पुणे एयरपोर्टवर मे अखेर नवे ‘सिक्युरिटी होल्ड एरिया

पुणे : प्रतिनिधी
पुणे विमानतळावरील नव्या ‘सिक्युरिटी होल्ड एरिया’चे (एसएचए) बांधकाम मार्चअखेर पूर्ण होण्याची शक्यता असून, आवश्यक परवानग्या पूर्ण झाल्यानंतर मेअखेर तो प्रवाशांसाठी खुला होईल, अशी माहिती अधिकाऱ्यांनी दिली. नागरी विमान सुरक्षा ब्युरोच्या मान्यतेनंतरच हा विभाग कार्यान्वित होणार असल्याने प्रक्रियेस काही काळ लागू शकतो, असे स्पष्ट करण्यात आले.

नवा एसएचए जुन्या आगमन विभागात उभारण्यात येत असून, त्यामुळे प्रस्थान विभागात अतिरिक्त जागा उपलब्ध होणार आहे. या प्रकल्पामुळे सुमारे चार हजार चौरस मीटर क्षेत्रफळाची वाढ होईल. तसेच १४ नवे ‘चेक-इन’ काउंटर, तीन सुरक्षा तपासणी यंत्रणा आणि दोन बोर्डिंग गेट्स उभारण्यात येणार आहेत. प्रवाशांच्या सुरळीत हालचालीसाठी आणि वाढत्या प्रवासी संख्येचा ताण सांभाळण्यासाठी हा प्रकल्प महत्त्वाचा मानला जात आहे.

विमानतळ प्रशासनानुसार, २०२५ मध्ये विमानतळावर १ कोटी ६ लाखांहून अधिक प्रवासी हालचाली नोंदल्या गेल्या. २०२६ मध्ये ही संख्या आणखी दहा लाखांनी वाढण्याचा अंदाज आहे. नव्या सुविधेमुळे प्रवाशांना अधिक सुलभ आणि वेगवान सेवा मिळेल, असा दावा प्रशासनाने केला आहे; मात्र मंजुरी प्रक्रियेमुळे होणाऱ्या विलंबाबाबत काही प्रवाशांनी नाराजी व्यक्त केली आहे