प्रशांत दराडे यांना छत्रपतीची उमेदवारी एक निष्ठेच फळ
Newsworldmarathi Baramati: श्री छत्रपती सहकारी कारखाना भवानीनगर या ठिकाणी प्रशांत दराडे यांना पृथ्वीराज जाचक यांनी उमेदवारी देऊन त्यांच्यावरती विश्वास दाखवला आहे. शेतकरी कुटुंबातील प्रशांत दराडे यांना ही संधी दिल्याने जाचक यांचे कौतुक करण्यात येत आहे.
श्री छत्रपती साखर कारखान्याच्या निवडणुकीसाठी उपमुख्यमंत्री अजित पवार व माजी अध्यक्ष पृथ्वीराज जाचक यांच्यात समन्वय साधत ‘श्री जय भवानी माता’ सर्वपक्षीय पॅनल जाहीर करण्यात आला. लासुर्णे, सणसर, उद्धट, अंथुर्णे, सोनगाव व गुणवडी या गटांमधून प्रत्येकी दोन ते तीन उमेदवार तर ‘ब’ वर्ग, अनुसूचित जाती-जमाती, महिला राखीव, ओबीसी व भटक्या-विमुक्त प्रवर्गातून प्रत्येकी एक उमेदवार निवडण्यात आले. गुरुवारी झालेल्या बैठकीनंतर जागावाटप निश्चित करण्यात आले.
आयसीएसई बोर्डाच्या निकालामध्ये अविषा जॉन पुण्यामध्ये द्वितीय
Newsworldmarathi pune : कौन्सिल फॉर द इंडियन स्कूल सर्टिफिकेट एक्झामिनेशन्स (सीआयएससीई) यांच्यातर्फे घेतलेल्या आयसीएसईच्या (दहावी) परीक्षेत अविषा जॉन हिला 99.4% गुण मिळवून पुणे शहरात द्वितीय क्रमांक पटकावला आहे. अविषा जॉन हि बाकलीवाल ट्युटोरियल्सच्या 3 वर्षीय फाउंडेशन आणि स्पेशल कॉम्प्रिहेन्सिव कोर्सची विद्यार्थिनी आहे.
अविषा तिच्या सातत्यपूर्ण अभ्यासू वृत्ती, शैक्षणिक गुणवत्ता आणि शांत स्वभावासाठी ओळखली जाते. बाकलीवाल ट्युटोरियल्समध्ये तिने घालवलेल्या तीन वर्षांत ती सतत टॉप परफॉर्मर राहिली आहे. तिचे उत्तम गुण हे तिच्या मेहनतीचे आणि संस्थेने दिलेल्या कठोर मार्गदर्शनाचे फलित आहेत. पुढील वाटचालीत अविषा विज्ञान आणि तंत्रज्ञान क्षेत्रात करिअर करण्याचा मानस बाळगते आणि आपल्या उज्वल भविष्याकडे ठामपणे वाटचाल करत आहे.
सीआयएससीईच्या भारतासह परदेशातील दोन हजार ८०३ शाळांमधील दोन लाख ५२ हजार ५५७ विद्यार्थ्यांनी यंदा आयसीएसईची परीक्षा दिली. त्यातील दोन लाख ५० हजार २४९ म्हणजेच ९९.०९ टक्के विद्यार्थी उत्तीर्ण झाले आहेत.
जयकुमार गोरे बदनामी प्रकरणात रामराजे नाईक निंबाळकर यांना समन्स : तपासात मोठा ट्विस्ट
Newsworldmarathi Pune : राज्याचे ग्रामविकासमंत्री जयकुमार गोरे यांच्याविरोधातील खंडणी व बदनामी प्रकरणात आता मोठा राजकीय वळण आले आहे. तपासाच्या धागेदोऱ्या माजी विधान परिषद सभापती आणि शरद पवार गटाचे ज्येष्ठ नेते रामराजे नाईक निंबाळकर यांच्यापर्यंत पोहोचले असून, वडूज पोलिसांनी त्यांना समन्स बजावले आहेत. त्यांना शनिवारी सकाळी ११ वाजता हजर राहण्याचे आदेश देण्यात आले आहेत. या घडामोडींमुळे सातारा जिल्ह्याच्या राजकारणात खळबळ उडाली आहे.
प्रकरणाचा उगम एका महिलेच्या आरोपांपासून झाला असून, तिच्या म्हणण्यानुसार जयकुमार गोरे यांनी २०१६ पासून व्यक्तिगत आकस ठेवून त्रास दिला, तसेच अश्लील फोटो व्हॉट्सॲपवर पाठवले. याप्रकरणी तिने पोलिसांत तक्रार दाखल केली होती.
दरम्यान, या प्रकरणात पत्रकार तुषार खरात, संबंधित महिला आणि शिवसेना शिंदे गटाचे नेते अनिल सुभेदार यांना दहिवडी पोलिसांनी अटक केली होती. तिघांनाही न्यायालयीन कोठडी देण्यात आली आहे.
आता रामराजे नाईक निंबाळकर यांचे नाव तपासात पुढे आल्यामुळे हे प्रकरण आणखी गुंतागुंतीचे बनले आहे.राजकीय वर्तुळात हे पाऊल रामराजेंना मोठा धक्का मानले जात आहे. पुढील तपासात आणखी कोणती नावे पुढे येतात, याकडे राज्याचे राजकारण लक्ष ठेवून आहे.
लोहगाव-खराडी रस्त्याच्या कामासाठी आमदार बापू पठारे यांचे थेट आमरण उपोषण…
Newsworldmarathi Pune : पुण्यातील लोहगाव-खराडी परिसराला जोडणाऱ्या केवळ ३०० मीटर अपूर्ण रस्त्याच्या कामासाठी आमदार बापू पठारे यांनी आमरण उपोषण सुरू केले आहे. आज सकाळी ८.३० वाजता त्यांनी स्थानिक नागरिक आणि कार्यकर्त्यांसह या रस्त्यावर ठिय्या देत आंदोलनाला सुरुवात केली. फॉरेस्ट पार्क आणि गोठण ओढा मार्गे जाणारा हा रस्ता लोहगाव-वाघोली मार्गाला जोडतो. मात्र, अनेक वर्षांपासून या रस्त्याचे काम प्रलंबित असून, नागरिक, विद्यार्थी, ज्येष्ठ नागरिक आणि रुग्णवाहिकांना दररोज अपुऱ्या रस्त्यामुळे त्रास सहन करावा लागत आहे.
या रस्त्याबाबत वारंवार निवेदने, मागण्या आणि पाठपुरावा करूनही पुणे महानगरपालिकेने दुर्लक्ष केल्याचा आरोप पठारे यांनी केला आहे. विभागाचे अधिकारी ‘बघू, करू’ असे उत्तर देतात, पण प्रत्यक्षात कोणतीही ठोस कारवाई होत नसल्यामुळे आता आमरण उपोषणाशिवाय पर्याय नसल्याचे पठारे यांनी म्हटले आहे. सोशल मीडियावर त्यांनी यासंदर्भात माहिती दिली असून, रस्त्याचे डांबरीकरण पूर्ण होईपर्यंत उपोषण सुरुच राहणार असल्याचा निर्धार त्यांनी व्यक्त केला आहे.
पठारेंच्या पोस्टमध्ये नक्की काय म्हटलं आहे?
लोहगाव-वाघोली रस्त्याला जोडणाऱ्या फॉरेस्ट पार्क, गोठण ओढा मार्गे जाणाऱ्या रस्त्यावरील केवळ ३०० मीटर अंतराचा रस्ता गेल्या अनेक वर्षांपासून प्रलंबित आहे. नागरिक, विद्यार्थी, ज्येष्ठ नागरिक आणि रुग्णवाहिकांना दररोज या रस्त्याच्या अपूर्णतेमुळे मोठ्या अडचणींना सामोरे जावे लागत आहे. वारंवार निवेदने, मागण्या आणि पाठपुरावा करूनही पुणे महानगरपालिकेने दुर्लक्ष केल्यामुळे आता मी या भागाचा लोकप्रतिनिधी म्हणून आज सकाळी ८.३० वाजता त्याच लोहगाव येथील ३०० मीटर रस्त्यावर आमरण उपोषण सुरू करण्याचा निर्णय घेतला आहे. असं पठारे यांनी पोस्टमध्ये म्हटलं आहे.
हत्या की आत्महत्या…! मासिक पाळीत जेवण बनवल्याने विवाहितेची हत्या? नातेवाईकांच्या आरोपाने खळबळ
Newsworldmarathi Jalgao : जळगाव जिल्ह्यातून एक धक्कादायक घटना समोर आली आहे. २६ वर्षीय विवाहितेने गळफास घेत आत्महत्या केल्याची घटना घडली आहे. गायत्री ज्ञानेश्वर कोळी (वय-२६) असं जीवनयात्रा संपविलेल्या विवाहितेचे नाव आहे. जळगाव तालुक्यातील किनोद येथे गुरुवारी ही घटना घडली आहे. दरम्यान, गळफास घेऊन तिने जीवन संपविलेले नसून विवाहितेचा सासू आणि नणंद यांनी गळा आवळून खून केल्याचा आरोप नातेवाईकांनी केला आहे. त्यामुळे विवाहितेने जीवन संपवलं की हत्या करण्यात आली? यावरून संशय व्यक्त केला जात आहे.
पोलिसांनी दिलेल्या माहितीनुसार, गायत्री कोळी या जळगाव तालुक्यातील किनोद याठिकाणी पती, सासू आणि दोन मुलं यांच्यासह राहत होत्या. पती भाजीपाला विक्रीचा व्यवसाय करतात. तर गायत्री शिवणकाम करून संसाराला हातभार लावत होती. दरम्यान, गुरुवारी (दि.१) रोजी दुपारी दोन वाजण्याच्या सुमारास विवाहितेने गळफास घेऊन आत्महत्या केल्याचे सांगण्यात आले.
गायत्रीने गळफास घेतल्याचे समजताच तिचे पती, सासू आणि नणंद फरार झाले होते. गायत्रीला जिल्हा शासकीय वैद्यकीय महाविद्यालयात दाखल केले असता वैद्यकीय अधिकाऱ्यांनी तिला मृत घोषित केले. या घटनेची माहिती गायत्रीच्या कुटुंबीयांना दिल्यानंतर त्यांनी घटनास्थळी धाव घेतली. दरम्यान गायत्रीने आत्महत्या केली नसून तिच्यासोबत घातपात झाल्याचा आरोप गायत्रीचा भाऊ सागर कोळी, बहीण प्रियंका कोळी आणि मावशी सुनीता कोळी यांनी केला आहे.
नातेवाईकांचा आरोप काय?
गायत्रीचा भाऊ सागर कोळी याने सांगितले की, गायत्रीला मासिक पाळी आली असताना तिने स्वयंपाक केला होता, तो स्वयंपाक तिच्या सासू आणि इतरांना चालत नव्हता. यावरून घरात किरकोळ वाद झाला. त्यानंतर हा वाद विकोपाला गेला. घरात घडलेल्या वादानंतर तिने हा प्रकार वडिलांना देखील सांगितला होता. मात्र, वडील बाहेरगावी गेले होते. असं असताना तिच्या सासू आणि नणंद यांनी घरी येऊन तिला मारझोड केली आणि गळा दाबून खून केला. नंतर त्यांनी आत्महत्या केल्याचा बनाव करत गायत्रीच्या गळ्यात साडी बांधून तिला लटकवून दिले, असा आरोप गायत्रीच्या भावाने केला आहे. या घटनेने परिसरात मोठी खळबळ उडाली आहे.
सलग सुट्ट्यांमुळे महामार्गांवर प्रचंड वाहतूक कोंडी
Newsworldmarathi pune मे महिन्याच्या सुरुवातीला सलग सुट्ट्यांमुळे मुंबई-पुणे, नाशिक आणि गोवा महामार्गांवर प्रचंड वाहतूक कोंडी झाली आहे. उष्णतेपासून बचावासाठी अनेक प्रवासी रात्री प्रवास करत असल्याने रात्रीही महामार्गांवर मोठ्या वाहनांच्या रांगा दिसून आल्या. विशेषतः मुंबई-पुणे एक्सप्रेस वेवरील लोणावळा-खंडाळा घाटात ८ ते १० किलोमीटर लांब वाहनांच्या रांगा लागल्या होत्या. घाट पार करण्यासाठी लागणारा वेळ १५-२० मिनिटांवरून २-३ तासांपर्यंत वाढला होता.
खासगी बसचालक राजेंद्र सिंह यांनी मुंबई-पुणे मार्गावरील ‘मिसिंग लिंक’ प्रकल्प तातडीने पूर्ण करण्याची मागणी केली. रेल्वे प्रशासनाने उन्हाळी गर्दी लक्षात घेऊन विशेष गाड्यांची घोषणा केली असली, तरी सर्व गाड्यांचे आरक्षण भरले असून तत्काळ तिकीटही मिळत नसल्याने प्रवाशांमध्ये नाराजी आहे. अनधिकृत दलालांकडून जादा दराने तिकीट विक्री होत असल्याच्या तक्रारीही वाढल्या आहेत.
मुंबई-नाशिक मार्गावर सुरू असलेल्या रस्त्याच्या कामांमुळे दिवा, कल्याण फाटा आणि माणकोली येथे रस्त्यांची दयनीय अवस्था झाली असून वाहनचालकांचा वेग कमी झाला आहे. त्यामुळे प्रवाशांना अधिक वेळ रस्त्यावर काढावा लागत आहे.
अकरा महिन्याच्या बाळाला बिबट्याने आईसमोरून उचलले…
Newsworldmarathi Dound : दहिटणे (ता. दौंड) येथील भिसे वस्तीवर बुधवारी सकाळी साडेनऊच्या सुमारास अकरा महिन्याच्या बाळाला बिबट्याने उचलून नेल्याची धक्कादायक घटना घडली. अन्वनित धुळा भिसे असे त्या चिमुकल्याचे नाव असून, तो आईसमोर खेळत असताना बिबट्याने अचानक झडप घालून त्याला ओढून नेले. आईच्या आरडाओरडीनंतर बिबट्या पळून गेला. या घटनेमुळे गावात मोठा संताप पसरला आहे.
दौंड तालुक्याच्या पश्चिम भागात बिबट्याचे सतत दर्शन होत असून पूर्वीही पाळीव जनावरांवर हल्ले झाले आहेत. परिसरात पिंजरा लावण्याची मागणी वारंवार करण्यात आली होती, मात्र वनविभागाने दुर्लक्ष केल्याचा आरोप ग्रामस्थांनी केला आहे. घटनेनंतर यवत पोलीस व वनविभागाने शोधमोहीम सुरू केली असून श्वानपथकाची मदत घेण्यात आली आहे. अद्याप बाळाचा ठावठिकाणा लागलेला नाही. वनविभागाच्या हलगर्जीपणामुळे ही दुर्दैवी घटना घडल्याचा नागरिकांचा आरोप आहे.
सोन्या-चांदीच्या दरात घसरण; आज तुमच्या शहरातील दर जाणून घ्या…
Newsworldmarathi Pune : गेल्या काही दिवसांपासून सराफा बाजारात सोन्याचे भाव गगनाला भिडले आहेत. लग्नसराईच्या काळात सोन्याच्या किमतीत सतत होणारी वाढ ग्राहकांच्या खिशाला कात्री लागत होती. त्याचप्रमाणे शुक्रवारी (२ मे) सोन्याच्या किमतीत थोडीशी घसरण झाली आहे. चांदीच्या किमतीतही बदल झाला आहे.
बुलियन मार्केट या वेबसाइटनुसार, शुक्रवारी देशात १० ग्रॅम २४ कॅरेट सोन्याचा भाव ९३,०३० रुपये आहे. तर २२ कॅरेटसाठी १० ग्रॅम सोन्याचा भाव ८५,२७८ रुपये आहे. तर १ किलो चांदीचा भाव ९५,२९० रुपये आहे. तसेच, १० ग्रॅम चांदीचा भाव ९५३ रुपये आहे.
दरम्यान, हॉलमार्कचा उद्देश सोन्याची पारदर्शकता तपासणे आहे. दागिन्यांमध्ये किती कॅरेट सोन्याचा समावेश आहे, हे हॉलमार्कसह लिहिले जाते. या युनिक कोडद्वारे दागिने शोधणे सोपी होते. सोन्याची पारदर्शकता तपासणे आहे. १ एप्रिल २०२३ पासून केंद्र सरकारच्या नवीन नियमानुसार हॉलमार्कशिवाय कोणतेही दागिने बाजारात विकता येत नाहीत.
आजचा सोन्याचा भाव काय?
मुंबई :
२२ कॅरेट सोन्याचा भाव प्रति १० ग्रॅम ८५,१२२
२४ कॅरेट सोन्याचा भाव प्रति १० ग्रॅम ९२,८६०
पुणे :
२२ कॅरेट सोन्याचा दर प्रति १० ग्रॅम ८५,१२२
२४ कॅरेट सोन्याचा दर प्रति १० ग्रॅम ९२,८६०
नागपूर :
२२ कॅरेट सोन्याचा दर प्रति १० ग्रॅम ८५,१२२
२४ कॅरेट सोन्याचा दर प्रति १० ग्रॅम ९२,८६०
नाशिक :
२२ कॅरेट सोन्याचा दर प्रति १० ग्रॅम ८५,१२२
२४ कॅरेट सोन्याचा दर प्रति १० ग्रॅम ९२,८६०
श्री छत्रपती कारखान्यात पवार-जाचक एकत्र; ‘जय भवानी माता’ पॅनल जाहीर
Newsworldmarathi Bhavaninagar: श्री छत्रपती सहकारी साखर कारखान्याच्या संचालक मंडळाच्या पंचवार्षिक निवडणुकीसाठी उपमुख्यमंत्री अजित पवार आणि माजी अध्यक्ष पृथ्वीराज जाचक यांच्यात अखेर समन्वय साधला गेला असून सर्वपक्षीय ‘श्री जय भवानी माता’ पॅनल जाहीर करण्यात आला आहे. मागील काही दिवसांपासून या पॅनलच्या जागा वाटपावरून राजकीय हालचालींना वेग आला होता. गुरुवारी पवार, भरणे आणि जाचक यांच्यात झालेल्या बैठकीनंतर सर्व जागांवर एकमत झाले.
या पॅनलमधून लासुर्णे (गट क्र. 1) मधून पृथ्वीराज जाचक व शरद जामदार, सणसर (गट क्र. 2) मधून रामचंद्र व शिवाजी निंबाळकर, उद्धट (गट क्र. 3) मधून घोलप पृथ्वीराज व कदम गणपत, अंथुर्णे (गट क्र. 4) मधून शिंगाडे विठ्ठल, दराडे प्रशांत, नरुटे अजित यांना उमेदवारी जाहीर झाली आहे.
सोनगाव (गट क्र. 5) मधून काटे अनिल, कोळेकर बाळासाहेब व मासाळ संतोष, गुणवडी (गट क्र. 6) मधून गावडे कैलास, देवकाते सतीश व टिळेकर निलेश यांची नावे निश्चित झाली आहेत. ब वर्गातून अशोक पाटील, अनुसूचित जाती-जमातीमधून मंथन कांबळे, महिला राखीवमधून सौ. माधुरी राजपुरे व सौ. सुचिता सपकळ, ओबीसीमधून तानाजी शिंदे आणि भटक्या विमुक्त जाती-जमाती विशेष प्रवर्गातून डॉ. योगेश पाटील यांना उमेदवारी देण्यात आली आहे.
भाजप नेत्या पंकजा मुंडे यांना अश्लील मेसेज आणि त्रासदायक कॉल करणाऱ्यास अटक
Newsworldmarathi Beed : भाजपच्या नेत्या पंकजा मुंडे यांना अश्लील संदेश पाठवून आणि त्रासदायक कॉल करून हैराण करणाऱ्या एका व्यक्तीला महाराष्ट्र नोडल सायबर पोलिसांनी अटक केली आहे. अटक करण्यात आलेल्या आरोपीचे नाव अमोल काळे (वय २५) असे असून, त्याला पुण्यातील भोसरी परिसरातून ताब्यात घेण्यात आले आहे. सायबर पोलिसांकडून या प्रकरणाचा अधिक तपास सुरू आहे.
या प्रकरणी मुंबईतील नरिमन पॉइंट येथील महाराष्ट्र भाजप कार्यालयात सोशल मीडिया समन्वयक निखिल भामरे (26) यांनी तक्रार दाखल केली होती. आरोपी काळे हा गेल्या काही दिवसांपासून पंकजा मुंडे यांना कॉल आणि मेसेज द्वारे त्रास देत होता. अखेर भामरे यांनी तक्रार दिल्यानंतर पोलिसांनी भारतीय न्याय संहिता (BNS) च्या कलम 78 आणि 79 अंतर्गत माहिती तंत्रज्ञान कायद्याच्या संबंधित तरतुदींसह एफआयआर नोंदवला.
आरोपी काळेचे मोबाईलचे लोकेशन शोधून काढले. ते पुण्यातील असल्याची माहिती समोर आली. त्यानंतर सायबर पोलिसांनी पुण्यातील भोसरी पोलिस स्टेशनच्या अधिकाऱ्यांच्या मदतीने काळेला ताब्यात घेतले. पोलि १०। खाक्या दाखविताच आरोपी अमोल काळे याने आपणच मुंडे यांना अश्लील मॅसेज व कॉल करत असल्याचे कबूल केले. यानंतर त्याला अटक केली आणि मुंबईला आणण्यात आले.
अमोल काळे हा विद्यार्थी असून तो बीड जिल्ह्यातील परळी तालुक्यातील रहिवाशी असल्याचे समजते. त्याने अश्लील भाषा का वापरली, तसेच छळ करण्याच्या वर्तनामागील त्याचा हेतू काय याचा तपास सध्या करण्यात येत आहे, अशी माहिती एका अधिकाऱ्याने दिली.
