोहोळ यांनी सांगितले. भाजपच्या संघटनात्मक ताकदीवर भर देताना ते पुढे म्हणाले, “भारतीय जनता पार्टी ही व्यक्तिकेंद्री नव्हे, तर विचारकेंद्री राजकारण करणारी पार्टी आहे. भाजप विचाराने चालते, संस्कृतीने काम करते आणि निष्ठेने जनतेची सेवा करते. इथे कोणतीही व्यक्ती पक्षापेक्षा मोठी नाही. पक्षातील प्रत्येक उमेदवार स्वच्छ, प्रामाणिक आणि जनतेच्या विश्वासास पात्र आहे—हाच भाजपाचा खरा बळकटीचा आधार आहे.” या रॅलीत तरुण, महिला आणि ज्येष्ठ नागरिकांचा मोठ्या प्रमाणावर सहभाग दिसून आला. राजकीय निरीक्षकांच्या मते, प्रभागातील एकूण वातावरण पाहता भाजपाच्या बाजूने स्पष्ट लाट निर्माण झाली असून विरोधकांसाठी ही स्थिती चिंताजनक ठरत आहे. “विविध सर्वेक्षणांनुसार पुण्याचा पुढील महापौर भाजपाचाच असणार हे जवळपास निश्चित आहे. प्रभाग क्रमांक ०९ हा भारतीय जनता पार्टीचा बालेकिल्ला असून येथील मतदार नेहमीप्रमाणे कमळालाच मतदान करणार,” असा ठाम विश्वासही मोहोळ यांनी व्यक्त केला. एकूणच, आजच्या भव्य रॅलीतून प्रभाग क्रमांक ०९ मध्ये भाजपाच्या विजयाचे ठोस संकेत मिळाले असून, १६ तारखेला हा प्रभाग भाजपाच्या बाजूने ४–० ने झुकणार, असा स्पष्ट राजकीय संदेश संपूर्ण शहरात गेला आहे. त्यामुळे या प्रभागाकडे राजकीय वर्तुळाचे विशेष लक्ष वेधले गेले आहे.

Newsworldmarathi Pune: झेडपी निवडणुकांसाठी 15 दिवसांची सुप्रीम कोर्टाने मुदत वाढ दिल्यानंतर आज (दि.13) राज्य निवडणूक आयोगाने जिल्हा परिषद आणि पंचायत समित्यांच्या निवडणुकांच्या तारखांची घोषणा केली आहे. 50 टक्के आरक्षणाची मर्यादा न ओलांडलेल्या 12 जिल्हा परिषदा आणि 125 पंचायत समित्यांसाठी 5 फेब्रुवारीला मतदान होणार आहे तर, 7 फेब्रुवारी रोजी निकाल जाहीर केले जातील, राज्याचे मुख्य आयुक्त दिनेश वाघमारे यांनी पत्रकार परिषदेत ही माहिती दिली. तर, उर्वरित 20 जिल्हा परिषदा आणि पंचायत समितीच्या निवडणुका दुसऱ्या टप्प्यात होणार असल्याचे राज्य निवडणूक आयुक्त वाघमारे यांनी स्पष्ट केले. आयोगाच्या या घोषणेनंतर पुणे, सोलापूरसह राज्यातील 12 जिल्हा परिषदांमध्ये आचारसंहिता लागू झाली आहे. कोणत्या 12 जिल्हा परिषदेच्या निवडणुका होणार ? लातूर, छत्रपती संभाजीनगर, परभणी, धाराशिव, सोलापूर, कोल्हापूर, पुणे, सातारा, सांगली, रायगड, रत्नागिरी, सिंधुदुर्ग या 12 जिल्हा परिषदा आणि त्या अंतर्गत येणाऱ्या 125 पंचायत समित्यांच्या निवडणुका पार पडणार आहेत. या निवडणुकांसाठी मतदारांना दोनदा मतदान करावे लागणार असून, यासाठी 1 जुलै 2025 ची यादी वापरली जाणार असून, – नॉमिनेशन ऑफलाईन पद्धतीने दाखल करता येणार आहे. 3 नोव्हेंबरला अंतिम मतदार यादी जाहीर झाली आहे.

Newsworldmarathi Pune: लहुजी शक्ती सेनेचे विष्णूभाऊ कसबे यांनी शिवसेना पक्षाचे अधिकृत उमेदवार आबा बागुल यांच्यासह संपूर्ण पॅनेलला जाहीर पाठिंबा दर्शवून विक्रमी मतांनी निवडून देण्याचे आवाहन केले आहे. प्रभाग क्रमांक ३६ (ड) सहकारनगर – पद्मावतीचे शिवसेना पक्षाचे अधिकृत उमेदवार आबा बागुल यांच्या मध्यवर्ती निवडणूक कार्यालयाला भेट देत विष्णूभाऊ कसबे यांनी आबा बागुल यांच्याकडून प्रचाराचा आढावा घेतला. शिवसेना पक्षाचे मुख्य नेते व उपमुख्यमंत्री एकनाथ शिंदे याचे कार्य विकासाभिमुख असल्याने तसेच आबा बागुल यांचे आजवरचे कार्य हे लोकोपयोगी असल्याने लहुजी शक्ती सेना आबा बागुल यांच्यासह संपूर्ण पॅनेलला जाहीर पाठींबा देत असून संपूर्ण समाजाची ताकद आबा बागुल यांच्या पाठीशी असल्याचे विष्णूभाऊ कसबे यांनी सांगितले आणि विक्रमी मतांनी निवडून देण्याचे आवाहनही समाजबांधवांना केले.या पाठिंब्यामुळे शिवसेनेची ताकद निश्चित वाढल्याची प्रतिक्रिया आबा बागुल यांनी यावेळी दिली.

Newsworldmarathi Pune: पुणे महानगरपालिकेच्या प्रभाग क्रमांक ३८ मध्ये आज भारतीय जनता पार्टीच्या वतीने भव्य बाईक रॅलीचे आयोजन करण्यात आले. या रॅलीला केंद्रीय नागरी उड्डाण व सहकार राज्यमंत्री मुरलीधर मोहोळ यांनी विशेष उपस्थिती लावली. भाजपच्या उमेदवारांचा विजयाचा एल्गार यावेळी जोरदारपणे करण्यात आला. रॅलीदरम्यान परिसरात मोठ्या प्रमाणात कार्यकर्ते, पदाधिकारी, महिला व युवकांचा उत्स्फूर्त सहभाग दिसून आला. शेकडो दुचाकींसह निघालेल्या या रॅलीमुळे संपूर्ण प्रभागात उत्साहाचे वातावरण निर्माण झाले. “विकास, विश्वास आणि सक्षम नेतृत्वासाठी भाजप” असा संदेश देत मतदारांशी थेट संवाद साधण्यात आला. यावेळी उपस्थितांना संबोधित करताना केंद्रीय मंत्री मुरलीधर मोहोळ यांनी केंद्रातील मोदी सरकार तसेच राज्यातील महायुती सरकारने राबवलेल्या विकासकामांची माहिती दिली. पुणे शहराच्या सर्वांगीण विकासासाठी भाजप कटिबद्ध असून प्रभाग ३८ मधील विकासासाठी सक्षम प्रतिनिधी निवडून देण्याचे आवाहन त्यांनी केले. राणी भोसले या अनुभवी, कार्यक्षम आणि लोकाभिमुख उमेदवार असल्याने त्यांचा विजय निश्चित असल्याचा विश्वास त्यांनी व्यक्त केला. तसेच प्रभाग ३८ मधील भाजपच्या सर्व अधिकृत उमेदवारांना विजयी करण्याचे आवाहनही त्यांनी केले. यामध्ये राणी भोसले यांच्यासह अश्विनी चिंधे, संदीप बेलदरे, व्यंकोजी खोपडे आणि प्रतिभा चोरगे यांचा समावेश आहे. सर्व उमेदवार एकत्रितपणे प्रभागाच्या विकासासाठी काम करणार असल्याचे त्यांनी नमूद केले. या बाईक रॅलीमुळे भाजपच्या प्रचाराला नवी ऊर्जा मिळाली असून प्रभाग ३८ मध्ये भाजपच्या विजयाबाबत कार्यकर्त्यांमध्ये मोठा आत्मविश्वास निर्माण झाला आहे.