Newsworldmarathi Pune: वैष्णवी हगवणे आत्महत्या प्रकरणाने राज्यभरात खळबळ उडवली असून, तिच्या सासरच्या मंडळींवर गंभीर आरोप झाले आहेत. या पार्श्वभूमीवर सुशील हगवणेची एक जुनी सोशल मीडिया पोस्ट सध्या चर्चेचा विषय ठरली आहे. या पोस्टमध्ये त्याने ‘लेकीला नाही तर सुनेला निवडून आणूया’ असे आवाहन केले होते.
सुशील हगवणेने २०२४ मध्ये झालेल्या लोकसभा निवडणुकीच्या प्रचारादरम्यान ही पोस्ट केली होती. त्यावेळी उपमुख्यमंत्री अजित पवार यांच्या पत्नी सुनेत्रा पवार बारामती मतदारसंघातून निवडणूक लढवत होत्या. सुशीलने त्यांच्यासाठी प्रचार करताना ‘सूना घराबाहेर पडल्या तर स्वतःचं साम्राज्य उभारू शकतात, सूना सुद्धा इतिहास घडवू शकतात’ असे लिहिले होते.
मात्र, वैष्णवी हगवणेच्या आत्महत्येनंतर तिच्या सासरच्या मंडळींवर छळाचे आरोप झाले असून, सुशील हगवणेवरही गुन्हा दाखल करण्यात आला आहे. या पार्श्वभूमीवर नेटकऱ्यांनी सुशीलच्या जुन्या पोस्टवर संताप व्यक्त केला आहे. ‘लोका सांगे ब्रह्मज्ञान आणि स्वतः कोरडे पाषाण’ अशा प्रकारच्या प्रतिक्रिया सोशल मीडियावर उमटत आहेत.
पोस्टमधील ‘सूनेला निवडून द्या’ या आवाहनाच्या विरोधात नेटकऱ्यांनी ‘तुमच्या घरातील सुनांना नीट सांभाळायचं आणि इज्जत द्यायचं कळत नाही, आणि इथे लोकांना ज्ञान शिकवतोस’ अशा कठोर शब्दांत टीका केली आहे. या प्रकरणामुळे हगवणे कुटुंबीयांवर समाजातून रोष व्यक्त होत असून, सोशल मीडियावर त्यांच्याविरोधात संतापाची लाट उसळली आहे.
ती पोस्ट चर्चेत?
उपमुख्यमंत्री अजित पवारांच्या पत्नी सुनेत्रा यांनी बारामती लोकसभा मतदारसंघातून सुप्रिया सुळेंविरोधात निवडणूक लढवली होती. त्यावेळी सुशील हगवणे याने सुनेत्रा पवारांचा प्रचार केला होता. बारामतीत नणंद विरूध्द भावजय अशी लढत झाली होती. त्यावेळी त्यानं सुनेत्रा पवारांच्या प्रचारासाठी इन्स्टाग्रामवरती पोस्ट केली होती.
‘यावेळी लेकीला नाही तर सुनेला निवडून आणुया….सूना घराबाहेर पडल्या तर स्वतःचं साम्राज्य पण उभारू शकतात, सूना सुद्धा इतिहास घडवू शकतात हे जगाला दाखवून देऊया…. एक मत सुनेसाठी,’ अशी पोस्ट सुशील हगवणे याने केली होती.
Recent Comments