Newsworldmarathi Pune: पर्यावरण संवर्धन, सामाजिक बांधिलकी आणि समाजात सकारात्मक बदल घडविण्यासाठी सातत्याने केलेल्या उल्लेखनीय कार्याची दखल घेत पुणे महानगरपालिकेचे सभागृह नेते गणेश बिडकर यांना प्रतिष्ठेच्या ‘ग्रीन क्रुसेडर अवॉर्ड २०२६’ ने सन्मानित करण्यात आले. महाराष्ट्राचे राज्यपाल जिष्णू देव वर्मा आणि केंद्रीय महिला व बालविकास राज्यमंत्री सावित्री ठाकूर यांच्या हस्ते त्यांना हा पुरस्कार प्रदान करण्यात आला.
यावेळी विधान परिषदेचे सभापती राम शिंदे, पर्यावरण मंत्री पंकजा मुंढे यांच्यासह विविध क्षेत्रातील मान्यवर उपस्थित होते. भामला फाउंडेशन आणि पंचशील फाउंडेशन वतीने आयोजित करण्यात आलेल्या पुणे चॅप्टर अंतर्गत हा सन्मान सोहळा पार पडला.
गेली अनेक वर्षे पुणे महानगरपालिकेत नगरसेवक, शहर सुधारणा समितीचे अध्यक्ष, स्थायी समितीचे अध्यक्ष तसेच सभागृह नेते अशा विविध महत्त्वपूर्ण जबाबदाऱ्या गणेश बिडकर यांनी सक्षमपणे सांभाळल्या आहेत. या जबाबदाऱ्या पार पाडताना केवळ प्रशासकीय कामकाजापुरते मर्यादित न राहता समाजाशी असलेली बांधिलकी जपत प्रत्यक्ष कृती, लोकसहभाग आणि दीर्घकालीन सकारात्मक बदल घडविण्याला त्यांनी नेहमीच प्राधान्य दिले आहे.
शहराच्या दूरगामी आणि शाश्वत विकासासाठी महत्त्वपूर्ण ठरणारे विविध विकास प्रकल्प मार्गी लागावेत, तसेच पुणे शहराच्या जीवनवाहिन्या असलेल्या नद्यांचे संवर्धन व्हावे, यासाठी त्यांनी आपल्या कार्यकाळात सातत्याने प्रयत्न केले आहेत. नागरी सुविधा, पायाभूत विकास आणि नागरिकांच्या दैनंदिन जीवनाशी निगडित प्रश्नांवर काम करताना विकास प्रक्रियेत लोकसहभागाला महत्त्व देण्याची भूमिका त्यांनी कायम जपली आहे.
भामला फाउंडेशन आणि पंचशील फाउंडेशन यांच्या संयुक्त विद्यमाने पुणे चॅप्टरचे आयोजन करण्यात आले होते. पर्यावरण संवर्धनासाठी योगदान देणाऱ्या तसेच सामाजिक क्षेत्रात उल्लेखनीय कार्यातून सकारात्मक बदल घडविणाऱ्या व्यक्ती आणि संस्थांच्या कार्याची दखल घेण्यासाठी ‘ग्रीन क्रुसेडर अवॉर्ड’ प्रदान करण्यात येतो.
Recent Comments