Newsworldmarathi Mumbai : अभिनेता सैफ अली खान यांच्या मुंबईतील बांद्रा येथील निवासस्थानी रात्री २ वाजता एक अज्ञात व्यक्ती घुसला आणि त्यांच्यावर चाकूने हल्ला केला. या हल्ल्यात सैफ यांच्या गळ्यावर १० सेंटीमीटरचा जखम झाला असून, त्यांच्या हात आणि पाठीवरही जखमा आहेत.
सैफ यांना तात्काळ लीलावती रुग्णालयात दाखल करण्यात आले, जिथे त्यांच्या जखमांवर शस्त्रक्रिया करण्यात आली. रुग्णालयातील डॉक्टरांच्या माहितीनुसार, सैफ यांच्या शरीरावर ६ वार झाले असून, त्यापैकी दोन गंभीर आहेत, ज्यापैकी एक त्यांच्या मणक्याजवळ आहे.
या घटनेच्या तपासासाठी मुंबई पोलिसांनी सात पथकांची स्थापना केली आहे. सुरुवातीच्या तपासानुसार, हल्लेखोराने सैफ यांच्या घरातील हाऊस हेल्पच्या खोलीतून प्रवेश केला आणि नंतर मुलांच्या खोलीत गेला. हाऊस हेल्पने त्याला अडवण्याचा प्रयत्न केला, ज्यामुळे झालेल्या गोंधळात सैफ यांनी हस्तक्षेप केला आणि त्यांच्यावर हल्ला झाला.
सैफ यांच्या पत्नी करीना कपूर यांनी माध्यमांना दिलेल्या निवेदनात सांगितले की, “घरात चोरीचा प्रयत्न झाला. सैफ यांच्या हाताला जखम झाली असून, त्यांच्यावर रुग्णालयात शस्त्रक्रिया झाली आहे. कुटुंबातील इतर सदस्य सुरक्षित आहेत. आम्ही माध्यमे आणि चाहत्यांना विनंती करतो की, कृपया संयम बाळगा आणि कोणत्याही अफवांवर विश्वास ठेवू नका, कारण पोलिस योग्य तपास करत आहेत.
