Newsworldmarathi Pune : महाराष्ट्र विधान परिषदेच्या २०२६ मध्ये होणाऱ्या स्नातक आणि शिक्षक मतदारसंघांच्या निवडणुकीसाठी भारतीय जनता पक्षाने आपल्या उमेदवारांची घोषणा केली आहे. भाजपच्या केंद्रीय निवड समितीने रविवारी (४ ऑक्टोबर) तीन उमेदवारांच्या नावांना मंजुरी दिली. यामध्ये पुणे विभाग पदवीधर मतदारसंघातून डॉ. (श्रीमती) स्मिता योगेश जाधव यांना उमेदवारी देण्यात आली आहे.
पुणे विभाग पदवीधर मतदारसंघाची निवडणूक यंदा चुरशीची होण्याची शक्यता आहे. या मतदारसंघातून भाजपने डॉ. स्मिता जाधव यांच्या नावावर शिक्कामोर्तब केल्याने निवडणुकीतील राजकीय समीकरणांना वेग येण्याची शक्यता आहे. पदवीधर मतदारांच्या प्रश्नांवर तसेच शिक्षण, रोजगार आणि युवा वर्गाशी संबंधित मुद्द्यांवर आगामी काळात प्रचाराची दिशा ठरण्याची शक्यता आहे.
दरम्यान, भाजपने नागपूर विभाग पदवीधर मतदारसंघातून सुधाकर विठ्ठलराव कोहळे यांना, तर पुणे विभाग शिक्षक मतदारसंघातून कौस्तुभ मुरलीधर गावडे यांना उमेदवारी दिली आहे.
महाराष्ट्रातील पदवीधर आणि शिक्षक मतदारसंघांच्या निवडणुकीकडे राजकीय वर्तुळाचे लक्ष लागले असून, विविध पक्षांकडून उमेदवारांची घोषणा होताच निवडणुकीचे चित्र अधिक स्पष्ट होणार आहे. पुणे पदवीधर मतदारसंघात डॉ. स्मिता जाधव यांच्या उमेदवारीनंतर आता इतर पक्षांकडून कोणाला मैदानात उतरवले जाते, याकडे सर्वांचे लक्ष लागले आहे.
Recent Comments