Newsworldmarathi Amravati: शेतकऱ्यांच्या कर्जमाफीसह शेतमजूर, दिव्यांग आणि ग्रामपंचायत कर्मचाऱ्यांच्या विविध मागण्यांसाठी प्रहार संघटनेचे नेते व आमदार बच्चू कडू यांनी आक्रमक पवित्रा घेतला आहे. शासनाकडून वेळोवेळी केल्या गेलेल्या आश्वासनांची आठवण करून देण्यासाठी प्रहार संघटनेने आजपासून राज्यभरात चक्काजाम आंदोलन छेडण्याचा इशारा दिला आहे.
“शेतकऱ्यांचा सातबारा कोरा करा” या मुख्य मागणीसाठी बच्चू कडूंनी अलीकडेच विदर्भात व्यापक पदयात्रा काढली होती. या पदयात्रेदरम्यानच आंदोलनाच्या पुढील टप्प्यांची दिशा ठरवण्यात आली होती. त्यानुसार, शासनाला दडपणात आणण्यासाठी रस्त्यावर उतरून संघर्ष उभारण्याचा निर्णय घेण्यात आला आहे.
याच पार्श्वभूमीवर अमरावती जिल्ह्यातील परतवाडा येथे बच्चू कडू यांच्या नेतृत्वाखाली चक्काजाम आंदोलनास सुरुवात करण्यात आली. या आंदोलनात शेतकरी, शेतमजूर, दिव्यांग, ग्रामपंचायत कर्मचारी तसेच प्रहार संघटनेचे कार्यकर्ते मोठ्या संख्येने सहभागी झाले आहेत. रस्त्यावर ठिय्या देत आंदोलकांनी शासनविरोधात जोरदार घोषणाबाजी केली.
बच्चू कडूंनी स्पष्ट केले आहे की, केवळ आश्वासनांवर वेळ काढणाऱ्या शासनाला आता प्रत्यक्ष निर्णय घ्यायला भाग पाडले जाईल. शेतकरी आणि कष्टकरी वर्गाच्या हक्कांसाठी हे आंदोलन अधिक तीव्र करण्यात येईल, असा इशाराही त्यांनी दिला आहे.
राज्य सरकारने त्वरीत निर्णय न घेतल्यास आंदोलनाचा विस्तार संपूर्ण महाराष्ट्रात करण्यात येईल, असा निर्वाणीचा इशारा प्रहार संघटनेने दिला आहे.
Recent Comments