News World Marathi© 2024 Newsworld मराठी बाह्य इंटरनेट साइट्सच्या सामग्रीसाठी आम्ही जबाबदार नाही. बाह्य लिंक्सबद्दल आम्हाल काय वाटतं? इथे वाचा. बाह्य लिंक्सबद्दल आम्हाल काय वाटतं? इथे वाचा.

Newsworldmarathi Mumbai : भारत आणि जपान नैसर्गिक मित्र असून आध्यात्मिक, सांस्कृतिकदृष्ट्याही दोन्ही देशांचं वेगळं नातं आहे. भारताच्या औद्योगिक प्रगतीत, पायाभूत सुविधांच्या निर्मितीत जपानची भूमिका महत्वाची राहिली आहे. भारतात जपाननं मोठी औद्योगिक गुंतवणुक केली असून महाराष्ट्रात तीनशेहून अधिक तर, पुणे आणि परिसरात पन्नास कंपन्या कार्यरत आहेत. राज्याच्या औद्योगिक, आर्थिक, सामाजिक प्रगतीत, रोजगारनिर्मितीत मोलांचं योगदान देणाऱ्या या कंपन्यांच्या समस्यांचे निराकरण करुन त्यांच्यासाठी उद्योगपुरक वातावरण निर्माण करणं शासनाची जबाबदारी आहे. यापुढील काळात उद्योग, आर्थिक क्षेत्रातील सहकार्यासोबतच सामाजिक, सांस्कृतिक क्षेत्रातही भारत आणि जपान यांच्यातील सहकार्य वाढविण्यासाठी प्रयत्न करुया, असं आवाहन उपमुख्यमंत्री अजित पवार यांनी जपानचे मुंबईतील वाणिज्यदूत यागी कोजी यांच्या भेटीदरम्यान आज झालेल्या चर्चेवेळी केलं. जपानचे मुंबईतील महावाणिज्यदूत यागी कोजी यांनी उपमुख्यमंत्री अजित पवार यांची आज मुंबईतील सह्याद्री अतिथीगृह येथे सदिच्छा भेट घेतली. यावेळी जपानी राज्यात जपानी गुंतवणूक वाढवण्यासह, उद्योगक्षेत्रासमोरील अडचणी दूर करण्यासंदर्भात सविस्तर चर्चा झाली. उद्योग, आर्थिक क्षेत्रांबरोबरंच दोन्ही सामाजिक,सांस्कृतिक सहकार्य वाढविण्यावरही चर्चेत भर देण्यात आला. राज्याच्या नियोजन विभागाचे अपर मुख्य सचिव तथा विकास आयुक्त डॉ. राजगोपाल देवरा, वित्त विभागाचे अपर मुख्य सचिव ओ.पी. गुप्ता, उपमुख्यमंत्र्यांचे सचिव डॉ. राजेश देशमुख उपस्थित होते. मुंबई, पुण्यासह राज्यात विविध ठिकाणी कार्यरत जपानी कंपन्यांना भेडसावणाऱ्या प्रश्नांना सोडविण्यास राज्य शासन प्राधान्य देईल. चांगले रस्ते, पुरेशी वीज, आवश्यक पाणी, सुरक्षित वातावरण आदी पायाभूत सुविधा पुरवण्याची जबाबदारी शासनाची आहे, ती पार पाडण्यात येईल. पुण्याच्या औद्योगिक परिसरातील रस्त्यांची दुरुस्ती करणयात येईल. सणसवाडी ते पिंपळे जगताप या रस्त्यासाठी ८० कोटी रुपयांचा निधी मंजूर करण्यात आला आहे. तिथे भूसंपादनाची प्रक्रिया सुरू असून पावसाळ्यानंतर या रस्त्याचे काम सुरू होईल. जिथे तातडीने रस्तादुरुस्ती आवश्यक आहे तेथे काँक्रीटच्या रस्त्याचे काम पुणे महानगर प्रदेश विकास प्राधिकरणाने तातडीने सुरू करावे, असे निर्देश उपमुख्यमंत्री अजित पवार यांनी बैठकीत दिले. पुण्यातील जपानी कंपन्यांना पायाभूत सुविधांबरोबरच रस्ते, वीज, पाणी दळणवळणासंदर्भातील प्रश्न तातडीने सोडवण्यात येतील. जपानी कंपन्यांच्या प्रश्नांसंदर्भात जपानी कंपन्यांच्या वरिष्ठ अधिकाऱ्यांसमोवत पुण्यात बैठक आयोजित करण्यात येईल. धोरणात्मक आणि करासंदर्भातील प्रश्नही सोडवले जातील, अशी माहिती उपमुख्यमंत्री अजित पवार यांनी जपानच्या मुंबईतील महावाणिज्यदूतांना दिली. यावेळी मियावाकी उद्याने, सामाजिक उत्तरदायित्व निधी, जायका, एस.टी.पी., पूर नियंत्रण अशा विविध प्रश्नांवर उभयतांमध्ये चर्चा झाली. पुढील काळात महाराष्ट्रातील गुंतवणुकीचे वातावरण अधिक चांगले होईल आणि भारत-जपान मैत्री आणखी दृढ होईल, असा विश्वास उपमुख्यमंत्री अजित पवार आणि महावाणिज्यदूत यागी कोजी यांनी व्यक्त केला.

Newsworldmarathi Mumbai: : वैष्णवी हगवणे आत्महत्या प्रकरणात आयपीएस अधिकारी जालिंदर सुपेकर यांच्यावर गंभीर आरोप झाले आहेत. भाजप आमदार सुरेश धस आणि सामाजिक कार्यकर्त्या अंजली दमानिया यांनी सुपेकर यांनी तुरुंगातील आरोपींकडून ३०० कोटी रुपयांची मागणी केल्याचा दावा केला आहे. या आरोपांमुळे राज्यातील राजकीय आणि सामाजिक वर्तुळात खळबळ उडाली आहे. सुपेकर-कराड कनेक्शन अंजली दमानिया यांनी दावा केला आहे की, सुपेकर यांचा बीड येथील वाल्मिक कराडशी व्यावसायिक संबंध आहे. वाल्मिक कराड हा धनंजय मुंडे यांचा निकटवर्तीय असून, त्याच्यावर खंडणी प्रकरणात गुन्हा दाखल आहे. दमानिया यांनी यासंदर्भातील कागदपत्रे सादर केली आहेत. चौकशीत काय समोर येणार? मुख्यमंत्री देवेंद्र फडणवीस यांनी या प्रकरणाची गंभीर दखल घेतली आहे. गृह विभागाकडे असलेल्या ६०० प्रकरणांपैकी ३०० प्रकरणांचा अहवाल तयार झाला असून, उर्वरित प्रकरणांचा तपास सुरू आहे. अंजली दमानिया यांनी सांगितले की, “या चौकशीतून अनेक बाबी समोर येतील. तुरुंगातील भ्रष्टाचार आणि पैशाच्या मागणीची प्रकरणे उघडकीस येणे आवश्यक आहे.” यामुळे सुपेकर आणि इतर संबंधित अधिकाऱ्यांवरील कारवाईची शक्यता नाकारता येत नाही. जालिंदर सुपेकर यांच्याकडून प्रत्येक जेलमध्ये पैशांची मागणी केली जाते. सुरेश धस यांनी सुद्धा आता सुपेकर यांनी 300 कोटींची मागणी होती असा आरोप केला आहे. यामुळे यावर आता अनेक खुलासे होतील. गन लायसन्स प्रकरणातही सुपेकर यांनी पैशाची मागणी केली होती. पुण्याचे तत्कालीन आयुक्त अमिताभ गुप्ता यांच्यावरही आरोप जालिंदर सुपेकर आणि पुण्याचे तत्कालीन आयुक्त अमिताभ गुप्ता या दोघांनी शस्त्र परवान्यांचे वाटप करण्यात प्रचंड प्रमाणात पैसे खाले आहेत. मुख्यमंत्र्यांनीही याची चौकशी लावली आहे. 600 प्रकरणे अशी आहेत ज्यात पैसे खाल्ले गेले आहेत. यापैकी 300 प्रकरणाचा अहवाल गृह विभागासमोर आला आहे. त्याची माहिती घेण्याचा मी प्रयत्न करत आहे. अनेक प्रकरणे बाकी आहेत. यातून आता अनेक खुलासे होतील, असे अंजली दमानिया यांनी म्हटले आहे.

Newsworldmarathi Mumbai: ठाणे जिल्ह्यातील शीळ गावातील भोईर कंपाउंड येथे एका लग्नमंडपाला कुत्रा बांधल्याच्या कारणावरून वाद निर्माण होऊन नवरदेवाला मारहाण झाल्याची घटना घडली आहे. या प्रकरणात दोन्ही पक्षांनी एकमेकांविरोधात तक्रारी दाखल केल्या असून, पोलिसांनी परस्परविरोधी गुन्हे नोंदवले आहेत. नवरदेवाची तक्रार नवरदेव भावेश लोलगे (२७) यांनी दिलेल्या तक्रारीनुसार, ३१ मे रोजी त्यांच्या आजीच्या घरासमोर लग्नमंडप उभारण्यात आला होता. विशाल म्हात्रे यांनी त्यांच्या कुत्र्याला मंडपाच्या लाकडाला बांधले, ज्यामुळे कुत्र्याने मंडप फाडला. या घटनेचा जाब विचारण्यासाठी गेलेल्या भावेश यांना विशालच्या पत्नी दर्शना यांनी शिवीगाळ केली. त्यानंतर विशाल यांनी लाकडी दांडक्याने भावेश यांच्या डोक्यावर मारले. विशालचा भाऊ अविनाश आणि त्यांची पत्नी धनश्री यांनीही भावेश यांना लाथाबुक्यांनी मारहाण केली आणि धमकी दिली. म्हात्रे कुटुंबाची तक्रार दर्शना म्हात्रे यांनी दिलेल्या तक्रारीनुसार, भावेश लोलगे यांनी जुन्या भांडणाचा राग मनात धरून त्यांच्या घरी येऊन शिवीगाळ केली. त्यांनी फायबर काठीने दर्शना आणि तिच्या भाची अक्षरा रणजित फुलोरे हिला मारहाण केली. विशाल यांनी हस्तक्षेप केल्यावर भावेश यांनी त्यांनाही मारहाण केली. भावेश यांचे भाऊ रवी लोलगे यांनी धनश्री म्हात्रे आणि अक्षरा फुलोरे यांना मारहाण केली, तर ललिता पाटील आणि कविता यांनी शिवीगाळ केली. या प्रकरणात शीळ डायघर पोलीस ठाण्यात दोन्ही पक्षांनी परस्परविरोधी तक्रारी दाखल केल्या असून, पोलिसांनी गुन्हे नोंदवले आहेत. पुढील तपास सुरू आहे.

Newsworldmarathi sambhajinagar :भारतीय जनता पक्षाचे दिवंगत नेते आणि महाराष्ट्राच्या जनतेच्या हृदयातील लोकनेते गोपीनाथ मुंडे यांच्या ११व्या स्मृतिदिनानिमित्त परळी येथील गोपीनाथगडावर आयोजित कार्यक्रमाने राज्यातील राजकीय आणि सामाजिक वर्तुळाचे लक्ष वेधून घेतले. या स्मृतिदिन कार्यक्रमाचे विशेष आकर्षण ठरले ते म्हणजे, मुंडे कुटुंबातील दोन महत्वाचे चेहरे – पंकजा मुंडे आणि धनंजय मुंडे – तब्बल ११ वर्षांनंतर एका मंचावर एकत्र दिसले. दोघांनीही कार्यक्रमात हजेरी लावल्याने हा क्षण अत्यंत भावनिक ठरला. कार्यक्रमादरम्यान पंकजा आणि धनंजय मुंडे यांनी दिवंगत वडिलांच्या आठवणींना उजाळा देत त्यांच्या कार्याचा गौरव केला. दोघांनीही परस्परांविषयी आदरयुक्त भाव व्यक्त करत उपस्थित कार्यकर्त्यांचे लक्ष वेधून घेतले. या भावनिक वातावरणाचा शिरकाव अधिक गडद झाला जेव्हा कार्यक्रमाच्या शेवटी दोघेही एकाच ताटात जेवत असल्याचे दृश्य पाहायला मिळाले. हा क्षण उपस्थित कार्यकर्त्यांसाठी केवळ आश्चर्यकारक नव्हता, तर तो आनंद आणि आशेचा किरणही ठरला. राजकीय मतभेदांमुळे अनेक वर्षे एकमेकांपासून दूर राहिलेल्या या दोघा भावंडांनी एकत्र आलेल्या या प्रसंगाने कार्यकर्त्यांमध्ये पुन्हा एकदा एकत्र येण्याची आशा निर्माण केली आहे. गोपीनाथगडावरील हा कार्यक्रम केवळ श्रद्धांजलीपर कार्यक्रम न राहता, कुटुंबीयांतील दूर गेलेल्या संबंधांमध्ये सौहार्द निर्माण करणारा महत्त्वपूर्ण क्षण ठरला.

Newsworldmarathi Mumbai: मुंबईतून एक धक्कादायक घटना समोर आली आहे. मुंब्रा भागात राहणाऱ्या एका तरुणाने २२ वर्षीय तरुणीला महापे एमआयडीसीतील एका लॉजवर आणून तिला पाण्यातून गुंगीचे औषध पाजले. त्यानंतर ती बेशुद्ध झाल्यानंतर तिच्यावर लैंगिक अत्याचार केल्याचा प्रकार उघडकीस आला आहे. रबाळे एमआयडीसी पोलिसांनी या प्रकरणातील तरुणाविरोधात गुन्हा दाखल करून त्याला अटक केली आहे. फरदीन खान (वय-२४) असे आरोपीचे नाव आहे. पोलिसांनी दिलेल्या माहितीनुसार, मुंब्रा परिसरात राहणारा फरदीन व २२ वर्षीय पीडित तरुणी यांची लग्न जुळवणाऱ्या साईटवरून ओळख झाली. दरम्यान, त्यांच्यात मैत्री झाल्यानंतर फरदीन याने त्याच्या मोबाईलमध्ये असलेले या तरुणीचे अश्लील फोटो दाखवून ते व्हायरल करण्याची धमकी तिला दिली व २८ मे २०२५ रोजी महापे येथील साची लॉजिंगमध्ये आणले. तत्पूर्वी त्याने तिला पाण्यातून गुंगीचे औषध पाजले. त्यामुळे ही तरुणी लॉजच्या खोलीत चक्कर येऊन बेशुद्ध होऊन पडली. त्यावर फरदीन याने या बेशुद्धावस्थेत पडलेल्या तरुणीवर लैंगिक अत्याचार केले. काही वेळाने पीडित तरुणीला जाग आल्यानंतर फरदीन याने तिच्या शरीराला स्पर्श करून तिच्यासोबत जबरदस्ती करण्याचा प्रयत्न केला. मात्र, तिने त्याला विरोध करत त्याच्याविरोधात तक्रार करण्याची धमकी दिली. त्यावर फरदीन याने यात तुलाच त्रास होईल, अशी तिला धमकी दिली. या प्रकारानंतर ही तरुणी घरी गेली व अंघोळ करत असताना फरदीन याने ती बेशुद्धावस्थेत असताना, तिच्यावर जबरदस्तीने लैंगिक अत्याचार केल्याचे तिच्या लक्षात आले. त्यावर तिने स्थानिक पोलीस ठाण्यात धाव घेऊन फरदीनविरोधात तक्रार दाखल केली. रबाळे पोलिसांनी फरदीन खान याच्याविरोधात बलात्काराचा गुन्हा दाखल करून त्याला अटक केली.