इंदापूरमध्ये नव्या औद्योगिक पर्वाची सुरुवात!

Newsworldmarathi Pune: इंदापूर तालुक्यातील औद्योगिक विकासाला नवी दिशा देणारा ऐतिहासिक निर्णय मंत्रिमंडळ बैठकीत घेण्यात आला आहे. महाराष्ट्र राज्य शेती महामंडळाच्या रत्नपुरी मळ्यातील तब्बल एक हजार एकर जमीन महाराष्ट्र औद्योगिक विकास महामंडळाकडे (एमआयडीसी) हस्तांतरित करण्यास मंजुरी देण्यात आली असून, त्यामुळे इंदापूरमध्ये नवीन औद्योगिक वसाहतीचा मार्ग अधिकृतपणे मोकळा झाला आहे. उपमुख्यमंत्री सुनेत्रा अजित पवार यांनी पदभार स्वीकारल्यानंतर झालेल्या पहिल्याच मंत्रिमंडळ बैठकीत हा महत्त्वपूर्ण निर्णय घेण्यात आला, ही बाब विशेष उल्लेखनीय ठरते.

इंदापूर तालुक्यासाठी स्वतंत्र औद्योगिक वसाहत उभारण्याचे स्वप्न दिवंगत उपमुख्यमंत्री अजित पवार यांनी पाहिले होते. या प्रकल्पासाठी त्यांनी सातत्याने पाठपुरावा केला होता. इंदापूरचे आमदार तथा कृषिमंत्री दत्तात्रय भरणे यांनीही दिवंगत अजित पवार यांच्याकडे यासंदर्भात वेळोवेळी पाठपुरावा केला होता.

या निर्णयामुळे इंदापूर, बारामती तसेच संपूर्ण पुणे जिल्ह्यातील औद्योगिक गुंतवणुकीला मोठी चालना मिळणार आहे. यामुळे हजारो युवकांना रोजगाराच्या नव्या संधी उपलब्ध होतील, स्थानिक उद्योजकतेला बळ मिळेल आणि ग्रामीण अर्थव्यवस्थेला नवे चैतन्य प्राप्त होईल. औद्योगिक विकासाच्या दिशेने महाराष्ट्राने आणखी एक निर्णायक टप्पा गाठला असून, इंदापूर लवकरच नव्या उद्योगांचा महत्त्वाचा केंद्रबिंदू म्हणून उदयास येईल, असा विश्वास व्यक्त केला जात आहे.