नागपूरमध्ये मराठी विषय शिक्षकांची भव्य कार्यशाळा

Newsworldmarathi Pune: नागपूर जिल्हा कनिष्ठ महाविद्यालय मराठी विषय शिक्षक महासंघाच्या वतीने आयोजित अभ्यासक्रम-आधारित एकदिवसीय कार्यशाळा 24 नोव्हेंबर 2025 रोजी उत्साहात पार पडली. विदर्भ बुनियादी कनिष्ठ महाविद्यालयात झालेल्या या कार्यशाळेचे वैशिष्ट्य म्हणजे संपूर्ण नागपूर जिल्ह्यातील सर्व मराठी विषय शिक्षकांना या कार्यशाळेसाठी एक दिवसाची कर्तव्य रजा मंजूर करण्यात आली होती. महाराष्ट्रातील शैक्षणिक क्षेत्रात असा उपक्रम प्रथमच राबविण्यात आल्याचे आयोजकांनी सांगितले.

या उपक्रमाचे आयोजन नागपूर जिल्हाध्यक्ष प्रा. सुरेश नखाते, कार्याध्यक्ष प्रा. सपन नेहरोत्रा आणि सचिव प्रा. संजय तिजारे यांच्या पुढाकारातून घडून आले. मराठीची अस्मिता जोपासणे, शिक्षकांना अद्ययावत ठेवणे, नवनवीन कौशल्य आत्मसात करणे, नवीन अभ्यासक्रमातील आव्हाने आणि संच मान्यता यांसारख्या महत्त्वपूर्ण मुद्द्यांवर या कार्यशाळेत चर्चा करण्यात आली.

महासंघाचे संस्थापक अध्यक्ष प्रा. सुनील डिसले यांनी अखिल भारतीय मराठी साहित्य संमेलनासाठी मराठी शिक्षकांना कायमस्वरूपी कर्तव्य रजा मिळावी, यासाठी पुढील वाटचाल सुरू असल्याचे सांगितले. त्यांच्या वक्तव्याला उपस्थित शिक्षकांनी दणदणीत टाळ्यांचा प्रतिसाद दिला.

नागपूर विभागाच्या शिक्षण उपसंचालिका डॉ. माधुरी सावरकर यांनी मराठी भाषा आणि विषय टिकवायचा असेल तर अशा उपक्रमांची आजच्या काळात आवश्यकता असल्याचे प्रतिपादन केले. तर माध्यमिक व उच्च माध्यमिक शिक्षण मंडळाचे अध्यक्ष मा. डॉ. शिवलिंग पटवे यांनीही महासंघाच्या कार्याचे कौतुक केले.

या कार्यशाळेमुळे मराठी विषय शिक्षकांच्या ज्ञानवृद्धीसोबतच मराठी विषयाच्या पुढील वाटचालीसाठी महत्वाचे पाऊल उचलले गेल्याची भावना सर्वांनी व्यक्त केली.