News World Marathi© 2024 Newsworld मराठी बाह्य इंटरनेट साइट्सच्या सामग्रीसाठी आम्ही जबाबदार नाही. बाह्य लिंक्सबद्दल आम्हाल काय वाटतं? इथे वाचा. बाह्य लिंक्सबद्दल आम्हाल काय वाटतं? इथे वाचा.

Newsworldmarathi Mumbai : मराठी अस्मितेच्या रक्षणासाठी, मुंबई आणि महाराष्ट्रासाठी एकत्र येण्याची वेळ आली आहे. शिवसैनिक यासाठी तयार आहेत, अशी समाजमाध्यमावर पोस्ट करत ठाकरेंच्या शिवसेनेने मनसेला पुन्हा एकदा साद घातली आहे. काही दिवसांपूर्वी शिवसेना आणि मनसे एकत्र येण्याची जोरात सुरू झालेली चर्चा ठाकरे बंधूंच्या परदेश दौऱ्यामुळे काहीशी थंडावलेली दिसत होती. मात्र, ही पोस्ट करत शिवसेनेने (ठाकरे) पुन्हा एकदा हवा भरल्याचे दिसत आहे. ठाकरेंच्या शिवसेनेच्या समाजमाध्यमावरील अधिकृत अकाऊंटवरून ही पोस्ट शेअर करण्यात आली आहे. शिवसेना पक्षप्रमुख उद्धव ठाकरेंच्या फोटोसह शेअर केलेल्या या फोटोमध्ये ‘वेळ आलीय, एकत्र येण्याची, मुंबई आणि महाराष्ट्रासाठी शिवसैनिक तयार आहे, मराठी अस्मितेच्या रक्षणासाठी,’ असा मजकूर लिहिण्यात आला आहे. मुंबई आणि महाराष्ट्राच्या हितासाठी एकजूट होऊन काम करण्याचा निर्धार शिवसैनिकांचा (ठाकरे) असल्याचे सांगणाऱ्या या पोस्टद्वारे उद्धव ठाकरे यांनी पुढाकार घेत मनसे अध्यक्ष राज ठाकरे यांना युतीसाठी निमंत्रण दिले असल्याचे बोलले जात आहे. उद्धव ठाकरे आणि राज ठाकरे सध्या परदेश दौऱ्यावर आहेत. असे असले तरी एकत्र येण्याची ही पोस्ट चांगलीच चर्चेचा विषय बनली आहे. दरम्यान, महाराष्ट्राच्या आणि मराठी माणसाच्या अस्तित्वापुढे आमच्यातील भांडण आणि वाद अत्यंत क्षुल्लक आहेत. ते बाजूला ठेवून एकत्र राहणे ही फार काही कठीण गोष्ट नाही. महाराष्ट्राच्या कल्याणाच्या मार्गात माझा अहंकार आडवा येऊ देणार नाही. परंतु हा विषय माझ्या एकट्याच्या इच्छेचा नाही, असं म्हणत राज ठाकरे यांनी काही दिवसांपूर्वी एका मुलाखतीत उद्धव ठाकरे यांच्या पक्षासोबत एकत्र काम करण्याची तयारी दर्शवली होती. त्यानंतर उद्धव ठाकरे यांनी देखील तत्काळ त्याला सकारात्मक प्रतिसाद देत राज ठाकरे यांचा प्रस्ताव स्वीकारताना महाराष्ट्राच्या हितासाठी एकत्र येण्यास सहमती दर्शवली होती. माझे कधीही मतभेद नव्हते. तरीही मी सर्व वाद बाजूला ठेवत एकत्र येण्यास तयार असल्याचे उद्धव ठाकरेंनी म्हटलं होत. त्यानंतर शिवसेना आणि मनसे एकत्र येणार असल्याची चर्चा राजकीय वर्तुळात सुरू झाली आहे.

Newsworldmarathi Parbhani : ‘एक रुपयात पीक विमा योजनेला शेतकऱ्यांनी चुना लावला’ या उपमुख्यमंत्री अजित पवार यांच्या वक्तव्याचा निषेध करीत महाराष्ट्र राज्य किसान सभा, युवक काँग्रेस आणि भाकपच्या कार्यकर्त्यांनी जिल्हाधिकारी कार्यालयात आढावा बैठकीसाठी जाताना त्यांच्या ताफ्यावर चुना फेकल्याची घटना घडली आहे. उपमुख्यमंत्री अजित पवार यांनी एक रुपयात पीक विमा योजनेला शेतकऱ्यांनी चुना लावल्याचे वक्तव्य केले होते. या वक्तव्यामुळे शेतकऱ्यांत तीव्र संताप निर्माण झाला आहे. पवार यांनी त्यांच्या वक्तव्याबद्दल शेतकऱ्यांची जाहीर माफी मागावी व पीक विमा घोटाळ्यात सहभागींवर कायदेशीर कारवाई करावी, या मागणीसाठी चुना फेक आंदोलन करण्यात आले. पोखर्णी नृसिंह येथे दर्शन घेऊन उपमुख्यमंत्री पवार जिल्हाधिकारी कार्यालयातील बैठकीसाठी येत होते. तेव्हा आंदोलकांनी जिल्हाधिकारी कार्यालयाच्या प्रवेशद्वारावर त्यांच्या ताफ्यासमोर चुन्याच्या डब्या फेकल्या. पोलिसांनी हस्तक्षेप करीत युवक काँग्रेसचे अमोल जाधव, किसान सभेचे शिवाजी कदम, काँग्रेसचे रोहिदास बोबडे, सीपीआयचे शेख अब्दुल, स्वराज्य इंडियाचे गोविंद गिरी, यांना ताब्यात घेतले. सरकारने शेतकऱ्यांना कर्जमाफी दिली नाही, सोयाबीनला ६ हजार रुपये भाव देण्याचे आश्वासन पाळले नाही. त्यामुळे सत्ताधाऱ्यांनीच महाराष्ट्राच्या मतदारांना चुना लावला आहे. वास्तविक पाहता पीक विमा कंपन्यांनी मागील पाच वर्षांत ५० हजार कोटी रुपयांची कमाई केली. महाराष्ट्रात दररोज पाच ते सहा शेतकरी आत्महत्या करीत आहेत. अर्थ मंत्रालयाने सामाजिक न्याय विभागाचा निधी कपात करून राज्यातील मागासवर्गीय समुदायाला चुना लावला आहे, असा आरोप आंदोलनकर्त्यांनी केला आहे.

Newsworldmarathi Mumbai : तळोजा फेस- १ मध्ये विवाहितेने आपल्या ४ वर्षीय मुलीची उशीच्या सहाय्याने तोंड दाबून हत्या केली. त्यानंतर स्वतः गळफास घेऊन आत्महत्या केल्याची घटना घडली आहे. मानसिक तणावामुळे आलेल्या नैराश्यातून विवाहितेने हा प्रकार केल्याचे उघडकीस आले आहे. गंभीर बाब म्हणजे या घटनेतील मुलीचा गुरुवारी वाढदिवस होता. तळोजातील मृत विवाहितेचे नाव सोनम अभिषेक केणी वय-३०) असे आहे. याबाबत अधिक माहिती अशी की, सोनम, पती अभिषेक केणी व मुलीसोबत पेठाली गावात राहत होती. सोनम गुरुवारी दुपारी जेवण केल्यानंतर बेडरुममध्ये झोपण्यासाठी गेली होती. मुलीच्या वाढदिवसाची तयारी करण्यासाठी अभिषेक दुपारी बाहेर गेला होता. याच कालावधीत सोनमने आपल्या मुलीची उशीने तोंड दाबून हत्या केली. त्यानंतर तिनेदेखील गळफास घेऊन आत्महत्या केली. सायंकाळी सोनमच्या पतीने मोबाईलवर वारंवार संपर्क साधला. मात्र, ती फोन उचलत नसल्याने त्याने घरी धाव घेतली. त्यानंतर त्याने बंद असलेले बेडरुम उघडून पाहणी केली असता, सोनम गळफास घेतलेल्या स्थितीत, तर मुलगी बेशुद्धावस्थेत आढळून आली. त्यामुळे त्याने तत्काळ दोघांना रुग्णालयात नेले. मात्र, डॉक्टरांनी दोघांना दाखलपूर्व मृत घोषित केले. दरम्यान, काही महिन्यापूर्वी सोनम गरोदर असताना, तिच्या मुलीचा जन्मताच मृत्यू झाला होता. त्यामुळे ती मानसिक तणावाखाली आली होती. तसेच तिच्यावर उपचारसुद्धा सुरू होते. मात्र, मानसिक तणाव वाढल्याने गुरुवारी दुपारी तिने नैराश्यातून मुलीची हत्या करून स्वतः देखील आत्महत्या केल्याचे उघडकीस आले आहे. सोनमने हे कृत्य करण्यापूर्वी चिट्ठी लिहून ठेवली असून, त्यात तिने मला माफ करा, असा मजकूर लिहून ठेवला आहे.

Newsworldmarathi Mumbai: नागरिकांच्या ‘इज ऑफ लिव्हिंग’साठी शहरी परिवहन व्यवस्थेमध्ये आमूलाग्र बदल आवश्यक असल्याचे स्पष्ट करत, यासाठी एकात्मिक महानगर वाहतूक प्राधिकरण (युनि फाईड मेट्रोपॉलिटीन ट्रान्सपोर्ट ॲथॉरिटी) स्थापन करण्याचे निर्देश मुख्यमंत्री देवेंद्र फडणवीस यांनी दिले आहेत या प्राधिकरणाच्या कायद्यासाठी जनतेकडून सूचना व हरकती घेण्यात येणार आहे. मुख्यमंत्री देवेंद्र फडणवीस यांच्या अध्यक्षतेखाली सह्याद्री अतिथीगृह, मुंबई येथे ‘युनिफाइड मेट्रोपॉलिटन ट्रान्सपोर्ट अ‍ॅथॉरिटी (UMTA) बिल, 2025’च्या संदर्भात आढावा बैठक पार पडली. राज्यातील महानगरांच्या शहरी क्षेत्रातील वाहतूक प्रकल्पांचे नियोजन, नियमन आणि बजेट तयार करण्याच्या पद्धतीमध्ये यूएमटीएची स्थापना एक परिवर्तनकारी पाऊल असल्याचे, मुख्यमंत्री देवेंद्र फडणवीस म्हणाले. बऱ्याच कालावधीपासून शहरी वाहतूक व्यवस्था अनेक वेगेवेगळ्या भागांमध्ये विखुरलेल्या आहेत. यासंदर्भात महानगरपालिका, राज्य परिवहन महामंडळ, मेट्रो आणि रेल्वे यांनी स्वतंत्रपणे आपापल्या व्यवस्था स्थापित केलेल्या आहेत. अनेक यंत्रणांच्या या बहुविविधतेमुळे अनेकदा जबाबदाऱ्यांमध्ये समन्वय, आव्हाने आणि प्रकल्प अंमलबजावणीत विलंब होतो. मुख्यमंत्री देवेंद्र फडणवीस म्हणाले की, सध्या वेगवेगळ्या महानगरांमध्ये विविध यंत्रणांमार्फत कार्यरत असलेल्या परिवहन सेवा एकत्रित व सुसूत्र करण्यासाठी हे प्राधिकरण उपयुक्त ठरणार आहे. त्यात ‘मुख्य कार्यकारी अधिकारी’ स्वतंत्र पद असावे तसेच महापौर, मनपा आयुक्त यांच्याही त्यात समावेश असावा. या प्राधिकरणाच्या माध्यमातून विविध सेवा एकाच भाड्यात उपलब्ध होतील आणि नियोजन एकसंध राहील. हे करताना राज्य व केंद्र सरकारच्या नियमांचा भंग होणार नाही याची दक्षता घेण्यात यावी. शहरातील सुरू असलेल्या प्रकल्पांना वेग देणे, एकच नियामक यंत्रणा तयार करणे आणि ‘लास्ट माईल कनेक्टिव्हिटी’ सुनिश्चित करणे या प्राधिकरणाच्या कामाचे केंद्रबिंदू असतील. प्रत्यक्ष अंमलबजावणी महापालिकेकडे राहील, तर नियोजन आणि सल्लागार भूमिका हे प्राधिकरण पार पाडेल, असे मुख्यमंत्री यांनी सांगितले. यावेळी उपमुख्यमंत्री एकनाथ शिंदे आणि वरिष्ठ अधिकारी उपस्थित होते.

Newsworldmarathi Akole : अकोले तालुक्यातील आदिवासी ठाकर समाजातील युवा नेते मारूती मेंगाळ यांच्या समवेत भाजपा, राष्ट्रवादी व कॉग्रेससह इतर पक्षातील प्रमुख पदाधिकारी, कार्यकर्ते उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश करत आहेत. त्यामुळे तालुक्यात राष्ट्रवादी, भाजपाला खिंडार पाडत शिवसेना भक्कम होणार असल्याची चर्चा सुरु झाली आहे. दरम्यान, या पक्षप्रवेशामुळे अहिल्यानगर जिल्ह्यात शिवसेना शिंदे गटाची ताकद आणखी वाढणार आहे. मेंगाळ यांच्यासोबत अकोले तालुक्यातील अनेक सरपंच, ग्रामपंचायत सदस्य, पंचायतसमिती सदस्य, काही माजी नगरसेवक, विविध संस्थांचे पदाधिकारी आणि कार्यकर्ते शिंदे गटात प्रवेश करत आहेत. आज दुपारी हा पक्षप्रवेश सोहळा पार पडणार असून मारुती मेंगाळ हे शेकडो वाहनांचा ताफा घेऊन ठाण्याकडे रवाना झाले आहेत. मेंगाळ यांच्या शिवसेना प्रवेशाने अकोले तालुक्यासह अहिल्यानगर जिल्ह्यात शिवसेनेला मोठी ताकद मिळणार आहे. एवढ्या मोठ्या प्रमाणात शिवसेनेत हा प्रवेश सोहळा झाल्यास तालुक्यातील मोठा राजकीय भूकंप ठरणार आहे. मारुती मेंगाळ हे तालुक्यातील आदिवासी भागातील ठाकर समाजाचे नेतृत्व असले तरी त्यांची बहुजन समाजावरही छाप असल्याने बहुजन समाज त्यांच्या पाठीमागे कायम उभा राहत असतो. ते अकोले पंचायत समितीचे उपसभापती असताना उल्लेखनीय काम केले असल्याने उपसभापती नावानेच त्याची ओळख झाली आहे.

Newsworldmarathi Special : भारतीय संस्कृतीत हळद केवळ एक मसाल्यामध्ये गणला जाणारा पदार्थ नसून हळद आरोग्य, सण-समारंभ, आणि उपचारपद्धतींमधील एक अविभाज्य भाग आहे. मात्र एकेकाळी हीच हळद परदेशात पेटंटच्या वादात सापडली होती. परंतु भारत सरकारच्या सजगतेमुळे आणि वैज्ञानिक समुदायाच्या प्रयत्नांमुळे भारताने या पेटंटवर यशस्वीपणे शिक्कामोर्तब करून घेतला. हे प्रकरण केवळ हळदीपुरतं मर्यादित नाही राहिले तर भारताच्या प्राचीन ज्ञानाच्या संरक्षणासाठी टर्निंग पॉइंट ठरले आहे. प्रकरणाची पार्श्वभूमी सन १९९५ मध्ये अमेरिकेतील University of Mississippi Medical Center ने हळदीचा जखमा भरून येण्यासाठी वापर यावर अमेरिकेच्या पेटंट आणि ट्रेडमार्क कार्यालयाकडून (USPTO) पेटंट घेतले. त्यांचं असं म्हणणं होतं की हळदीचा असा उपयोग करणे हा एक नवीन शोध आहे. परंतु भारतात हळदीचा वापर हजारो वर्षांपासून आयुर्वेदात आणि घरगुती उपचारांमध्ये जखमांवर, सर्दी-खोकल्यावर, आणि त्वचारोगांवर केला जात आहे. त्यामुळे, हळदीचा हा उपयोग पारंपरिक ज्ञानाचा भाग आहे आणि त्यावर वैयक्तिक किंवा संस्था स्तरावर पेटंट मिळणे हे चुकीचे आहे. भारत सरकारचा निर्णायक आक्षेप भारतीय वैज्ञानिक संस्था Council of Scientific and Industrial Research (CSIR) ने या प्रकरणाची दखल घेतली. त्यांनी US Patent Office मध्ये आक्षेप नोंदवला आणि सांगितले की हळदीचा औषधी वापर हा काही नवीन नाही, तर पारंपरिक आहे. यासाठी त्यांनी साहित्यपुरावे, आयुर्वेदिक शास्त्रातील उल्लेख, आणि प्राचीन ग्रंथांतील माहिती देखील सादर केली. ‘शारंगधर संहिता’, ‘चरक संहिता’ आणि ‘सुश्रुत संहिता’ या ग्रंथांमध्ये हळदीचा उपयोग अनेक आजारांवर झाल्याचे स्पष्ट उल्लेख आहेत. भारताच्या बाजूने ऐतिहासिक निकाल या पुराव्यांच्या आधारे, १९९७ मध्ये अमेरिकेच्या पेटंट कार्यालयाने ते पेटंट रद्द केले. हे पेटंट रद्द होणं म्हणजे भारताच्या प्राचीन ज्ञानासाठी आणि बौद्धिक संपदेच्या संरक्षणासाठी मिळालेले ऐतिहासिक यश होते. ‘Traditional Knowledge Digital Library’ (TKDL) ची स्थापना या प्रकरणानंतर भारताने एक महत्त्वपूर्ण पाऊल उचलले, ते म्हणजे पारंपरिक ज्ञान डिजिटल लायब्ररी (TKDL) ची स्थापना. CSIR आणि AYUSH मंत्रालयाच्या पुढाकाराने तयार झालेली या डिजिटल लायब्ररीमध्ये आजघडीला 2 लाखांहून अधिक पारंपरिक औषधांच्या फॉर्म्युलेशनची माहिती पाच आंतरराष्ट्रीय भाषांमध्ये उपलब्ध आहे. यामुळे भविष्यात कुणीही चुकीचे पेटंट घेण्याचा प्रयत्न केला, तर सादर करण्यासाठी भारताकडे त्वरित प्रमाणित पुरावे असतील. हळदी प्रकरणानंतर भारताचे आंतरराष्ट्रीय पातळीवर अन्य विजय हळदी प्रमाणेच भारताने नीमच्या किटकनाशक गुणधर्मांवर घेतलेले पेटंट आणि बासमती तांदळाच्या जातीवर केलेले दावे यावरही यशस्वी लढा दिला आहे. हळदीच्या पेटंट लढ्यात सहभागी प्रमुख व्यक्ती व संस्था 1. डॉ. रघुनाथ माशेलकर (Dr. Raghunath Mashelkar) लढ्याच्या या काळात ते CSIR चे महासंचालक होते. त्यांनी पेटंट रद्द करण्यासाठी जागतिक स्तरावर पुरावे गोळा करून USPTO मध्ये सादर करण्याचे नेतृत्व केले. त्यांचा दृष्टीकोन होता की पारंपरिक ज्ञानाला वैज्ञानिक व कायदेशीर पाठबळ देऊन जागतिक संरक्षण दिले पाहिजे. 2. CSIR – Council of Scientific and Industrial Research ही भारत सरकारची प्रमुख वैज्ञानिक संस्था असून, त्यांनी या केसचा पूर्ण कायदेशीर व वैज्ञानिक अभ्यास केला. CSIR च्या बौद्धिक संपदा विभागाने पेटंटविरोधातील औपचारिक आक्षेप अर्ज तयार केला. 3. Dr. V.K. Gupta CSIR च्या पारंपरिक ज्ञान डिजिटल लायब्ररी (TKDL) प्रकल्पाचे मुख्य. त्यांनी हळदीसारख्या औषधी वनस्पतींचा पारंपरिक वापराचे दस्तऐवजीकरण करून जागतिक स्तरावर सादर करण्यासाठी दिशा दिली. 4. Legal Experts and Patent Attorneys (CSIR टीम अंतर्गत) अमेरिकेच्या पेटंट कार्यालयात युक्तिवाद करण्यासाठी खास कायदेतज्ज्ञ आणि पेटंट अ‍ॅटर्नी नेमण्यात आले. त्यांनी भारतीय पुरावे (जसे की आयुर्वेदिक ग्रंथ, दस्तऐवज) पेटंट ऑफिससमोर प्रभावीपणे मांडले. 5. TKDL (Traditional Knowledge Digital Library) या लायब्ररीमुळे भारताला हजारो पारंपरिक उपचार पद्धतींचा वैज्ञानिक पुरावा दाखवता आला. हळदीच्या पेटंट प्रकरणाने एक गोष्ट ठामपणे सिद्ध केली ती म्हणजे भारताचे प्राचीन ज्ञान हा केवळ वारसा नसून, ती आपल्या भारत देशाची बौद्धिक संपदा आहे आणि ती जागतिक स्तरावर मान्यताप्राप्त असावी आणि संरक्षित ठेवली जावी. भारताने विज्ञान, संस्कृती आणि कायद्याचा योग्य मेळ घालून यशस्वी लढा दिला आणि जगाला दाखवून दिले की भारतीय पारंपरिक ज्ञान मूल्यवान तर आहेच आहे पण वैज्ञानिकदृष्ट्याही सिद्ध देखील आहे. लेखक – अक्षय बनकर

मस्साजोग गावचे सरपंच संतोष देशमुख यांच्या हत्या प्रकरणातील मुख्य सूत्रधार असलेला आरोपी वाल्मिक कराड याच्याबाबत महत्त्वाची अपडेट समोर येत आहे. वाल्मिक कराड हा बीड मध्यवर्ती कारागृहात अटकेत आहे. सीआयडीकडे त्याच्या विरोधात सबळ पुरावे आहेत. त्यामुळे त्याचा मुक्काम पुढचे अनेक दिवस जेलमध्ये राहणार असल्याची शक्यता आहे. असं असताना त्याच्याबाबत एक महत्त्वाची अपडेट आहे. वाल्मिक कराड याला जेलमध्ये पॅनिक अटॅक आल्याची माहिती. त्याला पॅनिक अटॅक आल्याने डॉक्टरांनी त्याची तपासणी केली आहे. वाल्मिक कराड याला दुपारच्या सुमारास अस्वस्थ वाटू लागलं. त्याची प्रकृती बिघडली. त्यामुळे डॉक्टरांनी त्याची तपासणी केली. त्याची तपासणी केली असता त्याला पॅनिक अटॅक आल्याची माहिती डॉक्टरांनी दिली. डॉक्टरांनी त्याच्यावर उपचार केल्याची माहिती आहे. त्याची प्रकृती बिघडल्यानंतर साहजिकच डॉक्टरांकडून त्याला योग्य तो औषोधपचार दिला जाईल. वाल्मिक कराडच्या पॅनिक अटॅकच्या वृत्तावर कुणाकडून काही नवीन माहिती दिली जाते का? ते पाहणं आता महत्त्वाचं आहे.

Newsworldmarathi Sangali : श्री क्षेत्र खरसुंडी येथे सासणकाठी व पालखी सोहळा मोठ्या उत्सवात पार पडला. या सोहळ्यात संपूर्ण राज्यातून लाखो भक्तगण सहभागी झाले होते. संपूर्ण खरसुंडी नगरी गुलाबी मय वातावरणाने नटली होती. आजच्या सोहळ्यानिमित्त श्री सिद्धनाथ महाराजांच्या उत्सव मूर्तीची सदरेवरील पूजा अत्यंत भक्तिभावाने संपन्न झाली. उद्या, आज रथोत्सवाने यात्रेची सांगता झाली. या पवित्र स्थळी येताना मनाला एक वेगळीच ऊर्जा लाभते. लोककलांच्या गजरात, भक्तांच्या जयघोषात आणि अध्यात्मिक वातावरणात न्हालेलं हे देवस्थान हजारो भक्तांचं श्रद्धास्थान आहे. सदियोंची परंपरा लाभलेले हे पवित्र स्थान, श्री सिद्धनाथ महाराजांचे अत्यंत जागृत व प्रभावी देवस्थान मानले जाते. भक्तांच्या श्रद्धेने न्हालेल्या या भूमीत दरवर्षी सासनकाटी महोत्सव साजरा केला जातो, ज्यामध्ये लाखो भाविक भक्तगण सहभागी होतात. या महोत्सवात देवाच्या पालखीची मिरवणूक, सासनांची पूजा, वाद्यांच्या गजरात निघणारा उत्साह आणि भक्तीमय वातावरण हे सर्व मनाला भावून जाणारं असतं. हे मंदिर ११२५ मध्ये हिमदपंथी (हेमादपंथी) वास्तुशैलीत बांधले गेले आहे. काळ्या दगडांचा वापर करून मोर्टारशिवाय टेनॉन आणि मॉर्टिस जॉइंट्सने नट-गुंठणी करण्यात आलेली ही पद्धत त्या काळातील यदुवंशी राज्यातील सर्वोत्तम कलाप्रतिभेचे उद्घाटन करते. दक्षिण दिशेने समोरासमोर उभारलेला, पाच प्रमुख विभागांत (प्रवेशद्वार, नगारखाना, सभामंडप, गर्भगृह, प्रदक्षिणा मार्ग) विभाजलेला हा मंदीर १५० फूट उंच शिखर व सुवर्ण कलशाने सज्ज आहे.

Newsworldmarathi Pune: रेंजहिल्स रहिवासी सभा व रेंजहिल्स रहिवासी महिला सभा, शताब्दी बुद्धविहार, रेंजहिल्स, पुणे, या संस्थांच्या माध्यमातून गेली अनेक वर्षे बौद्ध धम्मानुसार अभिप्रेत आणि अत्यावश्यक असलेले श्रामणेर शिबीर, श्रद्धावान उपासकांच्या सक्रिय सहभागा मधून आयोजित करण्यात येते. यंदाचे १५ दिवसीय निवासी श्रामणेर शिबीर ४ मे ते १८ मे २०२५ दरम्यान आयोजित करण्यात आले आहे. या वर्षीच्या शिबिरामध्ये प्रत्येक विषयांमधील तज्ज्ञ व्यक्तींचे मार्गदर्शन या शिबिरार्थीना मिळणार आहे. या वर्षीच्या शिबिरामधील उत्कृष्ट श्रामणेर शिबिरार्थीना पारितोषिके देऊन पुरस्कृत करण्यात येणार आहे. प्रत्येक शिबिरार्थीना भारताचे संविधान, बुद्ध आणि त्यांचा धम्म, बुद्ध वंदना पुस्तिका…. इत्यादी पुस्तके अभ्यासासाठी मिळणार आहेत. आदरणीय भन्ते नागघोष, महाथेरो, पुणे, आदरणीय भन्ते संघदुता, अरुणाचल प्रदेश, आदरणीय भन्ते धम्मानंद, तक्षशिला विहार, पुणे हा भिक्खू संघ मार्गदर्शक असणार आहे. तसेच आधी झालेल्या श्रामणेर शिबिरामध्ये अभ्यास वर्ग घेणारे तज्ञ मार्गदर्शक / शिक्षक / अभ्यासक यंदाही विविध विषयांवर मार्गदर्शन करणार आहेत, यंदाच्या शिबिरांची सुरुवात ४ मे रोजी सायंकाळी ५.३० वा, शताब्दी बुद्ध विहार, रेजहिल्स येथे  प्रा. डॉ. वसंत चाबुकस्वार, प्रिन्सिपल नवरोसजी वाडिया कॉलेज, पुणे. प्रा. डॉ. विजय गायकवाड, व्हाईस प्रिन्सिपल मॉडर्न कॉलेज ऑफ आर्ट्स सायन्स कॉमर्स, पुणे.यांच्या प्रमुख उपस्थितीत होणार आहे. सहभागी होण्यासाठी  आयु. कलावंत पवार 7264862810– आयु. डि के माने 9860120462 आयु. राजाराम सोनावणे 9049039541 आयु. गौरीशंकर भोसले 9730693099 आयु. दादासाहेब थिवार 9850496459 आयु. विश्वनाथ मधाळे – 7620375119 आयुष्मती प्रभाताई सोनवणे 9881229413 यांच्याशी संपर्क साधावा असे आवाहन आयोजकांनी केले आहे.