Newsworld Mumbai : सोलापूर जिल्ह्यातील मारकटवाडी या गावाने ईव्हीएम (इलेक्ट्रॉनिक मतदान यंत्र) विरोधात उभारलेला आवाज आणि मतपत्रिकेवर मतदानाची मागणी आता राज्याच्या आणि देशाच्या राजकारणाच्या केंद्रस्थानी आला आहे.
राष्ट्रवादी काँग्रेसचे अध्यक्ष शरद पवार उद्या गावाला भेट देणार आहेत. ते ग्रामस्थांचे म्हणणे ऐकून घेऊन त्यांच्या मागण्यांना पाठिंबा देतील, अशी अपेक्षा आहे. शरद पवार यांच्या भेटीमुळे या आंदोलनाला अधिक राजकीय वजन मिळू शकते.
लोकसभेतील विरोधी पक्षनेते राहुल गांधी यांची देखील गावाला भेट ही महत्त्वाची ठरणार आहे. ते लाँगमार्चची सुरुवात येथूनच करणार आहेत.
मारकटवाडीतील ग्रामस्थांचा आरोप आहे की, ईव्हीएममुळे मतदान प्रक्रियेबाबत शंका निर्माण होत आहेत, त्यामुळे पारदर्शकतेसाठी मतपत्रिकेवर मतदानाची मागणी केली जात आहे. पोलिस प्रशासनाने यापूर्वी त्यांना असे करण्यापासून रोखले होते, पण त्यांच्या आंदोलनाने आता राष्ट्रीय पातळीवर ईव्हीएमविरोधातील चर्चेला धार दिली आहे.
