युवक काँग्रेसने खडकी रेल्वे स्टेशनवर अडवली लोणावळा- पुणे लोकल ट्रेन
Newsworldmarathi Pune : नॅशनल हेरॉल्ड प्रकरणाचा गैरवापर करून भारतीय जनता पक्षाने काँग्रेसच्या सर्वोच्च नेतृत्वाला लक्ष्य करण्याचा प्रकार पुन्हा एकदा समोर आला आहे. श्रीमती सोनिया गांधी आणि लोकसभेतील विरोधी पक्षनेते राहुल गांधी यांना नोटीस पाठवून केंद्र सरकारने राजकीय सूडबुद्धीचा कळस गाठला आहे. या निषेधार्थ महाराष्ट्र युवक काँग्रेसच्या वतीने शिवाजीनगर रेल्वे स्थानकावर पुणे-लोणावळा लोकल ट्रेन रोखून तीव्र आंदोलन करण्यात आले.
यावेळी राज्य कार्याध्यक्ष शिवराज मोरे म्हणाले,
“भाजपकडून सुरु असलेली ही राजकीय सूडाची साखळी आम्ही खपवून घेणार नाही. राहुल गांधींवर खोट्या केसेस लावून त्यांना गप्प करण्याचा प्रयत्न हा लोकशाहीवर हल्ला आहे. देशात भाजपचा हुकूमशाही कारभार आम्ही चालू देणार नाही. रस्त्यावर उतरून, रेल्वे अडवून, सरकारला हादरवण्याचं काम युवक काँग्रेस करणार!”
मीडिया विभागाचे अध्यक्ष अक्षय जैन यांनी सांगितले,
“नॅशनल हेरॉल्ड प्रकरण फक्त एक निमित्त आहे – सत्य बोलणाऱ्या राहुल गांधींना धाक दाखवण्याचा हा डाव आहे. पण आम्ही ही इडी, सीबीआय, नोटीसांची भाषा समजून घेतली आहे. जर आमच्या नेत्यांना छळाल तर प्रत्येक युवक काँग्रेस कार्यकर्ता रस्त्यावर उतरून सरकारला प्रश्न विचारेल.”
पुणे शहराध्यक्ष सौरभ अमराळे यांनी आंदोलनाचे नेतृत्व करताना म्हटले, “पुणे शहरातून आम्ही हे स्पष्ट करतो की, सोनिया गांधी आणि राहुल गांधी हे आमचे अभिमानाचे नेते आहेत. त्यांच्यावर अन्याय झाला तर पुणे युवक काँग्रेस शांत बसणार नाही. आज ट्रेन थांबवली आहे, उद्या राज्य थांबवू – इतकं लक्षात ठेवा!
या आंदोलनामुळे काही काळासाठी लोकल सेवा विस्कळीत झाली होती. पोलीस प्रशासनाने आंदोलनकर्त्यांना तातडीने हटवून परिस्थिती नियंत्रणात आणली. युवक शिवराज मोरे, अक्षय जैन, सौरभ अमराळे, तारीख बागवान, प्रथमेश आबनावे, प्रवीण बिरादार, महेश म्हेत्रे, कौस्तुभ नवले, चैतन्य जायभाये मतीन शेख, विक्रांत धोत्रे, राहुल शिंदे,
अक्षय बहिरट, मुरली बुद्रराम, हर्षद हांडे, आदी उपस्थित होते.
Anaya Bangar: ‘क्रिकेटर मला घाणेरडे फोटो पाठवायचे’ : संजय बांगर यांच्या मुलीचा खळबळजनक आरोप
Newsworldmarathi Mumbai : माजी भारतीय क्रिकेटपटू आणि प्रशिक्षक संजय बांगर यांची मुलगी अनया बांगर हिने नुकताच एक मोठा खुलासा केला आहे. तिने तिच्या लिंग बदलाच्या प्रवासानंतर क्रिकेट क्षेत्रात तिला आलेल्या त्रासांविषयी आणि भेदभावांविषयी उघडपणे बोलले आहे.
अनया बांगरचा खुलासा
अनया, जी पूर्वी आर्यन म्हणून ओळखली जात होती, तिने हार्मोन रिप्लेसमेंट थेरपी आणि लिंग बदल शस्त्रक्रियेनंतर तिच्या ओळखीचा स्वीकार केला. तिच्या या प्रवासानंतर, तिला क्रिकेट क्षेत्रात अनेक अडचणींचा सामना करावा लागला. तिने सांगितले की, काही क्रिकेटपटूंनी तिला अश्लील फोटो पाठवले आणि तिला त्रास दिला. तिच्या मते, क्रिकेट क्षेत्रात अजूनही “toxic masculinity” म्हणजेच विषारी पुरुषत्वाची संस्कृती आहे, ज्यामुळे तिला तिच्या ओळखीबद्दल गुपित ठेवावे लागली.
अनेक क्रिकेटपटूंसोबत क्रिकेट खेळली
अनायाने सांगितले की, “ती मुशीर खान, सरफराज खान आणि यशस्वी जैस्वाल यांसारख्या प्रसिद्ध क्रिकेटपटूंसोबत खेळली आहे. माझे वडील एक सेलिब्रिटी असल्याने मला स्वतःबद्दल सर्व काही लपवावे लागले. क्रिकेटचे जग असुरक्षितता आणि विषारी पुरुषत्वाने भरलेले आहे.” लिंग बदल शस्त्रक्रियेनंतर सहकारी क्रिकेटपटूंच्या प्रतिक्रियेबद्दल विचारले असता, अनायाने सांगितले की, “मला पाठिंबा मिळाला आहे आणि काही छळ देखील झाला आहे.
क्रिकेट कारकिर्दीतील अडचणी
अनया बांगरने इस्लाम जिमखाना आणि इंग्लंडमधील हिन्कले क्रिकेट क्लबसाठी खेळले आहे. तिच्या लिंग बदलानंतर, आंतरराष्ट्रीय क्रिकेट परिषदेने (ICC) ट्रान्सजेंडर महिलांना महिला आंतरराष्ट्रीय क्रिकेटमध्ये सहभागी होण्यास मनाई केली आहे, ज्यामुळे तिच्या क्रिकेट कारकिर्दीत अडथळे निर्माण झाले.
अनयाचा अनुभव
अनयाने लल्लनटॉपला दिलेल्या मुलाखतीत सांगितले की, ती आठ-नऊ वर्षांची असताना तिला वाटायचे की ती मुलगी आहे. तिने तिच्या आईच्या कपड्यांमध्ये स्वतःला पाहून, “मी मुलगी आहे, मला मुलगी व्हायचं आहे” असं स्वतःला सांगितलं.
अनयाच्या या धाडसी खुलाशामुळे क्रिकेट क्षेत्रातील ट्रान्सजेंडर व्यक्तींना येणाऱ्या अडचणी आणि भेदभाव समोर आले आहेत. तिच्या या अनुभवामुळे, क्रिकेट क्षेत्रात समावेशकतेबद्दल आणि ट्रान्सजेंडर व्यक्तींच्या हक्कांबद्दल चर्चा सुरू झाली आहे.
भाजपचा हा ज्येष्ठ नेता अडकणार रिंकूसोबत विवाह बंधनात
Newsworldmarathi Delhi : भाजपाचे ज्येष्ठ नेते आणि पश्चिम बंगालमधील माजी प्रदेशाध्यक्ष दिलीप घोष वयाच्या 61व्या वर्षी विवाह बंधनात अडकणार आहेत. माजी खासदार आणि माजी आमदार असलेले दिलीप घोष हे आज (शुक्रवारी) न्यू टाऊन स्थित आपल्या निवासस्थानी साधेपणाने होणाऱ्या विवाह सोहळ्यात रिंकू मजूमदार यांच्यासोबत लग्नगाठ बांधणार आहेत.
भाजप नेते दिलीप घोष त्यांच्या ज्वलंत भाषणांमुळे अनेकदा चर्चेत असतात.त्यांची वधू रिंकू मजुमदार आहे, दक्षिण कोलकाता येथील भाजप महिला मोर्चाच्या त्या नेत्या आहेत. सूत्रांनी दिलेल्या माहितीनुसार, दोघेही कोलकात्यातील न्यू टाउन येथे मॉर्निंग वॉक दरम्यान भेटले होते. भाजप नेते दिलीप घोष लग्न करणार आहेत आणि या बातमीने बंगालच्या राजकीय वर्तुळात खळबळ उडाली आहे. गेल्या लोकसभा निवडणुकीत झालेल्या पराभवानंतर घोष एकटे पडले होते. त्याच कठीण काळात ज्या महिलेने त्यांना साथ दिली ती त्यांची जोडीदार आहे, असे वृत्तांमधून समोर आले आहे.
हा विषय सध्या चर्चेचा विषय बनला असला तरी, राज्य भाजपचे वरिष्ठ नेते मोठ्या प्रमाणात गप्प राहिले आहेत.विरोधी पक्ष तृणमूल काँग्रेसच्या नेत्यांनी दिलीप यांच्यावर अभिनंदनाचा वर्षाव केला आहे. हे लग्न अगदी साध्या आणि कौटुंबिक वातावरणात पार पडणार आहे, ज्यामध्ये फक्त जवळचे नातेवाईक आणि मित्र उपस्थित राहणार आहेत. सध्या कोणत्याही प्रकारच्या भव्य कार्यक्रमाचे नियोजन करण्यात आलेले नाही.
वृत्तानुसार, शुक्रवारी कोलकाता येथील दिलीप यांच्या निवासस्थानी एका साध्या समारंभात त्यांचे लग्न होणार आहे. रिंकू मजुमदार त्याची वधू होणार आहे. ती भाजपचीही सदस्य आहे. दिलीप घोष आतापर्यंत अविवाहित होते. वृत्तानुसार, रिंकू यांनी पहिल्यांदा लग्नाचा प्रस्ताव ठेवला होता, विशेषतः गेल्या लोकसभा निवडणुकीत दिलीप घोष यांचा पराभव झाल्यानंतर त्या त्यांच्या सोबत उभ्या राहिल्या, त्यांना साथ दिली. हे लग्न अगदी साध्या आणि कौटुंबिक वातावरणात पार पडणार आहे, ज्यामध्ये फक्त जवळचे नातेवाईक आणि मित्र उपस्थित राहणार आहेत. सध्या कोणत्याही प्रकारच्या भव्य कार्यक्रमाचे नियोजन केलेले नाही.
‘एमपीएल’च्या तिसऱ्या हगामांसाठी ‘पुनीत बालन ग्रुप’चा ‘कोल्हापूर टस्कर’ संघ सज्ज
Newsworldmarathi Pune : लोकप्रिय ठरलेल्या महाराष्ट्र प्रीमियर लीगच्या (एमपीएल) तिसऱ्या हगामांसाठी ‘पुनीत बालन ग्रुप’चा ‘कोल्हापूर टस्कर’ संघ सज्ज झाला आहे. या लीगसाठी झालेल्या खेळाडूंच्या लिलावामध्ये (ऑक्शन) संघातील जुन्या खेळाडूंबरोबरच नवीन गुणी चेहऱ्यांनाही ‘पुनीत बालन ग्रुप’ने संधी दिली आहे.
‘महाराष्ट्र क्रिकेट असोसिएशन’ने इंडियन प्रिमियर लीगच्या (आयपीएल) धर्तीवर ‘महाराष्ट्र प्रीमियर लीग’ (एमपीएल) सुरू केली आहे. २०२३ पासून सुरू झालेल्या या लीगमध्ये पुणे, कोल्हापूर, रत्नागिरी, संभाजीनगर, नाशिक आणि सोलापूर या सहा संघाचा समावेश आहे. त्यात ‘कोल्हापूर टस्कर’ या पुण्यातील युवा उद्योजक आणि ‘पुनीत बालन ग्रुप’चे अध्यक्ष पुनीत बालन यांच्याही संघाचा समावेश आहे. दरम्यान लीगच्या तिसऱ्या हगामांसाठी पुण्यात गुरुवारी खेळाडूंच्या लिलावाची प्रक्रिया पार पडली. त्यात ‘कोल्हापूर टस्कर’ या संघाने जुन्या ११ खेळाडूंना आपल्याकडे कायम ठेवत नव्याने तब्बल १८ खेळाडूंसाठी बोली लावत त्यांचाही आपल्या संघात समावेश केला आहे. त्यामुळे ‘कोल्हापूर टस्कर’ संघाकडे आता तब्बल २९ खेळाडू असणार आहेत आणि हा एमपीएल मधील हा सुपर संघ ठरला आहे. या संघातील रजनीश गुरबानी या खेळाडूंवर सर्वाधिक ५ लाख २० हजारांची बोली लागली होती. त्यामध्ये ‘पुनीत बालन ग्रुप’ने बोलीची सर्वाधिक रक्कम देत या खेळाडूला संघात घेतले.
– असा आहे कोल्हापूर टस्कर संघ
जुने खेळाडू- राहुल त्रिपाठी (आयकॉन प्लेअर), अंकित बावणे ( कर्णधार), अथर्व डाकवे, आत्मन पोरे, सिध्दार्थ म्हात्रे, श्रीकांत मुंढे, श्रेयस चव्हाण, सचिन दास, निहाल तुसमाड, सुमित मरकाली
नवीन खेळाडू- रजनीश गुरबानी, अथर्व वनवे, दिग्विजय जाधव, आनंद ठेंगे, दीपक डांगी, भार्गव पाठक, हार्दिक कुरंगळे, वेदांत पाटील, आर्यन शहा, विशांत मोरे, सुमित ढेंगरे, आयुष उभे, ऋतुराज विरकर, शुभम माने, निलय निवासकर, राजवीर जगताप, दिलीप मालवीय आणि सुनील यादव.
‘महाराष्ट्र प्रीमियर लीग’च्या (एमपीएल) दोन्ही हंगामात आमच्या ‘कोल्हापूर टस्कर’ संघाने चांगली कामगिरी केली. गतवर्षीच्या स्पर्धेत अंतिम फेरीत मजल मारली, मात्र आम्हाला निसर्गाची साथ लाभली नाही. आता तिसऱ्या हगामांसाठी ‘कोल्हापूर टस्कर’ संघ पुन्हा सज्ज झाला आहे. आमच्या संघात आम्ही नव्याने गुणी आणि होतकरु खेळाडूंना संधी दिली आहे. कोल्हापूर संघाला घवघवीत यश मिळवून देण्याबरोबरच हे खेळाडू पुढे भारतीय संघात जाऊन देशाचंही नाव उज्ज्वल करतील, अशी अपेक्षा आहे.– पुनीत बालन मालक, कोल्हापूर टस्कर व अध्यक्ष, पुनीत बालन ग्रुप
‘‘महाराष्ट्र प्रीमियर लीग’ (एमपीएल) यावर्षीही अतिशय जोमाने संपन्न होईल. राज्याच्या कानाकोपऱ्यातील होतकरु खेळाडूंना संधी देण्याचा हा एक प्रामाणिक प्रयत्न आहे. शिवाय अधिकाधिक प्रेक्षक या लीगसोबत जोडण्याचा आम्ही प्रयत्न करणार आहोत. इतर राज्याच्या लीगच्या तुलनेत डिजिटल मीडियावरही ‘महाराष्ट्र प्रीमियर लीग’ला अतिशय चांगला प्रतिसाद आहे आणि तो यावर्षी आणखी वाढेल याची आम्हाला खात्री आहे.’’– रोहित पवार आमदार व अध्यक्ष, महाराष्ट्र क्रिकेट असोसिएशन
धक्कादायक…! १७ वर्षीय अल्पवयीन मुलीवर जबरदस्तीने अनेकवेळा लैंगिक अत्याचार
Newsworldmarathi Mumbai : बिहार राज्यातून आलेल्या एका १७ वर्षीय अल्पवयीन मुलीवर गत महिनाभरात अनेकवेळा जबरदस्तीने लैंगिक अत्याचार केल्याचा प्रकार धक्कादायक प्रकार मुंबईच्या वाशीमध्ये घडला आहे. या घटनेतील पीडित मुलीने आपल्या मैत्रिणीला या प्रकाराची माहिती दिल्यानंतर हा प्रकार उघडकीस आला. वाशी पोलिसांनी या प्रकरणातील आरोपी विनोद भागेसिंग बिष्ट (वय-४६) याला बलात्कार आणि पॉक्सो कलमाखाली अटक केली आहे.
पोलिसांनी दिलेल्या माहितीनुसार, पीडित मुलगी मूळची बिहार राज्यातील आहे, तर आरोपी विनोद बिष्ट हा उत्तराखंड राज्यातला आहे. आरोपी वाशी सेक्टर १० मधील जे.एन. २ वसाहतीत राहण्यास आहे. आरोपी विनोद बिष्ट हा भोजपुरी चित्रपटाच्या प्रोडक्शनमध्ये काम करत असल्याने काही दिवसांपूर्वी त्याची बिहार राज्यात राहणाऱ्या पीडित मुलीच्या आईसोबत ओळख झाली होती.
त्यावेळी त्याने पीडित मुलीच्या आईसोबत चर्चा करताना त्यांच्या मुलीला चांगले काम मिळवून देण्याचे आश्वासन दिले होते. त्यामुळे पीडित मुलीच्या आईने मुलीला आरोपीकडे पाठवून दिले होते. त्यानंतर पीडित मुलगी मागील महिनाभरापासून आरोपीच्या घरी राहत होती. याच कालावधीत आरोपीने मुलीवर जबरदस्तीने लैंगिक अत्याचार केले. न्यायालयाने आरोपीची २१ एप्रिलपर्यंत पोलीस कोठडीत रवानगी केली आहे.
पुणेकरांनो लक्ष द्या! बाबा भिडे पूल दीड महिना वाहतुकीसाठी बंद, वाहतूक कोंडी वाढण्याची शक्यता
Newsworldmarathi Pune : आधीच वाहनांच्या गर्दीने त्रस्त असलेल्या पुणेकरांसाठी आणखी एक अडथळा निर्माण होणार आहे. डेक्कन जिमखाना परिसरातील बाबा भिडे पूल मेट्रोच्या कामामुळे पुढील दीड महिना वाहतुकीसाठी बंद राहणार आहे.
या पूलाशेजारील मेट्रो स्टेशनचे (डेक्कन जिमखाना) पादचारी पुलाचे काम सुरु असल्याने प्रशासनाने हा महत्त्वाचा पूल तात्पुरता बंद ठेवण्याचा निर्णय घेतला आहे. याबाबत मेट्रो प्रशासनाने “काम सुरु आहे, क्षमस्व” अशी माहिती देणारी पाटीही लावली आहे.
वाहतुकीवर होणार मोठा परिणाम
बाबा भिडे पूल हा डेक्कन, श्रीमंत दगडूशेठ हलवाई गणपती मंदिर, शनिवारवाडा परिसरात जाण्यासाठी एक महत्त्वाचा मार्ग आहे. त्यामुळे यामार्गावरून ये-जा करणाऱ्या वाहनचालकांना आता पर्यायी मार्गांचा वापर करावा लागणार आहे. परिणामी, सिंहगड रस्ता, लक्ष्मी रस्ता, फर्ग्युसन कॉलेज रोड या भागात वाहतूक कोंडी वाढण्याची शक्यता वर्तवली जात आहे.
पोलिसांसमोर मोठं आव्हान
वाहतूक पोलिसांसाठी या मार्गावरील वाहतूक सुरळीत ठेवणं हे मोठं आव्हान असणार आहे. नागरिकांनी शक्यतो सार्वजनिक वाहतुकीचा वापर करावा, आणि वेळ वाचवण्यासाठी पर्यायी मार्गांचा आधीपासूनच विचार करावा, असं आवाहन करण्यात येत आहे..
नदीपात्रातील वाहतुकीवर मोठा परिणाम
नारायण पेठ, सदाशिव पेठ असे शहरातील प्रमुख भाग तसेच जे एम आणि एफसी रोड या ठिकाणी जाण्यासाठी याच मार्गाचा वापर केला जातो. तर दुसऱ्या बाजूला उपनगरात राहणाऱ्या नागरिकांसाठी नदीपात्रातील रस्ता अत्यंत महत्त्वाचा मानला जातो. त्यामुळे आता त्याचा परिणाम नदीपात्रातील वाहतुकीवर सुद्धा होणार आहे.
बीडमध्ये गुन्हेगारीचा कळस! महिला वकिलाला सरपंच आणि कार्यकर्त्यांकडून पाईपने अमानुष मारहाण
Newsworldmarathi Beed : बीड – जिल्ह्यात गुन्हेगारीच्या घटनांना अक्षरशः ऊत आला असून, आता अंबाजोगाईतील एका महिला वकिलांवर झालेल्या अमानुष मारहाणीने खळबळ उडवली आहे. ज्ञानेश्वरी अंजान असं या वकिल महिलेचं नाव असून, त्या अंबाजोगाई सत्र न्यायालयात वकिली करतात.
मिळालेल्या माहितीनुसार, स्थानिक सरपंच आणि त्यांच्या कार्यकर्त्यांनी ज्ञानेश्वरी अंजान यांना पाईपने जबर मारहाण केली. इतकी की रक्त साकळलं आणि त्यांच्या अंगावर काळे-निळे व्रण पडले आहेत. या घटनेचे व्हिडीओ आणि फोटो सध्या समाजमाध्यमांवर व्हायरल होत असून, त्यामुळे जनमानसात संतापाची लाट उसळली आहे.
ज्ञानेश्वरी अंजान यांनी माध्यमांशी बोलताना संपूर्ण घटनेचा खुलासा केला आहे. मारहाण का करण्यात आली, यामागे नेमकं कारण काय होतं, हे अद्याप स्पष्ट झालेलं नाही, मात्र या घटनेमुळे बीड जिल्ह्यातील कायदा-सुव्यवस्थेवर प्रश्नचिन्ह उपस्थित झालं आहे.
नेमकं काय घडलं? महिला वकिलने सांगितला घटनेचा थरार
अंबाजोगाई तालुक्यातील सेनगाव येथे ही घटना घडली. पीडित वकील महिलेने माध्यमांसमोर मांडली आहे. वकिल महिलेला मायग्रेनचा त्रास आहे. त्यामुळे या पीडित महिलेने मंदिरावरील लाऊड स्पीकर आणि घरासमोर असलेल्या गिरणीमुळं ध्वनीचा होत असल्याने आवाज कमी करण्याची विनंती सरपंचाकडे केली. पण त्यांनी टाळाटाळ केली. त्यानंतर पीडित महिलेने थेट पोलिस ठाणे गाठत या प्रकरणी तक्रार दाखल केली. पोलिसांकडे तक्रार दिल्याने सरपंचासह त्याचे कार्यकर्ते महिला वकिलाच्या घरी आले. त्यांनी तिच्या आई-वडिलांना माफी मागायला लावली.
हे प्रकरण तेवढ्यावर मिटले नाही. आरोपींनी महिला वकिलाला एका शेतात नेत काठ्या आणि जेसीबी पाईपने गोल रिंगण करत बेदम मारहाण केली. यात ती महिला वकील बेशुद्ध पडली. तिला दवाखान्यात नेण्यात आले. रात्री उपचार करून घरी पाठवून देण्यात आले. या मारहाणीमुळे तिला चालणे आणि बोलणे सुद्धा कठीण जात आहे
‘बदलापूरची’ पुनरावृत्ती…! कर्जतमध्ये ५ वर्षांच्या चिमुकलींचे स्कूलबसमध्ये लैंगिक शोषण
Newsworldmarathi karjat: कर्जतमधील सेंट जोसेफ शाळेत विद्यार्थ्यांना घेऊन जाणाऱ्या स्कूल बसमधील अटेंडण्टने दोन चिमुकल्या मुलींवर अत्याचार केल्याची घटना घडली आहे. या दोन्ही मुली अवघ्या ५ वर्षांच्या आहेत.या घटनेने संताप व्यक्त करण्यात येत असून, पालकांमध्ये भीतीचे वातावरण निर्माण झाले आहे. पोलिसांनी या प्रकरणी करण दीपक पाटील (वय-२४, वडाप, ता. कर्जत) या आरोपीला अटक करून त्याच्यावर पॉक्सो कायद्यानुसार गुन्हा दाखल केला आहे.
याबाबत अधिक महिती अशी की, आरोपी करण हा त्यांना बसमधल्या ड्रायव्हरच्या मागच्या सीटवर बसायला सांगून त्यांच्याबरोबर अश्लील चाळे करायचा. त्या सीटवर बसायला गेल्या नाही तर तो त्यांना मारहाणसुद्धा करायचा. हा सर्व प्रकार गेल्या वर्षभरापासून पीडित मुलींसोबत होत असल्याचे त्यांच्या पालकांनी सांगितले. आरोपीला वाचवण्यासाठी पीडितांच्या पालकांवर दबाव टाकल्याचा आरोप मुलीच्या आईने केला आहे.
रात्रीच आरोपीला पोलिसांनी स्थानिक ग्रामस्थांच्या मदतीने पकडले होते. दरम्यान, तरुणाला कर्जत न्यायालयात दुपारी आणले असता, पालकांनी गाडीतून उतरणाऱ्या तरुणावर धावून जाण्याचा प्रयत्न केला. मात्र, पोलिसांनी मोठा बंदोबस्त कर्जत न्यायालयाच्या आवारात लावला होता. यापूर्वी बदलापूरमध्ये असाच प्रकार घडला होता, आणि आता कर्जतमध्येही ही विकृती समोर आल्याने पालकांमध्ये भीतीचे वातावरण निर्माण झाले आहे.
छत्रपती संभाजीराजेंनी घेतली चंद्रशेखर बावनकुळेंची भेट; काय झाली चर्चा?
Newsworldmarathi Mumbai : केंद्रीय गृहमंत्री अमित शाह यांच्या रायगड दौऱ्यात निमंत्रित करण्यात न आलेले रायगड विकास प्राधिकरणाचे अध्यक्ष तथा महाराष्ट्र स्वराज्य पक्षाचे प्रमुख संभाजीराजे छत्रपती यांनी गुरुवारी भाजपचे प्रदेशाध्यक्ष चंद्रशेखर बावनकुळे यांची त्यांच्या निवासस्थानी भेट घेतली.
या भेटीत कोणतीही राजकीय चर्चा झाली नसून कोल्हापुरातील क्रिकेट मैदानासाठी आवश्यक असलेल्या जमिनीच्या अनुषंगाने चर्चा करण्यासाठी आपण बावनकुळे यांची भेट घेतल्याचे संभाजीराजे यांनी सांगितले.
याबाबत बोलताना संभाजीराजे म्हणाले, कोल्हापूर जिल्हा क्रिकेट असोसिएशनचा मी अध्यक्ष आहे. कोल्हापुरात क्रिकेटच्या मैदानासाठी आम्हाला महसूल विभागाकडून ३० एकर जमीन मिळणार आहे, त्यासाठी बावनकुळे यांची भेट घेऊन चर्चा केली. त्यावर बावनकुळे यांनी सकारात्मक विचार करून निर्णय घेतला आहे, त्यामुळे येत्या काळात मुंबई, नागपूर, पुण्यानंतर कोल्हापुरातही आंतरराष्ट्रीय स्टेडियम होण्यासाठी मदत होणार आहे.
माणुसकीला सलाम… ! मुस्लिम बांधवानी केले बैलाचे विधिवत अंत्यसंस्कार
Newsworldmarathi Tuljapur : समाजामध्ये जाती-धर्माच्या भिंती समज-गैरसमजातून रुंदावत चाललेल्या असताना अजूनही प्रेम, माणुसकी, भूतदया जिवंत असल्याची सुखद घटना अणदूर (ता. तुळजापूर) येथे पाहायला मिळाली. अणदूर येथील पाटील तांड्यावरील शेतकरी राजूभाई शेख व कुटुंबीयांकडे असलेलया एका बैलाचे सोमवारी निधन झाले होते. त्यांनी त्याच्यावर विधिवत अंत्यसंस्कार केले आहेत.
आपल्याकडे असलेले गाय, बैल, म्हैस, कुत्रा यापैकी ब्रध्दापकाळाने किंवा अन्य कारणाने निधन झाले की त्यांच्यावर विधिवत अंत्यसंस्कार करण्याची वडीलांनी सुरू केलेली परंपरा आजही सुरू ठेवली आहे.
राजूभाई शेख हे परंपरागत शेतकरी आहेत. त्यांच्या मागील दोन पिढ्या येथे वास्तव्यास आहेत. शेती हेच त्यांचे उदरनिर्वाहाचे मुख्य साधन आहे. त्यांच्याजवळील गाय, बैल, म्हशी, कुत्रे आदीवर जिवापाड प्रेम करुन त्यांचे संगोपन करण्याचा त्यांना छंद आहे. विशेष म्हणजे आपल्याजवळील एकही गाय किंवा बैलाची ते कधीही विक्री करीत नाहीत. जोपर्यंत गाय दुध देते व बैल शेतीच्या कामात चालतो तोपर्यंत त्यांच्याकडून काम करवून घेतात.
काही शेतकरी गाय-बैल म्हातारे झाले की त्यांची कसायाला विक्री करतात. तर कांही शेतकरी आपल्या प्रगतीत सिंहाचा वाटा उचलणाऱ्या वयोमर्यादा संपल्यावरही कुटुंबातील सदस्याप्रमाणे प्रेम करुन अखेरच्या श्वासापर्यंत त्यांचा सांभाळ करतात, असं राजूभाई शेख यांनी सांगितले.
