Newsworldmarathi solapur: बाप लेकीच्या नात्याला काळिमा फासणारी घटना उघडकीस आली आहे. जन्मदात्या बापाने आपल्या पोटच्या मुलीचा गळा दाबून हत्या केल्याची संतापजनक घटना घडली आहे. या घटनेनंतर परिसरात एकच खळबळ उडाली आहे. या प्रकरणी पोलिसांनी आरोपीला ताब्यात घेतले असून, अटक करण्यात आली आहे. ओगसिद्ध रेवणसिद्ध कोठे असे नराधम बापाचे नाव आहे.
याबाबत अधिक माहिती अशी कि, श्रावणी ही आपल्या वडिलांसोबत दक्षिण सोलापूर तालुक्यातील कुसूर गावात राहत होती. आरोपी ओगसिद्धला एक मुलगा आणि तीन मुली आहेत. पत्नी सिव्हिल रुग्णालयात उपचार घेत होती. तर दोन मुली आणि मुलगा गावातील आजोळी राहण्यास गेले होते. घटनेच्या दिवशी मयत श्रावणी वडिलांजवळ मायेने झोपण्यासाठी गेली होती.
दरम्यान, नराधम बापाने आधी चिमुकलीचा गळा आवळून हत्या केली, नंतर घराशेजारी खड्डा खोदून तिचं प्रेत पुरलं. शुक्रवारी सकाळी आजोबा रेवणसिद्ध यांनी नात श्रावणी कुठंय. अशी चौकशी केली. तसेच गावात आणि आजोळी शोध घेतला, पण काही श्रावणी मिळाली नाही. त्यावेळी वस्तीवर जमलेल्या नातलगांच्या लक्षात आलं की, घराशेजारील खड्ड्यात नव्याने माती टाकलेली आहे आणि चिखलात पावलांचे ठसे उमटलेले दिसतात.
मात्र, नातलगांचा संशय वाढल्याने ओगसिद्ध याच्यावर दबाव टाकला. त्यावेळी त्याने “मीच गळा दाबून खून केला आणि तिला पुरलं” अशी थेट कबुली दिली आहे. या प्रकरणी मंद्रूप पोलिसांना घटनेची माहिती देण्यात आली. पोलिसांनी घटनास्थळी धाव घेत, आरोपीला ताब्यात घेतलं आहे. या निर्घृण हत्येचं नेमकं कारण अद्याप स्पष्ट झालेलं नाही. पोलिसांनी शवविच्छेदनासाठी मृतदेह ताब्यात घेतला असून, पुढील तपास पोलिस करीत आहेत.
Recent Comments