त्रिभुवन सहकार विद्यापीठ सहकार क्षेत्राला बळकटी देण्यासोबतच ग्रामीण अर्थव्यवस्थेला चालना देणार : केंद्रीयमंत्री मुरलीधर मोहोळ
Newsworldmarathi Delhi : देशभरात सहकार क्षेत्राचे मोठे जाळे असून आठ लाखांहून अधिक सहकारी समित्यांमध्ये ४० लाख कर्मचारी आणि ८० लाख निर्वाचित मंडळ सदस्य कार्यरत असून सुमारे ३० कोटी सदस्य जोडलेले आहे. मात्र, आगामी पाच वर्षात सहकार क्षेत्राला १७ लाख प्रशिक्षित तरुणांची गरज भासणार आहे. त्याकरिता सहकार क्षेत्रातील शिक्षण, प्रशिक्षण व कौशल्य आधारित प्रशिक्षित मनुष्यबळ निर्माण करण्यासाठी केंद्र सरकारच्या केंद्रीय सहकार विभागाने पंतप्रधान नरेंद्र मोदी व सहकारमंत्री अमित शाह यांच्या मार्गदर्शनाखाली देशाच्या तळागाळात सहकार क्षेत्र मजबुतीसाठी पुढाकार घेतला आहे.
देशातील पहिले सहकारी विद्यापीठ असलेल्या ‘त्रिभुवन सहकार विद्यापीठा’चे विधेयक पुण्याचे खासदार व केंद्रीय सहकार राज्यमंत्री मुरलीधर मोहोळ यांना राज्यसभेत मांडण्याचा मान मिळाला असून हे विधेयक वरिष्ठ सभागृहात मंजूर झाले आहे. २६ मार्च रोजी हे विधेयक लोकसभेच बहुमताने मंजूर करण्यात आले होते. त्रिभुवन सहकार विद्यापीठ सहकार क्षेत्राला बळकटी देण्यासोबतच ग्रामीण अर्थव्यवस्थेला चालना देणारे ठरेल, असे मत सहकार राज्यमंत्री मुरलीधर मोहोळ यांनी व्यक्त केले आहे.
राज्यसभेत त्रिभुवन सहकारी विद्यापीठावर तब्बल चार तास चर्चा झाली व याबाबत विधेयक मांडण्याची आणि सभागृहाला उत्तर देण्याची जबाबदारी गृहमंत्री अमित शाह यांनी राज्यमंत्री मुरलीधर मोहोळ यांच्यावर सोपवली होती. मोहोळ यांनी सहकार विद्यापीठाबाबतचे सर्व आक्षेप खोडून काढत जोरदारपणे सरकारची भूमिका सभागृहात मांडली.
स्वतंत्र सहकार मंत्रालयाची सुरुवात जुलै २०२१ पासून सुरु झाली असून साडेतीन वर्षात सहकार विभागाने मंत्री अमित शाह यांच्या नेतृत्वात मोठ्या प्रमाणात सहकार चळवळ मजबुतीकरणाचे काम केले. सन २०१३-१४ मध्ये सहकार विभागास केवळ १२२ कोटी रुपये देण्यात आले होते, परंतु सदर निधीत दहा पट वाढ करुन चालू वर्षीच्या अर्थसंकल्पात या मंत्रालयासाठी ११९० कोटी रुपयांचा निधी तरतूद करण्यात आला.
मोहोळ म्हणाले, ‘सहकार मंत्रालयाचे अंर्तगत देशात प्राथमिक कृषी पतसंस्थाचे (पॅक्स) सक्षमीकरण करण्याकरिता तयार केलेले आदर्श उपनियम ३२ राज्यांनी व केंद्रशासित प्रदेशांनी स्विकारले आहे. ग्रामीण अर्थव्यवस्थेला चालना देण्यासाठी पॅक्सला प्रोत्साहन देण्यात येत आहे. २५ नवे व्यवसाय पॅक्सला देण्यात आले असून आगामी पाच वर्षात २ लाख नवे पॅक्स स्थापन करण्याचे लक्ष्य आहे. मोदी सरकारने एनएसडीसीच्या माध्यमातून १ लाख २८ हजार कोटींची मदत केली असून देशभरातील साखर कारखान्यांना १० हजार कोटींची मदत आणि प्राप्तिकारात देखील ४६ हजार कोटींची माफी देण्यात आल्याचे मोहोळ यांनी सांगितले.
मुरलीधर मोहोळ यांनी मांडलेल्या महत्वपूर्ण बाबी…
– सन २०२७ मध्ये भारत जगातील तिसरी मोठी अर्थव्यवस्था होताना ग्रामीण अर्थव्यवस्थेचा सहभाग महत्वपूर्ण
– देशातील ५० टक्के लोकसंख्या कृषी क्षेत्राशी निगडित
– देशात ४३ हजार पॅक्स कॉमन सर्व्हिस सेंटर, ३६ हजार पॅक्स प्रधानमंत्री किसान समृध्दी केंद्र व ४ हजार पॅक्स प्रधानमंत्री जनऔषधालय चालू
– केंद्रीय सहकार विभागामार्फत २ हजार ५१६ कोटी रुपये खर्च करुन ६६ हजार पॅक्सचे डिजिटलायजेशन
– पुढील ५ वर्षात पॅक्सची संख्या तीन लाख करणार
– समाजातील सर्व घटकांसाेबत महिलांचा पॅक्स समितीत समावेश
– नॅशनल को-ऑपरेटिव्ह डेटाबेसची निर्मिती
– राष्ट्रीय सहकार धोरणाची लवकरच निर्मिती
– शेतकऱ्यांसाठी जगातील सर्वात मोठी अन्न भंडारण योजनेचे काम पॅक्सच्या माध्यमातून सुरु
– त्रिभुवन सहकार विद्यापीठामार्फत सहकारी संस्थाची कार्यक्षमता, मॅनजमेंट व्यवस्था सक्षमीकरण, नवीन रोजगार निर्मिती
बूथ कार्यकर्ता ते राज्यसभेत विधेयक मांडणारा मंत्री…
मुरलीधर मोहोळ हे गेली ३० वर्षे भाजपात कार्यरत असून त्यांनी बूथ प्रमुखापासून कामाला सुरुवात केली आणि त्यांचा हा प्रवास आता राज्य सभेत विधेयक मांडणारा मंत्री इथ पर्यंत झाली आहे. खासदारकीच्या पहिल्याच टर्ममध्ये केंद्रीय मंत्रीपद आणि थेट विधेयक मांडण्याची संधी, या मोहोळ यांच्या प्रवासाचे सर्वत्र कौतुक होत आहे.
पुणे शहरातील रस्त्यांच्या समस्यांवर काँग्रेस आक्रमक
Newsworldmarathi Pune: पुणे शहरातील रस्त्यांची दुरवस्था, मोठ्या प्रमाणावर पडलेले खड्डे, अपुऱ्या दर्जाचे पॅचवर्क, ब्लॉक बसवलेल्या रस्त्यांमुळे वाढलेले अपघात आणि नागरिकांच्या सुरक्षिततेचा प्रश्न यासंदर्भात काँग्रेसच्या शिष्टमंडळाने पुणे महानगरपालिकेच्या पथविभाग प्रमुख अभियंता अनिरुद्ध पावसकर यांची भेट घेतली. या बैठकीत शहरातील रस्त्यांच्या समस्यांवर सविस्तर चर्चा करण्यात आली.
शहरातील प्रमुख रस्त्यांवर मोठ्या प्रमाणावर खड्डे पडले असून, त्याचा वाहनचालक आणि पादचाऱ्यांना मोठा त्रास होत आहे. अपुऱ्या नियोजनामुळे रस्त्यांचे ब्लॉक घसरत असून, त्याचा थेट परिणाम वाहतुकीवर होत आहे. अनेक ठिकाणी ड्रेनेज झाकणं चुकीच्या पातळीवर बसवली गेल्यामुळे अपघातांचे प्रमाण वाढले आहे. तसेच, फुटपाथच्या उंची आणि लांबीतील विसंगतीमुळे वाहतुकीला अडथळा निर्माण होत असल्याचे काँग्रेस शिष्टमंडळाने निदर्शनास आणून दिले.
या बैठकीत पथविभाग प्रमुख अभियंता अनिरुद्ध पावसकर यांनी काँग्रेस शिष्टमंडळाला पुणे शहरातील 54 अधिकाऱ्यांची यादी सार्वजनिक करण्याची ग्वाही दिली. तसेच, काँग्रेसच्या शिष्टमंडळासोबत स्पॉट व्हिजिट करून, शहरातील विविध ठिकाणी पाहणी करण्याचे आणि समस्या दूर करण्यासाठी प्रयत्नशील राहण्याचे आश्वासन दिले. यासोबतच, पुणे शहरातील रस्त्यांसाठी एकात्मिक धोरण तयार करण्यासाठी पुढील स्तरावर चर्चा करण्याची तयारीही दर्शवली.
बैठकीत पथविभागाच्या वतीने यापूर्वी राबवण्यात आलेल्या विविध उपाययोजनांची माहिती देखील देण्यात आली. काँग्रेस शिष्टमंडळाने मागणी केली की, पुणे महानगरपालिकेने तातडीने योग्य उपाययोजना कराव्यात, अन्यथा नागरिकांच्या सुरक्षिततेसाठी काँग्रेस अधिक तीव्र आंदोलन छेडेल.
या , माजी सदस्य पी एम पी एम एल चंद्रशेखर कपोते, महाराष्ट्र प्रदेश काँग्रेस कमिटी प्रदेश सदस्य प्रशांत सुरसे, महाराष्ट्र प्रदेश युवक काँग्रेसचे सरचिटणीस प्रथमेश आबनावे, महाराष्ट्र प्रदेश काँग्रेस कमिटी सोशल मीडिया विभागाचे सरचिटणीस सुरेश कांबळे, पुणे शहर काँग्रेस कमिटीचे सरचिटणीस चेतन आगरवाल, माजी अध्यक्ष कसबा विधानसभा काँग्रेस कमिटी प्रविण करपे, काँग्रेस पदाधिकारी माजी स्वीकृत सदस्य आयुब पठाण, राजाभाऊ कदम, काँग्रेस साजिद शेख आदी उपस्थित होते.
या बैठकीनंतर लवकरच पथविभाग आणि काँग्रेस शिष्टमंडळाच्या संयुक्त पाहणी दौऱ्याची तारीख निश्चित करण्यात येणार असून, शहरातील रस्त्यांसंबंधी सुधारणा करण्यासाठी पुढील टप्प्यात ठोस निर्णय घेतले जातील.
निर्यातक्षम पिकांसाठी धोरणात्मक पाऊल! जिल्हाधिकारी जितेंद्र डूडी यांचा उत्पादनवाढीवर भर
Newsworldmarathi Pune: निर्यातक्षम पिकांच्या उत्पादनवाढीच्यादृष्टीने कृषी विभाग, आत्मा यंत्रणेने कृषितज्ज्ञ, शेतकरी उत्पादक कंपनी आणि शेतकरी बांधवांना सोबत घेऊन आधुनिक तंत्रज्ञानाच्या मदतीने जिल्ह्यात कालबद्ध कार्यक्रम राबवावा, असे निर्देश जिल्हाधिकारी जितेंद्र डुडी यांनी दिले.
जिल्हाधिकारी कार्यालयात आयोजित कृषी विभागाच्या क्षेत्रीय अधिकाऱ्यांसोबत आयोजित बैठकीत त्यांनी निर्देश दिले. यावेळी जिल्हा अधीक्षक कृषी अधिकारी संजय काचोळे, आत्माचे प्रकल्प संचालक सूरज मडके, कृषी उपसंचालक संजय विश्वासराव यांच्यासह उपविभागीय कृषी अधिकारी, तालुका कृषी अधिकारी आदी उपस्थित होते.
डूडी म्हणाले आगामी तीन वर्षात शेतकऱ्यांच्या उत्पादनात वाढ होण्याच्यादृष्टीने कालबद्ध कार्यक्रम राबविण्यात येणार आहे. केळी, अंजीर, आंबा, स्ट्रॉबेरी, सूर्यफूल, करडई यासारख्या पिकांचा सामूहिक पद्धतीने विकास करण्यावर भर देण्यात यावा. कालबद्ध कार्यक्रमाअंतर्गत प्रथम शेतकऱ्यांची निवड करुन त्यांना कृषी विभाग आणि आत्माच्या मदतीने प्रशिक्षण देण्याची कार्यवाही करावी. प्रशिक्षित शेतकऱ्यांमधूनच गावात ‘मास्टर प्रशिक्षक’ म्हणून जबाबदारी देण्यात यावी. शेतकऱ्यांना लागणाऱ्या पायाभूत सुविधांचा सर्वांगीण विचार करुन कृषी विभाग आणि आत्मा मिळून सविस्तर प्रकल्प अहवाल (डीपीआर) तयार करावा. शेतकऱ्यांना शासनाच्या विविध योजनांच्या माध्यमातून पायाभूत सुविधा उपलब्ध करुन देण्याबाबत प्रशासनातर्फे प्रयत्न करण्यात येतील.
कालबद्ध कार्यक्रमाच्या जनजागृतीकरीता जिल्हा, तालुका व गावनिहाय सभेचे आयोजन करुन शेतकऱ्यांना पीक पद्धती, कृषी क्षेत्रात कृत्रिम बुद्धीमत्ता (एआय), पाणी बचत आदीबाबत मार्गदर्शन करावे. शेतकऱ्यांना अधिक सक्षम बनवण्यासाठी ‘एआय’सारख्या आधुनिक तंत्रज्ञानाचा प्रभावी वापर करून त्यांचे उत्पादकता वाढवून पर्यायाने उत्पादन वाढीकरीता प्रयत्न करावे, असेही डूडी म्हणाले.
काचोळे यांनी जिल्ह्यातील विविध भागात उत्पादित होणाऱ्या पिकांबाबत माहिती दिली.
सारा तेंडुलकरची मोठी एंट्री! ई-क्रिकेट प्रीमियर लीगच्या मुंबई फ्रँचायझीची मालकीण
Newsworldmarathi Pune: सारा तेंडुलकर ग्लोबल ई-क्रिकेट प्रीमियर लीग (GEPL) मध्ये बहुप्रतिक्षित सिझन 2 साठी मुंबई फ्रँचायझीच्या मालक म्हणून सहभागी झाल्याची घोषणा पुणे स्थित डिजिटल मनोरंजन आणि तंत्रज्ञान क्षेत्रातील जागतिक अग्रणी जेटसिंथेसिसने केली आहे.
GEPL ही जगातील सर्वात मोठी ई-क्रिकेट आणि मनोरंजन लीग असून ती आतापर्यंत 300 दशलक्षाहून अधिक लाईफटाईम डाऊनलोड्स झालेल्या Real Cricket या खेळावर आधारित आहे. पहिल्या सिझनपासून, या लीगमध्ये अनेक पट वाढ नोंदवली गेलेली असून सिझन 1 मधील 200,000 नोंदणींच्या तुलनेत आता ही नोंदणी 910,000 पर्यंत पोहोचली आहे. जिओ सिनेमा आणि स्पोर्ट्स18 वर 2.4 दशलक्षाहून अधिक मिनिटांचे स्ट्रीम केलेले कंटेंट आणि 70 दशलक्षाहून अधिक मल्टीप्लॅटफॉर्म पोहोच यामुळे GEPL ने क्रिकेट ईस्पोर्ट्समध्ये एक अग्रगण्य स्थान निर्माण केले आहे.
मुंबई फ्रँचायझीची मालकी घेतल्याने सारा तेंडुलकरची या भागाशी असलेली घनिष्ठ नाळ अधोरेखित होते आणि लीगच्या प्रादेशिकीकरण, नवकल्पना, नेतृत्व आणि ईस्पोर्ट्ससाठीच्या बांधिलकीशी जुळणारी आहे. नव्या भारतातील विविध उद्योजकांसह GEPL परिसंस्थेमध्ये तिचा सहभाग स्पर्धात्मक गेमिंगला नव्याने परिभाषित करण्याच्या आणि डिजिटल युगात क्रिकेट चाहत्यांचे प्रेम वाढवण्याच्या लीगच्या उद्दिष्टाला बळकटी देतो.
जेटसिंथेसिसचे मुख्य कार्यकारी अधिकारी आणि संस्थापक श्री. राजन नवानी म्हणाले: “मुंबई टीमच्या फ्रँचायझी मालक म्हणून सारा तेंडुलकर यांचे स्वागत करताना आम्हाला अतिशय आनंद होत आहे. सारा या खऱ्या अर्थाने देशाच्या भविष्यासाठीचा महत्त्वपूर्ण घटक असलेल्या भारतातील नव्या जेन Z क्रिएटर आणि इन्फ्लुएंसर इकोसिस्टमचे प्रतिनिधित्व करतात. खेळ आणि ईस्पोर्ट्समधील सारा यांना असलेली खोल रुची आणि त्यांची प्रचंड लोकप्रियता ईस्पोर्ट्सला जनसामान्यांपर्यंत पोहोचवण्याच्या आमच्या ध्येयात त्यांना आदर्श सहयोगी बनवतात. या सहकार्यामुळे GEPL ची पोहोच विस्तारली जाईल, जीवनाच्या सर्व क्षेत्रांतील चाहत्यांशी जोडून घेता येईल आणि उदयोन्मुख खेळाडूंसाठी नव्या संधी निर्माण होतील.”
आपला आनंद आणि उत्साह व्यक्त करताना सारा तेंडुलकर म्हणाली: “क्रिकेट हा आमच्या कुटुंबाचा अविभाज्य भाग राहिला आहे. ई-स्पोर्ट्समध्ये त्याच्या शक्यता आणि क्षमतांचा शोध घेणे खूप रोमांचक आहे. GEPL मध्ये मुंबई फ्रँचायझीची मालकी घेताना एक स्वप्न प्रत्यक्षात साकार झालं आहे. या खेळाप्रती असलेली माझी आवड आणि माझ्या शहरावर असलेलं माझं प्रेम या गोष्टी एकत्र जुळून आल्या आहेत. आमच्या प्रतिभावान टीमसोबत काम करून एक प्रेरणादायक आणि मनोरंजक ई-स्पोर्ट्स फ्रँचायझी उभी करायला मी उत्सुक आहे.”
GEPL चे मुख्य कार्यकारी अधिकारी आणि लीग कमिशनर रोहित पोटफोडे म्हणाले: “मुंबई फ्रँचायझीच्या मालक म्हणून सारा तेंडुलकरचा सहभाग हा GEPL साठी एक महत्त्वाचा क्षण आहे. चाहत्यांसोबत तिचा दृढ संबंध आणि तिची जोशपूर्ण उपस्थिती लीगच्या प्रतिमेला नक्कीच उंचावेल. सिझन 2 अधिक मोठा आणि अधिक स्पर्धात्मक असताना तिच्या सहभागामुळे ई-क्रिकेट स्पोर्ट्समध्ये आणखी व्यापक सहभाग वाढायला मदत होईल.”
यशस्वी पदार्पणानंतर, GEPL सिझन 2 मध्ये विस्तारित टीम स्वरूप आणि प्रगत लीग डायनॅमिक्स सादर होतील. धोरणात्मक सखोलता आणि वास्तविकता यासाठी ओळखल्या जाणाऱ्या Real Cricket 24 द्वारे समर्थित अत्याधुनिक तंत्रज्ञान आणि अभिजात खेळाडूंसह तीव्र स्पर्धात्मकताही उंचावेल. हा सिझन मे 2025 मध्ये जोरदार ग्रँड फिनालेने समाप्त होईल. तिथे सर्वोच्च संघ ‘ई-क्रिकेट आयकॉन’ या प्रतिष्ठित किताबासाठी जागतिक स्तरावर झुंजतील.
कुणाल कामराला पुणेकराचे चोख प्रत्युत्तर
Newsworldmarathi Pune: उपमुख्यमंत्री एकनाथ शिंदे यांच्यावर बदनामीकारक काव्य करणाऱ्या स्टँडअप कॉमेडियन कुणाल कामराला पुणेकराने चोख प्रत्युत्तर दिले आहे. कामराच्याच शैलीत काव्य करीत एकनाथ शिंदे यांच्या कार्याचा गौरवपूर्ण उल्लेख करणारा फलक टिळक रस्त्यावर झळकला आहे. रिक्षा चालवताना एकनाथ शिंदे आणि मागे बसलेला ‘कॉमन मॅन’ असे व्यंगचित्र असलेला हा फलक सर्वांचेच लक्ष वेधून घेत आहे. ‘बोलनेवाले बोलते रहें, वो काम ही करता जाए !’ अशा शब्दांत शिंदे यांचा गौरव करण्यात आला आहे.
युवा सामाजिक कार्यकर्ते वैभव वाघ यांनी हा फलक दुर्वांकुर डायनिंग हॉलसमोर लावला आहे. ‘ठाणे की रिक्षा, चेहरे पे दाढी’ गाण्यांच्या ओळी लिहीत ‘शेर नजर वो आए’ असा गौरवपूर्ण उल्लेख शिंदे यांचा करण्यात आला. हिंदुत्वाचा कैवारी, चिपळूणचा महापूर, इर्शाळवाडीची दुर्घटना यामध्ये शिंदे यांनी तत्परता दाखवत थेट घटनास्थळी जाऊन केलेले कार्य, आरोग्य कक्षाच्या माध्यमातून केलेले कार्य यासह लाडकी बहीण योजना या काव्यातून मांडली आहे. काश्मीरच्या लाल चौकातील गणेशोत्सवात त्यांनी घेतलेला सक्रिय सहभाग यातून त्यांची कीर्ती ठाणेच नव्हे, तर पूर्ण देशभर असल्याचे दिसून येते, असे यातून सांगण्याचा प्रयत्न आहे.
या संदर्भात वैभव वाघ म्हणाले, “एकनाथ शिंदे यांनी अवघ्या अडीच वर्षात मुख्यमंत्री केलेले लोकोपयोगी कार्य प्रेरणादायी आहे. सामान्य माणसाला केंद्रस्थानी ठेवून अधिकाधीक चांगल्या सोयीसुविधा, योजना देण्याचे काम त्यांनी केले. लाडकी बहीण योजना आणली, मुख्यमंत्री आरोग्य सहायता कक्षातून लाखो गोरगरिबांना सेवा दिली. शेतकऱ्यांसाठी, महिलांसाठी, कामगारांसाठी, हिंदुत्वासाठी चोवीस तास उपलब्ध असणाऱ्या उपमुख्यमंत्र्यांबाबत कुणाल कामराने बदनामीकारक वक्तव्य संतापजनक आहे. कोणतेही कार्य न करणाऱ्या माणसाने शिंदे यांच्यासारख्या सर्वसामान्यांचा कैवारी असलेल्या व्यक्तीवर अवमानजनक काव्य रचणे ही विकृती आहे. कलेच्या नावाखाली अशी विकृती आपण सहन करता कामा नये. सामान्य माणसासाठी अहोरात्र झटणाऱ्या एकनाथ शिंदे यांचा गौरव व सन्मान करणे आपले कर्तव्य आहे.”
नागरिकांचे लक्ष वेधून घेणारा हा फ्लेक्स लावणारे वैभव वाघ हे पुणे जिल्ह्यात एक कल्पक आणि क्रियाशील नेतृत्व म्हणून प्रसिध्द आहेत. वंदेमातरम संघटनेचे प्रदेशाध्यक्ष तसेच दिल्ली येथील साहित्य संमेलनाच्या निमित्ताने झालेल्या मराठी साहित्ययात्री संमेलनाचे कार्यकारी अध्यक्ष म्हणून वाघ ह्यांनी काम पाहिले आहे. कोरोना काळात विविध संघटना आणि गणेशोत्सव मंडळांच्या माध्यमातून वैभव वाघ ह्यांनी केलेल्या कामाची देशपातळीवर दखल घेण्यात आली होती. ह्याच कामावर आधारित वाघ ह्यांनी लिहिलेले #व्हायरल_माणुसकी हे पुस्तक अल्पावधीतच प्रसिध्द झाले आहे. निवडणुकांचे व्यवस्थापन ह्या विषयात देखील वाघ ह्यांचा हातखंडा आहे. शिवसेना उध्दव बाळासाहेब ठाकरे पक्षाच्या वतीने वाघ ह्यांची राज्यभर निवडणुक व्यवस्थापन ह्या विषयावर भाषणे आयोजित केली जात. आता ह्या फ्लेक्सच्या निमित्ताने पुणेकरांशी नाळ जोडला गेलेला पुण्याचा सामाजिक कामातील वाघ एकनाथ शिंदे ह्यांच्या शिवसेनेत प्रवेश करतोय की काय अशी चर्चा पुण्याच्या सामाजिक आणि राजकीय वर्तुळात सुरु झाली आहे.
समान पाणीपुरवठा व कात्रज-कोंढवा रस्त्याचे काम मार्गी लावणार; आमदार योगेश टिळेकर यांची माहिती
Newsworldmarathi Pune: “शहराला समान पाणीपुरवठा, कात्रज-कोंढवा रस्त्याचे विस्तारीकरण, बेकायदेशीर बांधकामे आणि प्लॉटिंग, महावितरण कोंढवा कार्यालयाचे विभाजन, उड्डाणपुलास धर्मवीर छत्रपती संभाजी महाराज यांचे नाव देण्यासह स्वतंत्र महानगरपालिकेचा मुद्दा सभागृहात उपस्थित केला. त्यावर संबंधितांनी सकारात्मकता दर्शवली असून, आठवडाभरात सभापती महोदयांच्या दालनात बैठक लावण्यात आली आहे. त्यामुळे येत्या काळात हे सर्व मुद्दे मार्गी लागतील,” अशी माहिती विधानपरिषदेचे आमदार योगेशअण्णा टिळेकर यांनी पत्रकारांशी बोलताना दिली. नुकत्याच झालेल्या अर्थसंकल्पीय अधिवेशनाच्या पार्श्वभूमीवर बुधवारी योगेशअण्णा टिळेकर यांनी पुण्यात पत्रकारांशी संवाद साधला. प्रसंगी भारतीय जनता युवा मोर्चाचे प्रा. सचिन जायभाये, भूषण नाहाटा, बाळासाहेब घुले आदी उपस्थित होते.
योगेशअण्णा टिळेकर म्हणाले, “विधानपरिषद सदस्य म्हणून मला अर्थसंकल्पीय अधिवेशनात ३२ तारांकित प्रश्न, ११ लक्षवेधी, ९ औचित्याचे मुद्दे आणि ७ विशेष उल्लेख करण्याची संधी मिळाली. कामगार विभागाच्या विधेयकावर मत मांडता आले. पुण्यातील पाण्याचा प्रश्न, बेकायदेशीर व अनधिकृत प्लॉटिंग आणि कोंढव्यात अनधिकृत इमारतीत सुरु असलेली शाळा या लक्षवेधीना मंत्रिमहोदयांनी उत्तर देऊन यावर तातडीने मार्ग काढण्याचे आश्वासन दिले. कात्रज-कोंढवा रस्त्यासाठी २८० कोटींचा निधी आला, मात्र, त्याचे काम अद्यापही सुरु झाले नाही, याकडे लक्ष वेधले.”
“पुणे महानगरपालिकेच्या हद्दीत मोठ्या प्रमाणात नागरिकीकरण वाढत असून, त्याचा ताण महापालिका प्रशासनावर पडत आहे. परिणामी मुलभुत सोईसुविधा पुरविण्यामध्ये अडचणी येत आहेत. उपनगरांमधील नागरिक कर भारत असूनही त्यांना विकासकामांचा लाभ मिळत नाही. ही बाब लक्षात घेऊन स्वतंत्र महानगरपालिका तयार होणे गरजेचे आहे. याबाबत मुख्यमंत्र्यांशी संवाद सुरु आहे. लवकरच यावर निर्णय होईल. शहरात बकालपणा वाढतो आहे. व्यापाऱ्यांकडून, विकसकांकडून बांधकामे सुरु आहेत. ते थांबवण्यासाठी महसूलमंत्र्यांशी चर्चा झाली आहे,” असे ते म्हणाले.
योगेशअण्णा टिळेकर म्हणाले, “डॉ. बाबासाहेब आंबेडकर सांस्कृतिक भावनाशेजारील जागेत कर्करोग रुग्णालय उभारावे आणि त्याला डॉ. बाबासाहेब आंबेडकर यांचे नाव द्यावे किंवा त्याठिकाणी डॉ. बाबासाहेब आंबेडकर यांचे स्मारक उभारावे, अशी आमची मागणी आहे. ही जागा खासगी विकासकाला देता कामा नये. तसेच संगमेश्वर येथे होत असलेल्या छत्रपती संभाजी महाराजांच्या स्मारकाप्रमाणे धर्मवीरगडावरही स्मारक व्हावे, अशी भूमिका मांडली. भारतीय संविधानाला ७५ वर्षे पूर्ण होत असल्याच्या निमित्ताने सभागृहात संविधानावर भाषण करण्याची संधी मिळाली. संत सावता माळी यांच्या अरण (सोलापूर) येथील तीर्थक्षेत्र विकासासाठी १०० कोटी मिळावेत व त्याला ‘अ’ दर्जा मिळावा, अशी मागणी केली.
आमदार महेश लांडगे यांची आमदारकी अडचणीत? काय आहे प्रकरण जाणून घ्या…
Newsworldmarathi Pune : भाजपचे भोसरी विधानसभा मतदारसंघाचे आमदार महेश लांडगे यांच्यावर भोसरी विधानसभा मतदारसंघात मोठ्या प्रमाणात घोळ झाला असून निवडणूक प्रक्रिया कायद्यानुसार झाली नाही असा आरोप करणारी याचिका उच्च न्यायालयात दाखल करण्यात आली आहे. या याचिकेची दखल घेत उच्च न्यायालयाने 15 एप्रिल पर्यंत आमदार महेश लांडगे यांना उत्तर देण्याचे आदेश दिले आहेत त्यामुळे आमदार लांडगे यांची आमदारकी धोक्यात येणार का अशी चर्चा रंगली आहे.
राष्ट्रवादी शरद पवार गटाचे अजित गव्हाणे आणि आमदार महेश लांडगे या दोघांमध्ये भोसरी विधानसभा मतदारसंघांमध्ये लढत झाली. या लढतीमध्ये आमदार महेश लांडगे यांनी 62 हजार बोगस मतदारांचा समावेश केला असून 15 हजार मतदारांचे नावे वगळण्यात आली असल्याचा आरोप करत गव्हाणे यांनी आमदार लांडगे यांच्या विरोधात याचिका दाखल केली आहे. आमदार लांडगे यांनी प्रशासनाला हाताशी धरून नियोजनबद्ध भ्रष्टाचार केल्याचे पुरावे असल्याचे या याचिकेत गव्हाणे यांनी नमूद केले आहे.
या याचिकेची दखल न्यायालयाने घेतली असून न्यायाधीश आर.आय. छागला यांनी दिनांक 21 मार्च 2025 रोजी प्राथमिक सुनावणी झाली. या सुनावणीनंतर आमदार लांडगे यांना 15 एप्रिल पर्यंत याचिकेतील आरोपांना उत्तर देण्याचे आदेश उच्च न्यायालयाने दिले आहेत.
पुण्यात १२ एप्रिलला होणार २७ वे विश्वबंधुता साहित्य संमेलन
Newsworldmarathi Pune: विश्वबंधुता साहित्य परिषद, रयत शिक्षण संस्थेचे औंध येथील डॉ. बाबासाहेब आंबेडकर महाविद्यालय आणि काषाय प्रकाशन या संस्थांच्या वतीने २७ व्या विश्वबंधुता साहित्य संमेलनाचे आयोजन केले आहे. संमेलनाच्या निमित्ताने दिला जाणारा ‘विश्वबंधुता दर्पण पुरस्कार’ ज्येष्ठ साहित्यिक डॉ. शरणकुमार लिंबाळे, रयत शिक्षण संस्थेच्या उच्च शिक्षण विभागाचे सहसचिव डॉ. शिवलिंग मेनकुदळे आणि विश्वबंधुता मूल्यसंवर्धन समितीच्या सदस्या डॉ. तेजश्री पारंगे यांना प्रदान करण्यात येणार आहे. तिरंगा महावस्त्र, भारताचे संविधान आणि मानपत्र असे या पुरस्काराचे स्वरूप आहे, अशी माहिती विश्वबंधुता साहित्य परिषदेचे संस्थापक अध्यक्ष बंधुताचार्य प्रकाश रोकडे यांनी दिली.
बंधुताचार्य प्रकाश रोकडे म्हणाले, “ज्येष्ठ विचारवंत प्रा. सुभाष वारे यांच्या अध्यक्षतेखाली होत असलेल्या या संमेलनाचे उद्घाटन ज्येष्ठ साहित्यिक डॉ. अश्विनी धोंगडे यांच्या हस्ते सकाळी दहा वाजता नवी पेठेतील एस. एम. जोशी सभागृहात होईल. प्रसंगी स्वागताध्यक्ष कृष्णकुमार गोयल, कार्याध्यक्ष डॉ. विजय ताम्हाणे प्राचार्य डॉ. अरुण आंधळे प्रा. चंद्रकांत वानखेडे आणि प्रा. शंकर आथरे यांची उपस्थिती राहील.”
दुपारच्या सत्रात ज्येष्ठ कवयित्री सीमा गांधी यांच्या अध्यक्षतेखाली निमंत्रितांचे ‘जल्लोष अभिजात मराठीचा’ काव्यसंमेलन होईल. यावेळी संगीता झिंजुरके, डॉ. अशोककुमार पगारिया, सीमा झुंजारराव, शिल्पा कुलकर्णी, चंदन तरवडे, मधुश्री ओव्हाळ आणि विनोद सावंत यांची उपस्थिती राहील. २५ कवी यामध्ये सहभागी होतील. त्यानंतर प्रसिद्ध शिवव्याख्याते प्रा. प्रदीप कदम यांचे ‘सुवर्णमहोत्सवी विश्वबंधुता लोकचळवळीची प्रशंसनिय यशोगाथा’ या विषयावर व्याख्यान होईल. डॉ. बंडोपंत कांबळे, डॉ. प्रभंजन चव्हाण, प्रा. प्रशांत रोकडे, डॉ. सविता पाटील, प्रा. भारती जाधव आणि प्रा. सायली गोसावी हे संमेलनाच्या यशस्वीतेसाठी परिश्रम घेत आहेत, असे रोकडे यांनी नमूद केले.
हा आठवडा पावसाचा! राज्यात गारपिटीसह अवकाळी पावसाची शक्यता; मुंबईसह अनेक जिल्ह्यांना अलर्ट
Newsworldmarathi Pune : भारतीय हवामान विभागाच्या (IMD) ताज्या अंदाजानुसार, एप्रिल ते जून २०२५ या कालावधीत महाराष्ट्रासह देशातील अनेक भागांमध्ये सरासरीपेक्षा जास्त तापमान आणि उष्णतेच्या लाटांचा अनुभव येण्याची शक्यता आहे. विशेषतः, महाराष्ट्र, राजस्थान, गुजरात, हरियाणा, पंजाब, मध्य प्रदेश, उत्तर प्रदेश, बिहार, झारखंड, पश्चिम बंगाल, ओडिशा, छत्तीसगड, तेलंगणा, आंध्र प्रदेश आणि कर्नाटकमधील काही भागांमध्ये उष्णतेच्या लाटांचे प्रमाण वाढण्याची अपेक्षा आहे.
मराठवाडा आणि मध्य महाराष्ट्रात पुढील पाच ते सात दिवसांत (२ एप्रिलपासून) काही भागांत अवकाळी पावसाच्या सरी आणि गडगडाटी वादळांची शक्यता आहे. या पार्श्वभूमीवर, नागरिकांनी हवामानातील बदलांबाबत सतर्क राहून आवश्यक ती काळजी घेणे गरजेचे आहे.
भारतीय हवामान विभागाच्या अंदाजानुसार, मुंबई आणि महाराष्ट्रातील काही भागांत पुढील २४ तासांत वादळी वाऱ्यासह अवकाळी पावसाची शक्यता आहे. मुंबईत सध्याचे हवामान ढगाळ असून, आर्द्रता वाढली आहे. तसेच, मराठवाडा आणि मध्य महाराष्ट्रातील काही जिल्ह्यांमध्ये गारपीट होण्याची शक्यता वर्तवण्यात आली आहे. अवकाळी पावसामुळे शेती आणि दैनंदिन जीवनावर परिणाम होऊ शकतो, त्यामुळे नागरिकांनी सतर्क राहावे
हवामानशास्त्रज्ञांच्या मते, मध्य महाराष्ट्रात सध्या चक्रीय स्थिती निर्माण झाल्यामुळे वातावरणातील खालच्या आणि वरच्या थरांमध्ये विरुद्ध दिशेने वाहणाऱ्या वाऱ्यांमुळे ढगांच्या वाढीस मदत होत आहे. परिणामी, विजांचा कडकडाट, ढगांचा गडगडाट आणि काही भागांत गारपीटसह पाऊस पडण्याची शक्यता वाढली आहे.
डॉ. सानप यांनी दिलेल्या माहितीनुसार, ही स्थिती मागील दोन दिवसांपासून दिसून येत आहे आणि त्यामुळेच अनेक ठिकाणी अवकाळी पावसाचा प्रभाव जाणवत आहे. अशा परिस्थितीत शेतकरी आणि नागरिकांनी आवश्यक ती सावधगिरी बाळगण्याचा सल्ला हवामान खात्याने दिला आहे.
‘पीएमआरडीए’ विकास आराखड्याबाबत चौकशी करा : सुनील माने यांची मुख्यमंत्र्यांकडे मागणी
Newsworldmarathi Pune : ‘पीएमआरडीए’ विकास आराखड्याच्या जागांचे आरक्षण चुकीच्या पद्धतीने आणि अर्थिक गैरव्यवहार करून टाकण्यात आल्याची शक्यता आहे. त्याबाबत काही हजार कोटी रुपयांचे व्यवहार झाल्याची अधिकाऱ्यांमध्ये चर्चा आहे. या प्रकरणाची मुख्यमंत्र्यांनी ईडी आणि सीबीआय मार्फत चौकशी करावी आणि हे गैरप्रकार करणाऱ्यांना जबाबदार धरावे अशी मागणी राष्ट्रवादी कॉँग्रेस पार्टी शरदचंद्र पवार पक्षाचे प्रदेश सरचिटणीस व प्रवक्ते सुनील माने यांनी आज मुख्यमंत्री देवेंद्र फडणवीस यांच्याकडे केली. याबाबतचे पत्र त्यांनी मुख्यमंत्र्यांना ई मेल द्वारे पाठवले आहे.
गैरप्रकार झालेला हा विकास आराखडा रद्द केल्याबद्दल मुख्यमंत्र्यांचे अभिनंदन करतानाच सुनील माने यांनी, हा विकास आराखडा करण्याचे काम सुरू असताना मुंबईतून दोन खासगी व्यक्ती पुण्यात येऊन या कामात सहभागी होत होते. या प्रकरणात रोख रक्कम आणि चेकने सुद्धा व्यवहार झाल्याची आमची माहिती आहे, असा आरोप केला आहे. काही अधिकाऱ्यांची वाढलेली मालमत्ता, त्यांनी विकत घेतलेल्या जमिनी याबाबत ईडी आणि सीबीआय मार्फत चौकशी करावी या प्रकरणात सर्वांवर जबाबदारी निश्चित करून दोषी असणाऱ्यांना शिक्षा झाली पाहिजे, अशी मागणी त्यांनी केली आहे.
विकास आराखडा रद्द झाल्याने पुणे परिसराचे नियोजन पुन्हा अनेक वर्षे मागे गेले आहे. या नुकसानीस जबाबदार कोण हे सरकारला निश्चित करून जबाबदार व्यक्तींवर कारवाई करावी लागेल. अन्यथा जनतेचा वेळ, पैसा आणि परिश्रम, हे अर्थशून्य होईल. त्यामुळे या संबंधित सर्वांची चौकशी केली पाहिजे.
यानंतर विकास आराखडा करताना पुणे शहर, पिंपरी चिंचवड आणि जिल्ह्यातील तज्ञ व नागरिक यांचा सहभाग घ्यावा. ठिकठिकाणी चर्चासत्रे व कार्यशाळा घेऊन लोकांना सहभागी करावे. बांधकाम व्यवसायिकांना, खासगी व्यक्तींना या प्रक्रियेपासून दूर ठेवावे आणि कालबद्ध नियोजन करून विकास आराखडा लोकांसमोर आणावा अशी विनंती त्यांनी मुख्यमंत्री फडणवीस यांच्याकडे केली आहे.
