Newsworldmarathi Pune: साधू वासवानींच्या विचारांची आजच्या काळातील गरज असून “प्राणिमात्रांवरील दया आणि अहिंसेचा मार्ग हा मानवतेचा खरा धर्म आहे. साधू वासवानी यांनी आयुष्यभर दिलेला हा संदेश आजही तितकाच महत्त्वाचा आहे. २५ नोव्हेंबरला सर्वांनी मिळून ‘मांसरहित दिवस’पाळावा आणि त्यांच्या करुणामय विचारांना व्यापक स्वरूप द्यावे,” असे आवाहन पुणे महापालिका निवडणूक प्रमुख गणेश बिडकर यांनी केले. मानवतेची सेवा करताना कोणतीही जात, धर्म किंवा भेदभाव न पाहता सर्वांना प्रेमाने वागवावे, हा त्यांचा संदेश समाजात पोहोचणे आवश्यक असल्याचेही त्यांनी सांगितले.
करुणा, प्रेम आणि मानवतेची शिकवण देणारे गुरुदेव साधू वासवानी यांच्या १४६व्या जयंतीनिमित्त पुण्यात विशेष कार्यक्रमाचे आयोजन करण्यात आले. साधूवासवानी मिशनतर्फे आयोजित या कार्यक्रमात त्यांच्या प्रेरणादायी शिकवणीचा वेध घेण्यात आला. यावेळी ते बोलत होते.
कार्यक्रमाला साधू वासवानी मिशनच्या प्रमुख कृष्णा दीदी उपस्थित होत्या. त्यांच्या कार्याचा गौरव म्हणून गणेश बिडकर यांच्या हस्ते त्यांचा सत्कार करण्यात आला. साधू वासवानी मिशन सामाजिक, शैक्षणिक आणि आध्यात्मिक क्षेत्रात दीर्घकाळापासून करत असलेल्या सेवाभावी उपक्रमांची माहितीही यावेळी देण्यात आली. उपस्थितांनी गुरुदेवांच्या शिकवणीचे स्मरण करत समाजोपयोगी कार्यासाठी प्रेरणा घेतली.कार्यक्रमात सहभागी सर्वांनी साधू वासवानींच्या आदर्शांना अनुसरून मानवतेचे मूल्य जपण्याचा संकल्प व्यक्त केला.
Recent Comments