Newsworldmarathi Pune: दक्षिण पुण्याच्या पाणीप्रश्नावर गेल्या २३ वर्षांपासून सातत्याने लढा देत असून, आंदोलने, पाठपुरावा आणि प्रयत्नांमुळे समान पाणीपुरवठा योजनेअंतर्गत पाच पाण्याच्या टाक्या उभारण्यात आल्या, तसेच पाईपलाइन टाकण्यात आल्या. तरीही कात्रज-कोंढवा परिसराला आजही एक दिवस क्लोजर या अन्यायकारक पद्धतीला सामोरे जावे लागत आहे.
महायुती सत्तेच्या माध्यमातून प्रशासनाला सहकार्य करण्याची तयारी दर्शवित असताना, दिवाळीपूर्वी हा क्लोजरचा कलंक दूर करावा अशी ठाम मागणी विधानपरिषद आमदार योगेश टिळेकर यांनी केली.
दक्षिण पुण्यातील पाणी समस्येबाबत ५ ऑक्टोबर २०२० रोजी स्वारगेट येथे आमदार टिळेकर यांच्या नेतृत्वाखाली मोठे आंदोलन झाले होते. त्यावेळी ४१ कार्यकर्त्यांसह टिळेकर यांना चार दिवस तुरुंगवास भोगावा लागला होता. या आंदोलनाच्या पाचव्या वर्धापनदिनी, शेकडो कार्यकर्त्यांनी आज दुचाकी रॅली काढून संघर्ष दिवस साजरा केला.
रॅलीनंतर पाणीपुरवठा विभागाचे मुख्य अभियंता नंदकिशोर जगताप यांना निवेदन देण्यात आले. या प्रसंगी माजी नगरसेविका रंजनाताई टिळेकर, वृषाली कामठे, विरसेन जगताप, राणी भोसले, मनिषा कदम, प्रभाकर कदम, माजी सरपंच व्यंकोजी खोपडे, संदीप बेलदरे, तुषार कदम, अनिल येवले तसेच पाणीपुरवठा विभागाचे मुख्य अभियंता नंदकिशोर जगताप आणि उपअभियंता नितीन खुडे उपस्थित होते.
“आम्ही पाण्यासाठी जेलमध्ये गेलो, गुन्ह्यासाठी नव्हे” – आमदार टिळेकर
‘खून, मारामारी किंवा जमिनी हडप करण्याचे गुन्हे केले नव्हते; तर नागरिकांच्या पाण्याच्या हक्कासाठी आम्ही जेलमध्ये गेलो. तो दिवस काळा नव्हे, तर संघर्षाचा आणि अभिमानाचा आहे. समान पाणीपुरवठा योजनेतील उर्वरित कामांना गती देऊन १५ एमएलडी पाणी वाढवून मिळावे. प्रशासनाने वेळ न दवडता पूर्ण दाबाने आणि नियमित पाणीपुरवठा करून नागरिकांना न्याय द्यावा.
वंडरसिटी येथे २३ कोटींच्या निधीतून १२५ एमएलडी क्षमतेचा प्रकल्प अंतिम टप्प्यात आहे. फक्त १० टक्के काम बाकी असून, लाईन टाकणे, पंप बसवणे तसेच भूसंपादन, वाहतूक परवानग्या यांमुळे काम काहीसे रखडले आहे. डिसेंबर अखेरपर्यंत प्रकल्प पूर्ण करण्याचा प्रयत्न आहे. परिसरातील नागरिकांना वेळेत आणि पूर्ण दाबाने पाणी मिळावे यासाठी आम्ही प्रयत्नशील आहोत. या प्रकल्पाला आमदार योगेश टिळेकर यांचे वेळोवेळी सहकार्य लाभले असून, काम पूर्ण झाल्यावर पुन्हा आंदोलनाची वेळ येणार नाही.
नंदकिशोर जगताप, अधीक्षक अभियंता, पाणीपुरवठा विभाग, पुणे महापालिका
Recent Comments