Newsworldmarathi Mumbai: जात प्रमाणपत्र किंवा जात वैधता प्रमाणपत्र मिळवण्यासाठी सरकारी कार्यालयांचे फेरे मारणाऱ्या लाखो अर्जदारांसाठी दिलासादायक बातमी आहे. आता ही प्रक्रिया ऑनलाइन आणि पूर्णतः संगणकीकृत केली जाणार असून, एका क्लिकवर प्रमाणपत्र मिळण्याचा मार्ग खुला होणार आहे. ही प्रणाली लवकरच राबवली जाणार आहे. फडणवीस सरकारने या प्रस्तावाला मंजुरी दिली आहे आणि पुढील १०० दिवसांत कृती आराखडा तयार करण्याचे आदेशही दिले आहेत.
काय आहे नव्या प्रणालीचं वैशिष्ट्य?
AI-आधारित इंटरफेस: अर्जदारांना अर्ज करताना मार्गदर्शन करणारा नियमाधारित इंटरफेस उपलब्ध असणार आहे.
आधारशी थेट जोडणी: अर्जदाराचे नाव, वडिलांचे किंवा पतीचे नाव आणि आधार कार्डातील पत्ता — ही माहिती प्रणाली स्वतःच पडताळणार.
DG Locker एकत्रीकरण: आवश्यक कागदपत्रे डिजीलॉकरमधून थेट पडताळली जातील, त्यामुळे बनावट कागदपत्रांची शक्यता नाहीशी होईल.
जलद निर्णयप्रक्रिया: सादर केलेल्या माहितीची तात्काळ पडताळणी होऊन प्रमाणपत्र काही मिनिटांत मिळण्याची शक्यता.
कोणाला होणार फायदा?
सरकारी नोकरी, शैक्षणिक प्रवेश, निवडणूक आरक्षण, तसेच विविध योजनांचा लाभ घेण्यासाठी अनुसूचित जाती, जमाती, भटक्या जमाती, मागासवर्गीय व विशेष मागासवर्गीय नागरिकांना जात प्रमाणपत्र आवश्यक असते. सध्याच्या पेपर-आधारित प्रक्रियेत वेळ व श्रम वाया जातात. त्यामुळे ही संगणकीकृत प्रणाली लाखो अर्जदारांसाठी गेम चेंजर ठरणार आहे.
कोणाच्या मदतीने तयार होणार यंत्रणा?
ही प्रणाली डॉ. बाबासाहेब आंबेडकर संशोधन व प्रशिक्षण संस्था (बार्टी) आणि टाटा कन्सल्टन्सी सर्व्हिसेस (TCS) यांच्या संयुक्त सहकार्याने विकसित होणार आहे.
Recent Comments