News World Marathi© 2024 Newsworld मराठी बाह्य इंटरनेट साइट्सच्या सामग्रीसाठी आम्ही जबाबदार नाही. बाह्य लिंक्सबद्दल आम्हाल काय वाटतं? इथे वाचा. बाह्य लिंक्सबद्दल आम्हाल काय वाटतं? इथे वाचा.

Newsworldmarathi Pune: “युवक कल्याण खाते हे शासनाला काय कळलेच नाही!” – राज्याचे युवक कल्याण व क्रीडा मंत्री दत्तात्रय भरणे यांच्या या विधानाने राजकीय आणि प्रशासकीय वर्तुळात एकच खळबळ उडवली आहे. इंदापूर शहरात दहीहंडी पथकाच्या गोविंदाना मॅट वाटप कार्यक्रमात ते बोलत होते. भरणे यांनी जाहीरपणे कबूल केले की, आजवर युवक कल्याण खात्याला शासनाकडून योग्य गांभीर्याने पाहिलंच गेलं नाही. “आता हे खाते जोरात सुरू करणार आहोत,” असं सांगत त्यांनी एकप्रकारे शासनाच्या दुर्लक्षावर शिक्कामोर्तबच केलं आहे. त्यामुळे प्रश्न उभा राहतो की, हे खाते आजवर केवळ नावापुरतंच का होतं? राज्यातील तरुण वर्ग बेरोजगारी, नैराश्य, व्यसनाधीनता आणि क्रीडा सुविधांच्या अभावासारख्या गंभीर समस्यांना सामोरे जात असताना त्यांच्यासाठी असलेल्या खात्याकडे शासनानेच दुर्लक्ष केलं, हे अत्यंत दु:खद चित्र मंत्र्यांच्या वक्तव्यातून समोर आलं आहे. पूर्वीच्या सरकारांनी युवक कल्याण खात्याची केवळ कागदोपत्री पूर्तता केली आणि मूळ उद्दिष्टांची अंमलबजावणी केलीच नाही, हे आता स्पष्ट होतंय. ‘खरं काम आता सुरू होईल’ असं मंत्री म्हणत असले तरी हे केवळ भाषणातच राहतं की प्रत्यक्ष कृतीतही दिसतं, याकडे राज्यातील युवकांचे लक्ष लागले आहे. शेवटी मोठा सवाल हाच — जर आता खाते “जोरात” सुरू होणार असेल, तर आजवर ते निष्क्रिय होतं, हे खुद्द मंत्र्यांच्याच तोंडून स्पष्ट झालं. मग या निष्क्रियतेला जबाबदार कोण?

Newsworldmarathi Mumbai: राज ठाकरे आणि भाजप खासदार निशिकांत दुबे यांच्यात नुकत्याच झालेल्या भाषावादामुळे महाराष्ट्रातील राजकीय वातावरण पुन्हा तापलं आहे. निशिकांत दुबे यांनी “राज ठाकरे यांना हिंदी मी शिकवली” असा टोला लगावत मराठी-हिंदी भाषावादाला खुमासदार वळण दिलं. यावर राज ठाकरे यांनी हिंदी भाषिकांच्या भूमिकेवर पुन्हा प्रश्नचिन्ह उपस्थित केलं. राज ठाकरे यांनी आपल्या सभेत स्पष्ट शब्दांत सांगितलं, “महाराष्ट्रात राहायचं तर मराठी शिकावीच लागेल.” दुबे यांचे आरोप आणि प्रतिउत्तरांमुळे सोशल मीडियावरून ते गावोगावी चर्चेचा विषय बनला आहे. या वादातून मुंबईसह संपूर्ण महाराष्ट्रात भाषा-राजकारण रंगत आहे. आता हा वाद नेमका कुठवर जातो, याकडे राज्यासह देशाचे लक्ष लागले आहे.

Newsworldmarathi Mumbai: मोठ्या अपेक्षांनिशी प्रदर्शित होत असलेल्या सायारा या रोमँटिक थ्रिलर चित्रपटाला प्रेक्षकांचा उदंड प्रतिसाद मिळत आहे. अभिनेता अहान पांड्य आणि नवोदित अभिनेत्री अनीत पड्‌डा यांच्या प्रमुख भूमिका असलेल्या या चित्रपटाचा १८ जुलै रोजी प्रदर्शित होत आहे. चित्रपटाच्या प्रदर्शनापूर्वीच प्रेक्षकांमध्ये मोठ्या प्रमाणात उत्सुकता निर्माण झाली असून, प्री-बुकिंगमध्ये मोठी उसळी पाहायला मिळते आहे. तज्ज्ञांच्या मते, ‘सायारा’ हा चित्रपट पहिल्याच दिवशी सुमारे २४ कोटी रुपयांची कमाई करेल, असा अंदाज आहे. 🎬 मोठ्या पडद्यावर प्रेम, सस्पेन्स आणि संगीताची तिहेरी मेजवानी ‘आशिकी २’ आणि ‘एक विलन’ यांसारखे सुपरहिट चित्रपट देणारे दिग्दर्शक मोहित सूरी यांनी सायाराच्या माध्यमातून पुन्हा एकदा रोमँटिक थ्रिलरमध्ये आपला ठसा उमटवला आहे. चित्रपटातील गाणी विशेष गाजत असून, यूट्यूबवर रिलीज झालेल्या “तू सायारा, मी दिवाना…” या टायटल साँगला लाखो व्ह्यूज मिळाले आहेत. 🎟 प्री-बुकिंग जोरात • प्रीमियम मल्टिप्लेक्समध्ये सायारासाठी मोठ्या प्रमाणात बुकिंग • विशेषतः पुणे, मुंबई, दिल्ली, बेंगळुरू येथे शो ‘हाऊसफुल’ • तरुण प्रेक्षकांमध्ये प्रचंड क्रेझ 🗣️ सिनेमा समीक्षक काय म्हणतात? चित्रपट ट्रेलर, संगीत आणि स्टारकास्ट यांमुळे सायाराबद्दल उत्सुकता वाढली आहे. अहान पांड्य याची हे पदार्पण असूनही त्याच्या अभिनयाची चर्चा जोरात आहे. अनीत पड्‌डानेही आपल्या पहिल्याच चित्रपटात प्रभाव टाकला असल्याचं समीक्षकांचं मत आहे. 🎥 चित्रपटाची माहिती एका झटक्यात • दिग्दर्शक : मोहित सूरी • प्रमुख कलाकार : अहान पांड्य, अनीत पड्‌डा • संगीत : मिथुन, अंकित तिवारी • प्रकार : रोमँटिक थ्रिलर • रिलीज तारीख : १८ जुलै २०२५

Newsworldmarathi Mumbai: विकसित भारत २०४७ च्या दृष्टीने सुधारित युवा धोरणाची आखणी करावी. नव्या आव्हानांना सामोरे जाणाऱ्या युवकांच्या बदलत्या विचारसरणीचा समावेश युवा धोरणात केल्यास परिवर्तन शक्य आहे, असे प्रतिपादन मुख्यमंत्री देवेंद्र फडणवीस यांनी केले. विधानभवन येथे राज्याच्या सुधारित युवा धोरणासाठी गठित समितीच्या बैठकीत मुख्यमंत्री फडणवीस बोलत होते. या बैठकीस उपमुख्यमंत्री अजित पवार, क्रीडा व युवक कल्याण मंत्री तथा समितीचे अध्यक्ष दत्तात्रय भरणे, आमदार अमोल मिटकरी, श्रीकांत भारतीय, राष्ट्रीय युवा पुरस्कार सन्मानर्थी प्रा. डॉ. मिलिंद भोई, शंतनू जगदाळे, तपस्वी गोंधळी, मनीष गवई, विशेष निमंत्रित सदस्य अश्विनी एकबोटे, आमदार संतोष दानवे, राजेश पवार, आशुतोष काळे, प्रवीण दटके, देवेंद्र कोठे, सुहास कांदे, डॉ. बाबासाहेब देशमुख, प्रकाश सुर्वे, वरुण सरदेसाई, रोहित पाटील, युवा बिरादरीचे संस्थापक पद्मश्री क्रांती शाह, क्रीडा व युवक कल्याण आयुक्त शीतल तेली उपस्थित होते. विधान भवन मुंबई येथे ही बैठक संपन्न झाली. मुख्यमंत्री देवेंद्र फडणवीस म्हणाले की, युवकांचे विचार, त्यांच्या अपेक्षा समजून घेत धोरण आखले गेले तर ते समर्पक ठरेल. शहरी व ग्रामीण भागातील युवकांना समान संधी मिळावी यासाठी प्रशिक्षण, सुविधा आणि योजनांचा समावेश असलेले समतोल धोरण तयार करणे आवश्यक आहे. युवक कल्याण विभागाबरोबरच अन्य विभागांनीही हे उद्दिष्ट पूर्ण करण्यासाठी समन्वयाने काम करणे गरजेचे आहे. शाळा, महाविद्यालये, सोशल मीडिया आणि सेवा क्षेत्रातील प्रतिनिधींनाही धोरणात सहभागी करून त्यांच्या सूचना समाविष्ट करण्याचे आदेश मुख्यमंत्र्यांनी आज दिले. बैठकीत आमदार आणि निमंत्रित सदस्यांनीही सूचना मांडत समृद्ध धोरणासाठी योगदान दिले.या समितीतील तज्ञ सदस्य प्रा. डॉ. मिलिंद भोई, डॉ. शंतनू जगदाळे, श्री प्रवीण निकम यांनी युवा धोरणामध्ये आवश्यक असलेल्या गोष्टींचा कच्चा मसुदा यावेळी माननीय मुख्यमंत्री यांना सादर केला. शारीरिक मानसिक व भावनिक दृष्ट्या सक्षम असणारा युवक हा या युवा धोरणाचा पाया आहे असे प्रतिपादन प्रा. डॉ. मिलिंद भोई यांनी यावेळी केले. शिक्षण, रोजगार, राष्ट्रप्रेमाला प्राधान्य क्रीडा मंत्री दत्तात्रय भरणे यांनी सांगितले की, युवकांच्या सर्वांगीण विकासासाठी राज्य शासन विविध उपक्रम राबवित आहे. शहरी, ग्रामीण आणि आदिवासी भागातील युवकांच्या गरजा ओळखून, देश-विदेशातील युवकांबाबतच्या धोरणांचा अभ्यास करून, प्रत्यक्ष संवादातून उपाययोजना आखल्या जातील. नवे सुधारित युवा धोरण यामध्ये शिक्षण, रोजगार, उद्योजकता, बौद्धिक व सामाजिक विकास, स्टार्टअप, आर्टिफिशियल इंटेलिजन्स (AI) याबरोबरच जबाबदारीची जाणीव, राष्ट्रप्रेम, नेतृत्वगुण रुजवणे यावर भर दिला जाणार आहे. यासाठी राज्य व जिल्हास्तरावरील योजना, युवा प्रशिक्षण केंद्र, युवा पुरस्कार, वसतीगृहे, महोत्सव, व्यक्तिमत्व विकास उपक्रम, युवा निधी आणि युवा प्रतिष्ठा निर्देशांक आदी बाबींचा समावेश केला जाणार असल्याची माहिती यावेळी देण्यात आली.