Newsworldmarathi Nagapur: Emergency Landing : कोचीहून दिल्लीकडे रवाना झालेल्या इंडिगो विमानाला (फ्लाइट नं. 6E 2706) मंगळवारी (17 जून ) दुपारी बॉम्ब धमकीमुळे डॉ. बाबासाहेब आंबेडकर आंतरराष्ट्रीय विमानतळावर इमर्जन्सी लँडिंग करावी लागली. विमानात 157 प्रवासी आणि क्रू मेंबर्स असताना ही धमकी मिळाल्याने खळबळ उडाली. विमान सुखरूप उतरल्यानंतर सर्वांना सुरक्षितपणे बाहेर काढण्यात आले असून, आता विमानाची कसून तपासणी सुरू आहे. या घटनेमुळे विमानतळावर एकच गोंधळ निर्माण झाला आहे.
धमकीनंतर तातडीची कारवाई
विमान सकाळी 9.20 वाजता कोचीहून उड्डाण करून दुपारी 12.35 वाजता दिल्लीत पोहोचणार होते. मात्र, मध्यंतरी बॉम्ब असल्याचा इशारा मिळताच पायलटने हवाई वाहतूक नियंत्रण कक्षाशी (ATC) संपर्क साधला आणि नागपुरात आपत्कालीन लँडिंगची परवानगी मागितली. लँडिंगनंतर पोलीस, बॉम्बशोधक पथक आणि अग्निशमन दल घटनास्थळी दाखल झाले असून, प्रवाशांचीही चौकशी सुरू आहे. आतापर्यंत तपासात कोणतीही संशयास्पद वस्तू सापडलेली नाही.
सुरक्षा व्यवस्था कडक
याआधी विमानांमध्ये बॉम्ब धमक्या मिळाल्या असल्या तरी त्यातून ठोस पुरावा मिळाला नव्हता. तरीही या प्रकरणात कोणतीही जोखीम न घेता प्रशासनाने तातडीने पावले उचलली आहेत. नागपूर विमानतळावर सुरक्षा व्यवस्था बळकट करण्यात आली असून, इतर विमानांच्या उड्डाण-लँडिंगवरही लक्ष ठेवले जात आहे. धमकीचा हेतू आणि सत्यता याबाबत तपास पूर्ण झाल्यावरच स्पष्टता येईल, असे अधिकाऱ्यांनी सांगितले. सध्या सर्वांचे लक्ष पोलीस आणि बॉम्बशोधक पथकाच्या तपासाकडे लागले आहे.
Recent Comments