Newsworldmarathi Pune: पुण्यातील एरंडवणे परिसरातून एक धक्कादायक आणि हृदयद्रावक घटना समोर आली आहे. रवी (वय 35 वर्षे) या व्यक्तीने आपल्या सात महिन्यांच्या गर्भवती पत्नीला इतकी अमानुष मारहाण केली की तिचा गर्भपात झाला. या प्रकरणामुळे परिसरात प्रचंड खळबळ उडाली आहे.
पीडित महिलेने अलंकार पोलीस स्टेशनमध्ये तक्रार दाखल केली असून, पोलिसांनी आरोपी पतीविरोधात गंभीर गुन्हा नोंदवला आहे. पोलिसांकडून मिळालेल्या माहितीनुसार, रवी हा पत्नीच्या चारित्र्यावर सतत संशय घेत असे. तो तिला मानसिक आणि शारीरिक छळ देत होता. सततच्या त्रासामुळे पीडित महिला आधीच धास्तावलेली होती.
ही अमानुष घटना 20 जुलै रोजी रात्री सुमारे साडेअकरा वाजता घडली. रवीने त्या रात्री पुन्हा एकदा पत्नीशी वाद घालण्यास सुरुवात केली. रागाच्या भरात त्याने तिच्या पोटावर जोरात लाथ मारली. त्यानंतर तिचे केस धरून फरफटत नेले आणि जबरदस्त मारहाण केली. या मारहाणीमुळे पीडितेचा गर्भपात झाला, असे डॉक्टरांच्या तपासणीत निष्पन्न झाले.
या अमानवी कृत्यामुळे आरोपीवर महिला अत्याचार, मारहाण, गर्भपात घडवून आणल्याचा गुन्हा दाखल करण्यात आला आहे. पोलिसांनी या प्रकरणी अधिक तपास सुरू केला आहे. स्थानिक नागरिकांनी या घटनेचा तीव्र निषेध केला असून आरोपीला कठोर शिक्षा व्हावी, अशी मागणी होत आहे.
Recent Comments