Newsworldmarathi Pune: द पूना ब्लाईंड मेन्स असोसिएशन आणि रोटरी क्लब ऑफ पुणे शनिवार वाडा यांच्या संयुक्त विद्यमाने दिवाळीपूर्वी दृष्टीबाधित व्यक्तींसाठी सामाजिक उपक्रमाचे आयोजन करण्यात आले. या उपक्रमांतर्गत ४५१ दृष्टीबाधित व्यक्तींना दिवाळी शिधा वाटप करण्यात आले.
हा कार्यक्रम नांदेड फाटा, सिंहगड रस्ता येथील शिर्डी साईबाबा अंध महिला वृद्धाश्रमात पार पडला. या कार्यक्रमाला पुणे शहर तसेच आसपासच्या परिसरातील दृष्टीबाधित व्यक्ती आणि त्यांच्या कुटुंबीयांचा उत्स्फूर्त प्रतिसाद लाभला.
कार्यक्रमाला द पूना ब्लाईंड मेन्स असोसिएशनचे अध्यक्ष डॉ. राजेशभाई शहा आणि कार्यकारी संचालक परवेझ प्रमुख पाहुणे म्हणून उपस्थित होते. रोटरी क्लब पुणे शनिवार वाडा चे प्रेसिडेंट विवेक पाटसकर, सेक्रेटरी डॉ. समीर शास्त्री, प्रोजेक्ट लीडर स्वाती कोटलीकर, नारायण चांडक तसेच अभिनव सेवा फाऊंडेशनचे सुनील गोवर्धन उपस्थित होते. काश्मिरा ठाकर आणि त्यांच्या सहकाऱ्यांनी कार्यक्रमाचे आयोजन केले.
दृष्टीबाधित व्यक्तींची दिवाळी आनंदाची आणि उत्साहवर्धक व्हावी, या हेतूने गेल्या अनेक वर्षांपासून हा उपक्रम सातत्याने राबविला जात आहे.
द पूना ब्लाईंड मेन्स असोसिएशन ही संस्था १९६२ पासून दृष्टीबाधित व्यक्तींच्या कल्याणासाठी कार्यरत आहे. संस्थेमार्फत दृष्टीबाधित निराधार महिलांसाठी मोफत वृद्धाश्रम, १८ ते ३५ वयोगटातील विद्यार्थ्यांसाठी मोफत टेक्निकल ट्रेनिंग सेंटर तसेच डोळ्यांच्या आजारांवरील उपचारासाठी अत्याधुनिक रुग्णालय अशा विविध प्रकल्पांची अंमलबजावणी केली जाते. महाराष्ट्रासह संपूर्ण भारतातील अनेक दृष्टीबाधित व्यक्तींना या प्रकल्पांचा लाभ होत असून, समाजकल्याणाच्या क्षेत्रात संस्थेचे कार्य उल्लेखनीय मानले जाते.
Recent Comments