पुणे महानगरपालिकेच्या जलतरण तलावावर प्रशिक्षण घेत आहेत राष्ट्रीय स्तरावरील खेळाडू
Newsworldmarathi Pune: तापमानात मोठ्या प्रमाणात वाढ झाल्याने बाणेर येथील पुणे महानगरपालिकेच्या कै.धनंजय मधुकर ताम्हाणे जलतरण तलावावर पोहण्यासाठी तसेच पोहणे शिकण्यासाठी येणाऱ्या नागरिकांच्या संख्येत मोठी वाढ झाली आहे .सुट्ट्यांमुळे लहान मुले पोहण्यासाठी गर्दी करत आहेत त्यामुळे जलतरण तलाव फुल होत आहेत.
द्रोणाचार्य पुरस्कार प्राप्त आंतरराष्ट्रीय प्रशिक्षक डॉ तपन कुमार पाणिग्रही हे या ठिकाणी मुलांना दर्जेदार पद्धतीने होण्याचे प्रशिक्षण देत आहेत. अत्यल्प फी मध्ये दर्जेदार पद्धतीने महानगरपालिकेच्या जलतरण तलावामध्ये मुलांना प्रशिक्षण लाभत असल्यामुळे या ठिकाणी अनेक राष्ट्रीय स्तरावरील अनेक खेळाडू सराव करण्यासाठी येत आहेत.
गेल्या काही दिवसांपासून उन्हाचा पारा वाढला आहे त्यामुळे उन्हापासून सुटका मिळावी यासाठी जलतरण तलावावर पोहण्यास नागरिक गर्दी करू लागले आहेत लहान मुलांबरोबरच त्यांचे पालक देखील पोहण्याचा आनंद लुटण्यासाठी जलतरण तलावांवर येत आहेत. बच्चे कंपनी या जलतरण तलावावर सकाळपासूनच गर्दी करत आहेत.
बाणेर परिसरातील इतर जलतरण तलावांच्या मानाने महानगरपालिकेच्या जलतरण तलावावर माफक दरामध्ये नागरिकांसाठी कोचिंग तसेच पोहण्याच्या तलावाची सोय उपलब्ध केली असल्यामुळे नागरिक मोठ्या प्रमाणात या ठिकाणी पोहण्यासाठी येत आहेत. या ठिकाणी महिलांसाठी स्वतंत्र महिला प्रशिक्षकाचे देखील सोय उपलब्ध करून देण्यात आली आहे. बाणेर परिसरातील खाजगी जलतरण तलावांवर पोहणे शिकण्यासाठी पाच ते सात हजार फी आकारले जाते त्यामुळे सामान्य नागरिकांना ही फी परवडत नाही परंतु महानगरपालिकेच्या जलतरण तलावांवर अत्यंत कमी फी मध्ये कोचिंग उपलब्ध करून दिल्यामुळे सामान्य कुटुंबातील मुलांना देखील या ठिकाणी पोहण्यासाठी दर्जेदार कोचिंग मिळत आहे.
बाणेर येथील महानगरपालिकेच्या ताम्हाणे जलतरण तलावामध्ये मिळणाऱ्या सुविधा दर्जेदार असल्यामुळे परिसरातील नागरिक पोहण्यासाठी या जलतरण तलावाला प्राधान्य देत आहेत. या ठिकाणी चेंजिंग रूम तसेच शॉवरची देखील सुविधा उपलब्ध करून देण्यात आले आहे तसेच पोहण्यासाठी पोहण्याचा ड्रेस कंपल्सरी करण्यात आला आहे.
पुणे महानगरपालिकेने अत्यंत अल्प दरामध्ये बाणेर परिसरामध्ये पोहोण्याचा तलाव नागरिकांना उपलब्ध करून दिल्यामुळे परिसरातील नागरिक आनंद व्यक्त करत आहेत तसेच लहान मुलांबरोबरच पालक देखील या तलावामध्ये पोहण्याचा आनंद लुटत आहेत.
रमणबाग शाळेत उभारली ‘सद्गुणांची संकल्प गुढी
Newsworldmarathi Pune: न्यू इंग्लिश स्कूल रमणबाग प्रशालेमध्ये वर्षप्रतिपदा गुढीपाडव्या प्रीत्यर्थ शाला समिती अध्यक्ष डॉ.शरद अगरखेडकर, सर्व पदाधिकारी व शालेय मंत्रिमंडळातील विद्यार्थी मंत्रांच्या हस्ते अभिनव गुढी उभारण्यात आली.ज्ञान,श्रम,मूल्य संस्कार,एकी,कर्तृत्व,विज्ञान इत्यादी गुणांची जोपासना नव वर्षात करण्याची ‘संकल्प गुढी’ प्रशालेच्या मुख्याध्यापिका सौ चारुता प्रभुदेसाई यांच्या कल्पनेतून उभारण्यात आली.
या कार्यक्रमाला चित्रकला शिक्षिका अंजली मालुसरे शुभांगी पाखरे तसेच मुख्याध्यापक चारुता प्रभुदेसाई, उपमुख्याध्यापक जयंत टोले,पर्यवेक्षक अंजली गोरे व मंजुषा शेलूकर यांचे मार्गदर्शन लाभले.
राज्यात आणखी एक होणार नवा महामार्ग
Newsworldmarathi Team: केंद्रीय महामार्ग रस्ते वाहतूक मंत्री नितीन गडकरी यांनी एक मोठी घोषणा केली आहे. महाराष्ट्राला आणखी एक महामार्ग मिळणार आहे. त्यामुळे ७ तासांचा प्रवास फक्त २ तासांत करता येणार आहे. हा महामार्ग पुण्यासह पश्चिम महाराष्ट्र आणि मराठवाड्याला जोडणार आहे. या महामार्गासाठी १५ हजार कोटी रुपयांचा खर्च अपेक्षित आहे.
यासंदर्भात ठाकरे पक्षाचे खासदार संजय जाधव यांनी प्रश्न उपस्थित केला होता. यावर उत्तर देताना नितीन गडकरी यांनी पुणे ते छत्रपती संभाजीनगर यादरम्यान नवा महामार्ग विकसित होईल आणि यामुळे सात तासांचा प्रवास फक्त दोन तासांत पूर्ण होईल अशी माहिती दिली.
नितीन गडकरी यांनी देशातील महामार्गावर होणारी वाहतूक कोंडी टाळण्यासाठी केंद्र सरकारने मोठा निर्णय घेतला असल्याचे सभागृहात सांगितले. आगामी दोन वर्षांत दोन पदरी रस्ते चार पदरी तर चार पदरी रस्ते सहा पदरी करण्यात येणार आहेत. देशातील जवळपास २५ हजार किलोमीटरचे दुपदरी रस्ते चौपदरी करण्यात येणार असल्याचेही गडकरी यांनी यावेळी सांगितले.
दरम्यान, राज्यात गेल्या काही वर्षांमध्ये अपघातांची संख्या किती राहिली याचा एक डेटा सादर करत गडकरींनी अपघात नियंत्रणात राहावेत यासाठी सरकारची भूमिका काय ? याबाबत सरकारने काय निर्णय घेतला आहे यासंदर्भातही सभागृहाला माहिती दिली. यावेळी गडकरी म्हणाले, वाहनाचा जास्त वेग, वाहन चालवताना मोबाईलचा वापर, मद्यप्राशन करून वाहन चालवणे, चुकीच्या दिशेने वाहन चालवणे, सिग्नल तोडणे, हेल्मेट व सीटबेल्ट न वापरणे, रस्त्यांची खराब स्थिती यामुळे अपघात होतात. म्हणून अपघातांचे प्रमाण कमी करण्यासाठी महामार्ग मंत्रालय उपाययोजना राबवत आहे, असे त्यांनी सांगितले
द्राक्ष निर्यातदारांचा हंगाम गोड!
Newsworldmarathi Team : सांगली, सोलापूर जिल्ह्यांमध्ये यंदाच्या हंगामात द्राक्ष मालाची असणारी कमी, अवकाळी पाऊस न पडणे त्यामुळे मुबलक सूर्यप्रकाश, द्राक्षाला असणारी गोडी यामुळे नाशिक जिल्ह्यातील द्राक्ष उत्पादक शेतकऱ्यांचा हंगाम गोड ठरला आहे. गेल्या सहा ते सात दिवसांत स्थानिकसह निर्यातक्षम द्राक्षमालाचे दर पाच रुपयांपर्यंत कमी झाले असले तरी येत्या काही दिवसांत हे दर पुन्हा सुरळीत होतील, असे सांगण्यात येत आहे.
दरम्यान, आतापर्यंत १ लाख १० हजार ५३१ मेट्रिक टन द्राक्षाची निर्यात झाली आहे. त्यापासून अंदाजे एक हजार कोटी रुपयांचे परकीय चलन देशाला मिळाले आहे. अजून ३० टक्के द्राक्षमाल शिल्लक असून, दीड लाख मेट्रिक टनापर्यंत द्राक्षाची निर्यात असण्याची शक्यता वर्तवण्यात येत आहे.
देशात सर्वाधिक द्राक्ष उत्पादक असणारा महाराष्ट्र आणि राज्यातील एकूण उत्पादनाच्या ९१ टक्के उत्पन्न एकट्या नाशिक जिल्ह्यात होते. पण, गेल्या काही वर्षांत अवकाळी पावसाचा कोप, व्यापाऱ्यांकडून होणारी आर्थिक फसवणूक, वाढलेला उत्पादन खर्च यामुळे अनेक उत्पादकांनी नको ती द्राक्षशेती म्हणत बाग तोडले होते. मात्र, सन २०२४-२५ चा द्राक्ष हंगाम उत्पादकांसाठी लाभदायक ठरला असून, यावर्षी मागणी आणि पुरवठा यात तफावत असल्याचा परिणाम द्राक्ष उत्पादकांना दराबाबत दिलासा मिळाला आहे. निफाड, दिंडोरी, चांदवड, नाशिक या चार तालुक्यांत ५८४१८.२४ हेक्टर क्षेत्रात यावर्षी द्राक्ष लागवड होती.
थॉमसन, सीडलेस, माणिक चमन, सुपर सोनाका, गणेश हे हिरवे वाण तर शरद सीडलेस, क्रीम्सन सीडलेस, फ्लेम सीडलेस, रेड ग्लोब, मेडिका हे रंगीत वाणाचे द्राक्षपीक जिल्ह्यात घेतले जाते. युरोपीय देशात नेदरलँड, जर्मनी, बेल्जियम, डेन्मार्क, यूके तर नॉन युरोपियन देशात रशिया, युएई, कॅनडा, तुर्की, चीन या देशात द्राक्षनिर्यात होते. दरम्यान, द्राक्ष निर्यातदार पूर्वा चव्हाण यांनी जिल्ह्यातील १०० पेक्षा अधिक उत्पादकांचे पैसे न दिल्याने त्यांच्यावर अनेक ठिकाणी गुन्हे दाखल झाले होते. या प्रकरणाचा धडा घेत फसवणूक होणार नाही, असा विश्वास निर्यातदारांमध्ये निर्माण झाला आहे.
इमानदारी हीच व्यवसायाची गुरुकिल्ली : गणेश शिंदे
Newsworldmarathi Pune : सचोटी इमानदारी हीच व्यवसायाची गुरुकिल्ली असल्याचे सांगत जोपर्यंत स्पर्श आहे तोपर्यंत जीवन आहे असे सांगत स्नेह जिव्हाळा जिवंत राहू द्या आभासी दुनियेतून बाहेर पडून एकमेकांना भेटा चर्चा करा निसर्गावर प्रेम करा अशा अनेक मुद्द्यांना हात घालत. नातेसंबंध, मैत्री व व्यवसाय यांची सांगड कशी घालावी व जीवनाचा आनंद कसा घ्यावा याबाबत लेखक गणेश शिंदे यांनी अनेक उदाहरणाचे दाखले देत रियल इस्टेट च्या सभासदांना संबोधित केले.
असोसिएशन ऑफ रियल इस्टेट एजंट या संस्थेच्या सभासदांच्या स्नेहमेळाव्याचे आयोजन करण्यात आले होते यावेळी ते बोलत होते. गेली पंधरा वर्षे सातत्याने असोसिएशनच्या वतीने या मेळाव्याचे आयोजन करण्यात येते.
असोसिएशन च्या उपक्रमाची माहिती देताना अध्यक्ष सचिन शिंगवी म्हणाले की व्यवसायाबरोबर सामाजिक क्षेत्रात असोसिएशन अग्रेसर असून गेली तीन वर्ष मुद्रांक शुल्क वाढ न करणे साठी वेळोवेळी मुख्यमंत्री, महसूलमंत्री,नोंदणी निरीक्षक यांच्याशी संपर्क करून परिस्थितीचे गांभीर्य मांडून असंघटित ग्राहकांन साठी लढा उभा केला आहे तसेच भाडेकराराचे पोलीस व्हेरिफिकेशन ऑनलाईन होण्या संदर्भात पुण्याचे पोलिस आयुक्तांशी संवाद साधून जनतेच्या अडचणी सोडवण्याचा प्रयत्न केला आहे तर प्रमाणित गुंठेवारी घरांच्या पुनर्विक्रीत सर्वसमण्याची होणारी मुस्कटदाबी त्वरित थाबण्या साठी पुणे मनपा आणि महसूल खात्याने इंटिग्रेट करून माहितीचे आदान-प्रदाना चे पाऊल उचलून सर्वसामान्यांना दिलासा मिळेल अशी भूमिका घेत सर्वसान्याचा आवाज सरकार दरबारी पोहोचवला आहे.
दरवर्षी प्रमाणे यावर्षी असोसिएशनने “आवाज जनतेचा” ह्या पुरस्काराने पत्रकार दिगंबर दराडे आणि संजय कडू यांना सन्मानित करण्यात आले. तसेच समाजसेवेच्या उल्लेखनीय कार्याबद्दल असोसिएशन ऑफ सर्व्हिस प्रोव्हायडर (ASP) संस्थेचे सचिव मंगेश पाटील यांना पुरस्कृत करण्यात आले.
कार्यक्रम यशस्वी होण्यासाठी अध्यक्ष सचिन शिंगवी , उपाध्यक्ष रवींद्र चौकसे, खजिनदार उमाशंकर यादव, सचिव राजेंद्र दोशी, अनिल पाटील ,गणेश शेलार, कैलास फोफालिया, गणेश घुमे, सचिन कात्रे, एस के शिंगवी, प्रशांत गांधी, शांतीलाल बोरा यांनी केले तर सूत्रसंचालन रवींद्र चौकसे यांनी केले
डॉ. मंदाकिनी व डॉ. प्रकाश आमटे यांना ‘एआयबीडीएफ’तर्फे गोंदण पुरस्कार जाहीर
Newsworldmarathi Pune त्वचेच्या स्वयंप्रतिकार आजारांवरील इलाजासाठी मदत करणाऱ्या ऑटो-इम्यून ब्लिस्टरिंग डिसीज फाऊंडेशनच्या (एआयबीडीएफ) वतीने थोर समाजसेवक डॉ. मंदाकिनी व डॉ. प्रकाश आमटे यांना गोंदण पुरस्कार जाहीर करण्यात आला आहे. तसेच आमटे दाम्पत्याच्या प्रकट मुलाखतीचे आयोजन करण्यात आल्याची माहिती ‘एआयबीडीएफ’चे संस्थापक अशोककुमार सुरतवाला यांनी पत्रकार परिषदेत दिली. प्रसंगी फाउंडेशनचे विश्वस्त डॉ. शरद मुतालिक, अनिरुद्ध बंबावाले, जयंत हेमाडे, विजय नांदगावकर आदी उपस्थित होते.
अशोककुमार सुरतवाला म्हणाले, “ज्येष्ठ पर्यावरणशास्त्रज्ञ डॉ. माधव गाडगीळ यांच्या हस्ते आमटे दाम्पत्याला यंदाचा पहिलाच ‘गोंदण पुरस्कार’ प्रदान करण्यात येणार आहे. येत्या बुधवारी (ता. २ एप्रिल २०२५) सायंकाळी ६.३० वाजता डेक्कन क्लब हाऊस, डेक्कन जिमखाना, पुणे येथे हा पुरस्कार सोहळा होणार असून, पुरस्कार प्रदान केल्यानंतर प्रसिद्ध निवेदक प्रवीण जोशी आमटे दाम्पत्याची प्रकट मुलाखत घेणार आहेत. या सोहळ्याला विविध क्षेत्रातील मान्यवरांची विशेष उपस्थिती असणार आहे. हा कार्यक्रम फक्त निमंत्रितांसाठी आहे.”
डॉ. शरद मुतालिक म्हणाले, “त्वचेच्या आजारांकडे समाज आजही तुच्छतेने पाहतो. त्यामुळे अशा रुग्णांना आजारासोबत अन्य अडचणींचा सामना करावा लागतो. आर्थिक व सामाजिक संघर्षाला सामोरे जावे लागते. अशावेळी त्वचेच्या आजारांबाबत जागृती करून ऑटो-इम्यून ब्लिस्टरिंग आजारांनी ग्रस्त लोकांना मदत करण्यासाठी सुरु केलेला सामाजिक उपक्रम आहे.
अशोककुमार सुरतवाला यांच्या प्रेरणेने दिवंगत जयश्री सुरतवाला यांच्या स्मरणार्थ सुरु केलेल्या फाउंडेशनमार्फत लोकांमध्ये ऑटो-इम्यून ब्लिस्टरिंग आजारांविषयी जागरूकता वाढवण्यासह लवकर निदान व योग्य उपचारांसाठी मार्गदर्शन, गरजू रुग्णांना मदत देण्यात येते. तसेच या आजारांतून बऱ्या झालेल्या रुग्णांचे अनुभव पीडितांपर्यंत पोहचवून त्यांना प्रगत उपचार घेण्यास प्रोत्साहन व मार्गदर्शन देण्यासाठी व्यासपीठ उपलब्ध करून दिले जात आहे. यासह आधुनिक औषधोपचार सर्वांसाठी सुलभ व परवडणारे करण्यासाठी पुढाकार घेतला जात आहे.”
औंध रोड, बोपोडी भागातील वाहतूक कोंडीवर उपाय योजना करा : सुनील माने यांची मागणी
Newsworldmarathi Pune : औंधरोड, बोपोडी भागात वारंवार वाहतूक कोंडी होत आहे. यामुळे लोकांचा वेळ वाया जात आहे. याबाबत उपाय योजना करण्यासाठी आपण प्रत्यक्ष पाहणी दौरा आयोजित करावा अशी मागणी राष्ट्रवादी काँग्रेस पक्ष, शरदचंद्र पवार पक्षाचे प्रदेश सरचिटणीस व प्रवक्ता सुनील माने यांनी अतिरिक्त पोलिस आयुक्त तसेच वाहतूक शाखेचे प्रभारी मनोज पाटील यांच्याकडे केली.
याबाबतचे पत्र त्यांनी आज मनोज पाटील यांना प्रत्यक्ष भेटून दिले. लवकरच प्रत्यक्ष भेट देऊन या भागातील वाहतूक समस्येवर तोडगा काढण्याचे आश्वासन त्यांनी या भेटीत दिले.
सुनील माने यांनी दिलेल्या पत्रात म्हंटले आहे की, औंध रोड आंबेडकर चौक येथे नेहमी वाहतुकीची वर्दळ असते.
त्यातच या भागात सांगवी, स्पायसर कॉलेज या भागातील वाहतुकीची कोंडी कमी व्हावी म्हणून येथील मुळा नदीवर पूल बांधण्यात आला आहे. हा पूल औंधरोड येथील चंद्रमणी संघ येथून सुरु होतो. या पूलावरून प्रवास करणे गैरसोयीचे होत असल्याने पुलावर अत्यंत कमी वर्दळ आहे.
औंधरोड कडून सांगवीकडे जाणाऱ्या वाहनधारकांना या पुलावरून जाण्यासाठी डिव्हायडर नसल्याने पुणे विद्यापीठाकडून वळसा घालून यावे लागते. हा त्रास वाचवण्यासाठी लोक विरुद्ध दिशेने पुलावरून प्रवासासाठी जातात. यामुळे या रस्त्यावर गर्दी होते.
त्याचप्रमाणे सांगवी कडून येणारी वाहने औंधरोड येथे चंद्रमणी संघाजवळ येतात. पुणे विद्यापीठाकडून येणाऱ्या वाहनांची या रस्त्यावर अगोदरच गर्दी झालेली असते अशावेळी येथे बॉटल नेक तयार होऊन पुन्हा या रस्त्यावर गर्दी वाढते. जवळच येथे औंध रोडचा पीएमपीएमएलचा बस थांबा तसेच रिक्षा स्टँडही आहे. यामुळे आंबेडकर चौकातून रस्ता ओलांडून सांगवीकडे जाणाऱ्या वाहनधारकांना त्रास होतो.
याप्रमाणेच बोपोडी कडून येणारी ब्रेमेन चौक व खडकी स्टेशन परिसराकडे जाणारी वाहने औंधरोड आंबेडकर चौकात येतात यामुळे येथे वाहनांची मोठ्या प्रमाणात गर्दी होते. याप्रमाणेच खडकी स्टेशन पासून रेंजहिल्सकडे वळताना तसेच खडकी पोलिस स्टेशन जवळील बोगद्याजवळ नेहमी गर्दी होऊन वारंवार वाहतुकीची समस्या निर्माण होत आहे. दररोज होणाऱ्या या त्रासाला वाहनधारक वैतागले आहेत. वाहनांची मोठ्या प्रमाणावर गर्दी असल्याने या रस्त्यावर अनेक अपघात झाले आहेत.
यापुढेही एखाद्या गंभीर अपघाताची शक्यता नाकारता येत नाही. तरी कृपया आपण पाहणी दौरा आयोजित करून औंधरोड, बोपोडी, खडकी येथील वाहतूक समस्येचा आढावा घ्यावा व येथील नागरिकांची वाहतूक कोंडीतून मुक्तता करावी अशी विनंती त्यांनी या पत्राद्वारे केली आहे.
राज्याच्या तिजोरीत खडखडाट! पिककर्ज माफीबाबत अजित पवारांचे थेट स्पष्टीकरण…
Newsworldmarathi Pune : अर्थसंकल्प जाहीर झाल्यानंतर राज्यातील शेतकऱ्यांसाठी महत्त्वाचा मुद्दा ठरलेली पिककर्ज माफी आणि इतर शेतकरीधार्जिण्या योजनांबाबत अजूनही संभ्रम कायम आहे.”लाडकी बहीण” योजनेमुळे इतर योजनांवर आर्थिक ताण पडल्याचे स्पष्ट दिसत असून, त्यामुळे राज्य सरकारच्या तिजोरीत खडखडाट झाला आहे.”
उपमुख्यमंत्री अजित पवार यांनी यापूर्वीही राज्याच्या आर्थिक स्थितीबाबत परखड भूमिका मांडली होती. आता त्यांनी पिककर्ज माफीबाबतही आपली भूमिका स्पष्ट केली आहे. त्यांच्या या भूमिकेमुळे शेतकऱ्यांना दिलासा मिळणार की अजून प्रतीक्षा करावी लागणार, हे पाहणे महत्त्वाचे ठरणार आहे.
अजित पवार यांच्या या वक्तव्यावरून स्पष्ट होते की, त्यांनी अर्थसंकल्प वास्तववादी दृष्टिकोन ठेवून मांडला असून, राज्याच्या आर्थिक शिस्तीवर भर दिला आहे. त्यांनी विरोधकांच्या टीकेला उत्तर देताना, “सगळी सोंग करता येतात, पण पैशाचं सोंग करता येत नाही” असे म्हणत, सरकारच्या आर्थिक मर्यादांची जाणीव करून दिली आहे.
यावरून राज्यातील खर्चाच्या प्राधान्यक्रमांवर मोठा प्रभाव पडत आहे, हे दिसून येते. लाडकी बहीण योजनेसाठी मोठ्या प्रमाणात निधी वाटप झाल्यामुळे इतर योजनांवर आर्थिक मर्यादा आल्या, असे संकेतही त्यांच्या या वक्तव्यातून मिळतात. त्यामुळेच पिककर्ज माफी किंवा इतर शेतकरी योजनांवर कोणता निर्णय घेतला जाणार, याकडे सगळ्यांचे लक्ष लागले आहे.
अजित पवार यांनी थेट आणि स्पष्ट शब्दांत सांगितले आहे की, या वर्षी आणि पुढच्या वर्षी पिककर्ज माफी होणार नाही, कारण राज्याची आर्थिक परिस्थिती तशी नाही. त्यांनी हेही अधोरेखित केले की, “निवडणुकीपूर्वी काही जणांनी कर्जमाफीबाबत वक्तव्ये केली होती, पण प्रत्यक्षात परिस्थिती तशी नाही.”
त्यांचा हा निर्णय आर्थिक शिस्तीचा भाग असला तरी, यामुळे राज्यातील शेतकऱ्यांमध्ये मोठ्या प्रमाणात नाराजी निर्माण होऊ शकते. विशेषतः, निवडणुकीपूर्वी कर्जमाफीच्या आश्वासनांवर विश्वास ठेवलेल्या शेतकऱ्यांना हा मोठा धक्का बसू शकतो.
पुणेकरांसाठी खुशखबर! 42 किमी लांबीच्या नव्या मेट्रो मार्गाने जोडले जाणार हे भाग..!
Newsworldmarathi Pune: पुणे आणि पिंपरी-चिंचवडसाठी मेट्रोचा विस्तार हे दोन्ही शहरांच्या वाहतूक व्यवस्थेसाठी मोठा निर्णय आहे. महामेट्रोने प्रस्तावित केलेला 42 किलोमीटर लांबीचा नवीन मेट्रो मार्ग पिंपरी-चिंचवडच्या दळणवळणासाठी मोठा बदल घडवू शकतो. सध्या डीपीआर (सविस्तर प्रकल्प अहवाल) तयार करण्याचे काम सुरू आहे, म्हणजेच लवकरच या प्रकल्पाला अधिकृत मंजुरी मिळण्याची शक्यता आहे.
हा विस्तार झाल्यास शहरातील ट्रॅफिकचा ताण कमी होईल आणि प्रवाशांना पर्यायी, जलद आणि सोयीस्कर सार्वजनिक वाहतूक उपलब्ध होईल. विशेषतः वाढत्या शहरीकरणामुळे वाहतूक कोंडी ही मोठी समस्या बनली आहे, त्यामुळे मेट्रोच्या विस्तारामुळे नागरिकांना मोठा दिलासा मिळेल.
हा नवीन 42 किलोमीटर लांबीचा मेट्रो मार्ग पुणे आणि पिंपरी-चिंचवडच्या सार्वजनिक वाहतूक व्यवस्थेसाठी मोठी गेमचेंजर ठरू शकतो. विशेषतः तो मुंबई-पुणे-बेंगळुरू महामार्गाशी जोडला जाणार असल्यामुळे या भागातील वाहतुकीची कोंडी कमी होण्यास मदत होईल.
सध्या सविस्तर प्रकल्प अहवाल (DPR) युद्धपातळीवर तयार केला जात आहे, याचा अर्थ लवकरच हा प्रकल्प पुढच्या टप्प्यात जाईल. एकदा डीपीआर मंजूर झाल्यानंतर निधी मंजुरी आणि प्रत्यक्ष काम सुरू होण्याची प्रक्रिया गतीने होईल.
हा प्रकल्प पूर्ण झाल्यावर पिंपरी-चिंचवड आणि पुण्यातील उपनगरांमधील प्रवास अधिक जलद आणि सोयीस्कर होईल. यामुळे केवळ प्रवाशांना फायदा होणार नाही, तर वाहतुकीवरील भारही कमी होईल आणि पर्यावरणपूरक सार्वजनिक वाहतूक व्यवस्था अधिक सक्षम होईल.
महापालिकेच्या सर्वसाधारण सभेत मंजुरी मिळाल्यानंतर हा प्रस्ताव अंतिम निर्णयासाठी राज्य शासनाकडे पाठवला जाईल. या मार्गाची रचना पाहता, तो निगडी – मुकई चौक – वाकड – नाशिक फाटा – चाकण या प्रमुख भागांमधून जाणार आहे. विशेष म्हणजे, हा मार्ग चाकणपर्यंत नेण्यात येत असल्याने औद्योगिक क्षेत्रात काम करणाऱ्या लाखो प्रवाशांना मोठा दिलासा मिळेल. चाकण हे महाराष्ट्रातील एक मोठे औद्योगिक केंद्र आहे आणि तिथे मोठ्या प्रमाणावर कामगार आणि व्यावसायिक प्रवास करतात.
तसेच, हा मेट्रो मार्ग मुंबई-पुणे-बेंगळुरू महामार्गाशी जोडला जाणार असल्यामुळे वाहतुकीच्या दृष्टीने एक महत्वपूर्ण कनेक्टिव्हिटी निर्माण होईल. परिणामी, महामार्गावर होणारी वाहतूक कोंडी काही प्रमाणात कमी होईल आणि सार्वजनिक वाहतूक प्रणाली अधिक कार्यक्षम बनेल.
महाराष्ट्र राज्यात प्रथमच शिव्यामुक्त शाळा ठराव संमत सर्वांनी घ्यावा आदर्श : वैदेही सावंत
Newsworldmarathi Pune महिला दिनानिमित्त राष्ट्र सेवा दल संचालित साने गुरुजी विद्यालय प्राथमिक शाळा पुणे व चक्रभेदी सोशल फौंडेशन देवरुख यांच्या संयुक्त विद्यमाने बॅ नाथ पै सभागृह पुणे येथे गुणवंत पालक, गुणवंत विद्यार्थी पुरस्कार सोहळा संपन्न झाला.क्रांतीज्योती सावित्रीबाई फुले यांच्या प्रतिमेचे पूजन व दीपप्रज्वलन करून कार्यक्रमाला सुरुवात झाली.महिला पालकांनी स्री भ्रुणहत्या व सावित्रीबाई च्या जीवनातील प्रसंगावर आधारित कार्यक्रम सादर केला त्याचबरोबर विद्यार्थ्यांनी समतेच्या वाटेनं खणकावित पैंजण यावं हे समुहगीत सादर केले.कार्यक्रमाचे प्रास्ताविक व स्वागत शाळेच्या मुख्याध्यापिका मीना काटे यांनी केले.
कार्यक्रमाच्या प्रमुख पाहुण्या व चक्रभेदी संस्थेच्या वैदेही सावंत यांनी विधवा अनिष्ठ प्रथा म्हणजेच नवरा वारल्यांनतर तिचे बांगड्या फोडणे, कुंकू पुसणे, जोडवी काढणे इ. समूळ नष्ट झाली पाहिजे. तसेच चक्रभेदी संस्था शिव्या मुक्त समाज अभियान राबवत आहे त्या अनुषंगाने नुकताच गुहागर पाचेरी आगर गावात ८मार्च दिनी महिला सभेत शिव्या मुक्त गावचा ठराव घेण्यात आला त्याच धर्तीवर उपस्थित सर्वांना उद्देशून यशदा ट्रेनर सावंत यांनी शिव्या मुक्त शाळा असा ठराव घेऊया का? असे विचारले सर्वांना मान्य असेल तर हात वर करा असे सुचवले असता सर्वांनी मान्य केले.
शाळेच्या आवारात कोणीही शिव्या द्यायच्या नाहीत असा एकमताने ठराव करण्यात आला. महाराष्ट्र राज्यातील ही पहिली शाळा व्यवस्थापण कमिटी आहे जिने अशा प्रकारचा ठराव केला आहे. त्याचा आदर्श सर्वांनी घ्यावा असे सावंत यांनी नम्र आवाहन केले
यावेळी व्यासपीठावर संकल्प फाऊंडेशनच्या अध्यक्षा चेतना बिडवे, लोकमतचे वरीष्ठ उपसंपादक दिपक होमकर, महाराष्ट्र लोकविकास मंचचे उपाध्यक्ष एस एन कोंढाळकर, प्रशासक मंडळाचे सदस्य प्रा भगवान कोकणे,साने गुरुजी प्राथमिक शाळेच्या मुख्याध्यापिका मीना काटे, ज्येष्ठ शिक्षक सोपान बंदावणे, व्यवस्थापन समिती सदस्य अविनाश खंडारे आदी मान्यवर उपस्थित होते.कार्यक्रमाचे अध्यक्ष स्थान प्रशासक मंडळाचे सचिव शिवाजी खांडेकर यांनी भूषवले.
महिलांनी स्वतःचा व्यवसाय सुरु करताना संवाद क्षमता, मार्केटिंग स्कील असावे लागते ते सर्व संकल्प फाऊंडेशनच्या माध्यमातून दिले जाईल असा विश्वास उपस्थित महिला पालकांना चेतना बिडवे यांनी दिला.
यावेळी शाळेचे पालक सुषमा शिंगाडे व पूनम कदम यांच्या पुढाकाराने सेवा ज्येष्ठ शिक्षक सोपान बंदावणे यांचा कृतज्ञता म्हणून आकर्षक फोटोफ्रेम देऊन सन्मान करण्यात आला.
अध्यक्षीय भाषणात शिवाजी खांडेकर यांनी शिव्या मुक्त शाळा हा ठराव पास करण्याविषयी समाधान व्यक्त केले .तसेच पालकांकडून स्वयं स्फुर्तीने एखाद्या शिक्षकाचा सन्मान होणे ही महाराष्ट्रातील एक अनमोल घटना असल्याचे सांगितले. शिक्षक सोपान बंदावणे यांचा पालकांकडून झालेला सत्कार हे शिक्षणक्षेत्रात वेगळे पाऊल असल्याचे विचार त्यांनी मांडले.
लोकमतचे वरीष्ठ उपसंपादक दिपक होमकर यांनी विविध उदाहरणांद्वारे महिलांचे कुटुंबातील स्थान कसे असावे याबाबत प्रभावी मांडणी केली. यावेळी वर्षभरात उत्तम कामगिरी केलेल्या विद्यार्थ्यांना स्व शिला खंडारे यांच्या स्मृतिप्रीत्यर्थ अविनाश खंडारे पुरस्कृत गुणवंत विद्यार्थी पुरस्कार देण्यात आला तर स्व वामनराव उबाळे यांच्या स्मरणार्थ मीना काटे पुरस्कृत गुणवंत पालक पुरस्कार देण्यात आला.
इनरव्हील क्लबच्या वतीने शाळेतील दहा विद्यार्थ्यांचा शैक्षणिक खर्च संगिता गोवळकर यांनी दिली. कार्यक्रमाचे सूत्रसंचालन संगिता गोवळकर यांनी तर आभार शितल खेडकर यांनी मानले. कार्यक्रम यशस्वी करण्यासाठी संजय ससे, विठ्ठल शेवते, तेजस्विनी फूलफगर , लक्ष्मी कांबळे तसेच सुषमा शिंगाडे, पूनम कदम, स्वाती चौरे, सारिका नांगरे, रेणुका गरड मनाली बेंद्रे इ पालकांनी परिश्रम घेतले.
