सानेगुरुजी प्राथमिक शाळेत उत्साहात साजरा झाला बालदिन

Newsworldmarathi Pune: सानेगुरुजी प्राथमिक शाळा, सिंहगड रोड येथे बालदिन उत्साहात आणि अनोख्या पद्धतीने साजरा झाला. भारताचे पहिले पंतप्रधान पं. जवाहरलाल नेहरू यांच्या जयंतीनिमित्त दरवर्षी साजरा होणाऱ्या या दिवसाची सुरूवात मुलांना विविध प्राण्यांचे मुखवटे देऊन झाली. कुणी हत्ती, कुणी सिंह, कुणी मांजर तर कुणी ससा बनून मुलांनी खेळाच्या मैदानात धाव घेतली. मिकी माऊस, पाळणा आणि विविध खेळण्यांमुळे शाळेचे वातावरण उत्साहाने भरून गेले.

यानंतर झालेल्या गोष्टीच्या तासात जादूगार संजय रघुवीर यांचे जादू प्रयोग पाहून मुले थक्क झाली. हे प्रयोग चमत्कार नसून हातचलाखी व वैज्ञानिक तत्त्वांवर आधारित असल्याचे त्यांनी मुलांना समजावून सांगितले. खेळ-धम्माल संपल्यावर विद्यार्थ्यांनी खाऊचा आस्वाद घेतला.

बालदिनाच्या औपचारिक उद्घाटनासाठी मैदानात सर्व विद्यार्थी जमले. संस्थेचे सचिव मा. शिवाजी खांडेकर, संतोष पवार, तुषार मानकर, अतुल पासलकर, मनोज पोळेकर, नितीन मोरे, सूरज ननावरे आणि माजी विद्यार्थी प्रशांत सकट यांच्या उपस्थितीत फुगे आकाशात सोडण्यात आले. माजी विद्यार्थी म्हणून या पाहुण्यांनी शाळेबद्दलची जिव्हाळ्याची भावना व्यक्त केली.

२००४–०५ च्या चौथीतील माजी विद्यार्थ्यांच्या गटाने सर्व मुलांसाठी रायटिंग पॅड व खाऊचे वितरण केले. या पॅडचे विशेष वैशिष्ट्य म्हणजे ते त्यांच्या मित्राच्या स्मृतिप्रीत्यर्थ (स्व. अजिंक्य नारायण खाटपे) देण्यात आले होते.

कार्यक्रमाचे स्वागत मुख्याध्यापिका काटे मॅडम यांनी केले. नगरसेविका प्रियाताई गदादे यांनी शाळेला सर्वतोपरी मदत करण्याचे आश्वासन दिले. सूत्रसंचालन बंदावणे सरांनी केले. नियोजनात ससे सर, खेडकर मॅडम आणि सांस्कृतिक प्रमुख गोवळकर मॅडम यांनी कार्यभार सांभाळला.