Newaworldmarathi Pune: पुणे महानगरपालिका आयुक्त नवल किशोर राम यांची राष्ट्रवादी युवक काँग्रेस – शरदचंद्र गटाच्या पुणे शहर शिष्टमंडळाने भेट घेऊन शहरातील नाईट क्लब, पब, बार, लॉज, हॉटेल्स, रेस्टॉरंट्स आणि तत्सम व्यावसायिक आस्थापनांमधील वाढत्या अग्निसुरक्षा धोक्यांवर सविस्तर चर्चा केली. अलीकडेच घडलेल्या भीषण आगीच्या घटनेच्या पार्श्वभूमीवर ही बैठक विशेष लक्षवेधी ठरली.
शिष्टमंडळाने आयुक्तांसमोर शहरातील अनेक ठिकाणी अग्निसुरक्षा उपकरणांची अनुपलब्धता, अपुरी साधने, नियमांचे उल्लंघन, तसेच सुरक्षा तपासणीत दिसून आलेल्या त्रुटींबाबतचे मुद्दे मांडले. या त्रुटीमुळे नागरिकांच्या जीवितास गंभीर धोका निर्माण होत असून या संदर्भात तातडीची आणि कठोर कारवाईची मागणी करण्यात आली. नागरिक सुरक्षितता हा सर्वोच्च प्राधान्याचा विषय असल्याने प्रशासनाने तातडीने हस्तक्षेप करण्याची आवश्यकता शिष्टमंडळाने स्पष्ट केली.
बैठक सकारात्मक वातावरणात पार पडली. आयुक्त नवल किशोर राम यांनी शिष्टमंडळास आश्वस्त करताना शहरातील सर्व संबंधित व्यावसायिक आस्थापनांची टप्प्याटप्प्याने अग्निसुरक्षा तपासणी करण्यात येईल, असे स्पष्ट केले.
त्यांनी सांगितले की उणिवा आढळल्यास संबंधितांवर कठोर, तसेच कायदेशीर कारवाई केली जाणार आहे.अग्निसुरक्षा नियमांचे पालन अनिवार्य करण्यासाठी तातडीच्या उपाययोजना राबवण्यात येणार आहेत.नवीन सुरक्षा मार्गदर्शक तत्त्वांची प्रभावी अंमलबजावणी होईल यासाठी प्रशासन कडक पावले उचलेल.
नागरिकांच्या सुरक्षेला प्राधान्य देत नगरपालिका आवश्यक ती सर्व उपाययोजना करणार असल्याचा विश्वास आयुक्तांनी व्यक्त केला. या भेटीवेळी राष्ट्रवादी युवक काँग्रेस पुणे शहर अध्यक्ष किशोर कांबळे, अजिंक्य पालकर, अमोघ ढमाले, अजय पवार, मधुकर भगत, आशिष एरंडकर यांच्यासह अनेक पदाधिकारी व कार्यकर्ते उपस्थित होते.
Recent Comments