News World Marathi© 2024 Newsworld मराठी बाह्य इंटरनेट साइट्सच्या सामग्रीसाठी आम्ही जबाबदार नाही. बाह्य लिंक्सबद्दल आम्हाल काय वाटतं? इथे वाचा. बाह्य लिंक्सबद्दल आम्हाल काय वाटतं? इथे वाचा.

Newsworld Pune : दादावाला ज्युनिअर कॉलेजच्या वतीने आयोजित आंतर शालेय व आंतर महाविद्यालयीन अभिजया लोकनृत्य स्पर्धेला उस्फूर्त प्रतिसाद दि पूना गुजराती केळवणी मंडळाच्या ए. एस. डी. बी. दादावाला जुनिअर कॉलेजच्या वतीने आयोजित करण्यात आलेल्या अभिजया आंतर शालेय व आंतर महाविद्यालयीन लोकनृत्य स्पर्धेला उस्फुर्त प्रतिसाद मिळाला.

या स्पर्धेचे आयोजन नेहरू मेमोरियल हॉल पुणे येथे करण्यात आले होते. या स्पर्धेद्वारे विविध शालेय तथा महाविद्यालयीन विद्यार्थ्यांना लोकनृत्य कला सादर करण्याची संधी मिळाली. स्पर्धेचे उद्घाटन तथा पारितोषिक वितरण दि पुना गुजराती केळवणी मंडळाचे अध्यक्ष राजेश भाई शाह, उपाध्यक्ष जनक भाई शाह, सचिव हेमंत भाई मणियार, सहसचिव प्रमोद भाई शाह, संदीप भाई शाह, दिलीप जगड, विनोद देडिया यांच्या हस्ते करण्यात आले.

यावेळी प्राचार्या सोनल बारोट, उपप्राचार्य विश्वनाथ पाटोळे उपस्थित होते. आंतरशालेय इयत्ता 8वी ते 10 वी मधील गटात अहिल्यादेवी गर्ल्स हायस्कूल प्रशालेला प्रथम पारितोषिक, विद्या प्रतिष्ठान नांदेड सिटी पब्लिक स्कूल प्रशालेला द्वितीय पारितोषिक, हुजूरपागा गर्ल्स हायस्कूल लक्ष्मी रोड प्रशालेला तृतीय पारितोषिक, तसेच आरसीएम गुजराती हायस्कूलने उत्तेजनार्थ पारितोषिक पटकावले.

आंतर महाविद्यालयीन इयत्ता 11वी ते 12वीमधील गटात प्रथम पारितोषिक ए. एस. डी. बी. दादावाला कनिष्ठ महाविद्यालयाने, द्वितीय परितोषिक हुजूरपागा कात्रज महाविद्यालयाने, तृतीय पारितोषिक आर डी कनिष्ठ महाविद्यालयाने पटकावले, तसेच उत्तेजनार्थ पारितोषिक एनसीएल कनिष्ठ महाविद्यालयाने पटकावले. या स्पर्धेचे आयोजन पर्यवेक्षिका माधुरी पाटील, अर्चना बारोट, सविता कुलकर्णी यांनी केले. प्रास्ताविक पर्यवेक्षिका शमा गद्रे यांनी केले. अर्चना काळे, उषा चव्हाण, अनुजा सेलोट, सौ. शिल्पा मुदगी यांनी कार्यक्रमाचे सूत्रसंचालन केले.

Newsworld mumbai : Sharad Pawar : दिल्ली येथे होणाऱ्या 98 व्या सरहद संस्था आयोजित अखिल भारतीय साहित्य महामंडळाचे साहित्य संमेलनाच्या स्वागताध्यक्षपदी शरद पवार (Sharad Pawar) यांची निवड करण्यात आली.

सरहद संस्था आयोजित अखिल भारतीय साहित्य महामंडळाचे ९८ वे अखिल भारतीय मराठी साहित्य संमेलन दि.२१, २२, २३ फेब्रुवारी २०२५ या काळात दिल्लीला होणार आहे. यापूर्वी १९५४ साली दिल्लीला ३७ वे अखिल भारतीय मराठी साहित्य संमेलन झाले. त्याचे स्वागताध्यक्ष काकासाहेब गाडगीळ, संमेलनाध्यक्ष तर्कतीर्थ लक्ष्मणशास्त्री जोशी तर उद्घाटक तत्कालिन पंतप्रधान पंडित नेहरू होते. संयुक्त महाराष्ट्र चळवळीला या संमेलनानंतर बळ मिळाले आणि १ मे १९६० साली महाराष्ट्र राज्याची स्थापना झाली. त्यानंतर दिल्लीला एकदाही अखिल भारतीय मराठी साहित्य संमेलन झाले नाही. नुकताच मराठी भाषेला अभिजात भाषेचा दर्जा मिळाला आहे.

या पार्श्वभूमीवर ७० वर्षांनी दिल्लीत होणाऱ्या य संमेलनाचे आयोजन सरहद संस्थेद्वारे केले जात असून त्याचाच भाग म्हणून महाराष्ट्राचे मुख्यमंत्री एकनाथ शिंदे, मनसेचे नेते राज ठाकरे, नितीन गडकरी आदी नेत्यांना विविध कार्यक्रमात संस्थेने निमंत्रित केले होते.दिल्ली ही देशाची राजकीय राजधानी असल्यामूळे येथे होणारे संमेलन सर्वसमावेशक व्हावे या भावनेतून संमेलनाच्या स्वागताध्यक्षपदी अनुभवी, ज्येष्ठ व साहित्यरसिक व्यक्ती व्हावी असा संयोजक समितीने प्रयत्न केला त्यातून शरद पवार यांना संस्थेने केलेली विनंती पवार यांनी मान्य केली.

शरद पवार हे केवळ उत्तम वाचक अथवा साहित्यप्रेमी नसून महाराष्ट्रातून सांस्कृतिक आणि साहित्यिक चळवळीशी प्रारंभापासून जोडले गेले आहे. त्यांनी छत्रपती संभाजीनगर, नाशिक, चिपळूण आणि सासवड येथील अखिल भारतीय साहित्य संमेलनाचे उद्घाटन केले आहे. तर, १९९० मध्ये त्यांनी स्वागताध्यक्ष व्हावे असे पुण्यातील संमेलनात समितीने ठरविले होते मात्र, त्यावर्षी ते होऊ शकले नाही. यंदा दिल्लीमध्ये महाराष्ट्राची अस्मिता ज्या व्यक्तींभोवती केंद्रीत असते त्यातून सर्वात ज्येष्ठ नाव शरद पवार यांचे आहे. त्यांच्या अनुभवांमुळे हे संमेलन अविस्मरणीय होईल आणि राजकारणाच्या पलिकडे जाऊन मराठी भाषा आणि संस्कृतीचा जागर करणारे ठरेल, असा विश्वास नहार यांनी व्यक्त केला.

Newsworld Pune : कात्रज चौकातील उड्डाणपुलाच्या कामामुळे वाहतूक कोंडी मोठ्या प्रमाणात होत आहे. यामुळे पुणे महानगर परिवहन महामंडळाने कात्रज बसस्थानकांमधील बस मार्गांचे स्थलांतर करण्याचा निर्णय घेतला आहे.हा निर्णय वाहतूक शाखेचे पोलिस उपायुक्त अमोल झेंडे यांच्या सूचनेनुसार घेण्यात आला असून नवीन व्यवस्थेमुळे पीएमपी बस मार्गांमध्ये सोमवार (दि.२) पासून रात्री १२ नंतर बस मार्गात आणि बसस्थानकात बदल करण्यात येणार असल्याचे पीएमपी प्रशासनाकडून सांगण्यात आले आहे.

Newsworld Pune : भारतीय संविधानाच्या अमृत महोत्सवी वर्षानिमित्त विश्वभुषण. डॉ. बाबासाहेब आंबेडकर सांस्कृतिक महोत्सव समिती, पुणेच्या वतीने संविधान दिनानिमित्त आयोजित ‘भारतीय संविधान विचार संमेलन’ मध्ये कविसंमेलन आणि ‘भारतीय संविधान का संगीतमय सकर’ या सांस्कृतिक कार्यक्रमाच्या बहारदार सादरीकरणातून संविधानाचा जागर करण्यात आला. 

बालगंधर्व रंगमंदिर येथे संविधान दिनानिमित्त संमेलनाचे मुख्य आयोजक परशुराम वाडेकर आणि निमंत्रक सुनीता वाडेकर यांच्या वतीने आयोजित या संमेलनाचा विषय ‘भारतीय संविधानाचे ७५ वर्षे .. विकास व वाटचाल’ हा होता.संविधानाच्या भोवती गुंफन्यात आलेल्या या कविसंमेलनाच्या  अध्यक्षस्थानी सुप्रसिद्ध कवी   प्रकाश घोडके होते तर संमेलनात अंजली कुलकर्णी,  देवा झिंजाड,  जित्या जाली आदि मान्यवर कवी सहभागी झाले होते, त्यांनी स्वातंत्र्य, न्याय, समता आणि बंधुता  या विषयांवरील तसेच डॉ. बाबासाहेब आंबेडकर यांच्या संघर्षावरील आपल्या कवितांचे सादरीकरण करत रसिकांना मंत्रमुग्ध केले.

कविसंमेलनाचे सुत्रसंचालन सुमित गुणवंत यांनी केले.  ‘भारतीय संविधान का संगीतमय सकर’ या सांस्कृतिक कार्यक्रमातून  हून अधिक कलाकारांनी गायन, नृत्य सादरीकरणातून संविधानाच्या ७५ वर्षांची वाटचाल उलगडून दाखवण्याचा प्रयत्न केला. या कार्यक्रमाची संकल्पना व निर्मिती सुनिल महाजन, नृत्य  दिग्दर्शन  निकिता मोघे, संहिता लेखन  सक्ष्‌मीकांत देशमुख, कार्यक्रमाचे संयोजन  दिपक म्हस्के, केतकी महाजन-बोरकर यांनी केले होते तर  गायक  संदीप उबाळे, सौरभ दफ्तरदार, रश्मी मोघे यांनी आपल्या बहारदार गायनाने पुणेकरांची मने जिंकली. कार्यक्रमाचे सूत्रसंचालन दीपक म्हस्के यांनी केले.

Newsworld Pune : पुणे शहरात ‘रक्ताचा तुटवडा’ असल्याने रक्तदान शिबीर वरदान ठरते आहे मात्र रक्तास जात, पात, धर्म नसल्याने रक्तदानाचे संस्कार मानवता धर्म शिकवत असल्याचे उदगार काँग्रेस नेते व राज्य प्रवक्ते गोपाळदादा तिवारी यांनी काढले.

महाराष्ट्र राज्य वडार समाज संघटनेचे नेते, संस्थापक अध्यक्ष स्व. संगण्णाजी धोत्रे व स्व. संजयजी धोत्रे यांचे स्मरणार्थ मॉडेल कॉलनी छ. शिवाजी महाराज नगर येथील ‘एस. एस. धोत्रे फाऊंडेशन’ वतीने आयोजित ‘रक्तदान शिबिराचे’ उद्घाटन काँग्रेस नेते गोपाळदादा तिवारी यांचे हस्ते झाल्या प्रसंगी ते बोलत होते.

शिबिराचे संयोजक – निमंत्रक विक्रांत धोत्रे (उपाध्यक्ष छत्रपती शिवाजीनगर युवक काँग्रेस) व धोत्रे कुटुंबीयांनी ऊपस्थितांचे स्वागत केले. वडार समाजाचे नेते स्व शिव्वाण्णा धोत्रे यांचे पुतळ्यास मान्यवरांच्या हस्ते पुष्पहार अर्पण करण्यात आला. या प्रसंगी माजी उपमहापौर मुकारी अलगुडे, इंटक कामगार संघटनेचे कायदे सल्लगार ॲड. फैयाज शेख, राकेश विटकर, शहर काँग्रेस सरचिटणीस संजय मोरे, भाजप युवा मोर्चाचे हेमंत डाबी, सौ पौर्णिमा भगत, अदिती निकम, अण्णा भंडगर, सुरेश सपकाळ, अपर्णा कुऱ्हाडे, प्रा. रोहित आळंदीकर, नरेश आवटे, सौ वैशाली धोत्रे इ उपस्थित होते. माजी आमदार रविंद्र धंगेकर, युवक काँग्रेसचे शहर अध्यक्ष सौरभ अमराळे यांनी रक्तदान शिबिरास भेट दिली.

या शिबिरात ७५ रक्त बाटल्यांचे संकलन झाले. डॅा राजकुमार आणि त्यांचे सहकारी पल्लवी महांडवे, प्रीती पवार, प्रणाली होले, प्रणय घाडगे, नवनाथ कानडे इ मेडीकल टिम चे सहकार्य लाभले. रक्तदान शिबिराचे यशस्वी करण्यात राहुल शिंदे, साहिल शिंदे, इंद्रनील मराठे, जैष्णवी धोत्रे, सचिन धोत्रे, नरेश आवटे, यशवंत इरकल, रुपाली ठाकरे, प्रशांत शेट्टी, विकास सोनावणे, अनुष्का बुरगुटे, विद्या जाधव, सिकंदर शेख,आकाश सुरवसे,इ चे सहकार्य लाभले.

Newsworld marathi Nashik : Malegaon ED Raid : मालेगाव बँक गैरव्यवहार प्रकरणात 120 कोटी नव्हे तर 1200 कोटी रुपयांचा असल्याचा संशय व्यक्त करण्यात आला आहे. 21 बनावट कंपन्यांच्या बँक खात्यातून 800 कोटी रुपयांचा व्यवहार झाला असून गैरव्यवहाराची नवी मुंबई, सुरत, अहमदाबाद, उत्तर प्रदेश व दिल्लीपर्यंत व्याप्ती असल्याची धक्कादायक माहिती ईडीच्या तपासात समोर आली आहे. याबाबत अधिक माहिती अशी की, मालेगाव (Malegaon) येथील मर्चेंट बँकेच्या (Merchant Bank) शाखेत बेरोजगार तरुणांच्या खात्यांवरून 125 कोटी रुपयांचा आर्थिक व्यवहार झाल्याचा धक्कादायक प्रकार उघडकीस आला होता. हे पैसे ‘व्होट जिहाद’साठी वापरल्याचा आरोप भाजप नेते किरीट सोमय्या (Kirit Somaiya) यांनी केला होता. ईडी, सीबीआय, रिझर्व्ह बँक आदी ठिकाणी तक्रार देत त्यांनी चौकशीची मागणी केली होती. यामुळे राज्यभरात एकच खळबळ उडाली. सक्तवसुली संचालनालय (ED) करत असलेल्या तपासाची व्याप्ती वाढली आहे. हा गैरव्यवहार १२०० कोटी रुपयांचा असल्याचा संशय असून बनावट कंपनीद्वारे 21 बँक खात्यांतून करण्यात आलेल्या 800 कोटी रुपयांच्या व्यवहारांची माहिती ईडीला मिळाली आहे.

रोज सकाळी आपल्याला अनेक जण Morning Walk करताना दिसतात. मात्र आपण अनेकदा आळस करतो अथवा सकाळच्या घाईत वेळ काढणं शक्य होत नाही. हे जरी खरं असलं तरीही सकाळी स्वतःच्या निरोगी आरोग्यासाठी अर्धा तास काढायला हवा. सकाळीच उपाशीपोटी चालण्याचे अनेक फायदे आहेत.

1) चालल्यामुळे शरीराला योग्य व्यायाम मिळतो. त्यामुळे रात्री चांगली झोप लागण्यास मदत होते. याशिवाय मेंदू तरतरीत राहिल्याने आणि सकाळी उठून चालल्यामुळे अधिक चांगल्या पद्धतीने दिवसभर क्रिएटिव्हिटीसह काम पूर्ण होते. तुम्ही सकाळी चालण्याचा व्यायाम सुरू केला तर यामुळे शरीरातील डोपामाईन नावाचे हार्मोन रिलीज होते, जे तणाव कमी करण्याचे काम करते.

2) तसंच तुम्हाला नैराश्य येत असेल तर ते कमी करण्यासाठीही याचा उपयोग होतो. शरीरातून निघणारे सेरोटोनिन हार्मोन हे तुमची झोप अधिक गडद बनवून तुमचा मूड चांगला राखण्यास मदत करते.उपाशीपोटी चालण्यामुळे प्रतिकारशक्ती वाढण्यास मदत मिळते. तर हृदयाचे आरोग्य चांगले राखण्यास फायदा होतो. तसंच सांधेदुखीची समस्या दूर ठेवण्यास मदत होते.

3) मजबूत करण्यासाठी, मेंदूचे कार्य अधिक चांगले करण्यासाठी चालण्याचा शरीराला फायदा मिळतो. त्यामुळे रोज सकाळी उपाशीपोटी किमान अर्धा तास चालावे. १ तास चालण्यासाठी वेळ काढल्यास, अधिक उत्तम ठरते.

Newsworld marathi : मासिक पाळीविषयी आजही तितक्या खुलेआमपणे समाजात बोलले जात नाही. त्यामुळे असलेल्या अज्ञानाचा परिणाम स्त्री’च्या आरोग्यावर तर होतोच पण सर्वांनाच त्या नैसर्गिक बदलाचा तिरस्कार वाटायला लागतो.मासिक पाळी विषयीच्या समज-गैरसमाजांविषयी स्त्री-रोग तज्ज्ञ डॉ. तन्वी वैद्य यांनी Newsworld marathi शी केलेली ही बातचीत.मासिक पाळी म्हणजे नेमके काय होते ?मुळात मासिक पाळी हा काही आजार नाही. ती शरीरात होणारी एक नैसर्गिक प्रक्रिया आहे. या काळात अंडाशय आणि गर्भाशय यात मोठ्या घटना घडत असतात. दर महिन्यात बीज स्वीकारून गर्भ राहण्यासाठी गर्भाशय तयार होत असते. अशावेळी ते बीज गेले नाही तर त्यासाठी तयार केलेला पडदा नैसर्गिकरीत्या तुटतो आणि मासिक स्त्रावाच्या मार्गाने बाहेर पडतो. तीच प्रक्रिया मासिक पाळी म्हणून ओळखली जाते.

सॅनिटरी नॅपकिन (पॅड), कापड की मेन्स्ट्रल कप यापैकी योग्य काय आहे?रक्तस्त्राव होत असताना सॅनिटरी नॅपकिन वापरणेच योग्य आहे. पूर्वी काही ठिकाणी कापड वापरले जायचे. मात्र ते कापड स्वच्छ करणे, उन्हात वाळवणे शक्य असेल तरच ते घेणे योग्य आहे. अन्यथा मासिक पाळीच्या काळात झालेला संसर्ग वाढून तो गर्भाशयापर्यंत जाऊन प्रसंगी गर्भ राहण्यातही अडचण येऊ शकते. आजकाल बाजारात मेन्स्ट्रल कप आले आहेत. मात्र ते कुमारिकांना वापरता येत नाहीत.कप थेट योनीमार्गात घालायचे असल्याने योग्य व्यक्तीकडून ते कसे वापरायचे याचे ज्ञान तज्ज्ञ व्यक्तीकडून घ्यायला हवे.

त्या काळात पोट दुखते म्हणून पूर्ण आराम करावा का ?मासिक रक्तस्त्राव अधिक होत असेल किंवा प्रमाणापेक्षा अधिक पोट दुखत असेल तर वैद्यकीय तज्ज्ञांचा सल्ला घेणेच योग्य आहे. घरी बसून किंवा काम थांबवून, एकाच जागी स्थिर राहून वेदना कमी होत नाहीत. अशावेळी दिनक्रमावर परिणाम न करून घेता आपली कामे सुरु ठेवावीत. विशेषतः सतत वेदनाशामक गोळ्यांचे सेवन टाळावे.याकाळात काही महिलांची चिडचिड होते. त्याला हॉर्मोनल डिस्टर्बन्स म्हणतात. मात्र हे बदल तात्पुरत्या स्वरूपाचे असतात आणि प्रत्येक व्यक्तिगणिक वेगवेगळे असू शकतात

Newsworld marathi Baramati : काका अजित पवार आणि पुतण्या युगेंद्र पवार यांची लढत चर्चेची ठरली. या लढतीत अजित पवार विजयी झाले. त्यानंतर काकाविरुद्ध पुतण्याने पुन्हा फेरमतमोजणीचा अर्ज दिला आहे. त्यासाठी लागणारी रक्कमसुद्धा भरली आहे. त्यामुळे बारामतीमध्ये पाच टक्के ईव्हीएमची फेरमतमोजणी होणार आहे, असे युगेंद्र पवार यांनी माध्यमांशी बोलताना सांगितले.

राज्यातील विधानसभा निवडणुकीत सर्वाधिक चर्चेची निवडणूक बारामतीची ठरली होती. बारामतीमध्ये लोकसभेप्रमाणे विधानसभेतही पवार कुटुंबियांमध्ये लढत झाली. युगेंद्र पवार यांचे मतदार संघात दौरे सुरु आहे.

त्याबाबत ते म्हणाले, फक्त प्रचारासाठी जाणे आम्हाला पटत नाही. बारामतीमधील लोकांनी आम्हाला मतदान केले आहे. त्यामुळे गावागावांत जाऊन लोकांना भेटत आहोत. त्यांना विश्वास देत आहोत. त्यांचे आभार मानत आहोत. नेहमीसारखा हा आभार दौरा आहे. लोकसभेतही आम्ही हा दौरा केला होता. पवार साहेबांनी दिलेल्या शिकवण दिली आहे.

बाबा आढाव आंदोलनाबाबत बोलताना ते म्हणाले, बाबा खूप ज्येष्ठ आहेत. सगळ्यात जास्त अनुभव आहे. त्यांनी अनेक निवडणूका बघितल्या आहेत. त्यांना काहीतरी वाटत असेल त्यामुळे त्यांनी आंदोलन केले. आपल्याला ते गंभीरतेने घ्याव लागेल.

Newsworld marathi Mumbai : महाराष्ट्राचे मुख्यमंत्री म्हणून देवेंद्र फडणवीस यांच्या नावावर शिक्कामोर्तब झालं असून सोमवारी किंवा मंगळवारी त्यांची भाजपच्या विधिमंडळ पक्षनेतेपदी नियुक्ती होईल अशी माहिती भाजपच्या वरिष्ठ नेत्यांनी दिल्याचं वृत्त पीटीआयनं दिलं आहे. पंतप्रधान नरेंद्र मोदी आणि केंद्रीय गृहमंत्री अमित शाह मुख्यमंत्री म्हणून ज्या नावाची घोषणा करतील त्याला पाठिंबा असेल असं एकनाथ शिंदे आणि अजित पवारांनी आधीच जाहीर केलंय. दरम्यान, आझाद मैदानावर 5 डिसेंबर रोजी सायंकाळी 5 वाजता नव्या सरकारचा शपथविधी पार पडणार आहे.

Newsworld marathi Pune : पुण्यातील सारसबागचा गणपती बघायला दुरवरुन लोक येतात. हे सुद्धा एक लोकप्रिय प्रेक्षणीय स्थळ आहे. सारसबागच्या गणपतीला तळ्यातला गणपती सुद्धा म्हटलं जातं. हिवाळ्यामध्ये या गणपतीची खास चर्चा रंगते कारण हिवाळा सुरू झाला आणि जोरदार थंडी सुरू झाली की या गणपती बाप्पाला स्वेटर घातले जाते. दरवर्षी या गणपतीचे स्वेटरमधील फोटो व्हायरल होत असतात. सध्या असाच एक फोटो व्हायरल होत आहे.

Newsworld marathi Pune : महाराष्ट्राच्या इतिहासात विक्रमी बहुमत मिळवलेल्या महायुतीला वडगाव शेरी मतदारसंघात मात्र पराभव स्वीकारावा लागला आहे. महायुतीतील घटक पक्ष असलेल्या राष्ट्रवादी काँग्रेसच्या (अजित पवार) विद्यमान आमदार सुनील टिंगरे यांचा पराभव झाला असून, इथे राष्ट्रवादी काँग्रेस शरद पवार पक्षाचे बापू पाठारे यांनी विजय मिळवला आहे. सुनील टिंगरे यांच्या पराभवात आंबेडकरी चळवळीची भूमिका जायंट किलर ठरली आहे.

महायुतीतील घटक पक्ष रिपब्लिकन पार्टी ऑफ इंडियाच्या (आठवले) शेकडो पदाधिकाऱ्यांनी, कार्यकर्त्यांनी राजीनामे देत सुनील टिंगरे यांचे काम न करण्याचा निर्णय घेतला होता. त्याचाच फटका टिंगरे यांना बसला आहे.राज्यभरात रिपब्लिकन पक्षाला एकही जागा मिळाली नव्हती.

त्यामुळे नाराज होऊन पुण्याचे माजी उपमहापौर डॉ. सिद्धार्थ धेंडे यांनी आपल्या सर्व पदांचा राजीनामा दिला होता. त्यांच्या राजीनाम्याचे समर्थन करीत महापालिकेतील माजी गटनेत्या फरझान अय्युब शेख व अन्य पदाधिकाऱ्यांनी राजीनामे देत महायुतीच्या विरोधात जाहीर भूमिका घेतली होती. टिंगरे यांचा प्रचार करणार नाही, असेही त्यांनी सांगितले होते. या भागात आंबेडकरी चळवळीशी संबंधित मतदारांची मोठी संख्या आहे.

धेंडे व सहकाऱ्यांच्या या भूमिकेमुळे ही सर्व ताकद पाठारे यांच्या पाठीशी गेल्याने किंवा तटस्थ राहिल्याने टिंगरे यांना फटका बसला आहे.याबाबत डॉ. सिद्धार्थ धेंडे म्हणाले, “वडगाव शेरी विधानसभा मतदारसंघात आंबेडकरी चळवळीतील पदाधिकारी, कार्यकर्त्यांनी घेतलेली भूमिका निर्णायक ठरली आहे. गेल्या अनेक वर्षात महायुतीमधील प्रमुख नेत्यांनी आरपीआयला सन्मानपूर्वक वागणूक दिली नाही. त्यामुळे अनेकांनी प्राथमिक पक्ष सदस्यत्वाचा राजीनामा दिला होता. आंबेडकरी चळवळीतील पदाधिकारी, कार्यकर्ते यांच्‍यामध्ये नाराजीचा मोठा सूर होता. त्‍याचा परिणाम वडगाव शेरी विधानसभा मतदारसंघात स्‍पष्ट दिसला. या मतदारसंघात महायुतीला पराभवाचा फटका बसला आहे. या मतदारसंघात महाविकास आघाडीच्या उमेदवाराच्या विजयात आंबेडकरी अनुयायी, पदाधिकारी, कार्यकर्ते यांची भूमिका जाईंट किलर ठरली आहे.”

सत्तेचा सारीपाट

महाराष्ट्रात चालू आहे लोकसभेपासून सत्तेचा सारीपाट

लोकसभेत महाविकास आघाडीने जातीयवादाच्या माध्यमातून लावली महायुतीची वाट

म्हणूनच म्हणतो महाराष्ट्रात चालू आहे सत्तेचा सारीपाट

विधानसभेच्या निवडणुकीमध्येलाडक्या बहिणीने दिली महायुतीला साथ म्हणूनच महायुतीतील पक्षाचे झाले बळकट हात

म्हणूनच म्हणतो महाराष्ट्रामध्ये चालू आहे सत्तेचा सारीपाठ

महायुतीला मिळाले न भतो न भविष्यती बहुमत दहा दिवस होऊन गेले तरी मुख्यमंत्रीपदासाठी नाही होत त्यांचे एक मत

म्हणूनच म्हणतो महाराष्ट्रात चालू आहे सत्तेचा सारीपाठ

मुख्यमंत्री उपमुख्यमंत्री एकमेकाची घेत नाहीत गाठ, निवडणूक लढले एकत्रपण आता त्यांचे जुळत नाही मुख्यमंत्रीपदासाठी सूत्र

ओबीसी दलित एकवटला आणि महाविकास आघाडीची लावली वाटतरी पण महाविकास आघाडी ईव्हीएम वरील आरोपाचा घालते घाट

म्हणूनच म्हणतो महाराष्ट्रात चालू आहेसत्तेचा सारीपाट

कवी प्राचार्य डॉ खुशाल मुंढे

Newsworld marathi Satara : गृहमंत्रीपदासह सर्व विषयांवर महायुतीच्या बैठकीत चर्चा करून अंतिम निर्णय घेऊ असे मत मुख्यमंत्री एकनाथ शिंदे यांनी व्यक्त केले. राज्यातील जनतेने महायुतीला स्पष्ट बहुमत दिले असून त्यांच्या आशा अपेक्षा पूर्ण करणारे स्थिर सरकार देण्याला आमचे प्राधान्य असल्याचे मत शिंदे यांनी व्यक्त केले. सातारा येथील दरे गावातून मुंबईला परतण्यापूर्वी त्यांनी प्रसिद्धीमाध्यमांशी संवाद साधला यावेळी त्यांनी आपले हे मत व्यक्त केले. यावेळी बोलताना, विधानसभा निवडणुकीच्या धामधुमीत दररोज 8 ते 10 सभा करत असल्याने प्रचंड धावपळ झाली होती. यातून थोडासा आराम करण्यासाठी दरे मुक्कामी आलो असून आपली प्रकृती थोडी खराब होती मात्र आता आपली प्रकृती ठीक असल्याचे मुख्यमंत्र्यांनी यावेळी बोलताना स्पष्ट केले. राज्यातील जनतेने आजवर कधीही कुणाला दिले नाही एवढे भरभरून मतदान आम्हाला केले आहे. राज्यभर लाडक्या बहिणी, लाडके भाऊ, लाडके शेतकरी यांनी मतांचा अक्षरशः वर्षाव केला आहे. या निवडणुकीत त्यांना आम्ही काही आश्वासने दिलेली होती. आता ती पूर्ण करण्यासाठी एक मजबूत आणि स्थिर सरकार देण्याचा प्रयत्न महायुती म्हणून आम्ही करू असे सांगितले.

Newsworld marathi Mumbai : विधानसभा निवडणुकीत काँग्रेस पक्षातील ज्या पदाधिकाऱ्यांनी बेशिस्त वर्तन करून पक्षाच्या प्रतिमेला गालबोट लावण्याचे काम केले आहे. त्यांच्यावर कडक करवाई करण्याचा निर्णय पक्षाने घेतला आहे. बेशिस्त वर्तन करणाऱ्या या पदाधिकाऱ्यांवर प्रदेश काँग्रेसकडून कारवाईच्या नोटीस पाठवण्यात आल्या आहेत. नागपूर मध्य विधानसभा मतदारसंघाचे काँग्रेस पक्षाचे उमेदवार बंटी शेळके यांना काँग्रेस पक्ष व प्रदेशाध्यक्ष नाना पटोले यांच्यावर खोटे आरोप करून पक्षशिस्तीला काळीमा फासला असून त्यांना निलंबित का करू नये यासंदर्भात २ दिवसांत खुलासा करण्याचे आदेश देण्यात आले आहेत.विधानसभा निवडणुकीच्या निकालावर विचारमंथन करण्यासाठी प्रदेश काँग्रेसचे कार्यालय टिळक भवन येथे दिनांक २८ नोव्हेंबर रोजी बैठक बोलावली होती. या बैठकीनंतर टिळक भवन परिसरात प्रसार माध्यमांशी बोलताना त्यांनी काँग्रेस पक्ष व प्रदेशाध्यक्षांबाबत खोटी व बदनामी करणारी विधाने केली आहेत. त्यांनी काँग्रेस पक्ष व प्रदेशाध्यक्ष नाना पटोले यांची प्रतिमा मलिन करण्याचे काम केले असल्याने त्यांच्यावर कारवाई करण्यासंदर्भात नोटीस पाठवण्यात आली आहे, पक्षविरोधी कारवाया आणि पक्षाची प्रतिमा मलिन करणा-यांविरोधात कारवाई करण्यात येणार आहे, अशी माहिती प्रदेश उपाध्यक्ष संघटन व प्रशासन नाना गावंडे यांनी दिली आहे.

Newsworld Marathi Nagpur : Mohan Bhagwat : लोकसंख्या वाढीचा दर 2.1 पेक्षा कमी असेल तर तो समाज पृथ्वीवरून नष्ट होतो. त्यामुळे दोन पेक्षा जास्त म्हणजे कमीत कमी तीन अपत्य असावेत, असे अत्यंत महत्त्वाचे विधान करत राष्ट्रीय स्वयंसेवक संघाचे सरसंघचालक डॉ. मोहन भागवत (Mohan Bhagwat) यांनी केले. नागपुरात कठाळे कुल संमेलनात ते बोलत होते. या संमेलनात मोहन भागवत यांच्या आधी वक्तव्य करणाऱ्या व्यक्तींनी सध्या अनेक तरुण दांपत्य एकही अपत्य जन्माला घालण्यास तयार नाही, असा उल्लेख करत चिंता व्यक्त केली होती. त्याच मुद्द्याला पुढे घेऊन जात सरसंघचालकांनी अत्यंत महत्त्वाचे विधान केले.हिंदूंच्या संख्येत 7.8 टक्क्यांनी घट पंतप्रधानांच्या आर्थिक सल्लागार परिषदेने 1950 ते 2015 या काळात भारतात हिंदू बहुसंख्य होते, असं स्पष्ट केले आहे. तर दुसरीकडे आता हिंदूंची लोकसंख्येत 7.8 टक्क्यांनी घट झाल्याचेही स्पष्ट केले आहे. तर दुसऱ्या बाजूला भारताच्या शेजारील राष्ट्रांमध्ये त्या देशातील प्रमुख धर्मियांची लोकसंख्या वाढत असल्याचे अहवालात नमूद करण्यात आले आहे. शिवाय, यूपीएससीत मराठी यशवंतांचा टक्क घसरल्याचेही समोर आले आहे.

Newsworld marathi : Nana Patekar on Prajkta Mali : प्रसिद्ध अभिनेते नाना पाटेकर यांनी प्रसिद्ध अभिनेत्री प्राजक्ता माळी हिचं कौतुक केलं आहे. तसेच गश्मीर महाजनी याने फुलवंती सिनेमात केलेल्या कामाचंही नाना पाटेकर यांनी कौतुक केलंय.शिवशाहीर बाबासाहेब पुरंदरे यांच्या लेखणीतून उतरलेली ‘फुलवंती’ ही कादंबरी आता चित्रपटरूपात प्रेक्षकांना पाहता येणार आहे. या सिनेमात ‘फुलवंती’ या मध्यवर्ती भूमिकेत अभिनेत्री प्राजक्ता माळी आहे. तर व्यंकट शास्त्री यांची अतिशय सशक्त व्यक्तिरेखा अभिनेता गश्मीर महाजनी याने साकारली आहे. या सिनेमाचं वरिष्ठ अभिनेते नाना पाटेकर यांनी कौतुक केलं आहे.एका मुलाखतीदरम्यान नाना पाटेकर यांनी मराठी सिनेमे हिंदी भाषेत डब करण्याबाबत प्रतिक्रिया दिली. सगळे दाक्षिणात्य सिनेमे हिंदीमध्ये डब होत असतात. ते तुम्ही पाहता की नाही. मग मराठी सिनेमे का डब होत नाही? सगळेच नाही पण काही अतिशय टुकार दाक्षिणात्या सिनेमे हिंदीमध्ये डब केले जातात. मग प्रश्न पडतो की हे सिनेमे कसे काय चालले आणि हे सिनेमे का पाहावेत? असे टुकार सिनेमे देखील ओटीटी प्लॅटफॉर्मवर पाहिले जातात. मराठीमध्ये इतकं सकस सगळं निर्माण होतं. ते का डब केलं जात नाही?, असं नाना पाटेकर म्हणाले आता परवा एक ‘फुलवंती’ हा सिनेमा आला. तो सिनेमा पाहताना मला तो इतका छान आणि गोड वाटत होता. आमच्या रविंद्र महाजनींचा मुलगा गश्मीरने आणि प्राजक्ताने काय काम केलंय… व्हिज्युअली काय गोड दिसत होतं. अतिशय छान आणि श्रीमंत वाटावं अशी ही कलाकृती… मग का नाही हिंदीत डब केली जात?, असं म्हणत नाना पाटेकर यांनी मनातील खंत बोलून दाखवली.

Newsworld Marathi Pune : Crime Pune शिक्रापूरचे माजी उपसरपंच व शिवसेना शिंदे गटाचे जिल्हा सल्लागार दत्तात्रय बंडू गिलबिले (वय ५१) यांची निर्घृण हत्या करण्यात आल्याची घटना रविवारी (दि. १) दुपारी सव्वा बाराच्या सुमारास घडली. गिलबिले यांची मालमत्ता अथवा अनैतिक संबंधाच्या कारणांमधून ही हत्या झाल्याची प्राथमिक माहिती शिक्रापूर पोलिसांनी दिली आहे. पुढील तपास शिक्रापूर पोलीस करत आहेत. दत्तात्रय गिलबिले हे दुपारच्या वेळेस आपल्या बंगल्याच्या आवारात खुर्चीमध्ये बसलेले असताना आरोपींनी धारदार शास्त्राने त्यांच्या मानेवर वार केले. यात त्यांचा मृत्यू झाला.

Maharashtra Assembly Vidhan Sabha Election 2024 Result: विधानसभा निवडणुकीच्या निकालानंतर आठवडाभरानंतर महायुती सरकारचा शपथविधी कधी होणार आहे. राज्यातील महायुती सरकारचा शपथविधी पंतप्रधान नरेंद्र मोदी यांच्या उपस्थितीत गुरुवार, ५ डिसेंबर २०२४ रोजी सायंकाळी ५ वाजता आझाद मैदान, मुंबई येथे संपन्न होणार आहे. महाविकास आघाडीचे नेते सातत्याने ईव्हीएम मशीनवरून टीकास्त्र सोडत असून, मोठ्या प्रमाणावर उमेदवार फेरमतमोजणीसाठी अर्ज करताना दिसत आहेत. यातच महाविकास आघाडी ईव्हीएमविरोधातील मोहीम तीव्र करताना पाहायला मिळत आहे. माजी मुख्यमंत्री आणि काँग्रेसचे ज्येष्ठ नेते पृथ्वीराज चव्हाण यांनी ईव्हीएमची आंतरराष्ट्रीय स्तरावर तपासणी करावी, अशी मागणी केली आहे. 

Newsworld Marathi Mumbai : महायुतीच्या मुख्यमंत्रिपदाचा चेहरा कोण याचे उत्तर अद्याप मिळालेलं नाही. मात्र, महाराष्ट्राच्या 31 व्या मुख्यमंत्रिपदाचा शपथविधी सोहळा 5 डिसेंबर रोजी होणार असल्याची माहिती आहे. विशेष म्हणजे, विधानसभा अध्यक्ष राहुल नार्वेकर यांनीही या वृत्ताला दुजोरा दिला आहे. भाजप नेते देवेंद्र फडणवीस हेच महाराष्ट्राचे व महायुतीचे मुख्यमंत्री होतील, असा अंदाज राजकीय विश्लेषक वर्तवत आहेत. तर, दिल्लीच्या बैठकीत देवेंद्र फडणवीस यांचेच नाव निश्चित झाल्याची सूत्रांची माहिती आहे. त्यासाठी, भाजपकडून मुख्यमंत्रिपदाचा चेहरा 2 डिसेंबर रोजी स्पष्ट होणार आहे. भाजपचा गटनेता 2 डिसेंबरला निवडला जाणार असून दुपारी 1 वाजता विधानभवनात गटनेता निवडीसाठी भाजपची बैठक होणार आहे. या बैठकीला भाजपचे सर्व आमदार उपस्थित राहणार आहेत.