गुजरातमधील अहमदाबादच्या नरेंद्र मोदी स्टेडियमवर आज (दि.०३) पंजाब किंग्ज आणि रॉयल चॅलेंजर्स बंगळुरू यांच्यात पहिल्यावहिल्या आयपीएल जेतेपदासाठी घमासान युद्ध पाहायला मिळालं आणि यात रॉयल चॅलेंजर्स बंगळुरूने बाजी मारत आयपीएल २०२५ चे विजेतेपद पटकावले आहे आणि यासह त्यांची १८ वर्षांची प्रतीक्षा संपली आहे. अखेर विराट कोहलीचा संघ चॅम्पियन बनला आहे.
अहमदाबादमधील नरेंद्र मोदी स्टेडियमवर खेळल्या गेलेल्या अंतिम सामन्यात आरसीबीने पंजाबचा सहा धावांनी पराभव केला. नाणेफेक गमावल्यानंतर प्रथम फलंदाजी करताना आरसीबीने २० षटकांत नऊ गडी गमावून १९० धावा केल्या. प्रत्युत्तरात पंजाबचा संघ सात गडी गमावून केवळ १८४ धावाच करू शकला. यासह आरसीबी संघ आयपीएलचा आठवा विजेता संघ ठरला आहे. याआधी राजस्थान रॉयल्स, चेन्नई सुपर किंग्ज, डेक्कन चार्जर्स, मुंबई इंडियन्स, गुजरात टायटन्स, कोलकाता नाईट रायडर्स आणि सनरायझर्स हैदराबाद हे संघ चॅम्पियन बनले आहेत.
विजयासाठी १९१ धावांच्या लक्ष्याचा पाठलाग करताना पंजाबच्या संघाची सुरुवात चांगली झाली. प्रियांश आर्य आणि प्रभसिमरन सिंग यांनी ४३ धावांची भागीदारी केली. २४ धावा काढल्यानंतर प्रियांशला हेझलवूडने माघारी धाडलं. त्यानंतर २२ चेंडूत २६ धावा काढल्यानंतर प्रभसिमरन सिंग बाद झाला. अंतिम सामन्यात श्रेयस अय्यरची बॅट चालली नाही. एक धाव काढल्यानंतर तो बाद झाला.
Recent Comments