News World Marathi© 2024 Newsworld मराठी बाह्य इंटरनेट साइट्सच्या सामग्रीसाठी आम्ही जबाबदार नाही. बाह्य लिंक्सबद्दल आम्हाल काय वाटतं? इथे वाचा. बाह्य लिंक्सबद्दल आम्हाल काय वाटतं? इथे वाचा.

Newsworldmarathi Mumbai: बीडचे निलंबित पोलीस अधिकारी रणजीत कासले याच्याविरोधात मोठी कारवाई करण्यात आली आहे. मुंबई गुन्हे शाखेच्या पथकाने त्याला दिल्लीतून अटक केल्याची माहिती समोर आली आहे. नुकतेच बीडमधील शिवाजीनगर पोलीस ठाणे आणि सायबर विभागात कासले याच्याविरोधात दोन नवीन गुन्हे दाखल करण्यात आले होते. कासले याच्यावर समाजात तेढ निर्माण करणे, तसेच विविध राजकीय नेत्यांवर गंभीर आरोप केल्याच्या प्रकरणात गुन्हे दाखल आहेत. बीडसह मुंबईत देखील त्याच्याविरोधात गुन्हे दाखल झाले असून, त्याच्या वक्तव्यांमुळे सामाजिक शांतता धोक्यात येण्याची शक्यता व्यक्त करण्यात आली होती. यानंतर मुंबई गुन्हे शाखेच्या पथकाने दिल्लीमध्ये विशेष मोहिम राबवून त्याला अटक केली. अटक केल्यानंतर कासलेला न्यायालयात हजर करण्यात आले. न्यायालयाने त्याला दोन दिवसांची पोलिस कोठडी सुनावली असून, मुंबई गुन्हे शाखा पुढील तपास करत आहे. या प्रकरणामुळे एकेकाळी पोलीस खात्यात अधिकारी म्हणून काम केलेल्या कासले याच्याविरोधात कायदेशीर कारवाईचा वेग वाढलेला दिसत आहे. सध्या कासले याच्याविरोधात आणखी काही गंभीर प्रकरणांची चौकशी सुरू असून, पोलिस आणि सायबर गुन्हे शाखा त्याच्या ऑनलाइन कृतींचा सखोल तपास करत आहेत.

Newsworldmarathi Nashik : राज्यात अवकाळी पावसामुळे शेतकऱ्यांचे मोठ्या प्रमाणात नुकसान झाले असताना, कृषीमंत्री माणिकराव कोकाटे यांच्या एका वक्तव्यामुळे नवा वाद निर्माण झाला आहे. नाशिक जिल्ह्यातील सिन्नर तालुक्यातील पांढुर्ली गावात नुकसानीची पाहणी करताना त्यांनी विचारले, “हार्वेस्टिंग झालेल्या पिकांचे पंचनामे करून काय करणार? ढेकळांचे पंचनामे करायचे का?” या विधानामुळे शेतकरी संघटनांनी संतप्त प्रतिक्रिया व्यक्त केल्या असून, कोकाटे यांनी स्पष्टीकरण देत म्हटले की, “ज्या शेतात काहीच नाही, त्या ठिकाणी पंचनामे करून काय करणार? जे कांदे वावरात आहेत, त्यांचेच पंचनामे होतील. जे घरात आणून ठेवले आहेत, त्यांचे पंचनामे होणार नाहीत.” कोकाटे यांच्या या विधानामुळे विरोधकांनीही टीका केली आहे. कृषीमंत्री म्हणून त्यांनी शेतकऱ्यांच्या भावना समजून घेऊन संवेदनशीलता दाखवावी, अशी मागणी करण्यात येत आहे. या पार्श्वभूमीवर, राज्य सरकारने नुकसानग्रस्त शेतकऱ्यांना योग्य ती मदत आणि भरपाई देण्यासाठी तातडीने उपाययोजना करावी, अशी अपेक्षा व्यक्त केली जात आहे. नेमकं काय म्हणाले कोकाटे ? कृषीमंत्र्यांना नुकसानीसंदर्भात विचारले असता, नुकसानीचे पंचनामे सुरू असल्याची माहिती त्यांनी दिली. शेतकऱ्यांचे म्हणणे आहे की, उभ्या पिकांचेच पंचनामे केले जात आहेत, असे विचारले असता कोकाटे म्हणाले की, हार्वेस्टिंग झालेल्या पिकांचे पंचनामे करून काय होणार? ढेकळांचे पंचनामे करायचे का? जे कांदे शेतात आहेत, त्यांचेच पंचनामे होतील. जे घरात आणून ठेवले आहेत, त्यांचे पंचनामे होणार नाहीत. त्याचे पंचनामे करणे अवघड आहे. ते नियमात बसत नाही, असे त्यांनी म्हटले. शेतात जी काही पिके असतील त्यांचे रितसर पंचनामे केले जातील, असेही मंत्री कोकाटे यांनी स्पष्ट केले.

Newsworldmarathi sambhajinagar: समृद्ध समाजनिर्मितीसाठी यशवंतराव चव्हाण सेंटरच्या माध्यमातून शेती, युवक, महिला, शिक्षण, आरोग्य अशा विविध क्षेत्रात खूप मोठे सामाजिक कार्य सुरू आहे. या माध्यमातून समर्पित भावनेने लक्ष केंद्रित करत, जिद्द, चिकाटी, मेहनत घेत, अडचणीत तग धरून राहत, सकारात्मक आणि सातत्य ठेवत काम करणारी ही आजची तरुण पिढी सर्वांसाठी प्रेरक आहे. भारताचे उद्याचे भविष्य असणाऱ्या तरुणाईस आज यशवंतराव चव्हाण राज्यस्तरीय युवा पुरस्कार देत असताना अभिमान वाटतो, असे प्रतिपादन राज्याचे माजी आरोग्यमंत्री राजेश टोपे यांनी केले. यशवंतराव चव्हाण सेंटरच्या वतीने महाराष्ट्राच्या सर्वागीण विकासासाठी विविध क्षेत्रात विधायक, भरीव व विशेष कामगिरी करणाऱ्या युवक-युवतींना दिल्या जाणाऱ्या यशवंतराव चव्हाण राज्यस्तरीय युवा पुरस्कार सोहळ्याचे आज एमजीएम परिसरातील रुक्मिणी सभागृहात मान्यवरांच्या प्रमुख उपस्थितीत आयोजन करण्यात आले होते. यावेळी टोपे यांनी उपस्थितांशी संवाद साधला. या पुरस्कार वितरण सोहळ्याच्या अध्यक्षस्थानी यशवंतराव चव्हाण सेंटरच्या जिल्हा केंद्राचे अध्यक्ष अंकुशराव कदम होते तर, मानद कार्यक्रम व्यवस्थापक दत्ता बाळसराफ, कुलगुरू डॉ. विलास सपकाळ, कुलसचिव डॉ. आशिष गाडेकर, कार्यकारिणी सदस्य डॉ. अपर्णा कक्कड, कवी दासू वैद्य, संयोजक नीलेश राऊत, केतकी नेवपुरकर, गौरव सोमवंशी, विभागप्रमुख संतोष मेकाळे आदी मान्यवर उपस्थित होते. पुढे बोलताना टोपे म्हणाले, आज विविध क्षेत्रात काम करणारे हे सगळे तरुण समाजाच्या भल्यासाठी काम करत आहेत. विशेषत: सामान्य नागरिकांचे जीवन सुखमय आणि आनंददायी होण्यासाठी ही तरुणाई आपापल्या क्षेत्रात सामाजिक बांधिलकी जपत सातत्यपूर्ण कार्यरत आहे. या सर्वांनी आपल्या कामांतून ‘नोकरी मागणारे होण्यापेक्षा नोकरी देणारे व्हा’ हाच संदेश दिलेला आहे. यशवंतराव चव्हाण सेंटर विविध उपक्रमांच्या माध्यमातून समाजासाठी कार्य करणाऱ्या सर्वांना प्रेरणा आणि बळ देण्याचे काम करत आहे. भारताला संतांच्या विचारांची फार मोठी परंपरा आहे. भगवान बुध्दाने उदात्त धर्माची दिलेली शिकवण जगासाठी मार्गदर्शक ठरलेली आहे. अशा समृद्ध विचारपरंपरा लाभलेल्या देशात जाती-धर्माच्या नावाने होणारे वाद बघून मन विषन्न होतं. वडीलधाऱ्या माणसाने तरुणांना याविषयी योग्य मार्ग दाखवला पाहिजे. आपण कुठे चुकत आहोत, हे दाखवून दिले पाहिजे. यशवंतराव चव्हाण सेंटरने यासाठी पुढील काळात काम केले पाहिजे. संधीची नवनवीन क्षितिजे उपलब्ध होत असताना आता या तरुणांनी न थांबता, अथक परिश्रमातून नवनवीन विक्रम स्थापित केले पाहिजेत, असे यशवंतराव चव्हाण सेंटरच्या जिल्हा केंद्राचे अध्यक्ष अंकुशराव कदम यांनी यावेळी सांगितले. मानद कार्यक्रम व्यवस्थापक दत्ता बाळसराफ यावेळी बोलताना म्हणाले, आज यशवंतराव चव्हाण राज्यस्तरीय युवा पुरस्कार प्राप्त करणारे सगळे युवक-युवती समाजाच्या भल्यासाठी अनेक महत्वाच्या विषयावर काम करत आहेत. माध्यमे याची दखल घेत असतील किंवा नाही. मात्र, आज यशवंतराव चव्हाण सेंटरने यांच्या कामाची दखल घेतली आहे. आपली आवड जोपासत ही सगळी तरुण मंडळी आपले सर्वस्व झोकून देऊन काम करत आहेत. या अशा समाजातील तळागाळात काम करणाऱ्या व्यक्तींमुळे महाराष्ट्र चालतो आहे. कार्यक्रमाचे प्रास्ताविक संयोजक नीलेश राऊत यांनी केले. कार्यक्रमाचे सूत्रसंचालन यशश्री मुळे यांनी केले तर आभार विभागप्रमुख संतोष मेकाले यांनी केले. आज झालेल्या पुरस्कार वितरण सोहळ्यात ७ विविध विभागांमध्ये एकूण १६ पुरस्कार मान्यवरांच्या हस्ते प्रदान करण्यात आले. महाराष्ट्रातील युवकांच्या कार्याचे मूल्यमापन होऊन त्यांचा गौरव व्हावा आणि प्रोत्साहन मिळावे, हे या पुरस्कारांचे उद्दिष्ट आहे. *पुरस्काराचे स्वरूप :* रोख २१ हजार रु., स्मृतीचिन्ह व मानपत्र असे यशवंतराव चव्हाण राज्यस्तरीय युवा पुरस्काराचे स्वरुप आहे. यशवंतराव चव्हाण राज्यस्तरीय युवा पुरस्कार २०२४-२५ सालचे मानकरी खालीलप्रमाणे आहेत : साहित्य : विनायक होगाडे (कोल्हापूर) मृदगंधा दीक्षित (पुणे), सामाजिक : आकाश टाले (नागपूर) ऋतुजा जेवे (बुलढाणा) इनोव्हेटर : सुश्रुत पाटील (पालघर) पद्मजा राजगुरू (परभणी) क्रीडा : ओजस देवतळे, नागपूर (क्रीडा प्रकार : धनुर्विद्या) हृतिका श्रीराम, सोलापूर (डायव्हिंग), पत्रकारिता : प्रथमेश पाटील (पुणे) ज्योती वाय. एल. (मुंबई) उद्योजक : जयेश टोपे (नाशिक) शिवानी सोनवणे (पुणे) रंगमंचीय कलाविष्कार : कृष्णाई उळेकर, धाराशिव (लोककला) तन्वी पालव, सिंधुदुर्ग (शास्त्रीय नृत्य) ऋतुजा सोनवणे, जळगाव (शास्त्रीय संगीत) कल्पेश समेळ, रायगड (नाट्य)