Newsworldmarathi Pune: जनता वसाहत परिसरातील प्रमुख मुख्य रस्त्यांवरील खड्ड्यांमुळे नागरिकांना होत असलेल्या प्रचंड गैरसोयीबाबत नगरसेविका प्रिया गदादे यांनी पुणे महानगरपालिकेच्या पथविभाग प्रमुख मा. अनिरुद्ध पावसकर यांना निवेदन दिले.
या निवेदनात नमूद करण्यात आले आहे की, जनता वसाहत परिसरात फक्त एकच मुख्य रस्ता असून तोच नागरिकांच्या दैनंदिन वाहतुकीचा आधार आहे. मात्र, या रस्त्यावर मोठ्या प्रमाणात खड्डे पडल्यामुळे नागरिकांना प्रवास करताना गंभीर अडचणींचा सामना करावा लागत आहे. शाळा, महाविद्यालये, कार्यालये तसेच दैनंदिन व्यवहारासाठी जाणाऱ्या नागरिकांची अवस्था अधिकच बिकट झाली आहे. विशेषतः पावसाळ्यात या खड्ड्यांमुळे अपघातांचा धोका निर्माण झाला आहे.
निवेदनात तात्काळ या रस्त्यांची दुरुस्ती व नियमित देखरेख करण्याची मागणी करण्यात आली. तसेच या कामाची तातडीने दखल न घेतल्यास जनता वसाहत कुटुंबातील नागरिकांच्या वतीने आंदोलन उभारण्याचा इशारा नगरसेविका गदादे यांनी दिला आहे. त्यांनी स्पष्ट केले की, माजी लोकप्रतिनिधी म्हणून लोकांच्या प्रश्नांसाठी लढणे ही आपली जबाबदारी आहे आणि नागरिकांना योग्य सोयीसुविधा मिळेपर्यंत आपण पाठपुरावा सुरू ठेवणार आहोत.
निवेदनानंतर पथविभाग प्रमुख अनिरुद्ध पावसकर यांनी तत्काळ प्रतिसाद देत संबंधित अधिकाऱ्यांना जागेची पाहणी करण्याचे आदेश दिले आहेत. तसेच आवश्यक ती रस्त्यांची दुरुस्ती जलदगतीने करण्यात यावी, असे निर्देश दिले. लवकरच या कामाला प्रारंभ होईल असा विश्वास नागरिकांनी व्यक्त केला आहे.
यामुळे जनता वसाहत परिसरातील नागरिकांमध्ये आता दिलासा आणि आशेचे वातावरण निर्माण झाले आहे. नगरसेविका प्रिया गदादे यांच्या पाठपुराव्यामुळे या प्रश्नावर सकारात्मक कार्यवाही होईल, अशी अपेक्षा व्यक्त केली जात आहे.
Recent Comments