Newsworldmarathi Pune: महाराष्ट्र राज्य माध्यमिक आणि उच्च माध्यमिक शिक्षण मंडळाकडून (MSBSHSE) घेण्यात आलेल्या इयत्ता दहावीच्या परीक्षेचा निकाल अखेर उद्या जाहीर होणार आहे. निकाल मंगळवारी, दुपारी 1 वाजता मंडळाच्या अधिकृत संकेतस्थळावर उपलब्ध होणार असून, विद्यार्थ्यांना आपला निकाल ऑनलाईन पाहता येईल. काही दिवसांपूर्वी बारावीचा निकाल जाहीर झाला होता आणि त्यानंतरच दहावीच्या विद्यार्थ्यांमध्येही उत्सुकता शिगेला पोहोचली होती. ही प्रतीक्षा आता संपली असून, बोर्डाने निकालाची अधिकृत घोषणा केली आहे.
निकाल जाहीर झाल्यानंतर काही वेळातच विद्यार्थ्यांना त्यांच्या शाळांमधून मूळ गुणपत्रिकांचे वाटप करण्यात येईल. त्यामुळे विद्यार्थ्यांनी त्यानंतर आपल्या शाळांशी संपर्क साधावा, असेही बोर्डाकडून सांगण्यात आले आहे.
दरम्यान, निकालानंतर अकरावीच्या प्रवेशासाठी होणारी धावपळ आणि पालक-विद्यार्थ्यांची गैरसोय टाळण्यासाठी शिक्षण विभागाने महत्त्वाचा निर्णय घेतला आहे. यावर्षी अकरावीची संपूर्ण प्रवेश प्रक्रिया केंद्रीकृत ऑनलाईन पद्धतीने राबवण्यात येणार आहे. याबाबतचा निर्णय महाराष्ट्र राज्य शिक्षण मंडळाने घेतला असून, एक प्रसिद्धीपत्रक काढून त्याबाबत माहिती दिली आहे.
या निर्णयामुळे विद्यार्थ्यांना विविध कॉलेजांत प्रवेशासाठी फेरफटका मारण्याची गरज भासणार नाही. तसेच प्रवेश प्रक्रियेत पारदर्शकता आणि सुलभता सुनिश्चित होणार आहे. विद्यार्थ्यांनी बोर्डाच्या आणि अकरावी प्रवेशासाठी ठरवलेल्या अधिकृत संकेतस्थळावर वेळोवेळी अपडेट्स पाहावेत, असे आवाहन करण्यात आले आहे.
कुठे पाहाल निकाल?
https://results.digilocker.gov.in
https://sscresult.mahahsscboard.in
http://sscresult.mkcl.org
https://results.targetpublications.org
Recent Comments