News World Marathi© 2024 Newsworld मराठी बाह्य इंटरनेट साइट्सच्या सामग्रीसाठी आम्ही जबाबदार नाही. बाह्य लिंक्सबद्दल आम्हाल काय वाटतं? इथे वाचा. बाह्य लिंक्सबद्दल आम्हाल काय वाटतं? इथे वाचा.

Newsworldmarathi Pune: चक्रभेदी सोशल फाउंडेशन ही संस्था विधवा आणि एकल महिलांसाठी तसेच पर्यावरण विषयक कार्यासाठी प्रसिद्ध आहे. आतापर्यंत अनेक निराधार, एकल व विधवा महिलांशी संवाद साधून त्यांच्या अडीअडचणी समजून घेणे आणि त्यावर उपाय शोधण्याचे मोलाचे कार्य संस्था सातत्याने करत आहे. सध्या ‘मायेचं, हक्काचं घर’ हे केंद्र स्थापन करून महिलांना रोजगार उपलब्ध करून देण्याचे काम सुरू आहे. शिव्या मुक्त समाज अभियान, मोफत टी-स्टॉल वाटप, शेअरिंग-केअरिंगसारखे उपक्रम संस्थेच्या नावीन्यपूर्ण कार्याची साक्ष देतात. या सर्व प्रयत्नांचा उद्देश म्हणजे विधवा व एकल महिलांना समाजात मान-सन्मान प्राप्त करून देणे व त्यांना आर्थिकदृष्ट्या सक्षम बनवणे. या कार्यात अधिक बळ देण्यासाठी पुणे जिल्ह्यातील तळेगाव दाभाडे येथील रहिवासी मनीषा बागणीकर यांची जिल्हाध्यक्षपदी निवड करण्यात आली आहे. सिव्हिल इंजिनिअर असलेल्या मनीषा बागणीकर यांना सामाजिक कार्याचा समृद्ध अनुभव असून, त्यांच्या संवेदनशील दृष्टिकोन आणि कार्यशील वृत्तीमुळे त्यांची ही निवड करण्यात आली आहे. या प्रसंगी सारिका कांबळे, विशाखा कांबळे, मनोहर पगारे, दिग्विजय बागणीकर यांच्यासह साने गुरुजी प्राथमिक शाळेच्या मुख्याध्यापिका मीना काटे उपस्थित होत्या. महाराष्ट्रभरातून या निवडीचे कौतुक होत असून, मनीषा बागणीकर यांच्या नेतृत्वात चक्रभेदी सोशल फाउंडेशनच्या कार्यात निश्चितच अधिक बळ मिळणार असल्याचा विश्वास व्यक्त करण्यात येत आहे.

Newsworldmarathi Pune: उपमुख्यमंत्री अजित पवारांनी शिवराज्याभिषेक दिनानिमित्त सर्व जनतेला शुभेच्छा दिल्या आणि त्याच वेळी प्रशासकीय पारदर्शकतेसाठी महत्त्वाचे निर्णय घेतल्याची माहिती दिली. जिल्हा परिषदेच्या बांधकाम विभागातील अनियमितता लक्षात घेता एकच डॅशबोर्ड तयार करून नवी वेबसाईट विकसित करण्यात आली आहे. यामुळे बिले थांबणार नाहीत, असा विश्वास अजित पवारांनी व्यक्त केला. ते पुण्यात बोलत होते. अफवांना फाटा, स्पष्ट इशारा “मुख्यमंत्र्यांचं विधान अंतिम असतं. कोणीही चुकीचं वागलं तर कारवाई होणार, मग तो कोणताही जिल्हा असो,” असा स्पष्ट इशारा अजित पवारांनी दिला आहे. तसेच संजय शिरसाट मंत्री नसून आमदार आहेत, असं स्पष्ट करून त्यांनी गैरसमज दूर केला. महिलांवरील अत्याचार, राजकीय संवादावर भाष्य महिलांवरील अत्याचाराच्या बातम्यांवर पत्रकारांनी अधिकार पाळावा, असे त्यांनी नम्रतेने सांगितले. तसेच लक्ष्मण हाके आणि अमोल मिटकरी यांच्यातील संभाषणावर नाराजी व्यक्त करत, ‘सुसंस्कृत राजकारण’ हवे असल्याचे मत मांडले. निवृत्ती लाभ त्वरित देण्यासाठी स्वतंत्र डॅशबोर्ड अजित पवारांनी जाहीर केलं की, सरकारी कर्मचाऱ्यांच्या निवृत्तीच्या दिवशीच सर्व लाभ मिळावेत यासाठी सेवानिवृत्ती विभागात नवीन डॅशबोर्ड सुरू करण्यात आला आहे. जिल्हा परिषद सेवा व्हॉट्सॲपवर जिल्हा परिषदेच्या विविध सेवा आता WhatsApp चॅटबॉटवर उपलब्ध करण्यात आल्या आहेत. तसेच, अंगणवाडीसाठी खास ॲप तयार करण्यात आलं असून लाडक्या बहिणींना त्याचा फायदा होईल, असेही त्यांनी नमूद केले. तसेच ग्रामपंचायतीचा कर आता QR कोडच्या माध्यमातून घरबसल्या भरता येणार आहे. पुणे-मुंबईत बसूनही गावाकडील घराचा कर भरता येईल. शिक्षण प्रवेश प्रक्रियेबाबत लक्ष दहावीच्या निकालानंतर सुमारे १३ लाख विद्यार्थ्यांचे प्रवेश पूर्ण झाले आहेत. ग्रामीण भागातील तांत्रिक अडचणी लक्षात घेऊन मंत्री दादा भुसे यांच्याशी चर्चा करून उपाययोजना सुरू असल्याचं अजित पवारांनी सांगितलं. शस्त्र परवाने, मिठी नदी घोटाळा, वादग्रस्त परवाने रद्द अमिताभ गुप्ता प्रकरणात बीडमधील शस्त्र परवाने रद्द करण्यात आले असून पुणे आयुक्तांना चौकशीचे आदेश दिले आहेत. मिठी नदी घोटाळ्यावर तपास सुरु असून दोषींवर कारवाई होईल. जागावाटप आणि नुकसानभरपाई बाबत निर्णय स्थानिक स्वराज्य संस्थांतील जागावाटप महायुती एकत्र बसून ठरवणार असून, रामदास आठवले यांसारख्या मित्रपक्षांनाही सोबत घेण्याचा इशारा दिला. नुकसानीबाबत तात्काळ पंचनामे करून निधी मंजुरीसाठी प्रस्ताव पाठवण्याच्या सूचना दिल्या आहेत.

Newsworldmarathi Pune: राज्यात करोनाचा संसर्ग पुन्हा एकदा डोकं वर काढताना दिसतो आहे. गेल्या २४ तासांत ९८ नवे रुग्ण आढळून आले असून, त्यात मुंबई आणि पुणे महापालिका क्षेत्रात प्रत्येकी ३४ रुग्णांची नोंद झाली आहे. त्यामुळे दोन्ही शहरांमध्ये चिंता वाढली आहे. पिंपरी-चिंचवडमध्ये १०, तर पुणे ग्रामीण भागात ४ रुग्ण सापडले आहेत. आरोग्य विभागाच्या माहितीनुसार, राज्यात १ जानेवारी ते ५ जूनदरम्यान १४,५६५ संशयित रुग्णांची करोना चाचणी झाली असून, त्यातील १,१६२ जणांना संसर्ग झाल्याचे निदान झाले आहे. त्यात मुंबईतील सर्वाधिक ५७५ रुग्णांची नोंद झाली आहे. सध्या ५४८ रुग्ण उपचाराखाली, तर ५९७ रुग्णांनी करोनावर मात केली आहे. मृत्यूंचे प्रमाण कमी, पण सहव्याधी असणाऱ्यांना अधिक धोका या कालावधीत राज्यात १७ मृत्यूंची नोंद झाली असून, त्यातील १६ रुग्ण सहव्याधीग्रस्त होते. मृतांमध्ये मूत्रपिंडविकार, कर्करोग, फुफ्फुस विकार, ब्रेन स्ट्रोक, मधुमेह, क्षय अशा गंभीर आजारांचा समावेश होता. आरोग्य विभागाचा संदेश “सध्या रुग्णसंख्या कमी असली तरी लक्षणे सौम्य असूनदेखील दक्षता घेणे अत्यावश्यक आहे. रुग्णालयात दाखल होणाऱ्यांची संख्या कमी आहे,” अशी माहिती आरोग्य विभागाच्या सहसंचालिका डॉ. बबिता कमलापूरकर यांनी दिली.