Newsworldmarathi Pune : पुण्यातील वैष्णवी हगवणे आत्महत्याप्रकरणात मोठा तपास उलगडत आहे. तिच्या आत्महत्येनंतर झालेल्या पोलिस तपासात सासू-सासरा, पती, नणंद आणि मोठा दीर यांना अटक करण्यात आली आहे. वैष्णवीच्या आई-वडिलांनी केलेल्या आरोपानुसार, हगवणे कुटुंबीयांकडून सतत छळ होत होता. विशेषतः जमीन खरेदीसाठी 2 कोटी रुपयांची मागणी करत तिला मानसिक त्रास दिला जात होता.
वैष्णवीने या छळाला कंटाळून आत्महत्या केली, असे तिच्या कुटुंबियांचे म्हणणे आहे. ही आत्महत्या नसून खून असल्याचा संशयही त्यांनी व्यक्त केला आहे. याप्रकरणात पोलिसांनी एकूण 12 साक्षीदारांची चौकशी केली असून, काही महत्त्वाचे पुरावे समोर आले आहेत.
अत्यंत धक्कादायक बाब म्हणजे वैष्णवीच्या मृत्यूनंतर तिचे बाळ कस्पटे कुटुंबाला मिळू नये, यासाठी हगवणे कुटुंबीयांनी बाळ लपवून ठेवल्याचे उघडकीस आले आहे. यामुळे या प्रकरणात भावनिक गुंतागुंत वाढली असून, संबंधितांवर कठोर कारवाईची मागणी केली जात आहे.
दरम्यान, या प्रकरणातील एक आरोपी नीलेश चव्हाण अद्याप फरार असून, तो नेमका कुठे आहे, याबाबत चर्चा सुरू आहे. पोलिसांचे तपास पथक त्याचा शोध घेत आहे, मात्र अद्याप तो सापडलेला नाही. त्यामुळे पोलिसांच्या कार्यक्षमतेवर प्रश्नचिन्ह निर्माण झाले असून, अधिक कठोर तपासाची मागणी नागरिकांकडून केली जात आहे.
Recent Comments