Newsworldmarathi Pune: पुणे शहरात रोपवे सुरू करण्याची संकल्पना ही पर्यटनाच्या दृष्टीने निश्चितच स्वागतार्ह असून, पुण्याच्या पर्यटन विकासाला चालना देणारा हा एक चांगला प्रकल्प ठरू शकतो. पुण्यात रोपवे सुरू करण्याची संकल्पना सर्वप्रथम दिवंगत खासदार सुरेश कलमाडी साहेब यांनी मांडली होती. त्यामुळे पुण्यात रोपवे व्हावा, ही भूमिका निश्चितच सकारात्मक आहे. मात्र, सारसबाग ते पर्वती असा रोपवे करण्याचा प्रस्ताव व्यवहार्य वाटत नाही. या प्रस्तावाचा पुनर्विचार होणे आवश्यक आहे. सारसबाग आणि पर्वती हा परिसर पुणे शहरातील अत्यंत वर्दळीचा भाग आहे. या ठिकाणी दररोज मोठ्या प्रमाणावर नागरिक, पर्यटक आणि भाविकांची ये-जा असते. त्यातच या परिसरात सध्या पुरेशी पार्किंग व्यवस्था उपलब्ध नाही. अशा परिस्थितीत रोपवे प्रकल्प झाल्यास वाहनांची संख्या आणि पर्यटकांची गर्दी आणखी वाढून वाहतुकीवर मोठ्या प्रमाणात ताण निर्माण होण्याची शक्यता आहे. विशेषतः स्वारगेट हे पुण्याचे महत्त्वाचे मल्टिमोडल ट्रान्सपोर्ट हब आहे. मेट्रो, बस आणि इतर सार्वजनिक वाहतूक व्यवस्थेमुळे या परिसरात आधीच मोठ्या प्रमाणावर वाहतूक सुरू असते. अशा ठिकाणी रोपवे प्रकल्पामुळे वाहतुकीची समस्या अधिक गंभीर होऊ शकते. तसेच बाजीराव रस्त्यावरील वाहतूक आणि पुण्यातील मध्यवर्ती पेठांमध्ये जाण्यासाठी हा एक महत्त्वाचा मार्ग असल्याने या परिसरातील रस्ते मोकळे राहणे अत्यंत गरजेचे आहे. याशिवाय, रोपवे उभारणी करताना आवश्यक असणाऱ्या तांत्रिक बाबी, उपलब्ध जागा, प्रवाशांची सुरक्षितता, पार्किंग, वाहतूक व्यवस्थापन आणि पर्यावरणीय परिणाम यांचाही सखोल अभ्यास होणे आवश्यक आहे. या सर्व बाबींचा विचार करता, सारसबाग ते पर्वती या मार्गाऐवजी तळजाई टेकडी ते पर्वती असा रोपवे उभारण्याचा पर्याय अधिक योग्य ठरू शकतो. तळजाई टेकडी परिसरात आवश्यक पायाभूत सुविधा आणि रोपवेच्या उभारणीसाठी जागेच्या उपलब्धतेचा विचार करता या पर्यायाचा तांत्रिकदृष्ट्या अभ्यास करावा. यामुळे शहराच्या मध्यवर्ती भागातील वाहतुकीवरील अतिरिक्त ताण टाळता येईल, पार्किंगचा प्रश्न कमी होईल आणि पर्यटकांनाही रोपवेचा आनंद घेता येईल. त्याचबरोबर पुण्याच्या पर्यटन विकासालाही नवी दिशा मिळू शकेल. या संदर्भात पुणे महानगरपालिकेचे स्थायी समिती अध्यक्ष मा. श्रीनाथ भिमाले साहेब यांनी सारसबाग ते पर्वती या प्रस्तावाचा पुनर्विचार करून तळजाई टेकडी ते पर्वती या पर्यायी मार्गाचा गांभीर्याने विचार करावा, अशी सूचना करण्यात येत आहे.

शिवसेनेची भूमिका नेहमीच विकासाच्या बाजूने राहिली आहे. चांगल्या आणि शहराच्या हिताच्या प्रकल्पांना विरोध करणे ही शिवसेनेची भूमिका कधीच नव्हती. मात्र, विकास करताना नागरिकांच्या सोयी, शहराची वाहतूक व्यवस्था आणि भविष्यातील गरजा यांचा विचार होणे तितकेच महत्त्वाचे आहे. रोपवे प्रकल्प व्हावा, पण तो पुणेकरांच्या हिताचा आणि शहराच्या नियोजनाला पूरक असावा, हीच आमची भूमिका आहे.

– हेमंत आबा बागुल पुणे महानगर अध्यक्ष,युवासेना

Newsworldmarathi Pune: कार्यालयीन कामकाजाचा आढावा घेण्यासाठी आयोजित केलेल्या बैठकीला विनाकारण गैरहजर राहणे आणि शासकीय कामकाज प्रलंबित ठेवल्याप्रकरणी नोंदणी व मुद्रांक विभागातील दोन सह दुय्यम निबंधकांना कारणे दाखवा नोटीस बजावण्यात आली आहे. हवेली क्रमांक ३ येथील सह दुय्यम निबंधक प्रिया घुबे आणि हवेली क्रमांक १५ येथील सह दुय्यम निबंधक यतीन तावडे यांच्यावर ही कारवाई करण्यात आली आहे. सह जिल्हा निबंधक वर्ग-१ तथा मुद्रांक जिल्हाधिकारी, पुणे शहर यांनी या नोटिसा बजावल्या आहेत. नोंदणी उपमहानिरीक्षक व मुद्रांक उपनियंत्रक, पुणे विभाग यांच्या अध्यक्षतेखाली ३१ ऑक्टोबर २०२६ रोजी सकाळी १० वाजता सह जिल्हा निबंधक वर्ग-१, पुणे शहर कार्यालयाच्या सभागृहात आढावा बैठक आयोजित करण्यात आली होती. या बैठकीला संबंधित अधिकाऱ्यांना मासिक विवरणपत्रासह विहित वेळेत उपस्थित राहण्याचे आदेश देण्यात आले होते. मात्र, प्रिया घुबे या बैठकीला अनुपस्थित राहिल्याचे निदर्शनास आले. याशिवाय, त्यांच्या हवेली क्रमांक ३ कार्यालयातील ‘ई-प्रमाण’ प्रणालीवरील कामकाज ३ सप्टेंबर २०२६ पासून प्रलंबित असल्याचेही वरिष्ठ अधिकाऱ्यांच्या निदर्शनास आले. हवेली क्रमांक १५ चे सह दुय्यम निबंधक यतीन तावडे हे देखील कोणतेही सबळ कारण न देता बैठकीला गैरहजर राहिले. त्यामुळे दोन्ही अधिकाऱ्यांकडून लेखी खुलासा मागविण्याचे निर्देश देण्यात आले. वरिष्ठांच्या आदेशांचे पालन न करणे आणि कार्यालयीन कामकाजात कुचराई करणे हे वर्तन कार्यालयीन शिस्तीला धरून नसल्याचे नोटिशीत नमूद करण्यात आले आहे. संबंधित अधिकाऱ्यांचे वर्तन महाराष्ट्र नागरी सेवा (वर्तणूक) नियम, १९७९ मधील नियम ३ मधील तरतुदींचा भंग करणारे असल्याचा ठपका ठेवण्यात आला आहे. या प्रकरणी शिस्तभंगाची कारवाई का करण्यात येऊ नये, याचा खुलासा नोटीस मिळाल्यापासून दोन दिवसांच्या आत सादर करण्याचे आदेश देण्यात आले आहेत. हवेली क्रमांक १५ चे सह दुय्यम निबंधक यतीन तावडे यांच्याविरोधात रेरा कायद्याचे उल्लंघन करून दस्तांची नोंदणी केल्याप्रकरणी चौकशी सुरू आहे. त्यातच त्यांना कारणे दाखवा नोटीस बजावण्यात आल्याने त्यांच्या अडचणीत आणखी वाढ झाली आहे.

शहरासह राज्यातील अनेक अधिकारी आणि कर्मचारी नियमांचे पालन न करता मनमानी पद्धतीने कामकाज करीत आहेत. अशा अधिकारी-कर्मचाऱ्यांवर केवळ निलंबनाची कारवाई न करता त्यांना बडतर्फ करावे. नोंदणी महानिरीक्षक आणि महसूल विभागातील वरिष्ठ अधिकाऱ्यांनी अशा प्रकरणांत कठोर भूमिका घ्यावी.

– रोहन सुरवसे पाटील, नेते,राष्ट्रवादी काँग्रेस, पुणे.

Newsworldmarathi pune: रक्तदान हे केवळ सामाजिक कार्य नसून ते एक श्रेष्ठ पुण्यदान आहे. समाजातील सामान्य व्यक्तीदेखील रक्तदानात सहभागी होऊन अमूल्य योगदान देऊ शकते. एका व्यक्तीच्या रक्तदानामुळे गरजू रुग्णांचे प्राण वाचविण्यास मदत होऊ शकते. त्यामुळे प्रत्येकाने रक्तदानाविषयी जागरूक राहून या सामाजिक कार्यात आपला सहभाग नोंदवावा, असे प्रतिपादन दि पूना गुजराती केळवणी मंडळाचे अध्यक्ष डॉ. राजेश शहा यांनी केले. दि पूना गुजराती केळवणी मंडळ, श्री पूना गुजराती बंधू समाज, हरिभाई व्ही. देसाई महाविद्यालय आणि राष्ट्रीय सेवा योजना (NSS) यांच्या संयुक्त विद्यमाने स्व. नितीनभाई देसाई यांच्या जयंतीपूर्व दिनानिमित्त तसेच राष्ट्रीय एकात्मता दिनाचे औचित्य साधून शनिवार, दि. ३१ ऑक्टोबर २०२६ रोजी हरिभाई व्ही. देसाई महाविद्यालयाच्या शांताबेन सभागृहात रक्तदान शिबिराचे आयोजन करण्यात आले होते. या शिबिराचे उद्घाटन संस्थेचे अध्यक्ष डॉ. राजेश शहा यांच्या शुभहस्ते करण्यात आले. या कार्यक्रमाला स्व नितीन देसाई यांच्या कन्या निशा देसाई तसेच गुजरातमधील सुप्रसिद्ध स्त्रीरोगतज्ज्ञ, ख्यातनाम लेखक आणि लोकप्रिय स्तंभलेखक डॉ. शरद ठाकर यांची प्रमुख उपस्थिती लाभली. वैद्यकीय क्षेत्रातील योगदानासोबतच गुजराती साहित्यविश्वात त्यांनी आपल्या लेखनातून स्वतंत्र आणि मानाचे स्थान निर्माण केले आहे. या रक्तदान शिबिरात पूना हॉस्पिटल अँड रिसर्च सेंटरच्या राकेश जैन रक्तपेढीने रक्तसंकलनाची जबाबदारी पार पाडत सामाजिक बांधिलकी जपली. रक्ताची गरज असलेल्या रुग्णांना वेळेवर रक्त उपलब्ध होण्यासाठी अशा उपक्रमांचे महत्त्व अनन्यसाधारण आहे. या उपक्रमाच्या यशस्वितेसाठी संस्थेचे नैनेश नंदू,जनकभाई शहा, हरेश शहा, दिलीप जगड,पंकज डेडिया,विनोद डेडिया,हेमंत मणियार व वल्लभभाई पटेल यांनी विशेष सहकार्य केले. महाविद्यालयाच्या वतीने राष्ट्रीय सेवा योजनेचे स्वयंसेवक, क्रीडा विभागातील खेळाडू, सुपरवायझर द्वारकेश दवे, सेवकवर्ग आणि संस्थेचे प्रशासकीय अधिकारी श्री. संदीप देशपांडे यांनी शिबिराच्या यशस्वी आयोजनासाठी विशेष परिश्रम घेतले. महाविद्यालयातील विद्यार्थी, कर्मचारी तसेच स्पर्धा परीक्षा विभागातील विद्यार्थी आणि कर्मचाऱ्यांनी स्वतः रक्तदान करून इतरांनाही या सामाजिक कार्यासाठी प्रेरित केले. महाविद्यालयाचे प्राचार्य डॉ. राजेंद्र गुरव यांच्या मार्गदर्शनाखाली या शिबिराचे आयोजन करण्यात आले. कार्यक्रमाचे सूत्रसंचालन प्रा ऋतुजा हांडे यांनी केले. या शिबिराला उत्स्फूर्त प्रतिसाद मिळाला असून एकूण ७५ रक्तदात्यांनी रक्तदान करून सामाजिक बांधिलकीचे दर्शन घडविले.राष्ट्रीय एकात्मतेचा संदेश देतानाच मानवसेवेचा आदर्श जपणारा हा उपक्रम यशस्वीरीत्या संपन्न झाला.

Newsworldmarathi Pune: पुणे शहरात १० टक्के पाणीकपात लागू असताना शाळेचे गेट धुण्यासाठी महापालिकेच्या नळाद्वारे पुरविण्यात येणाऱ्या पाण्याचा वापर होत असल्याची तक्रार करण्यात आली आहे. या प्रकरणी बिशप स्कूलला गेट धुण्यासाठी नळाच्या पाण्याचा वापर तात्काळ बंद करण्याचे निर्देश प्रशासनाने दिले आहेत. सूचनांचे पालन न केल्यास प्रशासकीय कारवाई करण्याचा इशाराही देण्यात आला आहे. युवा सेनेचे पुणे महानगराध्यक्ष हेमंत बागुल यांनी २६ ऑक्टोबर २०२६ रोजी यासंदर्भात तक्रार केली होती. त्यानंतर प्रशासनाने संबंधित शाळेला सूचना दिल्या आहेत. पुणे महानगरपालिकेमार्फत नागरिकांना आणि विविध संस्थांना नळाद्वारे पाणीपुरवठा केला जातो. या पाण्याचा वापर आवश्यक कामांसाठी आणि योग्य पद्धतीने करणे अपेक्षित आहे. मात्र, बिशप स्कूलच्या गेटची स्वच्छता करण्यासाठी महापालिकेच्या नळाच्या पाण्याचा वापर होत असल्याचे निदर्शनास आल्याचे प्रशासनाने पत्रात नमूद केले आहे. सध्या पाण्याची गरज लक्षात घेता पिण्याच्या पाण्याचा अशा प्रकारे वापर करून अपव्यय करणे योग्य नसल्याचे प्रशासनाने स्पष्ट केले आहे. पुणे शहरात १६ ऑक्टोबर २०२६ पासून १० टक्के पाणीकपात लागू करण्यात आली आहे. यासंदर्भात अतिरिक्त महापालिका आयुक्तांनी प्रसिद्ध केलेल्या प्रसिद्धिपत्रकात सार्वजनिक महाविद्यालयांच्या वसतिगृह व्यवस्थापकांनी पिण्याच्या पाण्याची बचत करून सहकार्य करण्याचे आवाहन केले आहे. या पार्श्वभूमीवर बिशप स्कूलने गेट धुण्यासाठी महापालिकेच्या नळाच्या पाण्याचा वापर तात्काळ थांबवावा आणि पाण्याचा अपव्यय होणार नाही, याची दक्षता घ्यावी, असे निर्देश देण्यात आले आहेत. या सूचनांचे पालन न केल्यास लागू नियम आणि प्रचलित तरतुदींनुसार पुढील प्रशासकीय कारवाई करण्यात येईल, असे प्रशासनाने स्पष्ट केले आहे.

Newsworldmarathi Pune: सिंहगड रस्त्यावरील पुणे महापालिकेच्या पु. ल. देशपांडे उद्यानात मोकाट कुत्र्यांचा वावर वाढल्याने नागरिकांच्या सुरक्षेचा प्रश्न ऐरणीवर आला आहे. उद्यानात दररोज लहान मुले, ज्येष्ठ नागरिक आणि पर्यटक मोठ्या संख्येने येत असतात. मात्र, मोकाट कुत्र्यांमुळे नागरिकांमध्ये भीतीचे वातावरण निर्माण होत असल्याने या कुत्र्यांचा बंदोबस्त करण्याची मागणी पुणे शहर काँग्रेस कमिटीच्या पश्चिम विभागाचे पदाधिकारी अविनाश खंडारे यांनी केली आहे. यासंदर्भात खंडारे यांनी पुणे महापालिकेच्या उद्यान अधीक्षकांना २७ ऑक्टोबर २०२६ रोजी निवेदन दिले आहे. उद्यानाचा परिसर अत्यंत सुंदर असून, सकाळच्या वेळी व्यायाम, फिरणे आणि विरंगुळ्यासाठी अनेक नागरिक येथे येतात. मात्र, उद्यानात सध्या सुमारे सहा ते सात मोकाट कुत्र्यांचा वावर असल्याचे निवेदनात नमूद करण्यात आले आहे. सकाळच्या वेळी एका नागरिकावर या कुत्र्यांनी हल्ला करण्याचा प्रयत्न केल्याची घटनाही निवेदनात नमूद केली आहे. उद्यानाच्या प्रवेशद्वाराजवळ सुरक्षा रक्षक तैनात असले, तरी उद्यानाच्या आतील भागात मोकाट कुत्र्यांचा वावर असल्याने नागरिकांच्या सुरक्षिततेबाबत चिंता व्यक्त होत आहे. विशेषतः लहान मुले आणि ज्येष्ठ नागरिकांना या कुत्र्यांमुळे धोका निर्माण होऊ शकतो. त्यामुळे महापालिका प्रशासनाने या समस्येकडे गांभीर्याने लक्ष देऊन तातडीने उपाययोजना कराव्यात, अशी मागणी खंडारे यांनी केली आहे. उद्यानात येणाऱ्या नागरिकांना सुरक्षित वातावरण मिळावे, यासाठी संबंधित विभागाने पाहणी करून आवश्यक कार्यवाही करावी, अशी अपेक्षाही त्यांनी व्यक्त केली आहे. आता या निवेदनाची दखल घेऊन महापालिका प्रशासन काय पावले उचलते, याकडे नागरिकांचे लक्ष लागले आहे.

Newsworldmarathi Pune: नगरसेविका अर्चना तुषार पाटील यांच्या वाढदिवसानिमित्त सपिका पथ, काशेवाडी येथे आयोजित करण्यात आलेला भव्य ‘होम मिनिस्टर – सौभाग्यवतींचा’ हा कार्यक्रम उत्साहात संपन्न झाला. या कार्यक्रमात महिलांसाठी चारचाकी गाडीचे प्रथम पारितोषिक ठेवण्यात आले होते. महाराष्ट्रात प्रथमच ‘होम मिनिस्टर’ कार्यक्रमात चारचाकी गाडीचे बक्षीस देण्यात आल्याचा दावा आयोजकांनी केला. या अनोख्या बक्षिसामुळे कार्यक्रमाला विशेष आकर्षण प्राप्त झाले. हजारो माता-भगिनींच्या उपस्थितीत संपूर्ण परिसरात उत्साहाचे वातावरण निर्माण झाले होते. या कार्यक्रमातील प्रथम पारितोषिकाची मानकरी अश्विनी किशोर खुडे ठरल्या. त्यांना चारचाकी गाडी बक्षीस म्हणून मिळाली. हे पारितोषिक जिंकल्यानंतर त्यांच्या चेहऱ्यावर आनंद ओसंडून वाहत होता. त्यांच्या आनंदात सहभागी होत उपस्थित महिलांनीही उत्स्फूर्त प्रतिसाद दिला. महिलांच्या आनंदाला आणि उत्साहाला प्रोत्साहन देणारा हा सोहळा उपस्थितांसाठी अविस्मरणीय ठरला. चारचाकी गाडीबरोबरच महिलांसाठी फ्रिज, टीव्ही, वॉशिंग मशीन, पिठाची गिरणी यांसह अनेक आकर्षक बक्षिसांची व्यवस्था करण्यात आली होती. त्यामुळे कार्यक्रमाची रंगत अधिकच वाढली. मनोरंजन, आनंद आणि बक्षिसांची मेजवानी यामुळे कार्यक्रमाला महिलांचा मोठा प्रतिसाद मिळाला. या सोहळ्याला माजी राज्यमंत्री दिलीप कांबळे, आमदार सुनील कांबळे, माजी आमदार जगदीशजी मुळीक, माजी महापौर अंकुश काकडे, बाबासाहेब धाबेकर, महेश पुंडे, नगरसेविका कालिंदा पुंडे, गणेश यादव, राहुल भंडारे, भरत कांबळे, लहुजी क्रांती सेनेचे प्रमुख विष्णू भाऊ कसबे, माजी आरपीआय शहर प्रमुख महेंद्र कांबळे, संदीप दांदोरें, अशोक शिरोळे, अनिल दामजी, हरीश लडकत आणि दिनेश रासकर यांची उपस्थिती होती. कार्यक्रमाला हजारोंच्या संख्येने उपस्थित राहून प्रेम, आशीर्वाद आणि उत्स्फूर्त प्रतिसाद दिल्याबद्दल अर्चना तुषार पाटील यांनी सर्व माता-भगिनी, ज्येष्ठ नागरिक, मान्यवर आणि कार्यकर्त्यांचे मनःपूर्वक आभार मानले. वाढदिवसाचा आनंद जनतेसोबत साजरा करताना त्यांच्या चेहऱ्यावर हास्य फुलवणे आणि आनंदाचे क्षण निर्माण करणे, हाच आपल्यासाठी खरा आनंद असल्याची भावना अर्चना पाटील यांनी व्यक्त केली. जनतेच्या प्रेमातून आणि आशीर्वादातून जनसेवेचा हा प्रवास असाच अविरत सुरू ठेवण्याचा निर्धारही अर्चना पाटील यांनी व्यक्त केला.

Newsworldmarathi pune: श्री पूना गुजराती बंधू समाजाच्या वतीने आयोजित करण्यात आलेली ‘रास गरबा हरिफाई २०२६’ ही स्पर्धा लोकशाहीर अण्णाभाऊ साठे सभागृह, बिबवेवाडी, पुणे येथे उत्साहपूर्ण आणि सांस्कृतिक वातावरणात संपन्न झाली. महाराष्ट्र राज्याचे माजी मुख्यमंत्री तथा राज्यसभा सदस्य अशोक चव्हाण हे कार्यक्रमाचे प्रमुख पाहुणे म्हणून उपस्थित होते. श्री पूना गुजराती बंधू समाजाचे अध्यक्ष जयंत शाह आणि मॅनेजिंग ट्रस्टी डॉ. राजेश शाह यांच्या हस्ते प्रमुख पाहुणे श्री. अशोक चव्हाण यांचा सन्मान करण्यात आला. यावेळी व्यासपीठावर ॲड. श्रीजया अशोकराव चव्हाण,वल्लभभाई पटेल, नैनेश नंदू, राजेंद्र शाह, हरेश शाह,केतन कापडिया उपस्थित होते. उपस्थितांना संबोधित करताना मा.श्री.अशोक चव्हाण म्हणाले, सन १९१३ मध्ये पुण्यात स्थापन झालेल्या या समाजाने गेल्या अनेक दशकांमध्ये आपली स्वतंत्र ओळख निर्माण केली आहे. गुजरातमधून पुण्यात आलेल्या बांधवांनी एकत्र येऊन आपल्या समाजाची स्थापना केली. आपल्या संस्कृतीचे जतन करतानाच पुण्याच्या सामाजिक, शैक्षणिक आणि सार्वजनिक जीवनात योगदान देण्याची परंपरा या समाजाने जपली आहे.आज ११३ वर्षांच्या या प्रदीर्घ वाटचालीत श्री पूना गुजराती बंधू समाजाने केवळ गुजराती समाजालाच एकत्र आणले नाही, तर पुण्याच्या सामाजिक आणि सांस्कृतिक जीवनातही महत्त्वपूर्ण स्थान निर्माण केले आहे. ही निश्चितच अभिमानाची बाब आहे. या सामाजिक कार्याचा उल्लेख करताना जयराज स्पोर्ट्स अँड कन्व्हेन्शन सेंटरचा विशेष उल्लेख करावा लागेल.जयराज स्पोर्ट्स अँड कन्व्हेन्शन सेंटर ही गुजराती समाजाच्या एकजुटीची, दूरदृष्टीची आणि समाजासाठी काहीतरी भरीव करण्याच्या इच्छाशक्तीची साक्ष देणारी एक महत्त्वपूर्ण निर्मिती आहे. हे केंद्र केवळ क्रीडा किंवा सांस्कृतिक कार्यक्रमांसाठीचे ठिकाण नाही, तर सर्व समाजातील लोकांना एकत्र आणणारे, नव्या पिढीला संधी उपलब्ध करून देणारे आणि सामाजिक संबंध अधिक दृढ करणारे एक महत्त्वाचे व्यासपीठ आहे.आजच्या या स्पर्धेत सहभागी झालेल्या सर्व स्पर्धकांचे मी मनःपूर्वक अभिनंदन करतो. स्पर्धेत सहभागी मंडळांनी पारंपरिक गरबा नृत्य, आकर्षक वेशभूषा, तालबद्ध संगीत आणि विविध नृत्याविष्कारांच्या माध्यमातून उपस्थितांची मने जिंकली. प्रत्येक मंडळाने आपल्या सादरीकरणातून लोकपरंपरा, सांस्कृतिक वैविध्य आणि सामूहिक उत्साहाचे दर्शन घडविले. संपूर्ण सभागृहात चैतन्यपूर्ण वातावरण निर्माण झाले होते. उपस्थितांना संबोधित करताना श्री पूना गुजराती बंधू समाजाचे मॅनेजिंग ट्रस्टी डॉ. राजेश शाह यांनी पारंपरिक सण, उत्सव आणि सांस्कृतिक स्पर्धा या समाजाला एकत्र आणण्याचे महत्त्वपूर्ण माध्यम असल्याचे सांगितले. अशा उपक्रमांमुळे नवीन पिढीला आपल्या संस्कृतीची, परंपरेची आणि कलावैभवाची ओळख होते. समाजातील एकोपा दृढ होण्याबरोबरच कलाकारांना आपली कला सादर करण्यासाठी व्यासपीठ उपलब्ध होते. ‘रास गरबा हरिफाई ’ ही स्पर्धा पुन्हा सुरू करून सांस्कृतिक परंपरेला नवसंजीवनी देण्याचा प्रयत्न करण्यात आला असून, भविष्यातही अशा उपक्रमांना प्रोत्साहन देण्यात येईल, अशी भावना त्यांनी व्यक्त केली तसेच श्री पूना गुजराती बंधू समाजाच्या वतीने महाराष्ट्रातील दुष्काळग्रस्त भागातील नागरिकांना मदत करण्याच्या सामाजिक बांधिलकीतून मुख्यमंत्री सहायता निधीस ₹२ लाख १ हजार रुपयांची मदत देण्याची घोषणा करण्यात आली. आजच्या या भव्य आणि उत्साहपूर्ण कार्यक्रमाला माननीय अशोक चव्हाण साहेब यांनी आपली अमूल्य उपस्थिती लाभवून कार्यक्रमाची शोभा वाढवली, याबद्दल श्री पूना गुजराती बंधू समाजाच्या वतीने मी त्यांचे मनःपूर्वक आभार व्यक्त करतो.तसेच, या कार्यक्रमाच्या यशस्वितेसाठी सहभागी झालेल्या सर्व मंडळांचे, पदाधिकाऱ्यांचे, कार्यकर्त्यांचे आणि स्पर्धकांचे मी मनःपूर्वक अभिनंदन व आभार मानतो. जयराज ग्रुपच्या वतीने स्पर्धेतील प्रथम क्रमांक वैष्णवी ग्रुपला चषक आणि २५,००० रुपये, द्वितीय क्रमांक गहेक्ती गुजरातन ग्रुपला चषक आणि १५,००० रुपये, तर तृतीय क्रमांक नवताल ग्रुपला चषक आणि १०,००० रुपये रोख पारितोषिक देऊन गौरविण्यात आले व जयराज ग्रुपच्या वतीने स्पर्धेत सहभागी झालेल्या सर्व दहा मंडळांना प्रत्येकी १०,००० रुपयांचे विशेष पारितोषिक अशोक चव्हाण यांच्या हस्ते देण्यात आले. कार्यक्रमाला समाजातील मान्यवर, विविध गरबा मंडळांचे प्रतिनिधी, कलाकार आणि नागरिक मोठ्या संख्येने उपस्थित होते.स्पर्धेचे परीक्षण अनुजा सेलोट आणि निधी मेहता यांनी केले व कार्यक्रमाचे सूत्रसंचालन राधिका बगदाई यांनी केले.

Newsworldmarathi Pune: द पूना ब्लाईंड मेन्स असोसिएशन आणि रोटरी क्लब ऑफ पुणे शनिवार वाडा यांनी संयुक्त रित्या आयोजित केलेल्या कार्यक्रमात 450 दृष्टीबाधित व्यक्तींना दिवाळी शिधा वाटप करण्यात आले. द पूना ब्लाईंड मेन्स असोसिएशनच्या नांदेड फाटा,सिंहगड रस्ता येथील शिर्डी साईबाबा अंध महिला वृद्धाश्रमात झालेल्या कार्यक्रमात पुणे शहर व परीसरातील दृष्टीबाधित व्यक्तीं आणि त्यांचे कुटुंबीय सहभागी झाले होते. याप्रसंगी द पूना ब्लाईंड मेन्स असोसिएशनचे अध्यक्ष डॉ.राजेश शहा तसेच कार्यकारी संचालक श्री परवेझ बिलीमोरिया प्रमुख पाहुणे म्हणून उपस्थित होते. तसेच रोटरी क्लब पुणे शनिवार वाडाचे प्रेसिडेंट श्री दिनेश जोशी,प्रोजेक्ट डायरेक्टर श्री. श्रीनिवास पाळंदे ,श्री नारायण चांडक,अभिनव सेवा फौंडेशनचे श्री सुनील गोवर्धन उपस्थित होते.काश्मिरा ठाकर व सहकाऱ्यांनी या कार्यक्रमाचे आयोजन केले. दृष्टीबाधित व्यक्तींची ‘दिवाळी’ आनंदाची व्हावी यासाठी गेली अनेक वर्षे नियमितपणे हा उपक्रम राबविला जात आहे. द पूना ब्लाईंड मेन्स असोसिएशन ही सामाजिक संस्था गेली 1952 पासून दृष्टीबाधित व्यक्तींच्या कल्याणासाठी काम करीत आहे.महाराष्ट्र तसेच भारतामधील अनेक दृष्टिहीन व्यक्ती संस्थेच्या प्रकल्पाच्या लाभार्थी आहेत.

Newsworldmarathi Pune: मॉडेल कॅालनी वॅार्ड क्रमांक १२ दिवाळी हा दिव्यांचा सण असला तरी खरा आनंद हा आपल्या माणसांना भेटण्यात आहे, हा संदेश देत नगरसेविका पूजा प्रतुल जागडे यांनी प्रभागात एक आगळा-वेगळा उपक्रम राबविला आहे. गेल्या तीन दिवसांपासून प्रभागातील प्रत्येक वाडी-वस्ती, सोसायटी आणि गल्ली-बोळात जाऊन नागरिकांना प्रत्यक्ष भेटून दिवाळीच्या शुभेच्छा व भेटवस्तू देण्याचा उपक्रम त्यांनी हाती घेतला आहे. या उपक्रमात केवळ भेटवस्तू देण्यापुरता कार्यक्रम मर्यादित न ठेवता, नागरिकांशी थेट संवाद साधत त्यांच्या अडी-अडचणी जाणून घेतल्या जात आहेत. “ही केवळ दिवाळी भेट नाही, तर जनतेशी असलेले नाते अधिक घट्ट करण्याचा आणि विश्वासाचे बंध जपण्याचा एक प्रयत्न आहे,” असे पूजा जागडे यांनी यावेळी सांगितले. नागरिकांकडून मिळणारे प्रेम, ज्येष्ठांचे आशीर्वाद आणि आपुलकी हीच आपल्याला जनसेवेसाठी नवी ऊर्जा देते, अशी भावनाही त्यांनी या भेटीच्या वेळी व्यक्त केली आहे. सणाच्या धावपळीतही वेळ काढून नगरसेविका स्वतः दारात येतात, याचे नागरिकांमधून विशेष कौतुक होत आहे. केवळ राजकीय नेता म्हणून नव्हे तर कुटुंबातील सदस्य म्हणून त्या प्रत्येकाशी संवाद साधत असल्याने नागरिकांमध्ये समाधानाचे वातावरण आहे. आपली माणसं, आपला प्रभाग आणि जनसेवेचा अखंड संकल्प हा ध्यास घेऊन काम करणाऱ्या नगरसेविका पुजा प्रतुल जागडे यांच्या या उपक्रमाचे सर्वत्र स्वागत होत आहे.

Newsworldmarathi Pune: उपमुख्यमंत्री सुनेत्रा अजित पवार यांच्या वाढदिवसानिमित्त आमदार विक्रम काकडे यांच्या मार्गदर्शनाखाली राष्ट्रवादी काँग्रेसचे नेते रोहन सुरवसे पाटील यांच्या वतीने उंड्री येथील ‘आसरा – अनाथांचा हक्काचा निवारा’ या संस्थेत स्नेहभोजन आणि फळवाटपाचा उपक्रम आयोजित करण्यात आला. या आश्रमात राहणाऱ्या अनाथ मुलांसह मनोरुग्ण व्यक्तींना स्नेहभोजन देऊन त्यांच्यासोबत वेळ घालविण्यात आला. तसेच संस्थेच्या कार्याला हातभार लावण्यासाठी आर्थिक मदतही देण्यात आली. वाढदिवसाचे औचित्य साधून रोहन सुरवसे पाटील यांनी आश्रमातील मुलांशी आणि मनोरुग्ण व्यक्तींशी संवाद साधला. त्यांच्या गरजा आणि अपेक्षा जाणून घेण्याचा प्रयत्न केला. या वेळी सर्वांना गोडधोड भोजन देण्यात आले, तसेच फळांचे वाटप करण्यात आले. केवळ आर्थिक मदतच नव्हे, तर प्रेम, आपुलकी आणि भावनिक आधार देण्याच्या उद्देशाने हा उपक्रम राबविण्यात आला. आश्रमातील अनाथ मुलांचे शिक्षण, संगोपन आणि मनोरुग्ण व्यक्तींची देखभाल यांसाठी संस्थेच्या वतीने करण्यात येणाऱ्या प्रयत्नांची माहितीही सुरवसे पाटील यांनी घेतली. संस्थेच्या संचालिका स्वाती डिंगळे यांनी आश्रमाच्या कामकाजाची माहिती देताना मुलांचा दैनंदिन दिनक्रम, शिक्षण, संगोपन तसेच मनोरुग्ण व्यक्तींची काळजी घेण्यासाठी राबविण्यात येणाऱ्या उपक्रमांविषयी सांगितले. या प्रसंगी विशाल विहिरे, रणजित शिंपले आणि प्रसाद पाटील उपस्थित होते. उपमुख्यमंत्री सुनेत्रा पवार यांच्या वाढदिवसानिमित्त आश्रमातील मुलांनी त्यांना शुभेच्छा दिल्या. ‘अनाथ मुलांना आणि मनोरुग्ण व्यक्तींना आर्थिक मदतीसोबतच प्रेम, आपुलकी आणि भावनिक आधाराचीही गरज असते. समाजातील प्रत्येक घटकाने अशा व्यक्तींच्या पाठीशी उभे राहून त्यांना आधार देणे आवश्यक आहे. या मुलांच्या आणि गरजू व्यक्तींच्या पाठीशी आम्ही कायम उभे राहू,’ असा विश्वास रोहन सुरवसे पाटील यांनी व्यक्त केला. वाढदिवसासारख्या प्रसंगांचे औचित्य साधून सामाजिक उपक्रम राबविणे आणि गरजू घटकांशी आपुलकीचे नाते निर्माण करणे, हा या उपक्रमामागील उद्देश असल्याचे आयोजकांनी सांगितले.