Newsworldmarathi pune :पुणे फेस्टिव्हलच्या सुरवातीपासून मी या महोत्सवाचा भाग आहे. उद्घाटनापासून ते एकल सादरीकरणापर्यंत, मी या महोत्सवात नृत्यसेवा केली आहे. त्यामुळे मी स्वतःला पुणे फेस्टिव्हल कुटुंबाचा एक घटक मानते. मला दिलेला पुरस्कार मी माहेरवाशिणीचा गौरव म्हणून विनम्रतेने स्वीकारते, असे उद्गार प्रसिद्ध नृत्यगुरू, नृत्यांगना डाॅ. स्वाती दैठणकर यांनी शनिवारी येथे काढले. पुणे फेस्टिव्हलतर्फे ‘नृत्य झंकार’ ही महिलांची नृत्य स्पर्धा शनिवारी बालगंधर्व रंगमंदिरात आयोजित करण्यात आली होती. याप्रसंगी ज्येष्ठ भरतनाट्यम नृत्यांगना व नृत्यगुरू स्वाती दैठणकर यांना पुणे फेस्टिव्हलचे अध्यक्ष कृष्णकुमार गोयल यांच्या हस्ते पुणे फेस्टिव्हल ‘नृत्यगुरू पुरस्कार देऊन गौरविण्यात आले. सन्मानचिन्ह, उपरणे आणि पुष्पगुच्छ, असे या पुरस्काराचे स्वरूप आहे. याप्रसंगी पुणे फेस्टिव्हलच्या चेअरपर्सन मीरा सुरेश कलमाडी, मुख्य संयोजक अॅड अभय छाजेड, विश्वस्त मोहन टिल्लू, माजी आमदार दिप्ती चवधरी, नगरसेवक सुनील शिंदे, स्पर्धा संयोजक संयोगिता कुदळे तसेच प्रमुख पाहुण्या म्हणून पोलिस निरीक्षक शीतल जाधव आदी मान्यवर उपस्थित होते. दैठणकर म्हणाल्या, माझे कलाशिक्षण मुंबईत झाले, पण लग्नानंतर मी पुण्यात आले आणि आमचे सारे कुटुंबच पुणे फेस्टिव्हलचा एक भाग झाले. कलाकार म्हणून पुण्याने मला स्वीकारले. आपली गुरु-शिष्य परंपरा ही भारताने जगाला दिलेली देणगी आहे. संस्कृतीचा, कलेचा प्रवाह या परंपरेमुळे अखंडित आणि प्रवाही राहतो. गुरुंनी जे दिले, ते स्वतः जपून, त्यात भर घालण्याचा प्रयत्न करत, ते पुढील पिढीकडे सुपूर्द करणे, ही कलाकाराची जबाबदारी असते. ती जबाबदारी मी स्वीकारली असून, यथाशक्ती एक व्रत म्हणून पुढील पिढीकडे सोपविण्याचा प्रयत्न करते आहे. हा पुरस्कार मी त्याच भावनेने स्वीकारते आहे. गोयल म्हणाले, आपली संस्कृती, परंपरेचा वारसा जपण्याचे कार्य पुणे फेस्टिव्हलच्या माध्यमातून केले जात आहे. तीच महोत्सवाची ओळख आहे आणि स्वाती दैठणकर हीच ओळख जपण्याचे, पुढे नेण्याचे कार्य करीत आहेत. याप्रसंगी नृत्यस्पर्धेचे परीक्षक पूजा वाघ, डाॅ. जतीन पांडे व आकृती शृंगारे यांचाही गौरव गोयल यांच्या हस्ते करण्यात आला. रत्ना दहीवेलकर यांनी सूत्रसंचालन केले. त्यानंतर नृत्यस्पर्धेतील सादरीकरणे झाली. पुणे फेस्टिव्हल नृत्य झंकार स्पर्धेत एकल आणि समूह नृत्य अशा दोन प्रकारांचा समावेश होता. एकल नृत्य स्पर्धा २० ते ३५ आणि ३६ ते ५० वर्षे अशा दोन वयोगटांत, समूह नृत्य स्पर्धेसाठी २० ते ५५ वर्षे हा वयोगट होता. प्रत्येक समूहात ५ ते ८ महिला स्पर्धक सहभागी झाल्या होत्या. या स्पर्धेत बॉलीवूड, लावणी, कथ्थक, फ्युजन आदी विविध नृत्यप्रकारांचे सादरीकरण झाले. नृत्य स्पर्धेचा निकाल एकल वयोगट 20 ते 35 स्नेहल साधू- प्रथम तनुजा गोडे – द्वितीय एकल वयोगट 36 ते 50 श्वेता जाधव -प्रथम पल्लवी लोंढे – द्वितीय स्नेहल राक्षे – तृतीय समूह नृत्य भावना’ज डान्स ग्रुप – प्रथम माय डान्स अकॅडमी- द्वितीय

Newsworldmarathi Pune: घराघरातले दैनंदिन समरप्रसंग, नवरा-बायकोची भांडणे, कोवळ्या वयातली प्रेमभंग प्रकरणे इथपासून ते थेट राजकीय कोपरखळ्या मारणारे लाडकी बहीण, महाविकास आघाड्या, इटलीचे संदर्भ…असे विषयांचे वैविध्य जपणारी हास्यमैफल पुणे नवरात्रौ महोत्सवात शनिवारी सायंकाळी रंगली. हास्यकवींच्या विनोदी ढंगाच्या सादरीकरणाला रसिकांनीही मनमोकळी दाद दिली. पुणे नवरात्रौ महोत्सवाची सहावी माळ नेहरू स्टेडियम येथील गणेश कला क्रीडा मंदिरात हास्यमैफिलीच्या रूपाने गुंफली गेली. यावेळी माजी मंत्री हर्षवर्धन पाटील तसेच एकपात्री कलाकार मकरंद टिल्लू आणि पुणे नवरात्रौ महोत्सवाचे संस्थापक अध्यक्ष आबा बागुल उपस्थित होते. हर्षवर्धन पाटील आणि मकरंद टिल्लू यांच्या हस्ते हास्यकवींचा सत्कार करण्यात आला. हर्षवर्धन पाटील म्हणाले, मी या महोत्सवाचाच एक घटक आहे. गेल्या ३२ वर्षांत मी २५ वेळा तरी या महोत्सवाला उपस्थिती लावली आहे कारण मी महोत्सवाचाच एक घटक आहे, असे मानतो. महोत्सवाचे आयोजक आबा बागुल यांच्याविषयी ते म्हणाले, समाजात आरंभशूर अनेक असतात. पण आबांनी वेगळेपण आणि सातत्य जपले आहे, हे महत्त्वाचे आहे. आपल्याला लोकशाही मिळाली आहे, अभिव्यक्तीचे स्वातंत्र्य आहे. पैसा आहे, प्रतिष्ठा, पदे आहेत, पण तरीही आपले हास्य हरवले आहे, असे चित्र दिसते आहे. या पार्श्वभूमीवर ही हास्यमैफल उत्तरोत्तर रंगत जावो आणि हसू फुलवत राहो… हास्यकवी अनिल दीक्षित, डाॅ. दिलीप कुलकर्णी, स्वाती सुरंगळीकर, संदीप अवचट, भालचंद्र कोळपकर आणि बंडा जोशी यांनी आपल्या विनोदी ढंगाच्या कवितांनी या हास्यमैफिलीचे रंग खुलवले. दीक्षित यांच्या ‘गुलाबी साडी’ने रसिकांना मनमुराद हसवले आणि नोटाबंदीच्या संदर्भांनी वेगळीच दशकपूर्ती अनुभवली. डाॅ. कुलकर्णी यांच्या कवितांनी मूळ प्रसिद्ध गीतांचे संदर्भ जागवले. पहाटे पहाटे मला जाग आली, या सुरेश भट यांच्या कवितेचे विडंबन त्यांनी पहाटे पहाटे मला झोप आली, हिची घोरण्याची क्रिया मंद झाली, अशा शब्दांत ऐकवून हास्यलकेरी उठवल्या. तसेच ग. दि. माडगूळकरांची पोटापुरता पसा पाहिजे नको पिकाया पोळी, या गीताचे विडंबन त्यांनी पोत्याइतुका खिसा पाहिजे, अशा शब्दांत सादर केले. देणाऱ्यांना रोग हजारो, इवली माझी गोळी, असे वास्तवही त्यांनी ऐकवले. स्वाती सुरंगळीकर यांनी ‘घरचा आहेर’ या कवितेतून वरमाईचा लोभीपणा आणि तिला घरच्यांची घडवलेली अद्दल, असा विषय मांडला. नवर्‍याची चलाखी सांगणारी ‘तूच माझी राणी’ ही त्यांची कविताही उल्लेखनीय होती. संदीप अवचट यांनी राजकीय संदर्भांवर व्यंगात्मक भाष्य करणारे सादरीकरण केले. भाकर आणि पिझ्झा तसेच लाडकी बहीण, असे विषय त्यांनी विनोदाच्या अवगुंठणातून मांडले. महाविकासात कुठून आणायची निष्ठा, असा प्रश्न विचारणारी त्यांची कविता होती. त्यांनी ऐकवलेली ‘मीच म्हणून टिकले बाई तुमच्या या संसारी’, ही कविताही घराघरातले चित्र मांडणारी होती. भालचंद्र कोळपकर यांनी सिनेनटीशी लग्न करण्याचा व्यर्थ प्रयत्न करणाऱ्या हीरोच्या माध्यमातून हलकाफुलका विनोद मांडला. तसेच प्रपंचात भांडण ही किती आवश्यक गोष्ट आहे, हेही कथन केले. हास्यकवी बंडा जोशी यांनी (मोबाईल)चं याड लागलं, ही कविता आपले सारे जगणे व्यापून टाकलेल्या यंत्राचे वास्तव मांडत उलगडत नेली. ग. दि. माडगूळकरांचे ‘एक धागा सुखाचा’, या गाण्यावरील एक कपडा पतीचा, शंभर अर्धांगिनीचे, गतजन्मीचे देणे असते दुकानदारांचे…अशा शब्दांत नवरे लोकांची व्यथा मांडली. त्यांनी रिमझिम पाऊस पडे सारखा, या गीतावरील रिप रिप पाऊस पडे बारका तरि खड्ड्यांची रांग पुढे खड्डेच खड्डे चहूकडे गं बाई गेला रस्ता कुणीकडे, हे विदारक वास्तव सांगणारी कविता सादर करून टाळ्या मिळवल्या.

पुणे विभाग पदवीधर मतदारसंघातील अपक्ष उमेदवाराचा संकल्प; सामान्य कुटुंबातील विद्यार्थी, शिक्षक आणि सुशिक्षित तरुणांच्या प्रश्नांना प्राधान्य देणार Newsworldmarathi Pune : पुणे विभाग पदवीधर मतदारसंघाच्या निवडणुकीतील अपक्ष उमेदवार उंबरकर रुपेश शिवाजी (उमेदवार क्रमांक २२) यांनी विद्यार्थ्यांचे प्रश्न, सुशिक्षित तरुणांचा रोजगार, शिक्षकांच्या प्रलंबित समस्या आणि पदवीधरांच्या हक्कांसाठी विधान परिषदेत ठामपणे आवाज उठवण्याचा संकल्प व्यक्त केला आहे. सामान्य कुटुंबातून आलेल्या उमेदवाराने विद्यार्थ्यांपासून शिक्षकांपर्यंत आणि रोजगाराच्या प्रतीक्षेत असलेल्या तरुणांपासून पदवीधरांपर्यंत विविध घटकांच्या प्रश्नांना प्राधान्य देण्याची भूमिका मांडली आहे. आज राज्यातील सुशिक्षित तरुणांसमोर रोजगाराच्या मर्यादित संधी, पारदर्शक भरती प्रक्रिया आणि परीक्षांमधील गैरप्रकार रोखण्याचे आव्हान आहे. दुसरीकडे, शिक्षकांच्या प्रलंबित समस्या आणि पदवीधरांच्या प्रश्नांनाही विधिमंडळात योग्य प्रतिनिधित्व मिळणे आवश्यक आहे. या सर्व प्रश्नांवर प्रभावीपणे आवाज उठवण्याची गरज असल्याचे उंबरकर यांनी नमूद केले. “माझ्याकडे मोठ्या राजकीय नेत्यांची ताकद नसेल; मात्र सामान्य माणसाच्या संघर्षाची जाणीव, प्रामाणिकपणे काम करण्याची तयारी आणि अन्यायाविरुद्ध आवाज उठवण्याचे धाडस आहे. विद्यार्थ्यांचे, शिक्षकांचे आणि पदवीधरांचे प्रश्न विधान परिषदेत ठामपणे मांडणे, हे माझे प्रमुख ध्येय आहे,” असे उंबरकर यांनी सांगितले. ही निवडणूक केवळ एका उमेदवाराची नसून, पदवीधरांच्या प्रश्नांना प्रभावी प्रतिनिधित्व मिळवून देण्याची संधी असल्याचे त्यांनी म्हटले. मतदारांनी उमेदवारांची भूमिका, कामाचा दृष्टिकोन आणि प्रश्न सोडवण्याची बांधिलकी लक्षात घेऊन मतदान करावे, असे आवाहनही त्यांनी केले. २३ ऑक्टोबरला मतदानाचे आवाहन पुणे विभाग पदवीधर मतदारसंघासाठी २३ ऑक्टोबर २०२६ रोजी होणाऱ्या मतदानात उमेदवार उंबरकर रुपेश शिवाजी यांच्या नावासमोरील उमेदवार क्रमांक २२ ओळखून प्रथम पसंतीचा क्रमांक ‘१’ नोंदवून पाठिंबा द्यावा, असे आवाहन त्यांनी केले आहे. “आपला उमेदवार, आपला आवाज, आपला विश्वास!” या घोषवाक्यासह उंबरकर यांनी विद्यार्थ्यांचे, शिक्षकांचे आणि पदवीधरांचे प्रश्न व्यापक स्तरावर मांडण्याचा निर्धार व्यक्त केला आहे.

Newsworldmarathi Pune: राज्याची तिजोरी ही सर्वप्रथम बळीराजासाठी आहे. शेतकरी हा आपला अन्नदाता असून त्याला संकटातून बाहेर काढण्यासाठी मदत करताना सरकार कुठेही हात आखडता घेणार नाही. शेतकऱ्यांची यंदाची दिवाळी काळी होऊ देणार नाही, अशी ग्वाही उपमुख्यमंत्री एकनाथ शिंदे यांनी गुरुवारी दिली. राज्यातील दुष्काळी परिस्थितीच्या पार्श्वभूमीवर शेतकऱ्यांच्या पाठीशी सरकार खंबीरपणे उभे राहील, असेही त्यांनी स्पष्ट केले. ३२ व्या पुणे नवरात्रौ महोत्सवात आयोजित महर्षी पुरस्कार वितरण सोहळ्यात ते बोलत होते. श्री गणेश कला क्रीडा रंगमंच येथे शिंदे यांच्या हस्ते ज्येष्ठ पुरातत्त्ववेत्ते व मंदिर स्थापत्यतज्ज्ञ डॉ. गो. ब. देगलूरकर, ज्येष्ठ पार्श्वगायिका उषा मंगेशकर आणि ज्येष्ठ गायक-संगीतकार श्रीधर फडके यांना मानाचे ‘महर्षी’ पुरस्कार प्रदान करण्यात आले. शिंदे म्हणाले, “महाराष्ट्र आज दुष्काळाच्या संकटाचा सामना करत आहे. बळीराजा अडचणीत असून त्याच्या पाठीशी उभे राहणे ही आपल्या सर्वांची जबाबदारी आहे. मुख्यमंत्री आणि आम्ही सर्वांनी शेतकऱ्यांच्या बांधावर जाऊन परिस्थितीची पाहणी केली. त्यांच्या मागणीनुसार तातडीने दुष्काळ जाहीर केला. मागील वर्षी अतिवृष्टी झाली होती; मात्र शेतकऱ्यांची दिवाळी काळी होऊ दिली नाही. यंदाही तसे होऊ देणार नाही. शेतकऱ्यांना या संकटातून बाहेर काढण्यासाठी प्रत्येकाने आपल्या परीने मदतीचा हात पुढे करावा.” परभणी येथे शेतकऱ्यांची भेट घेतल्यानंतर मदतीचे वाटप केल्याचे सांगून ते म्हणाले, शेतकऱ्यांना मदत करण्यासाठी सामूहिक विवाह सोहळ्यांनाही सहकार्य केले जाईल. शेतकऱ्यांच्या पाठीशी लाखो हात उभे राहतील, असा विश्वासही त्यांनी व्यक्त केला. समाजातील रत्नांचा सन्मान म्हणजे खरी नवरात्र नवरात्रोत्सवाच्या आयोजनाचे कौतुक करताना शिंदे म्हणाले, “समाजातील विविध क्षेत्रांत उल्लेखनीय काम करणाऱ्या रत्नांचा सन्मान करून आबा बागुल यांनी खरी नवरात्र साजरी केली आहे. सलग ३२ वर्षे हा महोत्सव सुरू ठेवणे मोठे काम आहे. नऊ दिवसांत येथे सुमारे दहा लाख भाविक दर्शनासाठी येतात. त्यामुळे पुण्यात मंगलमय वातावरण निर्माण होते आणि संस्कृतीचे जतन होते.” आपण दिलेला शब्द पाळतो, त्यामुळे लोकांचा विश्वास संपादन केला आहे. अनेक अडथळे आले, तरी शब्द दिल्यामुळेच आपण या कार्यक्रमाला उपस्थित राहिलो, असेही त्यांनी सांगितले. उषा मंगेशकर यांच्या कार्याचा गौरव करताना शिंदे म्हणाले, लता मंगेशकर आणि आशा भोसले यांच्यासोबतच उषा मंगेशकर यांनीही संगीत क्षेत्रात स्वतःची स्वतंत्र ओळख निर्माण केली. त्यांच्या स्वरांनी घराघरांत भक्तिभाव जागवला. श्रीधर फडके यांनी वडील सुधीर फडके यांचा ‘गीत रामायण’चा वारसा समर्थपणे पुढे नेला आहे. डॉ. गो. ब. देगलूरकर यांनी मंदिर स्थापत्य आणि मूर्तिशास्त्राच्या अभ्यासातून भारतीय सांस्कृतिक वारसा समृद्ध केला आहे. भारतीय संस्कृती केवळ जुन्या ग्रंथांमध्ये किंवा मंदिरांमध्ये नसून ती आपल्या कला, विचार आणि जीवनमूल्यांमध्ये आहे. नवीन तंत्रज्ञान शिकवतानाच मुलांना आपल्या संस्कृतीची ओळख करून देणे आवश्यक आहे. हा वारसा पुढील पिढीपर्यंत पोहोचविणे ही सामूहिक जबाबदारी आहे, असे शिंदे म्हणाले. मराठी भाषेला अभिजात भाषेचा दर्जा मिळवून दिल्याबद्दल पंतप्रधान नरेंद्र मोदी यांचे आभार मानत मराठी भाषेचा प्रसार करण्यासाठी सरकारच्या मराठी भाषा विभागामार्फत प्रयत्न सुरू असल्याचेही त्यांनी नमूद केले. राजकारणात पदे येतात आणि जातात; मात्र पद नसतानाही समाजकारण करणे महत्त्वाचे आहे. बाळासाहेब ठाकरे यांनी सांगितलेला ‘८० टक्के समाजकारण आणि २० टक्के राजकारण’ हा मंत्र आपण आचरणात आणत असल्याचे त्यांनी सांगितले. पुरस्कार विजेत्यांच्या भावना पुरस्कार स्वीकारताना उषा मंगेशकर यांनी महोत्सवातील सन्मानाबद्दल आनंद व्यक्त केला. लता मंगेशकर यांनी याच ठिकाणी देवीच्या मंदिरात पसायदान गायल्याच्या आठवणीला त्यांनी उजाळा दिला. आबा बागुल यांच्याशी आपल्या कुटुंबाचे जवळचे नाते असल्याचे सांगत त्यांनी महोत्सवाचे काम पुढे सुरू ठेवण्याची अपेक्षा व्यक्त केली. यावेळी त्यांनी ‘या देवी सर्वभूतेषु मातृरूपेण संस्थिता’ या देवीस्तुतीच्या ओळी सादर केल्या. डॉ. गो. ब. देगलूरकर यांनी मूर्तिशास्त्राच्या अभ्यासाविषयी बोलताना पंढरपूरच्या विठ्ठलमूर्तीचा अभ्यास आणि आळंदी येथील समाधीविषयक कामाचा उल्लेख केला. अयोध्येतील राममूर्तीच्या निवडीवेळी बालरूप, हास्यमुद्रा आणि आशीर्वाद देणारा भाव यांचा विचार करण्यात आल्याचे त्यांनी सांगितले. या पुरस्कारामुळे समाधान मिळाल्याची भावना त्यांनी व्यक्त केली. श्रीधर फडके यांनी आपल्या गाण्यांच्या प्रवासातील आठवणी सांगितल्या. महोत्सवाच्या सुरुवातीच्या काळात मुसळधार पाऊस असतानाही लाकडी फळ्या टाकून कार्यक्रम सुरू ठेवला होता. त्या वेळी ‘फिटे अंधाराचे जाळे’ यासह अन्य गाणी सादर केल्याची आठवण त्यांनी सांगितली. मान्यवरांची उपस्थिती कार्यक्रमाला उद्योग व मराठी भाषा मंत्री उदय सामंत, केंद्रीय आयुष व आरोग्य राज्यमंत्री प्रतापराव जाधव, खासदार श्रीरंग बारणे, माजी उपसभापती व आमदार डॉ. नीलम गोऱ्हे, महानगरप्रमुख नाना भानगिरे, माजी आमदार रवींद्र धंगेकर, रमेश कोंडे, सरहद संस्थेचे संस्थापक संजय नहार, महोत्सवाचे आयोजक आबा बागुल, जयश्री बागुल आणि युवासेना शहराध्यक्ष हेमंत बागुल उपस्थित होते. यावेळी गायक जितेंद्र भुरुक, बाली येथील मंदिराचा देखावा सादर करणारे मिथिलेश कुमार आणि पुण्यातील सहा ढोल-ताशा पथकप्रमुखांचा सत्कार करण्यात आला. कार्यक्रमाचे प्रास्ताविक आबा बागुल यांनी केले, तर सूत्रसंचालन सुकन्या जोशी यांनी केले. त्यांनी पुरस्कार विजेत्यांशी संवादही साधला. दुष्काळग्रस्तांसाठी आर्थिक मदत जाहीर राज्यातील दुष्काळी परिस्थितीची जाणीव ठेवून पुणे नवरात्रौ महोत्सवात दुष्काळग्रस्तांच्या मदतीसाठी आर्थिक सहकार्य जाहीर करण्यात आले. हेमंत बागुल यांनी पाच लाख रुपये, डॉ. नीलम गोऱ्हे यांनी दीड लाख रुपये, तर सुदर्शना त्रिगुणाईत आणि सुमनदेवी तातेरा यांनी पाच लाख रुपये मदत जाहीर केली.

Newsworldmarathi Pune: आज पुणे महानगरपालिकेच्या सभागृहात शेतकऱ्यांच्या प्रश्नावर झालेली चर्चा ही शेतकरी संकटात असताना केवळ भाषणबाजी आणि आरोप-प्रत्यारोपांमध्ये अडकलेली दिसून आली. एकीकडे शेतकरी संकटाचा सामना करत असताना, त्यांच्या मदतीसाठी तातडीने ठोस निर्णय घेण्याऐवजी तासन्तास चर्चा करण्यात कितपत औचित्य आहे, असा सवाल शिवसेनेच्या वतीने उपस्थित करण्यात येत आहे. शेतकऱ्यांना खऱ्या अर्थाने मदत करण्याची इच्छा असेल, तर केवळ चर्चेपुरते मर्यादित न राहता महापौरांच्या अध्यक्षतेखाली तातडीची बैठक घेऊन मदतीबाबत ठोस निर्णय करता आला असता. संकटात सापडलेल्या शेतकऱ्यांना आज आश्वासनांपेक्षा प्रत्यक्ष मदतीची अधिक गरज आहे. त्यामुळे राजकीय आरोप-प्रत्यारोप बाजूला ठेवून सर्वांनी मदतीसाठी पुढाकार घेणे आवश्यक आहे. शिवसेना पक्ष केवळ चर्चा करत नाही, तर प्रत्यक्ष मदतीसाठी पुढाकार घेत आहे. राज्याचे उद्योगमंत्री मा. ना. श्री. उदयजी सामंत साहेब यांनी शेतकऱ्यांच्या मदतीसाठी १० लाख रुपयांची मदत जाहीर केली. त्यांच्या आवाहनाला प्रतिसाद देत पुणे नवरात्र महोत्सवाच्या माध्यमातून हेमंत बागुल यांनी ५ लाख रुपयांची मदत जाहीर केली. तसेच विधान परिषदेच्या उपसभापती मा. नीलमताई गोऱ्हे यांनी १.५ लाख रुपयांची मदत जाहीर केली असून, शिवसेनेच्या इतर पदाधिकाऱ्यांनीही मिळून आणखी ५ लाख रुपयांची मदत जाहीर केली आहे. या माध्यमातून शेतकऱ्यांना प्रत्यक्ष मदत पोहोचवण्याचा प्रयत्न शिवसेनेच्या वतीने करण्यात येत आहे. संकटाच्या काळात शेतकऱ्यांच्या पाठीशी उभे राहणे, त्यांना आधार देणे आणि त्यांच्या अडचणी दूर करण्यासाठी कृती करणे, हीच खरी सामाजिक आणि राजकीय बांधिलकी आहे.

शेतकऱ्यांच्या दुःखावर राजकारण करण्यापेक्षा त्यांच्या अश्रूंना आधार देणे महत्त्वाचे आहे. चर्चा जरूर व्हावी; मात्र त्या चर्चेतून तातडीने निर्णय आणि प्रत्यक्ष मदतही मिळाली पाहिजे. शेतकऱ्यांना दिलासा देण्यासाठी सर्वांनी एकत्र येऊन काम करावे, हीच आमची ठाम भूमिका आहे.

— हेमंत आबा बागुल पुणे महानगराध्यक्ष, युवा सेना

NewsworldmarathiPune: ‘या देवी सर्वभूतेषु, शक्तिरूपेण संस्थिता… नमस्तस्यै नमस्तस्यै नमो नमः…’ या मंगल स्वरांनी महालक्ष्मी मंदिराचा परिसर दुमदुमून गेला. श्री महालक्ष्मी मंदिर, सारसबागच्या वतीने सार्वजनिक नवरात्रोत्सवानिमित्त मंदिरात बाल शिशु मंदिर आणि समर्थ विद्या मंदिर प्राथमिक शाळेतील १०८ मुलींच्या ‘कन्यापूजन’ कार्यक्रमाचे आयोजन करण्यात आले होते. कन्या पूजन हा नवरात्री पूजेचा एक अविभाज्य भाग आहे. ज्यामध्ये लहान मुलींना देवी दुर्गाच्या नऊही रूपांचे प्रतीक मानून त्यांची देवी म्हणून पूजा केली जाते. यावेळी अभिनेत्री पूजा पवार, अपूर्वा सपकाळ, मंदिर ट्रस्टच्या प्रमुख विश्वस्त अमिता अग्रवाल, विश्वस्त व उत्सव प्रमुख डॉ.तृप्ती अग्रवाल, विश्वस्त प्रवीण चोरबेले आदी उपस्थित होते. कन्यापूजन करताना मुलींचे पाद्यपूजन आणि औक्षण करण्यात आले. सुगंधित अत्तरपाणी मुलींवर शिंपडून त्यांचे पाद्यपूजन देखील करण्यात आले, तसेच ट्रस्टतर्फे सर्व मुलींना खाऊ आणि भेटवस्तू देण्यात आल्या. देवीनामाचा जयघोष करीत देवीस्वरूप असलेल्या लहान मुलींनी आपले पूजन होत असल्याचे दृश्य पाहिले आणि त्यावेळी प्रत्येक चिमुकलीच्या चेहऱ्यावरील आनंद काहीसा वेगळा होता. प्रमुख विश्वस्त अमिता अग्रवाल म्हणाल्या, श्री महाकाली, श्री महालक्ष्मी आणि श्री महासरस्वती या आदिशक्तीच्या त्रिदेवी स्वरूपाचे पवित्र अधिष्ठान श्री महालक्ष्मी मंदिरात आहे. शक्ती, बुद्धी आणि धनधान्य देणाऱ्या मातांची रूपे वेगवेगळी आहेत आणि लहान मुलींमध्येच ही रूपे दिसतात. कन्या हे देवीचे स्वरूप असते. मात्र, मुलींनी केवळ पूजेपुरते मर्यादित न राहता प्रत्येक क्षेत्रात धैर्याने काम करायला हवे. त्यांनी खूप शिकून मोठे व्हायला हवे, तरच खऱ्या अर्थाने देवी प्रसन्न होईल.

Newsworldmarathi pune : आई तुझ्या ग चरणी… आई गोंधळाला ये… च्या तालावर पुणेकरांनी माता माता की जय… चा गजर केला. श्री महालक्ष्मी मंदिरासमोर भंडाऱ्याची उधळण आणि पुष्पवृष्टीत अष्टलक्ष्मी भव्य रथयात्रा मिरवणूक काढण्यात आली. यामध्ये शेकडो देवीभक्तांनी मोठ्या उत्साहाने सहभाग घेतला. श्री महालक्ष्मी मंदिर, सारसबागच्या वतीने आयोजित सार्वजनिक नवरात्रोत्सवात हा भव्य दिव्य सोहळा पार पडला. यावेळी मंदिर ट्रस्टचे प्रमुख संस्थापक विश्वस्त राजकुमार अग्रवाल, मंदिराच्या प्रमुख विश्वस्त अमिता अग्रवाल, विश्वस्त व उत्सव प्रमुख डॉ. तृप्ती अग्रवाल, भरत अग्रवाल, ॲड. प्रताप परदेशी, प्रवीण चोरबेले, हेमंत अर्नाळकर यांसह विश्वस्त, पदाधिकारी व कार्यकर्त्यांनी यामध्ये उत्साहाने सहभाग घेतला. अशाप्रकारे नवरात्रात पहिल्यांदाच मंगळवारच्या औचित्यपूर्ण महत्त्व लक्षात घेऊन अशी वैविध्यपूर्ण शोभायात्रा काढण्यात आली आणि त्याला उत्स्फूर्त प्रतिसाद मिळाला. उत्सव प्रमुख डॉ. तृप्ती अग्रवाल म्हणाल्या, श्री महाकाली, श्री महालक्ष्मी आणि श्री महासरस्वती या आदिशक्तीच्या त्रिदेवी स्वरूपाचे पवित्र अधिष्ठान असलेल्या श्री महालक्ष्मी मंदिरात अष्टलक्ष्मी भव्य रथयात्रा सोहळा यापूर्वी झालेला नव्हता. त्यामुळे यंदा मंदिरातर्फे हा सोहळा आयोजित करण्यात आला. मंदिरासमोर पुष्पवृष्टी करून या रथयात्रा सोहळ्याचे उत्साहात स्वागत करण्यात आले. विश्वकर्मा विद्यापीठातील पदाधिकारी, मंदिराचे कार्यकर्ते व राजेश अंबिके, शेखर निवंगुणे यांच्या सहकार्याने हा सोहळा पार पडला. मंदिरा बाहेर दररोज सायंकाळी ७.३० वाजता गंगा आरती आयोजन करण्यात येत असून याला देखील नागरिकांचा प्रतिसाद मिळत आहे.

Newsworldmarathi Pune : भारताला विकसित राष्ट्राच्या दिशेने वाटचाल करताना गगनभरारी घेण्यात मोठी भूमिका बजावणाऱ्या महिला शास्त्रज्ञांचा सन्मान सारसबाग येथील श्री महालक्ष्मी मंदिरातर्फे करण्यात आला. भारतीय विज्ञान शिक्षण आणि संशोधन परिषदेचे (आयसर) संचालक डॉ. सुनिल भागवत यांच्या हस्ते सन्मान सोहळा पार पडला. यावेळी विश्वकर्मा विद्यापीठ, पुणे उपाध्यक्ष प्रा. डॉ. वासुदेव गाडे यांची प्रमुख उपस्थिती होती. मंदिर ट्रस्टच्या प्रमुख विश्वस्त अमिता अग्रवाल, विश्वस्त व उत्सव प्रमुख डॉ.तृप्ती अग्रवाल, विश्वस्त भरत अग्रवाल, अ‍ॅड. प्रताप परदेशी, प्रवीण चोरबेले आदी मान्यवर देखील उपस्थित होते. कार्यक्रमात प्रा. डॉ. सुवर्णा दातार, डॉ. तेजश्री भावे, डॉ. पुराबी गाराई, डॉ. शिल्पा जैन, डॉ. मंजु मदान या महिला शास्त्रज्ञांचा गौरव करण्यात आला. डॉ. सुनिल भागवत म्हणाले, विज्ञान आणि शिक्षण क्षेत्रात जबाबदारी व त्याचा परिणाम हे खूप महत्वाचे असते. विज्ञान समाजाला उत्तरदायी असले पाहिले, असे ज्येष्ठ शास्त्रज्ञ सी व्ही रमण यांनी सांगितले होते. पुढील पिढी ही स्पेस टेक्नालॉजीची आहे. या पिढीचे प्रश्न सोडविण्यावर आपण काम करावे. सरंक्षण आणि शिक्षण क्षेत्रात आजवर अनेक महिलांनी गौरवपूर्ण कामगिरी केली आहे. त्यांची परंपरा आपण पुढे चालू ठेवली आहे, याचा खूप आनंद होतो. भरत अग्रवाल म्हणाले, मंदिरातर्फे नवरात्रोत्सवात नारी शक्तीचा सन्मान करण्यात येतो. आपल्यासारख्या संशोधक महिलांनी आपल्या कर्तृत्वाने मानवी जीवन अधिक समृद्ध करण्याचा प्रयत्न केला. आपल्या कार्याचा सन्मान करण्याचे भाग्य आम्हाला लाभले, असेही त्यांनी सांगितले. यावेळी युवराज लाहोटी यांनी प्रास्ताविक केले़, विशाल सोनी यांनी महिला शास्त्रज्ञांचा परिचय करुन दिला. महाआरतीने कार्यक्रमाची सांगता झाली.

Newsworldmarathi pune : विविध भावभावना व्यक्त करणारी, प्रत्येक पिढीच्या भावना जागवणारी अशी मराठी आणि हिंदी चित्रपटगीतांची मैफल मंगळवारी रंगली. शास्त्रीय, उपशास्त्रीय संगीतासह पाश्चात्त्य संगीताचा फ्लेवरही या मैफिलीने रसिकांना दिला. ३२ व्या पुणे नवरात्र महोत्सवाच्या तिसर्या माळेची सायंकाळ हिंदी आणि मराठी चित्रपटसृष्टीतील गाजलेल्या गीतांमुळे लक्षणीय ठरली. नेहरू स्टेडियम येथील गणेश कला क्रीडा रंगमंदिरात झालेल्या या कार्यक्रमात कृष्णधवल काळापासून ते रंगीत चित्रपटांच्या काळापर्यंतचा सांगीतिक प्रवासही रसिकांना अनुभवता आला. कला, संस्कृती आणि संगीताचा संगम साधणार्या पुणे नवरात्रौ महोत्सवात आयोजक अध्यक्ष आबा बागुल यांच्या पुढाकाराने बॅलिवुड आल टाईम हिट्स हा कार्यक्रम टीएमडी यांनी प्रस्तुत केला. नवरात्र उत्सवाचे औचित्य साधून देवीस्तुतीपर रचनेने कार्यक्रमाची सुरुवात झाली. आई भवानी, लल्लाटी या गीतांनी भक्तीरसपूर्ण वातावरण निर्माण केले. त्यानंतर अधीर मन झाले, मै हूॅ झुम झुम झुमरू, ये दिल ना होता बेचारा, आज की रात मजा हुस्न का, इक हसीना थी, मला वेड लागले प्रेमाचे, देखा एक ख्वाब तो ये, परदेसियों ये सच है पिया, पर्दा है पर्दा, किशोरकुमार यांच्या गीतांचा मेडले, मुझे नौलाखा मंगादे, साजणी, डिपाडी डिपांग, यारा हो यारा ईष्कने मारा, लागा चुनरी मे दाग, ऐसी दिवानगी, यारी है ईमान मेरा, परदेसी परदेसी, जय जय शिवशंकर, गुलाबी आंखे, दम मारो दम, उदे गं अंबे उदे…अशी विविधरंगी मराठी – हिंदी गीते रसिकांना स्मरणरम्य काळात घेऊन गेली. अजय अतुल यांनी संगीतबद्ध केलेल्या गीतांना भरभरून दाद मिळाली. तेजस्विनी आहुजा, माधुरी भोसेकर, चंद्रशेखर महामुनी, आकाश सोळंकी, पियुष भोंडे या गायक कलाकारांनी समरसून सादर केलेल्या या गीतांना, अमन सय्यद, आसिफ खान, आसिफ इनामदार, हर्षद गनबोटे, सॅम्सन चंदनशिव या कलाकारांनी वाद्यांची साथसंगत केली. वाद्यवृंद संचलन मुकेश देढिया यांनी केले. आकाश सोळंकी यांनी गायनासह निवेदनही केले. याप्रसंगी पुणे नवरात्रौ महोत्सवाचे संस्थापक अध्यक्ष आबा बागुल, जयश्री बागुल, अमित बागुल यांच्यासह डाॅ. सतीश देसाई, किशोर सरपोतदार, नंदकुमार बानगुडे, नंदकुमार कोंढाळकर, घनश्याम सावंत, विलास रत्नपारखी, रमेश भंडारी आदी उपस्थित होते. जयश्री बागुल आणि पूना गेस्ट हाऊसचे किशोर सरपोतदार यांच्या हस्ते कलाकारांचे सत्कार करण्यात आले.

Newsworldmarathi Pune : अर्थपूर्ण शब्द आणि प्रसंगानुसार बांधलेली चाल, सुरेल आवाज, लोकप्रिय नट, रमणीय चित्रीकरण स्थळे…असा माहौल रसिकांच्या मनात जागविणारी जादू ‘मॅजिक ऑफ बर्मन्स’ या कार्यक्रमातून सोमवारी रसिकांनी अनुभवली. ३२ व्या पुणे नवरात्रौ महोत्सवाच्या दुसऱ्या माळेची सायंकाळ श्री. गणेश कला क्रीडा रंगमंच येथे हिंदी चित्रपटसृष्टीतील सचिन देव बर्मन आणि राहुल देव बर्मन, या पितापुत्रांच्या जोडीने गाजवलेल्या गीतांमुळे स्मरणीय ठरली. कृष्णधवल काळापासून ते रंगीत चित्रपटांच्या काळापर्यंतचा सांगीतिक प्रवासही यातून पुढे आला. प्रारंभी ज्येष्ठ अभिनेत्री मधू कांबीकर यांच्या तैलचित्रास महोत्सवाचे आयोजक अध्यक्ष आबा बागुल यांनी पुष्पहार अर्पण करून श्रद्धांजली वाहिली. मधू कांबीकर यांच्या ‘शापित’ चित्रपटातील गाजलेल्या भूमिकेचा उल्लेख करून आबा बागुल म्हणाले की, ‘शापित’ ते ‘एक होता विदूषक’ हा त्यांचा चित्रपट प्रवास थक्क करणारा होता. अतिशय प्रभावी अभिनय करणाऱ्या मधु कांबीकर या उत्तम लावणी सम्राज्ञी होत्या. त्यांच्या निधनाने आपण एका गुणी कलावंतास मुकलो. अशा भावना त्यांनी व्यक्त केल्या. याप्रसंगी नंदकुमार बानगुडे, घनश्याम सावंत, नंदकुमार कोंढाळकर, अमित बागुल, विलास रत्नपारखी आदि उपस्थित होते. कला, संस्कृती आणि संगीताचा संगम साधणाऱ्या पुणे नवरात्रौ महोत्सवात आयोजक अध्यक्ष आबा बागुल यांच्या पुढाकाराने मॅजिक ऑफ बर्मन्स हा कार्यक्रम पंचम क्रिएशन्स आणि लिओ डिझाईन्स यांनी प्रस्तुत केला. हिंदी चित्रपटसृष्टीत ज्येष्ठ संगीतकार एस. डी. बर्मन आणि नंतर त्यांचे सुपुत्र राहुल देव बर्मन, यांनी वैशिष्ट्यपूर्ण अशा गीतांची निर्मिती करून, खरोखर एक जादूभरे वातावरण निर्माण केले. त्या वातावरणाचा पुनःप्रत्यय मॅजिक आफ बर्मन्स या सादरीकरणातून रसिकांनी सोमवारी घेतला. प्यार करनेवाले, दिवाना मुझसा नही, तुमने मुझे देखा, ख्बाव हो तुम या कोयी हकीकत, ये दिल ना होता बेचारा, जब हम जवा होंगे, घुंघटा, गुलाबी आखें, पूछो ना कैसे मैने रैन बिताई, नाचे मन मोरा मगन, होटों पें ऐसी बात, बचना ऐ हसीनों, मेहबूबा मेहबूबा, लेकर हम दिवाना दिल, ये जवानी है दिवानी, कर ले प्यार करले, काटा लगा, यम्मा यम्मा, कैसे कब कहा, दिन ढल जाये, तेरे मेरे सपने, ये शाम मस्तानी, प्यार दिवाना होता है, रूप तेरा मस्ताना, लडका हाये अल्ला, अरे यार मेरी तुम भी हो गजब, चूडी नही ये मेरा दिल है….अशी सदाबहार गाणी मकरंद पाटणकर, रूपाली आनंद आणि डॉ. विवेक पांडे यांनी सादर केली. चिंतन मोढा (की बोर्ड), अभिजीत भदे (ड्रम्स), अमन सय्यद (की बोर्ड), प्रथमेश मोरे (सॅक्सोफोन), हर्षद गनबोटे (तबला, ढोलक), राहुल भाटे (गिटार), आनंद घोगरे (ऑक्टोपॅड) यांनी अनुरूप साथसंगत केली. आकाश सोळंकी यांनी निवेदन केले. कार्यक्रमाची संकल्पना माधुरी जोशी आणि आनंद घोगरे यांची होती. कलाकारांचे सत्कार आबा बागुल, जयश्री बागुल, अमित बागुल, जयवंत जगताप यांच्या हस्ते करण्यात आले. यावेळी नंदकुमार बानगुडे, नंदकुमार कोंढाळकर, रमेश भंडारी, घनश्याम सावंत आदी उपस्थित होते.