News World Marathi© 2024 Newsworld मराठी बाह्य इंटरनेट साइट्सच्या सामग्रीसाठी आम्ही जबाबदार नाही. बाह्य लिंक्सबद्दल आम्हाल काय वाटतं? इथे वाचा. बाह्य लिंक्सबद्दल आम्हाल काय वाटतं? इथे वाचा.

Newsworldmarathi Mumbai: जम्मू काश्मीरमधील पहलगाम येथील दहशतवादी हल्ल्यानंतर भारत-पाकिस्तानदरम्यान वाढलेल्या तणावाच्या पार्श्वभूमीवर, केंद्रीय गृह मंत्रालयाने सर्व राज्यांना बुधवारी दिनांक ७ मे रोजी विविध आपत्कालीन परिस्थितींसाठी सज्जता तपासण्याच्या उद्देशाने मॉक सिक्युरिटी ड्रिल राबवण्याचे निर्देश दिले आहेत. त्यानुसार राज्यातील १६ ठिकाणी सिक्युरिटी ड्रिल घेण्यात येणार आहे. केंद्रीय गृह मंत्रालयात झालेल्या आढावा बैठकीत देशभरातील २४४ जिल्हा नागरी संरक्षण केंद्रांची स्थिती तपासण्यात आली. यामध्ये निवारा केंद्रे, इशारा देणारी यंत्रणा आणि समन्वय सुविधा कार्यरत आहेत की दुरुस्तीची गरज आहे, याचे मूल्यमापन करण्यात आले. या ड्रिलचा महत्त्वाचा भाग म्हणजे सामान्य नागरिकांना प्रशिक्षण देणे असणार आहे. गृह मंत्रालयाकडून प्राप्त झालेल्या माहितीनुसार, या मॉक ड्रिलमध्ये हवाई हल्ल्याचा इशारा देणाऱ्या सायरन आणि ब्लॅकआऊट (वीज बंदी) परिस्थितीला कसा प्रतिसाद द्यावा, यावर विशेष भर दिला जाणार आहे. नागरिकांना त्यांच्या घरी वैद्यकीय कीट, अतिरिक्त औषधे, टॉर्च आणि मेणबत्त्या ठेवण्याचे निर्देश दिले जाणार आहेत. मॉकड्रीलमध्ये सामान्य नागरिकांना काय शिकवलं जाणार प्रशासनाने नागरिकांना सल्ला दिला आहे की, अशा परिस्थितीत मोबाईल उपकरणे आणि डिजिटल व्यवहार अयशस्वी ठरू शकतात. अशा परिस्थितीत तोंड देण्यासाठी आवश्यक ती रोख रक्कम जवळ ठेवावी. गृह मंत्रालयाने देशभरातील २४४ जिल्ह्यांमध्ये १०० हून अधिक संवेदनशील ठिकाणांची निश्‍चिती केली आहे. या मॉक ड्रिलमध्ये अनेक उपाययोजना समाविष्ट असणार आहेत. त्यामध्ये हवाई हल्ल्याचा इशारा देणारे सायरन वाजवणे, नागरिकांना नागरी संरक्षणाच्या उपाययोजनांचे प्रशिक्षण देणे, शत्रूच्या संभाव्य हल्ल्याच्या वेळी स्वतःचे संरक्षण कसे करावे याबाबत मार्गदर्शन करणे, तसेच बंकर आणि खंदकांची स्वच्छता व तपासणी करणे यांचा समावेश आहे. महाराष्ट्र सरकार हायअलर्ट मोडवर केंद्र सरकारच्या मॉक ड्रिलच्या पार्श्वभूमीवर महाराष्ट्र सरकारने हायअलर्ट जारी केला आहे. राज्य प्रशासनाकडून सर्व यंत्रणांना सतर्क राहण्याच्या कडक सूचना देण्यात आल्या आहेत. राज्य शासनाने अंतर्गत स्तरावर हालचालींना गती दिली असून, सर्व पालकमंत्र्यांसह इतर मंत्र्यांना संबंधित प्रशासनाशी सातत्याने संपर्कात राहण्याचे आदेश दिले आहेत. उद्या राज्यातील १६ ठिकाणी मॉकड्रिल आणि ब्लॅकआऊट होणार आहे. महाराष्ट्रात १६ ठिकाणी मॉकड्रिल मुंबई, उरण-जेएनपीटी, तारापूर, पुणे, ठाणे, नाशिक, थळ-वायशेत, रोहा-धाटाव-नागोठाणे, मनमाड, सिन्नर, पिंपरी-चिंचवड, छत्रपती संभाजीनगर, भुसावळ, रायगड, रत्नागिरी, सिंधुदुर्ग

Newsworldmarathi Delhi: भारत प्रशासित काश्मीरमध्ये आणि सीमावर्ती राज्यांमध्ये वाढत्या तणावाच्या पार्श्वभूमीवर, अनेक विमान वाहतूक कंपन्यांनी आपल्या उड्डाणांमध्ये बदल केले आहेत. जम्मू, श्रीनगर, लेह, जोधपूर, अमृतसर, भुज, जामनगर, चंडीगड आणि राजकोटसारख्या ठिकाणांवरील उड्डाणे रद्द करण्यात आली असून काही विमानांचे मार्ग वळवण्यात आले आहेत. एअर इंडियाने जाहीर केल्यानुसार, वरील सर्व ठिकाणांसाठीची उड्डाणं आज दुपारी १२ वाजेपर्यंत रद्द करण्यात आली आहेत. अमृतसरकडे जाणाऱ्या दोन आंतरराष्ट्रीय विमानांचे मार्ग वळवून त्यांना दिल्लीकडे पाठवण्यात आले आहे. स्पाइसजेटने देखील धर्मशाला, लेह, जम्मू, श्रीनगर आणि अमृतसरसह उत्तर भारतातील अनेक विमानतळ बंद झाल्याची माहिती दिली असून, त्यामुळे त्यांच्या उड्डाणांवर प्रतिकूल परिणाम झाला आहे. इंडिगो एअरलाइन्सनेही सोशल मीडियावर पोस्ट करत सांगितले की, बदलत्या हवाई परिस्थितीमुळे काही शहरांमध्ये जाणाऱ्या व येणाऱ्या उड्डाणांवर परिणाम झाला आहे. दरम्यान, हल्ल्यांच्या पार्श्वभूमीवर पाकिस्तानने लाहोर आणि कराची या प्रमुख शहरांचे हवाई क्षेत्र बंद करण्याची घोषणा केली आहे

Newsworldmarathi Team: भारताने केलेल्या हवाई हल्ल्यांनंतर पाकिस्तानने तीव्र प्रतिक्रिया दिली असून, पंतप्रधान शाहबाज शरीफ यांनी भारताच्या कारवाईला “युद्धाची कृती” (Act of War) म्हटले आहे. एक्स या सोशल मीडिया प्लॅटफॉर्मवर पोस्ट करत त्यांनी सांगितले की, “शत्रूने पाकिस्तानच्या पाच ठिकाणांवर भ्याड हल्ला केला आहे. भारताच्या या हल्ल्याला सडेतोड उत्तर देण्याचा संपूर्ण अधिकार पाकिस्तानला आहे. आणि आम्ही जशास तसे प्रत्युत्तर देत आहोत.” ते पुढे म्हणाले की, “संपूर्ण पाकिस्तान लष्करासोबत उभा आहे आणि आमचं मनोधैर्य मजबूत आहे. पाकिस्तान आणि त्याचं सैन्य शत्रूशी कसा मुकाबला करायचा हे जाणून आहे. आम्ही शत्रूच्या कोणत्याही वाईट हेतूला यशस्वी होऊ देणार नाही.” या हल्ल्यांबाबत पाकिस्तानचे संरक्षण मंत्री ख्वाजा आसिफ यांनी आरोप केला की, भारताने दहशतवादी छावण्यांच्या नावाखाली सामान्य नागरिकांवर आणि धार्मिक स्थळांवर हल्ले केले आहेत. ते म्हणाले, “या हल्ल्यात एका लहान मुलाचा आणि एका महिलेचा मृत्यू झाला आहे. एकूण मृतांची संख्या अद्याप स्पष्ट नाही. सात लक्ष्यांपैकी दोन काश्मीरमध्ये आणि पाच पाकिस्तानमध्ये आहेत.” ख्वाजा आसिफ यांनी आंतरराष्ट्रीय माध्यमांना पाकिस्तानमध्ये येऊन परिस्थितीची सर्व बाजूंनी तपासणी करण्याचे आवाहन केले आहे.

Newsworldmarathi Delhi: पहलगाम येथे झालेल्या दहशतवादी हल्ल्याचा बदला घेत, भारताने पाकिस्तानमधील दहशतवादी छावण्यांवर जोरदार प्रत्युत्तर दिले आहे. लष्कर, नौदल आणि हवाई दलाने संयुक्तपणे पाकिस्तानातील विविध ठिकाणांवर क्षेपणास्त्र हल्ला केला. सूत्रांनी दिलेल्या माहितीनुसार, हा हल्ला भारताच्या हद्दीत राहून करण्यात आला असला, तरी प्रत्यक्षात हा हवाई हल्ला पाकिस्तानच्या सुमारे 100 किमी आत केला गेला. या ऑपरेशनदरम्यान एकूण 9 टार्गेट्स निश्चित करण्यात आले होते आणि सर्व 9 च्या 9 टार्गेट्स यशस्वीरित्या उद्ध्वस्त करण्यात आले आहेत. या टप्प्याटप्प्याने पार पडलेल्या हल्ल्यामुळे दहशतवाद्यांना मोठा फटका बसला असून, अनेक दहशतवादी छावण्या नष्ट झाल्याची माहिती समोर आली आहे. या महत्त्वाच्या कारवाईदरम्यान पंतप्रधान नरेंद्र मोदी स्वतः संपूर्ण ऑपरेशनवर नजर ठेवून होते. त्यांनी सुरुवातीपासून शेवटपर्यंत प्रत्येक हालचालीवर लक्ष ठेवले. भारताच्या तिन्ही सैन्य दलांच्या संयुक्त कारवाईत उच्च तंत्रज्ञानाचा वापर करून अत्यंत नियोजनबद्ध आणि अचूक हल्ला करण्यात आला. या हल्ल्यामुळे भारताने पुन्हा एकदा आपली दहशतवादविरोधी ठाम भूमिका स्पष्ट केली आहे. ही कारवाई केवळ प्रतिशोध नव्हे, तर भविष्यातील अशा घटनांना आळा घालण्यासाठीचा इशाराही मानला जात आहे.

Newsworldmarathi Team : पहलगाम दहशतवादी हल्ल्यापासून भारतात तीव्र संताप व्यक्त केली जात होती. पाकिस्तानला धडा शिकवला जावा, अशी मागणी केली जात होती. आंतरराष्ट्रीय स्तरावरदेखील भारताला समर्थन मिळत होतं. गेल्या काही दिवसांपासून केंद्र सरकारच्या उच्चस्तरीय बैठका होत असताना लवकरच काहीतरी मोठं घडण्याची शक्यता वर्तवली जात होती. त्याचं उत्तर आता मिळालं असून भारतानं पाकिस्तानच्या हद्दीत घुसून तब्बल ९ दहशतवादी तळ उद्ध्वस्त केले आहेत. मध्यरात्री दीडच्या सुमारास भारतीय हवाई दलानं एअर स्ट्राईक केला आहे. या मोहिमेला भारतानं ‘ऑपरेशन सिंदूर’ नाव देण्यात आलं आहे. पहलगाममधील दहशतवादी हल्ल्याला प्रत्युत्तर म्हणून भारतीय हवाई दलाने ‘ऑपरेशन सिंदूर’ अंतर्गत पाकिस्तानमध्ये घुसून दहशतवादी ठिकाणांवर जोरदार हल्ला चढवला. बहावलपूर, कोटली आणि मुजफ्फराबादमधील नऊ ठिकाणे उद्धस्त करत, भारताने दहशतवाद्यांना सडेतोड उत्तर दिले. या कारवाईत ३ जणांचा मृत्यू आणि १२ जण जखमी झाल्याचे वृत्त आहे.

Newsworldmarathi Paranda: महाराष्ट्र नवनिर्माण शेतकरी सेनेच्या जिल्हाध्यक्षांच्या शेतात आग लावल्याने घरासह चिकूची बाग, ठिबक संच, केबल जळून भस्मसात झाले. ही दुर्घटना परंडा तालुक्यातील करंजा शिवारात रविवारी घडली आहे. या घटनेत शेतकऱ्याचे ४ लाख रुपयाचे नुकसान झाले आहे. याबाबत अधिक माहिती अशी कि, महाराष्ट्र नवनिर्माण शेतकरी सेनेचे जिल्हाध्यक्ष सुदीप मोरे यांची करंजा शिवारात शेती आहे. अज्ञात व्यक्तीने रविवारी सकाळी त्यांच्या शेतातील घरासह आंबा व चिक्कूच्या बागेला आग लावली. उन्हाळ्याचे दिवस असल्यामुळे आगीने रौद्ररुप धारण केले. आगीत बीएसएनएलचे केबल, चार एकरसाठी आणलेले ठिबक सिंचनचे पाईप तसेच शेतातील घर, इतर साहित्य, आंबा व चिक्कू बाग जळून खाक झाली. शेजारचे शेतकरी व लोकांनी आग आटोक्यात आणली. तोपर्यंत मोरे यांचे जवळपास ४ लाख रुपयाचे नुकसान झाले. याबाबत अॅड. पवन मोरे यांनी पोलीस ठाण्यात तक्रार दिली आहे. प्रशासनाने घटनास्थळाचा पंचनामा करून नुकसान भरपाई द्यावी, अशी मागणी शेतकरी मोरे यांनी केली आहे.