होंडा मोटरसायकल आणि स्कूटर इंडिया पुणे, महाराष्ट्र येथे रस्ते सुरक्षा जनजागृती अभियान
Newsworldmarathi Pune: होंडा मोटरसायकल आणि स्कूटर इंडिया (HMSI) ने पुणे, महाराष्ट्र येथे रस्ते सुरक्षा जनजागृती अभियानाच्या माध्यमातून रस्ते सुरक्षेवर आपला भर पुन्हा अधोरेखित केला. या उपक्रमात रेडियंट इंटरनॅशनल स्कूल, श्री जे. आर. गुंजाळ इंग्रजी माध्यमिक शाळा आणि ज्युनियर कॉलेज, गव्हर्नमेंट कॉलेज ऑफ इंजिनिअरिंग अँड रिसर्च आणि ग्रामोन्नती मंडळ आर्ट्स, कॉमर्स अँड सायन्स कॉलेज या संस्थांमधील २२०० हून अधिक विद्यार्थी आणि कर्मचारी सहभागी झाले आणि जबाबदार रस्ते वर्तनाविषयी मूलभूत ज्ञान प्राप्त केले.
लहान वयातच रस्ते सुरक्षा शिक्षणाची सवय लागावी या उद्देशाने HMSI ने हा उपक्रम राबवला. केवळ जनजागृती करून थांबण्यापेक्षा हा उपक्रम विद्यार्थ्यांमध्ये दीर्घकालीन सकारात्मक वर्तनशील बदल घडवण्यावर केंद्रित आहे. लहानपणीच योग्य रस्ते वर्तनाची सवय लावल्याने ते जबाबदार रस्ते वापरकर्ते होऊ शकतात आणि त्यांच्या आजूबाजूच्या लोकांवरही चांगला प्रभाव टाकू शकतात. शाळा, महाविद्यालये आणि शासकीय व अशासकीय संस्थांबरोबर सहकार्य करत HMSI रस्ते सुरक्षेला दैनंदिन जीवनाचा अविभाज्य भाग बनवत आहे.
या अभियानामध्ये सुरक्षित वाहन चालवण्याचे धडे, धोका ओळखण्याचे प्रशिक्षण, खेळ, प्रश्नमंजुषा, हेल्मेट जनजागृती आणि राइडिंग ट्रेनर मॉड्यूल्स यांचा समावेश करण्यात आला. हे सर्व इंटरॅक्टिव्ह आणि व्यावहारिक उपक्रम असल्यामुळे विद्यार्थ्यांना केवळ रस्ते सुरक्षा नियम शिकण्यास मदत झाली नाही, तर रस्त्यावर असताना जबाबदारीची जाणीवही निर्माण झाली.
HMSI ने रेडियंट इंटरनॅशनल स्कूल, श्री जे. आर. गुंजाळ इंग्रजी माध्यमिक शाळा आणि ज्युनियर कॉलेज, गव्हर्नमेंट कॉलेज ऑफ इंजिनिअरिंग अँड रिसर्च आणि ग्रामोन्नती मंडळ आर्ट्स, कॉमर्स अँड सायन्स कॉलेज यांचे या उपक्रमाच्या यशस्वी आयोजनासाठी मनःपूर्वक आभार मानले. विद्यार्थ्यांचा आणि कर्मचाऱ्यांचा उत्स्फूर्त सहभाग जबाबदार रस्ते वर्तनाबद्दल जागरूकता निर्माण करण्यास आणि सुरक्षित रस्त्यांसाठी कार्य करण्यास उपयुक्त ठरला.
HMSI ने आपल्या सातत्यपूर्ण रस्ते सुरक्षा मोहिमेच्या माध्यमातून आतापर्यंत महाराष्ट्रातील सुमारे ३ लाख नागरिक आणि विद्यार्थ्यांपर्यंत पोहोचून त्यांना रस्ते सुरक्षा विषयक व्यावहारिक ज्ञान प्रदान केले आहे. अशा उपक्रमांच्या मदतीने HMSI रस्ते सुरक्षा जनजागृती निर्माण करत राहील आणि सर्वांसाठी जबाबदार वाहन चालवण्याच्या सवयी प्रोत्साहित करत राहील.
बारामती नगरपालिकेतील आका कोण?
Newsworldmarathi Baramati : राज्याचे उपमुख्यमंत्री असलेल्या अजित पवार यांच्या तालुक्यातील नगरपालिकेच्या प्रशासकीय वर्तुळाला भ्रष्टाचाराची कीड लागले असल्याचे वास्तव समोर आले आहे कालच एका बड्या अधिकाऱ्याला एक लाख रुपयांची लाच घेताना अटक करण्यात आली आहे. प्रशासकीय वर्तुळात लुडबुड करणारा आका तयार झाला आहे. प्रशासकीय वर्तुळाला लागलेली कीड संपवण्याची धमक राज्याचे उपमुख्यमंत्री अजित पवार यांच्याकडे असल्याने त्यांच्याकडे एक आशेचा ‘किरण’ म्हणून पाहिले जात आहे.
बारामती नगरपरिषदेत नगररचनाकार विकास किसनराव ढेकळे (वय ५०) यांना लाच प्रकरणी अटक करण्यात आली. शहर पोलिस ठाण्यात त्यांच्या विरोधात भ्रष्टाचार प्रतिबंध अधिनियमानुसार गुन्हा दाखल करण्यात आला. यानिमित्ताने या विभागाला भ्रष्टाचाराची कीड लागली असल्याचे समोर आले असून अनेक सुरस कथा आता बाहेर येवू लागल्या आहेत.
शहरातील बांधकाम व्यावसायिक भगवान चौधर यांच्या गृह प्रकल्पाचा प्रस्ताव नगरपरिषदेच्या नगररचना विभागात दाखल होता,तो प्रस्ताव मंजूर होण्यासाठी ढेकळे यांनी दोन लाख रुपयांची मागणी केली होती. तडजोडीअंती १ लाख ७५ हजार रुपये द्या अशी मागणी ढेकळे यांनी केली. त्यातील १ लाख रुपयांचा पहिला हप्ता लाच स्वरुपात घेताना त्यांना बुधवारी (दि. १९) रात्री ताब्यात घेत अटक करण्यात आली.
या विभागात अगदी शिपायापासून ते ऑनलाईन काम करणाऱ्या एजन्सीचे ऑपरेटर, ते थेट नगररचनाकार अशी भ्रष्टाचाराची मोठी साखळीच कार्यरत असल्याचे बोलले जात आहे. विशेष म्हणजे कार्यालयीन वेळेव्यतिरिक्त रात्री हाॅटेलात अनेकदा व्यवहार ठरवले जातात. गृह प्रकल्प असो कि व्यावसायिक प्रकल्प त्याच्या मंजूरीसाठी लाच दिल्याशिवाय सहीच होत नसल्याचे चित्र बारामतीत आहे. एजंटांचा विळखा या विभागाला पडला आहे.
बारामती नगरपरिषदेच्या कारभारावर उपमुख्यमंत्री अजित पवार यांचे बारकाईने लक्ष असते. पवार यांच्यामुळे कोट्यवधींचा निधी पालिकेला विकासकामांसाठी मिळतो. पवार यांनी वारंवार सूचना केल्यानंतरही अधिकारी स्तरावर अडवाअडवीची कामे चालतात. पैसे दिल्याशिवाय कामेच होत नसल्याचा अनुभव नागरिकांना येतो आहे. काही वर्षांपूर्वी एका जाहीर कार्य़क्रमात पालखी महामार्ग भूसंपादन मोबदल्यापोटी प्रांताधिकारी पैसे मागत असल्याची तक्रार एका शेतकऱ्याने पवार यांच्याकडे केली होती. गेल्या दोन महिन्यांपूर्वी पंचायत समितीचा एक अधिकारी पैसे घेतल्याशिवाय विहिरींच्या कामांना परवानगी देत नाही, अशी तक्रार पवार यांच्याकडे केली होती. त्यावर पवार यांनी आमची भावकीच पैसे घेतेय. त्यांनी चुकीचे काम केले असल्यास गैर नाही, असा इशारा दिला होता. त्यानंतरही बारामतीत विविध विभागाच्या अधिकारी-कर्मचाऱ्यांच्या वागण्यात तसूभरही बदल झालेला नाही.
बारामती नगरपरिषदेला मिळणाऱ्या महसूलापैकी मोठा वाटा हा बांधकाम परवानगीच्या माध्यमातून जमा होत असतो. बारामती शहराच्या विकासामध्ये बांधकाम व्यावसायिकांचा मोलाचा वाटा आहे. नगररचना विभागातील अधिकाऱ्यांच्या मनमानी कारभाराचा प्रचंड त्रास बारामतीमधील सर्व बांधकाम व्यावसायिकांना मागील काही वर्षांपासून होत आहे. ही बाब मुख्याधिकाऱ्यांच्या कानावर ‘क्रेडाई’ने वेळोवेळी घातली आहे.विकास ढेकळे यांच्यावरील कारवाईचे बारामती ‘क्रेडाई’ने स्वागत केले असून आता तरी या विभागातील कार्यतत्परता व कार्यक्षमता वाढवावी अशी मागणी ‘क्रेडाई’ने केली आहे.
मोठी बातमी: राज्यातील शाळांना CBSC अभ्यासक्रम लागू होणार…शिक्षणमंत्र्यांची मोठी घोषणा
Newsworldmarathi Mumbai: यंदाच्या यंदाच्या शैक्षणिक वर्षापासूनच स्टेट बोर्ड शाळेतील (School) विद्यार्थ्यांच्या अभ्यासक्रमात सीबीएससी पॅटर्न (CBSC) लागू करण्यात येणार आहे. याबाबत च्या सूचना राज्यातील राज्य शिक्षण मंडळांच्या शाळांना देण्यात आल्या आहेत.
राज्यातील विद्यार्थ्यांची गुणवत्ता वाढावी यासाठी शैक्षणिक वर्ष 2025-2026 या वर्षापासून सीबीएससी पॅटर्न लागू होणार आहे. विद्यार्थ्यांचा सर्वांगीण विकास व्हावा या हेतूने सरकारने हा निर्णय घेतला आहे. राज्याचे शिक्षणमंत्रीदादा भुसे (Dada bhuse) यांनी यासंदर्भात आज सभागृहात माहिती देत घोषणा केली. विशेष म्हणजे यापूर्वी मुख्यमंत्री देवेंद्र फडणवीस यांच्यासमवेत झालेल्या बैठकीनंतरही त्यांनी राज्यात सीबीएससी पॅटर्न लागू करण्यासंदर्भात आढावा सुरू असल्याचे म्हटले होते.
विधान परिषदेतील प्रश्नावर लेखी उत्तर देताना
राज्य अभ्यासक्रम आराखड्याला शालेय शिक्षण विभागाशी संदर्भात सुकाणू समितीने मान्यता दिली असल्याची माहिती मंत्री दादा भुसे यांनी दिली.
भाजप नेते आणि आमदार प्रसाद लाड यांनी विचारलेल्या प्रश्नाला मंत्री दादा भुसे यांनी हे उत्तर दिले. राज्यातील इयत्ता तिसरी ते बारावीच्या शाळांसाठी राष्ट्रीय शैक्षणिक धोरणानुसार, केंद्रीय माध्यमिक शिक्षण मंडळाच्या सीबीएसई अभ्यासक्रमाच्या आराखड्याला सुकाणू समितीने मान्यता दिली का? असा प्रश्न आमदार प्रसाद लाड यांनी विचारला होता. त्यावर, सीबीएसई अंतर्गत पाठ्यपुस्तके मराठीत उपलब्ध करुन दिली जाणार असून 1 एप्रिलपासून सत्राची सुरुवात करण्यात येणार असल्याचे उत्तर दादा भुसे यांनी दिले.
Ajit pawar : अजित पवार पालकमंत्री असलेल्या पुणे जिल्ह्याला मिळेना उपायुक्त
Newsworldmarathi Pune :अजित पवार पालकमंत्री असलेल्या जिल्ह्यात प्रशासनाचा कारभार पाहण्यासाठी उपायुक्तांची वानवा असल्याचे वास्तव समोर आले आहे. पुणे विभागीय कार्यालयातील सहा उपायुक्तपदांवर केवळ एकच उपायुक्त असल्याने प्रशासकीय कामकाजाचा ताण अन्य अधिकाऱ्यांवर वाढत चालला आहे.
पुणे विभागाच्या अंतर्गत सातारा, सांगली, कोल्हापूर, सोलापूर असे जिल्हे येतात. या पाच जिल्ह्यांचा महसुली कारभार पुणे विभागीय आयुक्त कार्यालयातूनच चालतो. मात्र, मागील काही महिन्यांपासून पुणे विभागीय कार्यालयात उपायुक्तांच्या जागा रिकाम्या असल्याचे पाहायला मिळत आहे.
रोजगार हमी योजना उपायुक्त, पुनर्वसन उपायुक्त, नगरपालिका प्रशासन, सामान्य प्रशासन, अप्पर आयुक्त सामान्य प्रशासन, अप्पर आयुक्त महसूल यांच्या जागी अद्याप अधिकाऱ्यांची नेमणूक झालेली नाही. आता केवळ करमणूक कर / भूसंपादन उपायुक्तपदी अरुण आनंदकर यांची नियुक्ती केली आहे.
विभागीय आयुक्त कार्यालयाची भूमिका ही त्या विभागात असलेल्या सर्व राज्य सरकारी कार्यालयांचे प्रशासकीय प्रमुख म्हणून काम करण्याची असते. विभागीय आयुक्तांना विभागातील जमीन महसूल संकलन, कालवा महसूल संकलन आणि कायदा व सुव्यवस्था राखण्याची थेट जबाबदारी दिली जाते. विभागीय आयुक्त विभागातील स्थानिक सरकारी संस्थांचे अध्यक्षपद देखील भूषवतात.
विभागीय आयुक्त हे विभागाचे सामान्य प्रशासन आणि त्यांच्या नियंत्रणाखालील जिल्ह्यांचा नियोजित विकास करण्यासाठी जबाबदार असतात आणि महसूल प्रकरणांसाठी अपील न्यायालय म्हणून देखील काम करतात. त्यांच्या अन्य कामांची जबाबदारी उपआयुक्तांवर असते. त्यामुळे ही पदे अतिशय महत्त्वाची मानली जातात.
Devendr fadanvis: शरद पवार आणि उद्धव ठाकरे यांचं वर्णन कसे कराल? जयंत पाटील यांच्या प्रश्नावर फडणवीस म्हणाले.. “भरवसा नाही”..
Newsworldmarathi Mumbai : गेल्या काही दिवसांपासून राज्याचं राजकारण वेगवेगळ्या विषयांवरून चांगलंच ढवळून निघालं आहे. औरंगजेबाच्या कबरीवरून सत्ताधारी आणि विरोधकांमध्ये आरोप-प्रत्यारोपाचं राजकारण सुरु आहे. यातच नागपूरमध्ये दंगलीची घटना घडली. यावरून उद्धव ठाकरे यांच्यासह महाविकास आघाडीच्या नेत्यांनी राज्याचे मुख्यमंत्री देवेंद्र फडणवीस यांच्यावर जोरदार टीका केली. या टीकेला भाजपाकडून जोरदार प्रत्युत्तर दिलं जात आहे. यातच आज राष्ट्रवादी काँग्रेस (शरद पवार) पक्षाचे प्रदेशाध्यक्ष जयंत पाटील यांनी मुख्यमंत्री देवेंद्र फडणवीस यांची मुलाखत घेतली.
या मुलाखतीत जयंत पाटील यांनी मुख्यमंत्री देवेंद्र फडणवीस यांना राज्यातील विविध विषयांच्या संदर्भात प्रश्न विचारले. या प्रश्नावर मुख्यमंत्री देवेंद्र फडणवीस यांनी देखील दिलखुलास उत्तरे दिली. लोकमत वृत्तसंस्थेच्या एका पुरस्कार सोहळ्यात देवेंद्र फडणवीस यांनी ही मुलाखत दिली. यावेळी जयंत पाटील यांनी देवेंद्र फडणवीस यांना शरद पवार आणि उद्धव ठाकरे यांच्याबाबत एक प्रश्न विचारला. या प्रश्नावर देवेंद्र फडणवीस यांनी देखील एका वाक्यात उत्तर दिलं.
जयंत पाटलांनी काय प्रश्न विचारला?
शरद पवार आणि उद्धव ठाकरे यांचं दोन-दोन वाक्यात तुम्ही कसं वर्णन कराल? असा प्रश्न जयंत पाटील यांनी देवेंद्र फडणवीस यांना विचारला. यावर देवेंद्र फडणवीस यांनी दोन वाक्याऐवजी एका वाक्यात उत्तर दिलं. फडणवीसांनी म्हटलं की, “एका वाक्यात उत्तर देतो. वाईट वाटून घेऊ नका. काही भरवसा नाही. या वाक्यात दोघांची देखील वागण्याची पद्धत आली. काही भरवसा नाही”, असं देवेंद्र फडणवीस यांनी म्हटलं.
मंत्र्यांच्या बेजबाबदार विधानांबाबत फडणवीस काय म्हणाले?
नागपूरमध्ये दंगल उसळल्यानंतर सरकारमधील काही मंत्री चिथावणीखोर विधाने करत असल्याबाबतचा आरोप विरोधकांनी केला. मंत्र्यांच्या या विधानांवर मुख्यमंत्र्यांनी अंकुश लावावा, अशी मागणी होत आहे. यावर आता मुख्यमंत्री देवेंद्र फडणवीस यांनी मोठी प्रतिक्रिया दिली. ते म्हणाले, “जेव्हा आपण मंत्री असतो तेव्हा संयमानेच बोलले पाहिजे. माजी पंतप्रधान अटल बिहारी वाजपेयी यांनी राजधर्माचे पालन करण्याबाबत विधान केले होते. त्यामुळे आपले विचार, आपल्या आवडी-निवडी या बाजूला ठेवल्या पाहिजेत. आपण संविधानाची शपथ घेतलेली आहे. संविधानाने आपल्याला कुणाहीबरोबर अन्याय न करता वागण्याची जबाबदारी टाकली आहे. मंत्र्यांनी बोलत असताना संयम बाळगला पाहिजे. आपल्या बोलण्याने कुठेही तेढ निर्माण होणार नाही, हा प्रयत्न केला पाहिजे. कधी कधी तरूण मंत्री बोलून जातात. अशावेळी मी त्यांच्याशी संवाद साधतो त्यांना समजावून सांगतो. मंत्री असल्यामुळे संयम बाळगूनच बोलले पाहिजे”,असं मुख्यमंत्री देवेंद्र फडणवीस यांनी म्हटलं आहे.
पुणे जिल्हा परिषदेचा २९२ कोटी रुपयांचा अर्थसंकल्प सादर
पुणे जिल्हा परिषदेने २०२५-२६ या वर्षाचा २९२ कोटी ७५ लाख रुपयांचा अर्थसंकल्प बुधवारी मांडला. मुद्रांक शुल्क, तसेच जलसंपदा विभागाकडे थकीत पाणीपट्टीपोटी मिळणाºया रकमेमुळे गेल्या वर्षीच्या तुलनेत यंदाच्या अर्थसंकल्पात ५८ कोटी रुपयांची वाढ झाली आहे.
शाळा सुधारणा, प्राथमिक आरोग्य केंद्राचे सक्षमीकरण, अंगणवाड्यांसाठी सोलर पॅनेल, लघू पाटबंधारे,फेलोशिप योजना आदींचा अर्थसंकल्पात समावेश करण्यात आला आहे. जिल्हा परिषदेने मुख्य वित्त लेखा अधिकारी विशाल पवार यांनी २०२५- २६ या वर्षाचा अर्थसंकल्प हा मुख्य कार्यकारी अधिकारी आणि प्रशासक गजानन पाटील यांच्याकडे सादर केला.
त्यानंतर जिल्हा परिषदेच्या सल्लागार समितीकडे प्रशासक पाटील यांनी हा अर्थसंकल्प समितीपुढे मांडला आणि त्याला मंजुरी
देण्यात आली.या वेळी जिल्हा परिषदेचे अतिरिक्त मुख्य कार्यकारी अधिकारी चंद्रकांत वाघमारे, सामान्य प्रशासन विभागाचे उपमुख्य कार्यकारी अधिकारी श्रीकांत खरात, वित्त लेखा अधिकारी विशाल पवार, उपमुख्य वित्त लेखा अधिकारी अभिजित पाटील, सहायक लेखाअधिकारी जितेंद्र चासकर, याशिवाय विविध विभागाचे प्रमुख उपस्थित होते.
जिल्ह्यातील अनेक समाज मंदिरे ओस पडली आहेत. त्याठिकाणी चुकीचे कृत्य सुरू असतात. त्यामुळे त्या ठिकाणी आता ग्रंथालये करण्यात येणार आहे. गेल्या वर्षी २२३ समाजमंदिरांचे ज्ञानमंदिरात अर्थात ग्रंथालयात रूपांतर झाले. आता पुन्हा ४५० समाजमंदिरांचे ज्ञानमंदिरात रूपांतर करण्याचे
नियोजन आहे. जिल्ह्यातील ३०३ शाळांचे मॉडेल स्कूलमध्ये रूपांतर करण्याचा निर्णय जाहीर करण्यात आला आहे. त्याशिवाय जिल्ह्यातील १०८ प्राथमिक आरोग्य केंद्राचे अद्ययावतीकरण करण्यात येणार आहे.
खासगी आरोग्य सेवेच्या धर्तीवर आरोग्य केंद्रावर रुग्णसेवा देण्यावर भर देण्यात येणार आहे.अर्थसंकल्पातील तरतुदीनुसार, सुमारे ४५ हजार लाभार्थ्यांना वैयक्तिक लाभ योजनेच्या (डीबीटी) माध्यमातून लाभ मिळणार आहे. प्राथमिक आरोग्य केंद्रे, शाळा तसेच अंगणवाड्यांसाठी आवश्यक वीजपुरवठा उपलब्ध करण्यासाठी सोलर योजना राबविली जाणार आहे. जर्मन, फ्रेंच, स्पॅनिश भाषांचे ज्ञान असलेल्या शिक्षकांमार्फत सध्या धडे दिले जात आहेत. त्यामुळे आता जास्त विद्यार्थी
पटसंख्या असणाºया शाळांमध्ये या भाषेच्या खासगी संस्थांची मदत घेतली जाणार आहे.
समाजकल्याण विभागाच्या माध्यमातून जिल्हा परिषद फेलोशिप योजना राबविण्यात येणार आहे. या योजनेंतर्गत प्रायोगिक तत्त्वावर विद्यार्थ्यांची निवड केली जाणार आहे. त्यांना दरमहा २५ हजार रुपयांचे मानधन दिले जाईल. निवड झालेल्या विद्यार्थ्यांना जिल्हा परिषदेच्या प्रशासकीय कामाचा अनुभव घेता
येणार आहे. जिल्हा परिषदांच्या शाळांमधील विद्यार्थ्यांच्या सुरक्षितता आणि शिस्तीसाठी सीसीटीव्ही बसविण्यात येणार आहे. शाळेच्या सक्षमीकरणांतर्गत शिक्षकांसाठी बायोमेट्रिक फिंगरप्रिंट किंवा फेसरीडिंग हजेरी प्रणाली सुरू करण्याचा मानस आहे.
Shivjayanti: सम्राट ग्रुपतर्फे आयोजित शिवजयंती मोठ्या उत्साहात साजरी
Newsworldmarathi Pune : पारंपरिक वेशभूषेत नटलेले आबालवृद्ध… ‘जय भवानी, जय शिवाजी’ असा जयघोष… अग्रभागी असणारा छत्रपती शिवाजी महाराजांचा भव्य पुतळा… अशा स्फूर्तिदायी अन् ‘शिवमय’ वातावरणात शिवछत्रपतींना मानवंदना देण्यात आली. निमित्त होते विजय मित्र मंडळ ट्रस्ट आणि सम्राट ग्रुप आयोजित शिवाजयंती सोहळ्याचे..
सोमवार पेठेत सम्राट ग्रुपच्या वतीने भव्यदिव्य अशा शिवजयंती उत्सवाचे आयोजन करण्यात आले होते. यावेळी छत्रपती शिवाजी महाराज यांच्या पुतळ्याला पुष्पहार अर्पण करून शिवजयंती उत्साहात साजरी करण्यात आली.
यावेळी अप्सरा फेम अभिनेत्री सोनाली कुलकर्णी यांची प्रमुख उपस्थिती होती. तसेच केंद्रीय राज्यमंत्री सहकार आणि नागरी विमान वाहतूक खासदार मुरलीधर मोहोळ, उच्च व तंत्रशिक्षण तथा संसदीय कार्यमंत्री महाराष्ट्र राज्य सांगली पालकमंत्री चंद्रकांतदादा पाटील, राज्यमंत्री, महाराष्ट्र राज्य नगरविकास, परिवहन, सामाजिक न्याय, वैहाकीय शिक्षण, अल्पसंख्यांक विकास माधुरी मिसळ, आमदार सुनील कांबळे, आमदार हेमंत रासने, तसेच भाजप चे पदाधिकारी कार्यकर्ते मोठ्या संख्येने सहभागी झाले होते. यावेळी राजमुद्रा ग्रुप आणि पुणे स्पोर्ट्स अकॅडमी च्या वतीने मर्दानी खेळ सादर करण्यात आले.
यावेळी अभिनेत्री सोनाली कुलकर्णी म्हणाल्या, छत्रपती शिवाजी महाराजांच्या जीवनचरित्रातून विद्यार्थ्यांनी प्रेरणा घेऊन आपली सर्वोत्कृष्ठ कामगिरी करण्याचे ध्येय बाळगावे असे आवाहन केले.
आमच्या पुढच्या पिढीला शिवाजी महाराजांचे विचार पोहचविण्यासाठी गेली अनेक वर्ष पूर्व भगत शिवजयंती आम्ही साजरा करतो.या शिवजयंती मुळे आम्हा सर्वांना समाजासाठी काम करण्याची एक प्रेरणा मिळते. या शिवजयंती उत्सवाच्या माध्यमातून अनेक सामाजिक उपक्रम रबविले जातात असे, आयोजक माजी सभागृह नेते गणेश बिडकर यांनी सांगितले.
छत्रपती शिवाजी महाराज यांनी प्रत्येक पिढीला प्रेरणा आणि संदेश देण्याचे काम केले आहे. त्यामुळे मी आणि आपण सर्वजण छत्रपती शिवाजी महाराज यांनी दिलेल्या मार्गावर काम करित राहिले पाहिजे.तसेच छत्रपती शिवाजी महाराज यांच्या संकल्पनेतील जो महाराष्ट्र होता.जे स्वराज्य होत,ते सर्वांनी मिळून आणण्याचा प्रयत्न करावा,तसेच पंतप्रधान नरेंद्र मोदी आणि मुख्यमंत्री देवेंद्र फडणवीस हे सरकारच्या माध्यमातून तो प्रयत्न करीत असून या कामासाठी चळवळ उभारली गेली पाहिजे”,असे आवाहन देखील त्यांनी यावेळी केले आहे.
या शिवजयंती उत्सव उत्साहात पार पाडण्यासाठी आयोजक गणेश बिडकर, अध्यक्ष शुभम पवार, मार्गदर्शन विशाल दरेकर, तसेच विजय मित्र मंडळ ट्रस्ट आणि सम्राट ग्रुपच्या सर्व कार्यकर्त्यांनी विशेष प्रयत्न केले.
नव्याने समाविष्ठ बत्तीस गावांसाठी महापालिकेने दिले काय? : आमदार भीमराव तापकीर यांचा सवाल
Newsworldmarathi Pune: पुण्यामध्ये नव्याने समाविष्ठ झालेल्या ३२ गावांनी पुणे महापालिकेला किती मिळकत कर दिला? आणि महापालिकेने काय सोयी सुविधा उपलब्ध करून दिला? पुणे महापालिका आयुक्तांनी या गावांबाबत कोणताच निर्णय घेतला नाही त्यांच्याकडे ती क्षमताच नाही अशी खरमरीत टीका खडकवासला मतदार संघाचे आमदार भीमराव तापकीर यांनी विधानसेभेच्या अर्थसंकल्पीय अधिवेशनात केली.
पुणे शहराच्या चोहू बाजूने असलेल्या ३२ ग्रामंपंचायती पुणे महापालिकेत विसर्जित करून पुणे शहाराचा विस्तार करण्यात आला. त्यामुळे या गावांचा महसुली कर ग्रामपंचायत ऐवजी महापिलेकत जमा होत आहे. ३२ गावांतून कोट्यवधी रुपयांचा कर महापालिकेला मिळत आहे मात्र त्या तुलनेत या गावांमध्ये ना रस्ते, ना ड्रेनेज, ना शुध्द पाणीपुरवठा महापालिकेत पुरवते आहे, त्यामुळे या गावांनी एकत्र येऊन कृती समिती स्थापन करून अनेकवेळा आंदोलन केले आयुक्तांना निवेदने दिली आहेत. मात्र आयुक्तांनी त्याबाबत ठोस निर्णय घेतला नाही. त्यामुळे आमदार भीमराव तापकीर यांनी ३२ गावांचा प्रश्न विधानसभेत विचारला.
आमदार तापकीर म्हणाले की, ३२ गावांनी मिळून महापालिकेला आत्तापर्यंत किती टॅक्स दिला आहे. तो आकडा मंत्रीमहोदयांनी द्यावा तो आता उपलब्ध नसेल तर तातडीने या गावांच्या समस्या सोडविण्यासाठी एक बैठक घ्यावी आणि त्यावेळी या गावातून मिळालेले महसूली उत्पन्न सांगावे. गावनिहाय कराची रक्कम सांगावे. त्यावर विधानसभा अध्यक्षांनी याबाबत तातडीने बैठक घेण्याची सुचना मंत्री उदय सामंत यांना दिली.
कौशल्य विकास केंद्र लवकरच
तब्बल १९० कोटी रुपयांचे देशातील सर्वात मोठे कौशल्य विकास केंद्र पुण्यामध्ये लवकरच होणार आहे. उद्योजक रतन टाटा हयात असताना याबाबत निर्णय झाला आहे. त्यासाठी १६० कोटी रुपये टाटा ग्रूपकडून सीएसआर व्दारे मिळणार आहे तर उर्वरित रक्कम पुणे महापालिका देणार आहे. याची बैठक लवकरच होणार असून त्या बैठकीला सर्वांना बोलाविण्यात येईल अशी माहिती उद्योग मंत्री उदय सामंत यांनी दिली.
Pune University: पुणे विद्यापीठाच्या मुलींच्या वासतिगृहात दारूच्या बाटल्या अन सिगारेटची पाकीट…
Newsworldmarathi Pune : पुणे हे विद्येचं माहेर घर असून येथे देशासह जगभरातील विद्यार्थी शिकण्यासाठी येतात. राज्यातील विविध ठिकाणांहून लाखो तरूण येथे चांगेल शिक्षण मिळते म्हणून पुण्याची वाट धरतात. तर पुणे विद्यापीठात प्रवेश मिळावा म्हणून कसूनन तयारी करतात. मात्र आता याच सावित्रीबाई फुले विद्यापीठात एक धक्कादायक प्रकार उघडकीस आला असून मुलींच्या वसतीगृहात दारूच्या बाटल्यांचा खच आणि सिगारेटची पाकिटं सापडली आहेत. यामुळे शिक्षण क्षेत्रात एकच खळबळ उडाली आहे.
मिळालेल्या माहितीनुसार, पुण्यातील सावित्रीबाई फुले विद्यापीठमधील मुलींच्या वस्तीगृहात मोठ्या प्रमाणावर मोठ्या प्रमाणात दारू आणि धूम्रपान केलं जात असल्याचं उघड झाले आहे. हा प्रकार वसतीगृहातील मुलींकडूनच सुरू असल्याचा आरोप एका विद्यार्थीनी केल्याने समोर आला आहे.
विद्यापीठातील मुलींच्या वस्तीगृहात मुलींकडूनच मद्यप्राशन आणि धूम्रपान सुरू होता. याबाबत वसतिगृहात राहणाऱ्या एका विद्यार्थिनीने वसतिगृह महिला अधिकाऱ्याकडे तक्रार केली होती. एनेकदा तक्रार करूनही यावर कोणताच तोडगा निघत नव्हता. यामुळे संबंधित विद्यार्थिनीने प्रभारी कुलसचिव आणि कुलगुरू यांना पत्रातून सर्व घटनाक्रम सांगितला. मात्र प्रशासनाकडून कोणतीही कारवाई करण्यात आलेली नाही, असा आरोप त्या मुलीने केला आहे.
दरम्यान आता विद्यापीठातील मुलींच्या वसतिगृहामध्ये मोठ्या प्रमाणावर दारुच्या बाटल्या आणि सिगारेटची पाकिटं आढळून आलेली आहेत. मुलींच्या रुममधील काही फोटो आता समोर आली आहेत. यामुळे विद्यापीठात नेमकं काय सुरूय असा सवाल उपस्थित होत आहे.
तर संबंधित मुलीने जुलै महिन्यापासून तिच्या रुममेट्सने तिला अंमली पदार्थांचे सेवन करुन त्रास दिल्याचा आरोप केला आहे. तसेच या मुलींच्या दारु, सिगारेटमुळे मायग्रेनचा त्रास झाला असून मानसिक आणि शारिरीक छळ केला जातोय असाही दावा तीने केला आहे. याच या त्रासाला कंटाळून तिने वारंवार तक्रार केली होती. मात्र या तक्रारीवर कोणतीच कारवाई झाली नाही.
Pune Accident: पुण्यात भीषण दुर्घटना ! ट्रॅव्हलरला आग लागून चार जणांचा होरपळून मृत्यू
Newsworldmarathi Pune : हिंजवडी फेज 1 मध्ये आज (दि. 19 मार्च) सकाळी भीषण अपघात घडला. व्योमा ग्राफिक्स कंपनीच्या 12 कर्मचाऱ्यांना घेऊन जाणाऱ्या ट्रॅव्हलर टेम्पोला अचानक आग लागली. या दुर्घटनेत चार कर्मचाऱ्यांचा होरपळून मृत्यू झाला, तर काही जखमींवर खासगी रुग्णालयात उपचार सुरू आहेत.
सकाळी सुमारे ८ वाजता टेम्पो हिंजवडी फेज वनमध्ये जात असताना चालकाच्या पायाखाली अचानक आग लागली. ही बाब लक्षात येताच चालक आणि समोरील कर्मचारी गाडीतून तातडीने बाहेर पडले. मात्र, मागील दरवाजा उघडता आला नाही, त्यामुळे मागच्या सीटवर बसलेल्या चार कर्मचाऱ्यांना बाहेर पडता आले नाही आणि त्यांचा आगीत होरपळून मृत्यू झाला.
या घटनेत इतर काही कर्मचारी जखमी झाले असून त्यांना जवळच्या खासगी रुग्णालयात दाखल करण्यात आले आहे. त्यांची प्रकृती स्थिर असल्याचे डॉक्टरांनी सांगितले आहे.
हिंजवडी पोलिसांनी घटनास्थळी येऊन तपास सुरू केला आहे. प्राथमिक अंदाजानुसार, टेम्पोच्या इंजिनमध्ये तांत्रिक बिघाड झाल्याने आग लागली असावी. तसेच, गाडीच्या मागील दरवाज्याच्या यंत्रणेत काही दोष होता का, याचाही तपास सुरू आहे.
