News World Marathi© 2024 Newsworld मराठी बाह्य इंटरनेट साइट्सच्या सामग्रीसाठी आम्ही जबाबदार नाही. बाह्य लिंक्सबद्दल आम्हाल काय वाटतं? इथे वाचा. बाह्य लिंक्सबद्दल आम्हाल काय वाटतं? इथे वाचा.

Newsworldmarathi Pune: रावसाहेब पटवर्धन विद्यालयात “प्रदूषण मुक्त दिवाळी संकल्प अभियान” मोठ्या उत्साहात राबवण्यात आले. या अभियानाचा उद्देश विद्यार्थ्यांमध्ये पर्यावरण संरक्षणाबाबत जागरूकता निर्माण करणे आणि फटाकेमुक्त, स्वच्छ व सुरक्षित दिवाळी साजरी करण्याचा संदेश देणे हा होता. या अभियानाअंतर्गत शाळेतील सर्व विद्यार्थी, शिक्षक आणि शिक्षकेतर कर्मचारी यांनी फटाके न फोडण्याची आणि प्रदूषणमुक्त दिवाळी साजरी करण्याची शपथ घेतली. दिवसेंदिवस वाढणाऱ्या वायू व ध्वनी प्रदूषणामुळे पर्यावरणावर तसेच माणसाच्या आरोग्यावर होणारे गंभीर दुष्परिणाम लक्षात घेऊन हे अभियान हाती घेण्यात आले. या प्रसंगी शाळेचे शिक्षक पुष्पक कांदळकर यांनी विद्यार्थ्यांशी संवाद साधत प्रदूषणाचा वाढता धोका आणि त्यातून निर्माण होणाऱ्या आरोग्य समस्यांविषयी माहिती दिली. त्यांनी विद्यार्थ्यांना आपल्या छोट्या कृतीतूनही पर्यावरण संवर्धनात मोठा वाटा उचलता येतो, हे समजावून सांगितले. शाळेचे प्राचार्य अनिल कांबळे यांनी फटाके न फोडता आनंदी आणि सुरक्षित दिवाळी कशी साजरी करता येते, याचे महत्त्व पटवून दिले. शाळेच्या वतीने पर्यावरणपूरक दिवे, कागदी सजावट आणि सेंद्रिय रंग वापरून दिवाळी साजरी करण्याचे आवाहन करण्यात आले. या कार्यक्रमात विद्यार्थ्यांनी “हरित दिवाळी, सुरक्षित दिवाळी” या घोषणांद्वारे संदेश दिला. कार्यक्रम यशस्वीपणे पार पडण्यासाठी सर्व शिक्षक, शिक्षकेतर कर्मचारी आणि विद्यार्थ्यांनी परिश्रम घेतले. या उपक्रमातून शालेय स्तरावरच पर्यावरण रक्षणाची बीजे पेरण्याचा प्रयत्न करण्यात आला असून, फटाके मुक्त दिवाळी साजरी करण्याचा संकल्प सर्वांनी दृढतेने व्यक्त केला.

Newsworldmarathi Pune: भारतीय शेतीच्या मातीत रुजलेले एक स्वप्न, जे आज जागतिक स्तरावर फुलत आहे. ही आहे टू ब्रदर्स ऑर्गेनिक फार्म्सची कथा – दोन भावांच्या धैर्याची, शाश्वततेची आणि नाविन्याची. पुण्याजवळील भाळावडी गावातून सुरू झालेली ही यात्रा आज ११० कोटी रुपयांच्या सीरिज बी फंडिंगपर्यंत पोहोचली आहे. पण ही फक्त आकड्यांची गोष्ट नाही; ही आहे मातीशी नाळ जोडलेल्या दोन भावांच्या संघर्षाची आणि यशाची. सर्व काही सुरू झाले २०१७ मध्ये, जेव्हा सत्यजित आणि अजिंक्य हांगे या दोन भावांनी कॉर्पोरेट जगत सोडले आणि शेतीकडे वळले. सत्यजित, ज्याने आयआयटी आणि आयआयएममधून शिक्षण घेतले होते, आणि अजिंक्या, ज्याने मार्केटिंगचा अनुभव घेतला होता, दोघांनीही शहरातील चकचकीत जीवन पाहिले होते. पण त्यांच्या मनात एक प्रश्न होता: आपल्या देशातील अन्न का विषारी होत चालले आहे? रासायनिक खतांमुळे माती खराब होत आहे, शेतकरी आत्महत्या करत आहेत आणि ग्राहकांना स्वच्छ अन्न मिळत नाही. “आम्ही ठरवलं, की आम्ही स्वतःच्या शेतातून सेंद्रिय उत्पादने उगवू आणि थेट ग्राहकांपर्यंत पोहोचवू,” असे अजिंक्या सांगतात. शुरूवातीला आव्हानांचा डोंगर होता. भाळावडीतील त्यांचे १०० एकर शेत रासायनिक शेतीने खराब झाले होते. रिजेनरेटिव्ह फार्मिंग – म्हणजे मातीला पुन्हा जीवंत करण्याची पद्धत – अवलंबली. गायींच्या गोठ्यातून मिळणारे नैसर्गिक खत, कीटकनाशकांऐवजी नैसर्गिक उपाय आणि शेतकऱ्यांना प्रशिक्षण. पहिल्या वर्षी उत्पादन कमी होते, विक्री अवघी. पण भावांनी हार नाही मानली. सोशल मीडियावरून त्यांनी स्वतःची कहाणी सांगितली – व्हिडिओ, पोस्ट आणि थेट ग्राहक संवाद. “आम्ही ब्रँड नाही, आम्ही विश्वास आहोत,” असा त्यांचा दावा. लवकरच त्यांचे अमरनाथ गायीचे तूप, सेंद्रिय धान्य आणि मसाले घराघरात पोहोचू लागले. २०२० पर्यंत कंपनीने पाय रोवले. ई-कॉमर्स प्लॅटफॉर्मवर विक्री वाढली, विशेषतः महामारीत जेव्हा लोक स्वच्छ अन्न शोधत होते. २०२२ मध्ये सीरिज ए फंडिंगमध्ये ५८.२५ कोटी रुपये उभारले. हे पैसे शेतकरी नेटवर्क वाढवण्यात, उत्पादन सुविधा उभारण्यात वापरले. आज कंपनी ५,००० हून अधिक शेतकऱ्यांशी जोडलेली आहे, ज्यांना ते प्रशिक्षण देतात आणि हमी भाव देतात. “शेतकरी हा आमच्या कुटुंबाचा भाग आहे,” सत्यजित म्हणतात. आता सीरिज बी मध्ये ११० कोटी रुपये मिळाले – ३६० वन अॅसेट, रेनमॅटर, नरोत्तम शेखसरिया फॅमिली आणि राहुल गर्ग यांच्यासारख्या दिग्गज गुंतवणूकदारांकडून. हे पैसे नवीन फॅक्टरी, अमेरिका आणि एमईएनए बाजारपेठ, तंत्रज्ञान आणि टीम वाढवण्यासाठी. सणासुदीत विक्री दुप्पट होईल, असा अंदाज. पण यशाचे खरे रहस्य? पारदर्शकता. प्रत्येक उत्पादनावर क्यूआर कोड – स्कॅन केले की शेतकऱ्याचे नाव, मातीची चाचणी आणि उत्पादन प्रक्रिया दिसते. गुंतवणूकदारही प्रभावित. रेनमॅटरचे दिनेश पै म्हणतात, “४५ टक्के भारतीय कृषीत कार्यरत असताना, ही कंपनी शाश्वत बदल घडवते.” राहुल गर्ग, जे गेल्या वर्षभरात मेंटॉर आहेत, म्हणतात, “हे भावांचा ब्रँड वैयक्तिक स्पर्शाने चालतो.” ही कथा शिकवते की, स्वप्न आणि मेहनत असली की मातीपासून आकाश गाठता येते. टू ब्रदर्स आज केवळ कंपनी नाही, तर एक चळवळ आहे – सेंद्रिय भारताची. पुढे काय? जागतिक ब्रँड होणे. दोन भावांच्या या यात्रेला शुभेच्छा!

पुणे : आगामी पुणे महानगरपालिका निवडणुकीच्या पार्श्वभूमीवर महत्त्वाचा टप्पा समजल्या जाणाऱ्या मतदार यादी पुनरावलोकनाचा कार्यक्रम जाहीर करण्यात आला आहे. या कार्यक्रमानुसार 6 नोव्हेंबर 2025 रोजी प्रारूप मतदार यादी जाहीर होणार आहे. मतदारांना आपल्या नावाविषयी, पत्त्याविषयी किंवा इतर तपशीलांबद्दल तक्रारी अथवा हरकती नोंदविण्यासाठी संधी दिली जाणार आहे. प्रारूप यादी जाहीर झाल्यानंतर 14 नोव्हेंबरपर्यंत नागरिकांना हरकती आणि दुरुस्त्या नोंदवता येतील. या कालावधीत मतदारांनी आपल्या नावाची नोंद योग्य आहे का, त्यात काही त्रुटी आहेत का, हे तपासून घ्यावे असे आवाहन प्रशासनाने केले आहे. प्राप्त हरकती आणि दुरुस्त्यांवर निवडणूक विभागाकडून योग्य ती छाननी करण्यात येईल. या छाननीनंतर आणि सर्व आवश्यक दुरुस्त्या पूर्ण करून 28 नोव्हेंबर रोजी अंतिम मतदार यादी जाहीर केली जाणार आहे. या अंतिम यादीतच पुढील महापालिका निवडणुकीसाठी पात्र मतदारांची नावे राहतील. त्यानंतर 14 डिसेंबर रोजी मतदान केंद्रनिहाय मतदार यादी प्रकाशित केली जाईल, ज्यामध्ये प्रत्येक मतदान केंद्राच्या मतदारांची अद्ययावत माहिती असेल. महानगरपालिका निवडणुका अपेक्षित असल्याने, या मतदार यादीच्या कार्यक्रमाकडे राजकीय पक्ष, कार्यकर्ते आणि मतदार यांचे लक्ष लागले आहे. प्रशासनाने सर्व नागरिकांना आपली नावे मतदार यादीत निश्चित करण्याचे आवाहन केले असून, वेळेत हरकती किंवा दुरुस्त्या सादर करण्याचे आवाहन करण्यात आले आहे.

Newsworldmarathi Pune:फॅशन आणि हस्तकलेच्या जगात आपली वेगळी ओळख निर्माण केलेल्या रुबाब इंडियाने आपल्या नवव्या वर्षात भव्य पदार्पण करत एक नवा पर्व सुरू केला आहे. या विशेष प्रवासात त्यांनी आता तनिष्काच्या TASW सोबत हातमिळवणी केली असून, एकत्रितपणे सर्जनशीलता, शैली आणि परंपरेचं अद्भुत मिश्रण साकारले आहे. ग्राहकांच्या अभिरुचीनुसार आणि आधुनिक ट्रेंडशी जुळवून घेत, दोन्ही ब्रँड्सनी एकत्र येऊन फॅशनच्या नव्या अध्यायाची निर्मिती केली आहे.

पुणेकरांसाठी ही बातमी विशेष आनंदाची आहे, कारण या नव्या सहकार्याचे साक्षीदार होण्यासाठी आता स्वारगेट येथे मुक्ता अपार्टमेंटमधील नटराज हॉटेलच्या शेजारी असलेल्या आमच्या सहयोगी स्टोअरला भेट देता येणार आहे. येथे एकाच छताखाली परंपरा आणि आधुनिकतेचं अद्वितीय मिलन पाहायला मिळेल. रुबाब इंडियाच्या मनाली दानैत आणि तनिष्काच्या तनिष्का सावंत (TASW by तनिष्का) या दोन नावाजलेल्या डिझायनर्सनी एकत्र येऊन सर्जनशीलतेला नव्या उंचीवर नेलं आहे. त्यांची दृष्टी आणि कलात्मकता फक्त कपड्यांपुरती मर्यादित नसून, ती भारतीय हस्तकलेच्या आत्म्याला नव्या परिमाणात सादर करते. पारंपरिक डिझाईन्सना आधुनिक टच देत त्यांनी प्रत्येक पोशाखात एक वेगळेपणा आणि दर्जा जपला आहे. या सहकार्याच्या माध्यमातून रुबाब इंडिया आणि TASW आता फॅशनप्रेमींसाठी संपूर्ण भारतातील उत्कृष्ट हस्तकला, साड्या, आणि डिझायनर वस्तूंची आकर्षक श्रेणी सादर करत आहेत. खास बनारसी, पैठणी, चंदेरी आणि लिनन साड्यांपासून ते समकालीन फ्यूजन ड्रेसेसपर्यंत, प्रत्येक निर्मिती काळजीपूर्वक क्युरेट केली गेली आहे. या संग्रहात महिलांसाठी पारंपरिक तसेच आधुनिक दोन्ही शैलींचा समावेश आहे, ज्यामुळे प्रत्येक प्रसंगासाठी योग्य पोशाख सहज सापडतो. फक्त महिलांसाठीच नव्हे, तर पुरुष आणि मुलांसाठीदेखील खास हस्तकला आणि डिझायनर वस्तू येथे उपलब्ध आहेत. लग्नसोहळे, एंगेजमेंट, पारंपरिक सण, तसेच दैनंदिन वापरासाठी उपयुक्त अशा विविध पोशाखांच्या पर्यायांमुळे हा स्टोअर फॅशन आणि परंपरेचं परिपूर्ण केंद्र ठरतो. रुबाब इंडियाने आपल्या गेल्या नऊ वर्षांच्या प्रवासात ग्राहकांच्या अपेक्षा, त्यांच्या आवडीनिवडी आणि शैलीचा सखोल अभ्यास केला आहे. त्या अनुभवावर आधारित त्यांनी आता “कस्टमाइज्ड फॅशन अनुभव” सादर केला आहे, जिथे प्रत्येक ग्राहकाच्या व्यक्तिमत्त्वानुसार आणि गरजेनुसार कपडे डिझाइन केले जातात. हेच या ब्रँडचं सर्वात मोठं वैशिष्ट्य आहे – व्यक्तीच्या आत्मविश्वासाला आणि सौंदर्याला अधोरेखित करणारी फॅशन. रुबाब इंडिया आणि TASW यांच्या या सहकार्यामुळे पुण्याच्या फॅशनविश्वात एक नवा उत्साह आणि नवचैतन्य निर्माण झालं आहे. ही केवळ कपड्यांची गॅलरी नसून, भारतीय कलात्मकतेचा उत्सव आहे. प्रत्येक वस्त्रात कारागिरांच्या हातांची मेहनत, डिझायनर्सच्या कल्पकतेचा स्पर्श आणि भारतीय परंपरेचा आत्मा जाणवतो. जर तुम्ही तुमच्या खास प्रसंगासाठी काहीतरी अनोखं, परंपरेशी निगडीत आणि तरीही आधुनिक अशा पोशाखाच्या शोधात असाल, तर रुबाब इंडिया आणि TASW यांचे हे सहयोगी स्टोअर तुमच्यासाठी सर्वोत्तम ठिकाण ठरेल. संपूर्ण कुटुंबासाठी कस्टमाइज्ड डिझाईन्स, नवीन ट्रेंड्स आणि दर्जेदार फॅब्रिक्स यांचा संगम येथे अनुभवता येईल. तुमच्या फॅशन कल्पनांना आकार देण्यासाठी आणि वैयक्तिक शैली साकारण्यासाठी आजच भेट द्या 📍 रुबाब इंडिया आणि TASW सहयोगी स्टोअर, मुक्ता अपार्टमेंट, नटराज हॉटेल शेजारी, स्वारगेट, पुणे. 📞 अपॉइंटमेंटसाठी संपर्क करा: 7507170170

Newsworldmarathi Pune: जिल्हाधिकारी जितेंद्र डुडी यांच्या अध्यक्षतेखाली पुणे जिल्हा परिषदेच्या सार्वत्रिक निवडणुकीसाठी आरक्षणाची सोडत जाहीर करण्यात आली. एकूण ७३ गटांपैकी अनुसूचित जातीसाठी ७, अनुसूचित जमातीसाठी ५ आणि नागरिकांचा मागासवर्गीय प्रवर्गासाठी १९ गट राखीव ठेवण्यात आले आहेत, त्यापैकी १० जागा महिलांसाठी आहेत. तर सर्वसाधारण प्रवर्गासाठी ४२ गट राखीव असून त्यापैकी २० गट महिलांसाठी राखीव आहेत. विविध प्रवर्गांनुसार सदस्यपदांचे आरक्षण निश्चित करण्यात आले आहे. अनुसूचित जाती (महिला) प्रवर्गासाठी राखीव गट • इंदापूर – ७१ लासुरने • इंदापूर – ७० वालचंदनगर • बारामती – ६१ गुणवडी • हवेली – ४१ लोणीकाळभोर अनुसूचित जमाती (महिला) प्रवर्गासाठी राखीव गट • जुन्नर – ८ बारव • जुन्नर – १ डिंगोरे • आंबेगाव – ९ शिनोली नागरिकांचा मागास प्रवर्ग (महिला) साठी राखीव गट • खेड – २२ कडूस • बारामती – ६० सुपा • हवेली – ४० थेऊर • शिरूर – १५ न्हावरा • जुन्नर – ४ राजुरी • जुन्नर – ६ नारायण • जुन्नर – २ ओतूर • पुरंदर – ५३ नीरा शिवतक्रार • जुन्नर – ५ बोरी बुद्रुक • इंदापूर – ६७ पळसदेव नागरिकांचा मागास प्रवर्गासाठी राखीव गट • हवेली – ३७ पेरणे • वेल्हे – ५५ वेल्हे बुद्रुक • खेड – २५ मेदनकरवाडी • मुळशी – ३६ पिरंगुट • शिरूर – २० मांडवगण फराटा • दौंड – ४९ यवत • आंबेगाव – १३ अवसरी बुद्रुक • भोर – ५६ वेळू सर्वसाधारण महिला प्रवर्गासाठी राखीव गट • खेड – २३ रेटवडी • दौंड – ४७ पाटस • बारामती – ६३ वडगाव निंबाळकर • शिरूर – १९ तळेगाव ढमढेरे • इंदापूर – ६९ निमगाव केतकी • मावळ – ३१ खडकाळे • आंबेगाव – ११ कळंब • दौंड – ४४ वरवंड • शिरूर – १८ शिक्रापूर • आंबेगाव – १० घोडेगाव • मावळ – ३० इंदुरी • हवेली – ४२ खेड शिवापूर • खेड – २६ पाईट • इंदापूर – ६६ भिगवण • शिरूर – १६ रांजणगाव गणपती • खेड – २८ कुरुळी • मावळ – ३३ सोमाटने • इंदापूर – ७३ बावडा • पुरंदर – ५० गराडे • हवेली – ३८ कोरेगाव मुळ

Newsworldmarathi Pune: पुण्यातील सुप्रसिद्ध व्यापारी, जयराज ग्रुपचे संचालक तसेच सामाजिक, शैक्षणिक, आरोग्य इत्यादी सर्वच क्षेत्रात अग्रस्थानी असलेले व्यक्तिमत्व, अन्नधान्याच्या व्यवसायात पंचक्रोशीमध्ये बासमती किंग म्हणून ओळख असलेले व्यक्तिमत्व म्हणजे डॉ.राजेश शहा यांना अमेरिकेतील नावाजलेल्या बर्लिंग्टन स्टेट विद्यापीठ, यूएसए’ कडून सामाजिक उद्योजकतेतील मानद डि.लीट ( बिझनेस मॅनेजमेंट अँड सोशल वर्क) विथ गोल्ड मेडल पुरस्काराने दिनांक 12 ऑक्टोबर 2025 रोजी दिल्ली येथे सन्मानित करण्यात आले. दिल्ली येथे सदर पदवी प्रदान सोहळ्या प्रसंगी बर्लिंग्टन स्टेट विद्यापीठच्या प्रतिनिधींनी बोलतांना डॉ.राजेश शहा यांना उद्देशून म्हंटले की, “आपल्या सामाजिक उद्योजकतेच्या क्षेत्रातील आपले अद्वितीय योगदान प्रेरणादायी ठरले आहे. मानवी जीवन व विविध समुदायांमधील परिवर्तन घडवून आणण्यासाठी आपले प्रयत्न मोलाचे आहेत. डि.लीट पुरस्कार आपल्या नाविन्यपूर्ण आणि प्रभावी उपक्रमाद्वारे सकारात्मक सामाजिक बदल घडवून आणण्यासाठी केलेल्या उत्कृष्ठ कामगिरीला आम्ही समर्पीत करीत आहोत. व्यवसायात एक उंची गाठली असली तरी डॉ.राजेश शहा हे सामाजिक क्षेत्रात कायमच अग्रेसर असतात. त्यांच्याच प्रयत्नांतून पुणे येथे भारतातील पहिलेच भव्य दिव्य असे गुजरात भवन – जयराज स्पोर्ट्स & कन्व्हेन्शन सेंटर उभारण्यात आले आहे. त्याच्याच बाजूला गेल्या चार वर्षांपूर्वी PGKM विद्याधाम ही अत्याधुनिक सोयी सुविधा व क्रीडांगण असलेली बॅगलेस व डे स्कूल त्यांच्याच नेतृत्वात सुरु करण्यात आली आहे. डॉ.राजेश शहा यांनी आई-वडिलांच्या स्मरणार्थ त्यांच्या मूळगावी पेढामली, ता. विजापूर, जिल्हा मेहसाना (गुजरात) येथे ‘कंचन-हिरा आयुर्वेदिक हॉस्पिटल व कॅन्सर रिसर्च सेंटर’ हे ६० बेड्सचे अत्याधुनिक हॉस्पिटल बांधले आहे. त्या ठिकाणी अत्यल्प किंवा मोफत दरात रुग्णांवर उपचार केले जातात. आतापर्यंत डॉ.राजेश शहा यांना विविध पुरस्कारांनी सन्मानित करण्यात आले आहे , त्यांच्या सार्वजनिक क्षेत्रातील कार्याची दखल घेऊन नुकतेच अमेरिकेच्या कॅलिफोर्निया विद्यापीठाने त्यांना मानद डॉक्टरेट पदवी (पी.एचडी) देऊन सन्मानित केले आहे तसेच प्रतिष्ठित अशा फेअर बिझनेस प्रॅक्टीसेस करीता देण्यात येणाऱ्या जमनालाल बजाज पुरस्काराने तीन वेळा सम्मानित करण्यात आले आहे. याशिवाय समाजरत्न, आदर्श व्यापारी त्याचबरोबर जीवनगौरव पुरस्कार, व्यापार भूषण, राष्ट्रिय ऐकता पुरस्कार, कर्मवीर पुरस्कार, बेस्ट बिसनेसमॅन पुरस्कार इत्यादी पुरस्कारांनी सम्मानित करण्यात आले आहे. पुण्यातील सुप्रसिध्द उपक्रम लाडू-चिवडा चे ते जनक असून या उपक्रमासह डॉ.राजेश शहा यांचे गिनीज बुक ऑफ वल्ड रेकॉर्ड मध्ये नाव नोंदले आहे. डॉ.राजेश शहा हे दि पूना गुजराती केळवणी मंडळ व या नावाजलेल्या शैक्षणिक संस्थेचे चेअरमेन आहेत. तसेच ते एच. व्ही. देसाई आय हॉस्पिटल चे अध्यक्ष असून श्री पूना गुजराती बंधु समाज या ११० वर्षे पासून कार्यरत संस्थेचे मॅनेजिंग ट्रस्टी आहेत. पुना मर्चंट चेंबरचे सुवर्ण महोत्सवी वर्षाततील अध्यक्ष, महाराष्ट्र गुजराती समाज महामंडळाचे महासचिव या पदावर कार्यरत आहेत. महाराष्ट्रातील व्यापाऱ्यांच्या संघटनांची शिखर संघटना असलेल्या फेडरेशन ऑफ असोसिशयन्स ऑफ महाराष्ट्र (फाम) चे गेल्या २५ वर्षांपासून वरिष्ठ उपाध्यक्ष म्हणून कार्यरत. त्याचबरोबर जनसेवा फाऊंडेशन चे खजिनदार म्हणून ही ते कार्यरत आहेत. याशिवाय अनेक संस्थांच्या विविध पदांवर डॉ.राजेश शहा कार्यरत आहेत.

Newsworldmarathi Pune: आरोग्यदायी समाजनिर्मितीसाठी कार्यसिद्धी प्रतिष्ठानचे संस्थापक अध्यक्ष गिरिराज तानाजीराव सावंत यांच्या संकल्पनेतून हे भव्य शिबिर महानगरपालिका मैदान, मोहननगर, धनकवडी येथे भरविण्यात आले आहे. या आरोग्य शिबिराच्या पहिल्या दिवशी सुमारे पाच हजार नागरिकांनी आरोग्य तपासणी सेवेचा लाभ घेतला. दोन दिवसीय या शिबिरात पुणे, मुंबई आणि नाशिक येथील नामांकित रुग्णालये व तज्ज्ञ डॉक्टर सहभागी झाले आहेत. शिबिराचे वैशिष्ट्य म्हणजे आद्ययावत वैद्यकीय तंत्रज्ञानाचा वापर करून होणारी तपासणी, तसेच सर्वच विभागांतील समग्र आरोग्यसेवा हे आहे. आज दुपारी सुमारे १२ वाजता या शिबिराचे औपचारिक उद्घाटन महाराष्ट्र राज्याचे माजी आरोग्यमंत्री व विधानसभेचे सदस्य प्रा. डॉ. तानाजीराव सावंत यांच्या हस्ते, तसेच चिंचवड विधानसभा सदस्य शंकर जगताप यांच्या प्रमुख उपस्थितीत पार पडले. सावंत म्हणाले, आरोग्य क्षेत्रात मंत्री म्हणून काम करताना अनेक योजना राबविल्या, परंतु समाजाशी निगडित अशा लोकहितकारी उपक्रमांद्वारे नागरिकांपर्यंत सेवा पोहोचवणे ही खरी लोकसेवा आहे. नगरसेवक किंवा सामाजिक कार्यकर्त्यांनी अशा उपक्रमांद्वारे लोकांना आरोग्याचा लाभद्यावा. या वेळी माजी आमदार अश्विनी जगताप, माजी महापौर दत्ता धनकवडे, माजी नगरसेवक विजय रेणुसे, विशाल तांबे, किशोर ऊर्फ बाळा धनकवडे, अभिजित कदम, आप्पा परांडे, श्रद्धा परांडे, शंकर कडू, कमल व्यवहारे, दिगंबर डवरी, मिलिंद पन्हाळकर, रेऊ गाडेकर, रावसाहेब कुंजीर उपस्थित होते. या शिविराच्या माध्यमातून नागरिकांना हृदयरोग, डोळे, दंत, हाडे, मधुमेह, रक्तदाब, स्त्रीरोग, त्वचारोग, कॅन्सर तपासणी, नेत्र तपासणी अशा विविध विभागांतील मोफत सेवा दिल्या जात आहेत. तसेच आवश्यकतेनुसार पुढील उपचारांसाठी संदर्भपत्रे व सल्लाही देण्यात येत आहे. दक्षिण पुणे परिसरातील नागरिकांनी या शिबिराला मोठ्या प्रमाणात प्रतिसाद देत आरोग्य जनजागृतीचा संदेश पुढे नेला असून, सामाजिक बांधिलकीतून उभा राहिलेला हा आरोग्याचा महायज्ञ सर्वानि यशस्वी ठरत असल्याचे मत गिरिराज सावंत यांनी व्यक्त केले. कार्यक्रमाचे सूत्रसंचालन अक्षय घोळवे यांनी तर मान्यवरांचे व नागरिकांचे आभार कुमार पाटील यांनी मानले.

Newsworldmarathi Pune: माऊंट किलीमंजारो हे शिखर टांझानिया या आफ्रिकेतील देशात आहे. या शिखराची उंची ५८९५ मीटर आहे. हे आफ्रिका खंडातील सर्वोच्च शिखर आहे. हे जगातील सर्वोच्च फ्री स्टॅंडिंग शिखर आहे. याच्या आजूबाजूला कुठलेही दुसरे शिखर नाही. हे शिखर लाव्हारसापासून बनलेले आहे. सेवन समीट्स मधील हे एक शिखर आहे. त्यामुळे जगभरातून या शिखराच्या चढाईसाठी लोक येत असतात. गिर्यारोहक, ट्रेकर्स, टुरिस्ट असे सगळे या शिखराच्या चढाईचा आनंद घेण्यासाठी येतात. या वर्षी आम्ही द अल्पायनिस्ट संस्थेची टीम एव्हरेस्टवीर भगवान चवलेंच्या मार्गदर्शना खाली या शिखरावर जायचे ठरले. ५ सप्टेंबर ला १३ जणांच्या टीमने माऊंट किलीमंजारो च्या दिशेने प्रस्थान केले. सुरुवातीची केनिया एअरलाईन्स ची तिकिटे काढली होती, पण ते विमान रद्द झाल्यामुळे इथिओपियन एअरलाईन्स च्या विमानाचे तिकीट काढले. खुप छान ही एअरलाईन्स आहे. मुंबई वरून सकाळी ११ वाजता आम्ही निघालो. साडेपाच तासांच्या प्रवासानंतर आम्ही इथिओपियातील अदीस अबाबा येथे पोहोचलो. येथे २ तासांचा लो-ओव्हर होता. यानंतर पुढे दिड तासांचा विमान प्रवास करून आम्ही किलिमंजारो येथे पोहोचलो. यलो फिवर चे वॅक्सिन येथे येण्यासाठी घेणे बंधनकारक आहे. त्यासाठी २ महिने अगोदर ची अपॅाइंटमेंट सरकारी दवाखान्यात घ्यावी लागते. इमिग्रेशन ची सगळी प्रोसेस करून आम्ही बाहेर पडलो. आमचा गाईड चुवा आम्हाला न्यायला आलाच होता. मोशी मधील पनामा हॅाटेलवर आमची राहण्याची सोय केलेली होती. येथे जाण्यासाठी सगळी तयारी इकडूनच करून जायचे. त्यामुळे वेळ वाचतो. संध्याकाळी सगळ्यांचे ब्रिफिंग झाले. सर्व तयारी झालेली होतीच. दुसऱ्या दिवशी सकाळी नाष्टा करून आमची टीम तयार झाली. आमच्या टीम मधे सर्वात कमी वयाची १२ वर्षांची युगा खवले ही ट्रेकर तर सुहास लुंकड काका ६८ वर्षांचे तर दिलीप पालवे काका ६४ वर्षांचे होते. युगाचे आई बाबा पण या शिखराच्या चढाईसाठी तिच्या सोबत आलेले होते. आपल्या मुलीच्या स्वप्नासाठी झटणारे हे आई-वडिल होते. मचामे गेट या वाटेने आम्ही जाणार होतो. ७ दिवसांची ही वाट आहे. या शिखरावर चढाईसाठी ६ मार्ग आहेत तर ऊतरण्यासाठी माऊका गेट चा वापर करतात. तुम्ही कुठल्याही गेट ने जावा पण तुमची संपुर्ण तपासणी प्रत्येक गेट वर होते. तुम्ही नेलेला सर्व कचरा परत खाली येताना संपुर्ण बरोबर घेऊन यावा लागतो. येथे स्वच्छता म्हणजे कमालीची आहे. शेकडो ने लोक या शिखरावर येतात पण कुठेही तुम्हाला कचरा केलेला नाही. कॅंप लावायच्या जागा फिक्स आहेत. प्रत्येक कॅंपवर पोहोचल्यावर तुम्हाला तेथील फॅारेस्ट च्या ॲाफिसमधे नोंद करावी लागते. सगळ्यांच्या बॅगा निघताना चेक केल्या जातात. काहीही संशयास्पद गोष्ट घेऊन जाण्यास परवानगी नाही. आमचा रूट हा मचामे रूट होता. त्यामुळे मचामे गेट पासून आमचा ट्रेक सुरू झाला. अप्रतिम सृष्टी सौंदर्याने हा रूट सजलेला आहे. पहिल्या दिवशी ११ किमी चा ट्रेक करून आम्ही मचामे कॅंप ला मुक्कामी गेलो. साधारणतः २८०० मीटरवर हा कॅंप लागतो. ट्रेक सुरू होताना येथे खुप फॅारमॅलिटीज असल्यामुळे ट्रेक सुरू व्हायला दुपारचे २ वाजून गेले, त्यामुळे मचामे कॅंप ला आम्हाला पोहोचायला ७ वाजून गेले. हा रूट म्हणजे सृष्टीसौंदर्याचे अप्रतिम रूप होय. इतकं सुंदर जंगल जणू मी ॲमेझॅान च्याच जंगलात आहे की काय असे वाटत होते. रेन फॅारेस्ट चे हे जंगल आहे. टांझानिया देशाचे लोकेशन विषुववृत्तीय प्रदेशात येत असल्यामुळे येथे पाऊस पण दोन वेळा असतो. सप्टेंबर शेवटी पाऊस सुरू होतो तो डिसेंबर अखेर बंद होतो तर मार्च ते में असा पुन्हा पाऊस असतो. त्यामुळे जंगल सुरेख वाढले आहे. टुरिझम वरतीच येथे व्यवसाय असल्यामुळे येथे किलीमंजारो आणि मेरू शिखरांवर गिर्यारोहण मोहिमा होतात तर जंगल सफारी फार प्रसिध्द आहेत. पहिल्या दिवशी जंगलामधे २ वेगवेगळ्या प्रकारची माकडे दिसली. काळ्या रंगाची आणि अंगावर मोठे केस असणारी. २ रा मुक्काम आमचा शिरा कॅंपला होता. शिरा कॅंप ३८०० मीटरवर आहे. सकाळी आठ वाजता आम्ही निघालो, दुपारी दोन वाजता आम्ही येथे पोहोचलो. आरामात ६ तासांत आम्ही येथे आलो. अक्लमटायझेशन साठी आम्ही खुप सावकाश चालत होतो. सर्व कॅंपवर वायफाय कनेक्टिविटी येथे आहे. या ठिकाणी जो कावळा आढळतो तो आकाराने फार मोठा आहे. मानेवर आणि पोटाला पांढरा पट्टा असतो. तिसऱ्या दिवशी आम्ही लोवा टॅावर ४६०० मीटर पर्यंत चढाई केली. तेथे दुपारचे जेवण घेऊन परत खाली बरांको कॅंप ला ४००० मीटर पर्यंत उतरलो. येथे संध्याकाळी सोबत आणलेली कल्याण भेळ खाल्ली. त्यामुळे शरीरातील र फार छान अक्लमटाईझ झालो. हा संपुर्ण रूट खुपच सुंदर आहे. विविध प्रकारची सुंदर फुले आणि झुडपे येथे आढळतात. एक छोटासा धबधबा या वाटेवर आहे. चवथ्या दिवशी चॅलेंज होते ते बरांका ॲालचे. खडी चढाई रॅाक फेस वरून करावी लागते. येथे चढाई दरम्यान गर्दी होते कारण सर्व पोर्टर आणि मेंबरला चढाईसाठी एकच मार्ग आहे. बरांका ॲाल चढून गेल्यावर मस्त कॅाफी साठी टेबल मांडलेला होता. एकदम भारी वाटले हा पाहुणचार पाहून. पुढे २ तासांतच आम्ही करांगा कॅंप ला पोहोचलो. करांगा कॅंप ला यायला ६ तास लागले. किलूमंजारो लाव्हा पासून बनलेला असल्यामुळे सर्व वाटेवर आणि कॅंपवर राखयुक्त माती खुप आहे. पाचवा दिवस आम्ही बराफू कॅंप च्या दिशेने निघालो. वाटेत छान बिस्किट आणि कॅाफी साठी टेबल लावला होता. एका रिजवर बराफू कॅंप लागतो. बराफू कॅंपवर पाण्याची कुठलिही सोय नाही. पण तेथील पोर्टर खुप खालपासून येथे पाणी आणतात. आम्ही बराफू च्या ऐवजी १५० मीटर वर कोसोवो ला कॅंप लावला. यामुळे समीट साठी चढाईचा वेळ कमी लागेल हा यामागचा उद्देश होता. सगळी टीम हळूहळू येथे पोहोचली. कोसोवो कॅंप ४८७० मीटरवर आहे. येथे पोहोचताच स्नो फॅाल चालू झाला. आज रात्रीच आम्ही समीट साठी निघणार होतो. त्यामुळे दुपारचे जेवण करून आम्ही थोडा आराम करायला गेलो. संध्याकाळी ७ वाजता जेवून आम्ही पुन्हा आराम करायला गेलो. रात्री १२ वाजता आमची आवराआवर सुरू झाली. सोबत थोडं स्नॅक्स, गरम पाणी घेऊन आम्ही एका रांगेत पुढे निघालो. छोटी युगा ला थोडी जास्तच थंडी वाजत होती. मधे मधे रडत होती, पण तिने जिद्द सोडली नाही. समीट साठी सर्व वाटेवरचे ट्रेकर्स येथून पुढे याच रूटवर येतात त्यामुळे खुप गर्दी येथे जाणवते. जरी ५९०० मीटरचे शिखर असले तरी या शिखरासाठी तयारी चांगली करावी लागते. वाटेत कोणाला तरी अल्टीट्युड चा त्रास झाला म्हणून गाईड त्याला पकडून खाली आणताना दिसतात. शेवटची चढाई संपतां संपत नाही. सुरुवातीला खडी चढाई संपल्यावर आपण स्टेला पॅाईंट ला पोहोचतो. येथे पोहोचलो की समीट पुढे तासभर अंतरावर आहे. येथून सुर्योदय पाहण्याचा जो आनंद आहे तो फक्त डोळ्यांत साठवू शकतो. शब्दात व्यक्त करू शकत नाही. समीटवर बर्फ आहे. पण चालून चालून वाट पडलेली असते त्यामुळे ट्रेकिंगच्या बुटावर शिखरमाथा गाठता येतो. समीट रिज खुप मोठी आहे. वाऱ्यामुळे येथे बर्फाचे खुप छान आकाराचे छोटे छोटे सुळके तयार झाले आहेत. सकाळी ७ वाजता तेजोमय सुर्यकिरणांच्या साक्षीने समीटवर पाऊले पडली होती. सगळीकडे वातावरण खुपच छान दिसत होते. ढगांची चादर सर्वत्र पसरलेली होती, जणू काही आम्ही त्या ढगांच्या चादरी वरूनच चालत होतो. इतका सुंदर परिसर आजपर्यंतच्या हिमालयीन मोहिमांत खुपच कमी वेळा पाहायला मिळाला. आमच्यातील ११ जणं समीटवर यशस्वी चढाई करू शकले. छोटी युगा खवले १२ वर्षांची तर दिलिप पालवे काका ६४ वर्षांचे होते. पालवे काकांनी बर्गमॅान आयर्नमॅन पण केलेले होते. जवळ जवळ तासभर आम्ही समीटवर होतो. मनमुराद फोटो आणि व्हिडिओ पण काढले. युगा ने तर छत्रपती शिवाजी महाराजांची गारद पण समीटवर दिली. यानंतर आम्ही सर्व जण हळूहळू खाली उतरायला सुरूवात केली. मग माझ्यातील ट्रेल रनर जागा झाला. तसाही मी या मोहिमेच्या १ आठवडा अगोदर लद्दाखमधे २ शिखरे समीट करून आलेलो असल्यामुळे फुल अक्सयटाईज होतो. त्यामुळे स्टेला पॅाईंट पासून पळत कोसोवो कॅंप पर्यंत आलो. एक वेगळाच अनुभव घेतला. पण ५८०० मीटरवर पळणे इतकं सोपं नसंत हेही कळले. आपल्याच शरीरावर वेगवेगळे प्रयोग करण्याची तशीही मला जास्तच खाज असते. पण मजा येते. ११ वाजेपर्यंत सर्व टीम खाली सुखरूप पोहोचली. जवळ जवळ १० तास लागले होते समीट कॅंप ते समीट आणि पुन्हा समीट कॅंप वर यायला. जेवण करून आम्ही पुढे मुक्कामी MNKA high camp ला निघालो. संध्याकाळी ५ पर्यंत आम्ही येथे पोहोचलो. उतराई एकदम उताराची आहे. सातव्या दिवशी मोइका गेटवर आम्हाला उतरायचे होते. एका दिवसांत खुप जास्त उतरायचे होते. उतरताना सगळे रेन फॅारेस्ट आहे. दाट जंगलातून उतरताना खुपच भारी वाटत होते. मोइका गेटच्या अगोदर शिखरावरून आणलेला सगळा कचरा गोळा करण्यासाठी एक जागा आहे. येथे सगळा कचरा मोजून धावा लागतो. सगळे खाली उतरल्यावर तुम्हाला समीटचे सर्टिफिकेट मिळते. या मोहिमेत एकूण १३ जणं सहभागी झाले होते. मोहिमेचा नेता अनुभवी आणि कसलेला गिर्यारोहक श्री भगवान चवले, न्रिपेन गोगोई, रविंद्र सराफ, निखिल गद्रे, संतोष सावंत, किर्ती ओसवाल, दिलीप पालवे, युगा खवले, तोषल खवले, हेमलता खवले, सीमा मेहेंदळे, सुहास लुंकड आणि शंकर फडतरे. वेगवेगळ्या वयातील, वेगवेगळ्या क्षेत्रातील हा समन्वय होता. मोशीत समीट चे सेलिब्रेशन केले. पुढे आफ्रिकेतील सर्वात मोठे आकर्षण म्हणजे सफारी. काही जणांनी १ दिवसांची सफारी केली तर काही जणांनी ४ दिवसांची सेरेनगेटी राष्ट्रीय उधानाची सफारी केली. किती प्राणी, किती पक्षी, काय ते सौंदर्य, हे सगळे पाहून मन तृप्त होऊन जाते. बाजूला जिराफ उभा असतो, सिंह, चित्ता तुमच्या गाडीच्या बाजूने येऊन बोनेटवर सुध्दा ऊभा राहून तुम्हाला सलामी काय देतो. शहामृग, झेब्रा, हत्ती, रानडुकरे यांचे कळपच्या कळपच सर्वत्र दिसतात. ही जंगल सफारी म्हणजे डोळ्यांचे पारणे फिटणे होय. टीव्हीवर डिस्कव्हरी मधे हे सगळे प्राणी पाहणे आणि स्वतः च्या उघड्या डोळ्यांनी हे सौंदर्य पाहणे यात जमीन अस्मान चा फरक आहे हे येथे गेल्यावर कळते. किलीमंजारो पुन्हा पुन्हा खुनावत राहणार यात शंका नाही. अनुभव कथनः- एव्हरेस्टववीर भगवान चवले, गिर्यारोहक

Newsworldmarathi Pune: भारतीय जनता पार्टी, उच्च व तंत्रशिक्षण मंत्री चंद्रकांत (दादा) पाटील यांच्या मार्गदर्शनाखाली समर्थ युवा फाउंडेशनच्या माध्यमातून मोफत आरोग्य तपासणी शिबिराचे आयोजन करण्यात आले. हे शिबिर आज कात्रज भाजी मंडई येथे संपन्न झाले. नागरिकांच्या आरोग्याबाबत जागरूकता निर्माण करण्यासाठी आयोजित या शिबिरात विविध प्रकारच्या आरोग्य तपासण्या मोफत करण्यात आल्या. या शिबिरात रक्तातील सर्व घटकांची तपासणी, रक्तदाब, साखर, कोलेस्टेरॉल, तसेच डोळ्यांची तपासणी (मोतीबिंदू व काचबिंदू) अशा विविध चाचण्यांचा समावेश होता. महिलांसाठी विशेषतः स्तन कर्करोग तपासणी करण्यात आली. याशिवाय दातांची तपासणी, सफाई, पॉलिश आणि सिमेंट फिलिंग या सेवा देखील मोफत उपलब्ध करून देण्यात आल्या. या सर्व तपासण्या नागरिकांसाठी पूर्णपणे विनामूल्य देण्यात आल्या. तपासणीचे रिपोर्ट राणीताई भोसले जनसंपर्क कार्यालय, बालाजीनगर, पुणे-४३ येथे मिळणार आहेत. या उपक्रमात पुणे महानगरपालिकेच्या नगरसेविका आणि भारतीय जनता पार्टीच्या शहर उपाध्यक्षा राणी रायबा भोसले तसेच रायबा भोसले (संस्थापक, राजगड ग्रुप) यांच्या पुढाकाराने शिबिर यशस्वीपणे पार पडले. या मोफत आरोग्य तपासणी शिबिरामुळे नागरिकांमध्ये आरोग्याविषयी जागरूकता वाढून सामाजिक बांधिलकीचा संदेश दृढ झाला.