News World Marathi© 2024 Newsworld मराठी बाह्य इंटरनेट साइट्सच्या सामग्रीसाठी आम्ही जबाबदार नाही. बाह्य लिंक्सबद्दल आम्हाल काय वाटतं? इथे वाचा. बाह्य लिंक्सबद्दल आम्हाल काय वाटतं? इथे वाचा.

Newsworldmarathi Pune : सतीश वाघ यांच्या हत्येप्रकरणात आणखी एक महत्त्वाचा खुलासा झाला आहे. पत्नी मोहिनी वाघ हिने सुरुवातीला फक्त पतीचे हातपाय तोडण्याची सुपारी दिली होती. मात्र, हल्लेखोरांना जेव्हा कळले की सतीश वाघ हे भाजप आमदार योगेश टिळेकर यांचे मामा आहेत, तेव्हा त्यांनी त्यांची हत्या करण्याचा निर्णय घेतला, असे तपासात समोर आले आहे. हत्येच्या या प्रकरणाचा तपास जसजसा पुढे जात आहे, तसतसे नवीन धक्कादायक तपशील उघड होत आहेत. सुरुवातीला हा खंडणीच्या वादातून घडलेला प्रकार असल्याचे समजले होते. मात्र, तपासादरम्यान मोहिनी वाघ व भाडेकरू अक्षय जावळकर यांचे प्रेमसंबंध असल्याचे उघड झाले. त्यानंतर मोहिनीने पतीचा छळ सहन न होऊन त्याच्या हातपाय तोडण्यासाठी सुपारी दिल्याचे मान्य केले. पण हल्लेखोरांनी सतीश वाघ यांचे आमदाराशी नाते असल्याचे समजताच, हा हल्ला हत्या करण्यापर्यंत नेला. त्यामुळे या प्रकरणाला आता राजकीय व गुन्हेगारी स्वरूप अधिक स्पष्टपणे मिळत आहे. पोलिस तपास अद्याप सुरू असून, हत्येच्या या कटात आणखी कोणाचा सहभाग आहे का, याचा शोध घेतला जात आहे. या प्रकरणामुळे राजकीय आणि सामाजिक वर्तुळात एकच खळबळ उडाली आहे. सुरुवातीला सतीश वाघ यांचे फक्त हात पाय तोडण्याची सुपारी देण्यात आली होती. मात्र मारेकऱ्यांना जेव्हा सतीश वाघ हे आमदार योगेश टिळेकर यांचे मामा आहेत असे समजले. त्यानंतर त्यांनी त्यांचा खून केला. सतीश वाघ हे पत्नीला मारहाण करत होते. तसेच घर खर्चासाठी पैसेही देत नव्हते. यावरून मोहिनी वाघ यांनी सतीश वाघ यांचा काटा काढण्याचा निर्णय घेतला

Newsworldmarathi Pune : सामाजिक क्षेत्रात योगदान देणाऱ्या रोटरी क्लबतर्फे शनिवार, दि. 4 जानेवारी आणि रविवार, दि. 5 जानेवारी 2025 रोजी पुण्यात पहिल्या रोटरी मराठी साहित्य संमेलनाचे आयोजन करण्यात आले आहे. उद्घाटन, समारोप समारंभासह साहित्यिक चर्चा, विविध विषयांवर परिसंवाद, मुलाखती, गप्पा, कविसंमेलन, प्रहसने, सांगीतिक कार्यक्रम तसेच संगीत नाटकाची मेजवानी पुणेकरांना मिळणार आहे. रोटरी व्होकेशनल एक्सलन्स ॲवॉर्ड प्रदान समारंभही लक्षवेधी ठरणार आहे. यशवंतराव चव्हाण नाट्यगृहात दोन दिवसीय संमेलन होणार असून संमेनलाच्या अध्यक्षपदी प्रसिद्ध कादंबरीकार विश्वास पाटील यांची निवड करण्यात आली आहे. केंद्र सरकारकडून मराठी भाषेला अभिजात भाषेचा दर्जा मिळाल्याचा आनंदोत्सव साजरा करण्याबरोबरच मराठी ही ज्ञानभाषा व्हावी, मराठी वाचन संस्कृतीचे जतन व्हावे, ती प्रवाहित राहावी या संकल्पनेतून पहिल्या रोटरी डिस्ट्रिक्ट मराठी साहित्य संमेलनाचे आयोजन करण्यात आले असल्याची माहिती रोटरी प्रांतपाल शितल शहा, संयोजन समिती कार्याध्यक्ष राजीव बर्वे, रोटरी क्लब ऑफ पुणे हेरिटेजचे अध्यक्ष सूर्यकांत वझे यांनी आज पत्रकार परिषदेत दिली. सावा हेल्थकेअरचे संचालक विनोद जाधव संमेलनाचे स्वागताध्यक्ष आहेत. रोटरी क्लब ऑफ पुणे हेरिटेज हे या मराठी साहित्य संमेलनाचे मुख्य यजमान असून पुण्यातील 15 रोटरी क्लब सहयजमान आहेत. पत्रकार परिषदेला डिस्ट्रिक्ट व्होकेशनल डायरेक्टर मधुमिता बर्वे, डिस्ट्रिक्ट सेक्रेटरी मोहन चौबळ यांची उपस्थिती होती. शनिवारी (दि. 4) सकाळी 9:15 वाजता ग्रंथदिंडी काढण्यात येणार असून यात रोटरियन्सचा सहभाग असणार आहे. सकाळी 9:50 वाजता पदन्यास कथक डान्स ॲकॅडमीच्या रेणुका केळकर-टिकारे आणि सहकारी गणेशवंदना सादर करणार आहेत. सकाळी 10 वाजता उद्घाटन समारंभ आयोजित करण्यात आला असून संमेलनाचे उद्घाटन प्रसिद्ध क्रिकेटपटू पद्मभूषण चंदू बोर्डे यांच्या हस्ते होणार आहे. खासदार प्रा. डॉ. मेधा कुलकर्णी, उच्च व तंत्रशिक्षण मंत्री चंद्रकांत पाटील, महापालिका आयुक्त राजेंद्र भोसले, महाराष्ट्र साहित्य परिषदेचे कार्याध्यक्ष प्रा. मिलिंद जोशी, नॅशनल बुक ट्रस्टचे विश्वस्त राजेश पांडे, नगरसेवक जयंत भावे, उपप्रांतपाल मोहन पालेशा, डि. लर्निंग जिल्हा प्रशिक्षक पंकज शहा, संतोष मराठे, नितीन ढमाले यांची प्रमुख उपस्थिती असणार आहे. उद्घाटन समारंभानंतर सकाळी 11:30 वाजता संमेलनाध्यक्ष विश्वास पाटील यांच्या मुलाखतीचा कार्यक्रम आयोजित करण्यात आला असून वैशाली वेर्णेकर, अभय जबडे हे विश्वास पाटील यांची मुलाखत घेणार आहेत. दुपारी 2:30 वाजता योगेश सोमण लिखित ‌‘ट्रेनिंग‌’ हे प्रहसन अविनाश ओगले आणि लीना गोगटे सादर करणार आहेत. दुपारी 2:45 वाजता ज्येष्ठ साहित्यिक शिवराज गोर्ले यांच्या अध्यक्षतेखाली ‌‘यशस्वी लेखनाची सूत्रे‌’ या विषयावर परिसंवाद आयोजित करण्यात आला असून यात ज्येष्ठ नाटककार श्रीनिवास भणगे, साहित्यिक वंदना बोकील-कुलकर्णी यांचा सहभाग असणार आहे. त्यांच्याशी राजेश दामले संवाद साधणार आहेत. दुपारी 4:15 वाजता संजय डोळे लिखित ‌‘मन:शांती‌’ हे प्रहसन राजेंद्र उत्तुरकर, सुनिता ओगले सादर करणार आहेत. वात्रटिकाकार रामदास फुटाणे यांच्या अध्यक्षतेखाली रोटरियन्सचा सहभाग असलेले निमंत्रितांचे कविसंमेलन सायंकाळी 4:30 वाजता आयोजित करण्यात आले असून यात अंकाजी पाटील, विजय पुराणिक, सुप्रिया जोगदेव, स्नेहल भट, ममता कोल्हटकर, डॉ. अश्विनी गणपुले, नीता केळकर, जयश्री कुबेर, डॉ. आनंदा कंक, राहुल लाळे, मुरलीधर रेमाणे, शशिकांत शिंदे, प्रदीप खेडकर, हर्षदा बावनकर, तनुजा खेर यांचा सहभाग आहे. संयोजन निनाद जोग करणार असून सूत्रसंचालन डॉ. अंजली कुलकर्णी करणार आहेत. रात्री 8:30 वाजता भरत नाट्य संशोधन मंदिराची निर्मिती असलेल्या पुरुषोत्तम दारव्हेकर लिखित आणि रवींद्र खरे दिग्दर्शित ‌‘संगीत कट्यार काळजात घुसली‌’ या नाटकाचा प्रयोग आयोजित करण्यात आला आहे. पं. जितेंद्र अभिषेकी यांचे संगीत असून अभय जबडे, रवींद्र खरे, अर्णव पुजारी, वज्रांग आफळे, विश्वास पांगारकर, निधी घारे, अनुष्का आपटे, ऋषिकेश बडवे आणि डॉ. चारुदत्त आफळे यांच्या भूमिका आहेत. राहुल गोळे, अथर्व आठल्ये, प्रज्ञा देसाई यांची साथसंगत असणार आहे. रविवारी (दि. 5) सकाळी 9:50 वाजता पदन्यास कथक डान्स ॲकॅडमीच्या रेणुका केळकर-टिकारे आणि सहकारी शिववंदना सादर करणार आहेत. सकाळी 10 वाजता प्रसिद्ध व्यंगचित्रकार शि. द. फडणीस यांचा रोटरी व्होकेशनल एक्सलन्स ॲवॉर्डने सन्मान करण्यात येणार असून पुरस्काराचे वितरण सुप्रसिद्ध कवी अशोक नायगावकर यांच्या हस्ते होणार आहे. सकाळी 11 वाजता अशोक नायगावकर यांच्या मुलाखतीचा कार्यक्रम होणार असून प्रा. मिलिंद जोशी त्यांच्याशी संवाद साधणार आहेत. दुपारी 2 वाजता सुप्रिया जोगदेव लिखित ‌‘ऑफिस ऑफिस‌’ हे प्रहसन शंतनु खुर्जेकर, अविनाश ओगले सादर करणार आहेत. माजी प्रांतपाल, ज्येष्ठ संगणकतज्ज्ञ दीपक शिकारपूर यांच्या अध्यक्षतेखाली ए. आय.चा साहित्यावर परिणाम होईल का? या विषयावर परिसंवाद आयोजित करण्यात आला असून यात प्रदीप निफाडकर, कुलदीप देशपांडे, महेश बोंद्रे, डॉ. आदित्य अभ्यंकर यांचा सहभाग असणार आहे. दुपारी 3:45 वाजता संजय डोळे लिखित ‌‘आगलावे वि. पेटवे‌’ हे प्रहसन संजय डोळे, पूजा गिरी, राजेंद्र उत्तुरकर, मधुर डोलारे सादर करणार आहेत. दुपारी 4 वाजता ‌‘अमृतसंचय‌’ हा ग. दि. माडगूळकर यांच्या गीतांवर आधारित सांगीतिक कार्यक्रम आयोजित करण्यात आला असून मुग्धा ढोले, आसावरी गोडबोले, दीपक महाजन, श्रीकांत बेडेकर गीते सादर करणार आहेत. अनिल गोडे, मिलिंद गुणे, मिहिर भडकमकर, सचिन वाघमारे, स्वयम्‌‍ सोनावणे, रोहित साने साथसंगत करणार आहेत. संयोजन मनिषा अधिकारी यांचे असून निवेदन स्नेहल दामले करणार आहेत. सायंकाळी 5:30 वाजता प्रसिद्ध राजकीय विश्लेषक भाऊ तोरसेकर आणि ‌‘असत्यमेव जयते‌’चे लेखक अभिजित जोग यांच्या समवेत मनमोकळ्या गप्पांचा कार्यक्रम आयोजित करण्यात आला असून या प्रसंगी सहकार आणि नागरी विमान वाहतूक केंद्रीय राज्यमंत्री मुरलीधर मोहोळ यांची उपस्थिती असणार आहे. त्यानंतर संमेलनाध्यक्ष विश्वास पाटील आणि प्रांतपाल शितल शहा, सूर्यकांत वझे यांच्या प्रमुख उपस्थितीत समारोप समारंभ आयोजित करण्यात आला आहे.

Newsworldmarathi Pune : डेक्कन एज्युकेशन सोसायटीच्या न्यू इंग्लिश स्कूल रमणबाग प्रशालेमध्ये वार्षिक स्नेहसंमेलन मोठ्या जल्लोषात साजरे करण्यात आले.प्रशालेतील ज्येष्ठ शिक्षक महेश जोशी यांनी संमेलनाचे कार्याध्यक्ष व राजेंद्र पवार यांनी उपकार्याध्यक्ष म्हणून कार्य पाहिले. प्रशालेचे माजी विद्यार्थी सुप्रसिद्ध सिनेनाट्य अभिनेते विजय मिश्रा प्रमुख अतिथी म्हणून उपस्थित होते. शालासमिती अध्यक्ष डॉ.शरद अगरखेडकर व प्रशालेच्या मुख्याध्यापक चारुता प्रभुदेसाई यांच्या संकल्पनेतून कृष्णायन या महानाट्याची निर्मिती करण्यात आली. प्रशालेतील ४०० विद्यार्थ्यांचा सहभाग असलेल्या कृष्णायन महानाट्याचे दिग्दर्शन व संकलन प्रशालेतील रंगकर्मी शिक्षक रवींद्र सातपुते यांनी केले तर अतिभव्य नेपथ्य उपमुख्याध्यापक जयंत टोले यांनी केले. विद्यार्थ्यांनी भूमिकेशी समरस होऊन कृष्ण,बलराम,सुदामा कंस, पुतना राक्षसी,नंद, यशोदा, देवकी,वसुदेव इत्यादी पात्रे हुबेहूब साकारली.कृष्णजन्म,पुतना वध,कालिया मर्दन, गोवर्धनोदधरण, रासलीला,विश्वरूपदर्शन अशा कृष्ण जीवनातील अनेक रोमहर्षक प्रसंगांचे भव्य नाट्य सादरीकरण पाहून प्रेक्षकांच्या डोळ्यांचे पारणे फिटले.अतिभव्य उत्कृष्ट नेपथ्य, रंगभूषा,वेशभूषा,प्रकाश योजना यांचा सर्वोत्तम मेळ नाटकास परमोच्च उंचीवर घेऊन गेला. या सोहळ्याचे प्रत्यक्षदर्शी साक्षीदार नाट्य अभिनेते विजय मिश्रा यांनी मी रमणबाग शाळेचा माजी विद्यार्थी असल्याचा मला अभिमान आहे.शाळेतील ४०० बालकराकारांनी सादर केलेला उत्कृष्ट नाट्यविष्कार पाहून अंगावर अक्षरशः रोमांच उभे राहिले. कौतुक करण्यास शब्द अपुरे असून असा नाट्यविष्कार शालेय स्तरावर आजतागायत पाहण्यात आला नसल्याचे गौरव उद्गार काढले. कृष्णायन या समूह नाट्यातील बालकलाकारांचे कौतुक करण्यासाठी प्रशालेचे वित्त नियंत्रक डॉ.विनयकुमार आचार्य, डॉ. शलाका अगरखेडकर उपस्थित होते. कार्यक्रमाचे सूत्रसंचालन दिपाली चौगुले यांनी केले तर पर्यवेक्षक मंजुषा शेलुकर वअंजली गोरे यांनी मानले. शिक्षक-शिक्षकेतर विद्यार्थी व पालक यांनी कार्यक्रमाचा आनंद घेतला.

Newsworldmarathi Pune : “आद्यक्रांतिगुरू लहुजी वस्ताद साळवे यांनी ‘जगेल तर देशासाठी आणि मरेल तर देशासाठी’ अशी शपथ घेऊन आयुष्यभर स्वातंत्र्यचळवळीत योगदान दिले. जातीपातीच्या भिंती तोडून देशभक्त क्रांतिकारकांची फळी त्यांनी घडवली. लहुजी साळवे खऱ्या अर्थाने समतेचे पुरस्कर्ते होते. जातीयवादाचे विष पेरणाऱ्या समाजकंटकांना त्यांचे समतेचे विचार कळले नाहीत. लहुजींचा समता-बंधुतेचा विचार समाजाला प्रेरणादायी आहे,” असे प्रतिपादन माजी गृहराज्यमंत्री रमेश बागवे यांनी व्यक्त केले. वस्तादांप्रमाणे शरीर बळकट करून अन्यायाविरुद्ध लढा दिला पाहिजे, असेही त्यांनी नमूद केले. लहुजी समता परिषद आणि गुलमोहर वर्ल्ड फाऊंडेशन यांच्या संयुक्त विद्यमाने ‘आद्यक्रांतिगुरू लहुजी वस्ताद साळवे युवाप्रेरणा पुरस्कार’ रुग्ण हक्क परिषदेचे संस्थापक अध्यक्ष उमेश चव्हाण बागवे यांच्या हस्ते प्रदान करण्यात आला. महात्मा फुले पगडी, उपरणे, सन्मान चिन्ह आणि ग्रंथ असे पुरस्काराचे स्वरूप होते. महाराष्ट्र साहित्य परिषदेच्या सभागृहात झालेल्या कार्यक्रमात मुख्य संयोजक अनिल हातागळे, आंबेडकरी नेते अंकल सोनवणे, लहुजी शक्ती सेनेचे अध्यक्ष विष्णू कसबे, लहुजी स्मारक समितीचे अध्यक्ष विजय डाकले, शिव उद्योग सेनेचे अध्यक्ष हर्षद निगिनहाळ, माजी पोलीस अधिकारी मिलिंद गायकवाड, उद्योजक भारत देसडला, राजाभाऊ कदम, संजय अल्हाट आदी उपस्थित होते. उमेश चव्हाण म्हणाले, “भारतीय संविधानाने प्रत्येक जाती-धर्माच्या व्यक्तीला दर्जेदार उपचार घेण्याचा अधिकार दिलेला आहे. रुग्ण हक्क परिषदेचे काम करताना आम्ही समतेचा विचार अंगीकारून रुग्णांना त्यांचे हक्क मिळवून दिले. आज ८८ टक्के लोकांना वैद्यकीय उपचारांचा खर्च १० लाखाच्या वर येतो, हे दुर्दैवी आहे. ही परिस्थिती बदलण्यासाठी रुग्ण हक्क परिषद कार्यरत असून, यात माझ्या सर्व सहकाऱ्यांचे योगदान मोलाचे आहे. हा सन्मान सर्व सहकाऱ्यांचा आहे.” अनिल हातागळे यांनी अध्यक्षीय मनोगत व्यक्त केले. जयश्री हातागळे यांनी स्वागत-प्रास्ताविक केले. दीपक मस्के यांनी सूत्रसंचालन केले. रामभाऊ कसबे यांनी आभार मानले.

Newsworldmarathi Pune : ज्येष्ठ पत्रकार, पुणे श्रमिक पत्रकार संघ व पुणे पत्रकार प्रतिष्ठानचे माजी अध्यक्ष, सावित्रीबाई फुले पुणे विद्यापीठाच्या संज्ञापन व वृत्तपत्रविद्या विभागाचे (रानडे) निवृत्त विभागप्रमुख डॅा. किरण ठाकूर (वय ७७) यांचे आज सकाळी अल्पशा आजाराने निधन झाले. त्यांच्या मागे पत्नी, दोन मुलगे, सुना व नातवंडे असा परिवार आहे. नर्मदालयाच्या संस्थापक भारतीताई ठाकूर या त्यांच्या भगिनी होत. गेल्या आठवडाभरापासून डॉ. ठाकूर आजारी होते. थकवा जाणवत असल्याने त्यांना येथील एका खाजगी रुग्णालयात दाखल करण्यात आले होते. तेथेच आज सकाळी त्यांची प्राणज्योत मालवली. एमआयटी महाविद्यालयाचे प्राध्यापक नचिकेत ठाकूर व दूरचित्र वाहिन्यांवरील मालिकांचे निर्माते पार्थ हे त्यांचे पुत्र होत. डॅा. ठाकूर यांच्या इच्छेनुसार त्यांचे देहदान करण्यात आले. डॉ. ठाकूर यांनी तीन दशकांहून अधिक काळ पत्रकारिता केली. पुणे डेलीमध्ये उपसंपादक आणि युनायटेड न्यूज ऑफ इंडिया (यूएनआय) या वृत्तसंस्थेचे प्रतिनिधी म्हणून त्यांनी काम पाहिले. इंडियन पोस्ट आणि द ऑब्झर्वर ऑफ बिझनेस अँड पॉलिटिक्स या नियतकालिकांसाठीही त्यांनी काम केले. डॉ. ठाकूर यांनी २००१ मध्ये अध्यापनाच्या क्षेत्रात प्रवेश केला. सावित्रीबाई फुले पुणे विद्यापीठाच्या संज्ञापन व वृत्तपत्रविद्या विभागात ते प्राध्यापक म्हणून रुजू झाले. २००१ ते २००७ या काळात विभागाच्या प्रगतीसाठी त्यांनी अनेक उपक्रम हाती घेतले आणि नव्या संशोधनांना चालना दिली. डॉ. ठाकूर यांनी भारतातील वृत्तपत्रांच्या वेब आवृत्त्या या विषयावर पीएचडी संशोधन केले. अनेक शोधनिबंधांबरोबरच न्यूजपेपर इंग्लिश, हँडबुक ऑन प्रिंट जर्नालिझम आदी पुस्तकांचे लेखनही त्यांनी केले. विद्यापीठातून निवृत्त झाल्यानंतर डॉ. ठाकूर यांनी अहमदाबाद येथील मुद्रा इन्स्टिट्यूट ऑफ कम्युनिकेशन अँड रिसर्च, तसेच फ्लेम आणि विश्वकर्मा विद्यापीठांमध्ये मानद प्राध्यापक म्हणून काम पाहिले. भारतीय विद्याभवनच्या नानासाहेब परुळेकर पत्रकारिता विभागाचे कामही त्यांनी काही काळ केले.

Newsworldmarathi pune : शाकीर खान यांचे पहिल्या झंकारापासूनच मंत्रमुग्ध करणारे सतार वादन आणि भुवनेश कोमकली यांचे भारदस्त, सुरेल गायन ऐकून पुणेकर रसिकांची सायंकाळ स्वरमय झाली. निमित्त होते ते कै. अरविंद देशपांडे यांच्या स्मृतिप्रित्यर्थ आयोजित स्वरगंध या सांगीतिक मैफलीचे. भारतीय अभिजात शास्त्रीय संगीताची आवड जोपासणऱ्या कै. अरविंद देशपांडे यांच्या स्मृतीस अभिवादन करण्यासाठी त्यांचे चिरंजीव मंदार देशपांडे व केदार देशपांडे यांनी या मैफलीचे आयोजन केले होते. मैफल एमईएसचे बालशिक्षण मंदिर सभागृहात झाली. मैफलीची सुरुवात शाकीर खान यांच्या सुमधुर सतार वादनाने झाली. त्यांनी चारुकेशी रागातील बारकावे आपल्या नजाकतदार वादनाने उलगडून दाखविताना सतार या वाद्यावरील आपली पकड, अतिशय वेगाने चालणारी बोटे त्यातून निर्माण होणारे सतारीचे झंकार अशा प्रभावी सादरीकरणाने रसिकांना विस्मयचकीत केले. शाकिर खान यांच्या जादुई बोटातून उमटलेल्या या रागाने संपूणे वातावरण भारित झाले होते. त्यानंतर शाकिर खान यांनी राग पिलू अमधील रचना सादर केली. खान यांना अमित कवठेकर यांनी परिपूर्ण व समर्पक तबला साथ केली. उमंग ताडफळे यांनी तानपुरा साथ केली. कार्यक्रमाच्या दुसऱ्या सत्रात सुप्रसिद्ध गायक भुवनेश कोमकली यांनी गायनाची सुरुवात राग शुद्ध कल्याणमधील बडाख्यालातील ‌‘ बोलन लागी‌’ या पारंपरिक बंदिशीने केली. याला जोडून छोटाख्याल सादर करताना आपले आजोबा व ख्यातनाम गायक पं. कुमार गंधर्व यांची ‌‘ये मोरा रे मोरा‌’ ही बंदिश ऐकविली. सुरांवरील पकड, तंत्रशुद्ध-स्पष्ट गायन, दमदार ताना हे गायन प्रभुत्व ऐकून रसिकांनी कोमकली यांना खुली दाद दिली. ‌ ‘दिल दा मालक साई‌’ ही पारंपरिक बंदिश तसेच ‌‘रूप धरे‌’ ही कुमार गंधर्व रचित बंदिश सादर करताना कोमकली यांनी आजोबांच्या गायन वैशिष्ट्याची छाप रसिकांच्या मनावर सोडली. रसिक श्रोते व साथसंगतकारांच्या आग्रहपूर्वक विनंतीला मान देऊन भुवनेश कोमकली यांनी राग सोहनी मधील ‌‘ये द्रुम द्रुम लता‌’ ही सुंदर रचना मोठ्या आवडीने ऐकविली. रसिक श्रोते कोमकली यांच्या गायनाने इतके प्रभावित झाले की कोणीही मैफल सोडून जायला तयार नव्हते. रसिकांच्या या असीम प्रेमामुळे कोमकली देखील भावविभोर झाले. कोमकली यांना सुयोग कुंडलकर (संवादिनी), संजय देशपांडे (तबला) यांनी दमदार साथ केली. कलाकारांचा सत्कार कै. अरविंद देशपांडे यांच्या पत्नी अनुराधा देशपांडे व पुतण्या हेमंत देशपांडे यांनी केला. प्रास्ताविकात मंदार देशपांडे यांनी कार्यक्रमाच्या आयोजनामागील भूमिका विशद करून मान्यवरांचे स्वागत केले. सूत्रसंचालन व कलाकार परिचय आरती पटवर्धन यांनी करून दिला.

Newsworldmarathi Pune : पुण्यातील सतीश वाघ हत्याकांड प्रकरणाने राज्यभर खळबळ उडवली आहे. या प्रकरणात आरोपी मोहिनी वाघने तिच्या पतीच्या अनैतिक संबंधांमुळे आणि तिच्यावर होत असलेल्या शारीरिक व मानसिक छळामुळे खुनाचा कट रचल्याचे पोलिस चौकशीत कबूल केले आहे. सतीश वाघ, जो मांजरी येथील शेतकरी व हॉटेल व्यावसायिक होता, याचा ९ डिसेंबर रोजी त्याच्या भाडेकरू अक्षय जावळकर याने सुपारी देऊन खून केला. पोलिस तपासादरम्यान मोहिनी वाघ व अक्षय जावळकर यांच्यात व्हॉट्सअ‍ॅप चॅटिंग सुरू असल्याचा पुरावा मिळाला, ज्यामुळे प्रकरणाचा तपास आणखी गडद झाला. चौकशीदरम्यान मोहिनी वाघने तिच्या व अक्षय जावळकरच्या संबंधांची कबुली दिली आणि पतीचा खून करण्यासाठी तिने अक्षयला सांगितल्याचे मान्य केले. या घटनेमुळे मोहिनी वाघला अटक करण्यात आली आहे. या प्रकरणाने पुण्यात आणि राज्यात एकच खळबळ उडवली आहे. या घटनेने वैवाहिक तणाव, नैतिकतेचे प्रश्न, आणि गुन्हेगारी प्रवृत्तीचे दुष्परिणाम या मुद्द्यांवर समाजाला विचार करण्यास भाग पाडले आहे. पोलिस तपास अद्याप सुरू असून, या प्रकरणातील इतर कोणतेही तपशील पुढे येण्याची शक्यता आहे.

Newsworldmarathi Pune : मलेशिया मध्ये मलाका येथे पार पडलेल्या मलेशिया चॅम्पियनशिप रॅलीमध्ये भारताचे प्रतिनिधित्व करणाऱ्या पुण्याच्या निकिता टकले खडसरे या युवतीने चॅम्पियनशिप रॅलीचे प्रथम पारितोषिक पटकावले. तब्बल साडेतीनशेहून अधिक रॅलीमध्ये सहभाग नोंदविलेल्या मुसा शरीफ निकिताचा सहचालक होता. राष्ट्रीय स्तरावर अनेक पारितोषिके मिळविलेली निकिता आंतरराष्ट्रीय पातळीवर पदार्पणात चॅम्पियनशिप मिळवणारी पहिली युवती ठरली. स्पर्धेच्या चार विभागात निकिताने ट्रॉफी मिळविली आहे. एम.आय.आर.सी रॅली ऑफ आशान, मलेशिया मध्ये मलाका येथे आयोजित चॅम्पियनशिप रॅलीमध्ये भारत, मलेशिया, इंडोनेशिया, चायना देशातील सुमारे 22स्पर्धक सहभागी झाले होते. राज्यस्तरीय, राष्ट्रीय, पातळीवर स्पर्धेत अनेक वेळा भाग घेतला, आंतरराष्ट्रीय स्तरावर खेळताना अनेक अडचनींना निकिताला सामोरे जावे लागले, त्यात भाषा, तंत्रज्ञान, नियमावली या सर्व गोष्टींना तोंड द्यावे लागले, रॅली सूरु झाल्यावर पहिल्याच स्टेजमध्ये एक किलोमीटरला इलेक्ट्रिक समस्या झाली, कार दुरुस्त केली पुन्हा रॅलीत सहभागी होऊन पूर्ण केली, यामध्ये नऊ स्टेजमध्ये जास्त गुण मिळवून निकिताने सर्व समस्यांवर मात करत चॅम्पियनशिप ट्रॉफी पटकाविली, सुमारे 365 रॅली त्यातील 86 आंतरराष्ट्रीय रॅलीत सहभाग असल्याने सहचालक मुसा शरीफ यांच्या अनुभवाचा खूप फायदा झाल्याचे निकिता आवर्जून सांगते. दोन दिवसीय रॅलीमध्ये पाऊस असल्याने खूप उष्ण वातावरण निर्माण झाले होते, उष्माघात चा त्रास अनेकांना सहन करावा लागला, वातावरण रॅलीसाठी उपयुक्त नव्हते, अशा परिस्थिती मध्ये नवखी आणि प्रथमच आंतरराष्ट्रीय स्तरावर सहभागी झालेल्या निकिताने यश मिळविले, मलेशिया चॅम्पियनशिप रॅली ही आंतरराष्ट्रीय पातळीवरील अवघड रॅली मानली जाते, या रॅलीत सहभागी स्पर्धक जगातील कुठल्याही रॅलीत चांगल्या पद्धतीने सहभागी होऊ शकतात, त्यामुळे या रॅलीला अधिक महत्व आहे. पामच्या झाडांमधून कार चालविताना फार सावध भूमिका घेत सहचालक मुसा शरीफ यांच्या सहकार्याने निकिता टकले खडसरेने चॅम्पियनशिप रॅलीत भारताचा झेंडा फडकविला. आंतरराष्ट्रीय स्तरावर पदार्पणात चॅम्पियनशिप मिळविणारी निकिता पहिली स्पर्धक ठरली आहे. आजवर आंतरराष्ट्रीय स्तरावर भारताचे प्रतिनिधीत्व केलेले संजय टकले, गौरव गिल, अरोर अर्जुन राव, कर्णाकदूर यांच्या रांगेत बसण्याचा मान निकिता टकले खडसरेने मिळविला आहे. राष्ट्रीय स्तरावर अनेक रॅली जिंकल्या आंतरराष्ट्रीय स्पर्धेत वडील उद्योजक नितीन टकले, आई राजश्री यांचा मोलाचा वाटा असल्याचे निकिता आवर्जून सांगते. तसेच आंतरराष्ट्रीय डब्ल्यू आर सी रॅली जिंकण्याचा मानस तिने बोलताना व्यक्त केला

Newsworldmartahi pune : भवानी पेठ परिसरामध्ये अनेक विकास कामे नगरसेविका अर्चना पाटील यांनी त्वरित मार्गी लावली आणि भवानी पेठेचा कायापालट केला. आणि नागरिकांचे प्रश्न मार्गी लावण्याचे कामही त्यांनी केले असे गौरव उद्गार खासदार मुरलीधर मोहोळ यांनी काढले. भारतीय जनता पार्टी पुणे शहर महिला आघाडीच्या मा. अध्यक्षा व मा. नगरसेविका अर्चना तुषार पाटील यांच्या कार्याचा आढावा घेणाऱ्या विशेष कॅलेंडरचे प्रकाशन पुण्यनगरीचे लाडके खासदार व केंद्रीय मंत्री मुरलीधर अण्णा मोहोळ यांच्या हस्ते झाले. यावेळी ते बोलत होते. हे विशेष कॅलेंडर लवकरच भवानीपेठ परिसरात वितरित केले जाणार असल्याची माहिती भारतीय जनता पार्टी पुणे शहर उपाध्यक्ष तुषार पाटील यांनी दिली. यावेळी भारतीय जनता पार्टी पुणे शहर उपाध्यक्ष तुषार पाटील, डॉ. अमोल देवळेकर, सुमित नेमजादे, सतीश साठे, व युवराज आडसुळ आणि नागरिक मोठ्या संख्येने उपस्थित होते.

Newsworldmarathi Pune : पेरणे (ता. हवेली) पेरणे येथे विजयस्तंभ अभिवादन कार्यक्रमासाठी दरवर्षी १ जानेवारी रोजी मोठ्या प्रमाणावर अनुयायी येत असतात. अभिवादन कार्यक्रमानिमित्त पुणे-अहिल्यानगर महामार्ग क्र.६० वर वाहतूक कोंडी होऊ नये यासाठी ३१ डिसेंबर २०२४ रोजी सायं. ५ वा. पासून ते १ जानेवारी २०२५ रोजी रात्री १२:०० वा. पर्यंत दोन्ही बाजूकडील वाहतुकीत तात्पुरत्या स्वरुपात बदलाचे आदेश प्रभारी जिल्हादंडाधिकारी संतोष पाटील यांनी जारी केले आहेत. याअंतर्गत चाकण ते शिक्रापूर व शिक्रापूर ते चाकण अशी दोन्ही बाजूकडील जाणारी-येणारी सर्व प्रकारची वाहतूक पूर्णपणे बंद करण्यात येणार आहे. अहिल्यानगर कडून पुणे-मुंबईकडे येणारी जड वाहने ही शिरुर, न्हावरा फाटा, न्हावरा, पारगाव, चौफुला, यवत, हडपसर या मार्गे पुण्याकडे जातील. पुण्याहून अहिल्यानगरकडे जाणारी जड वाहने खराडी बाह्यवळण येथून हडपसरवरुन पुणे-सोलापूर महामार्गाने चौफुला, केडगाव मार्गे न्हावरा, शिरुर-अहिल्यानगर मार्ग अशी वळविण्यात येतील. तसेच सोलापूर महामार्गावरुन आळंदी, चाकण या भागात जाणारी जड वाहने, ट्रक, टेम्पो आदी माल वाहतूक हडपसर, मगरपट्टा, खराडी बाह्यवळणमार्गे विश्रांतवाडीहून आळंदी व चाकण येथे जातील. मुंबईहून अहिल्यानगरकडे जाणारी जड वाहने, ट्रक, टेम्पो आदी माल वाहतूक वडगाव मावळ, चाकण, खेड, मंचर, नारायणगाव, आळेफाटामार्गे अहिल्यानगरकडे जातील. मुंबईहून अहिल्यानगरकडे जाणारी कार, जीप आदी हलकी वाहने वडगाव मावळ, चाकण, खेड, पाबळ, शिरुर मार्गे अहिल्यानगरकडे जातील, असेही आदेशात नमूद करण्यात आले आहे.

Newsworldmarathi Pune : पुरंदर तालुक्यातील जेजुरी येथे ३० डिसेंबर रोजी श्री खंडोबा देवाच्या सोमवती यात्रेच्या अनुषंगाने वाहतूक कोंडी होऊ नये तसेच कायदा व सुव्यवस्था अबाधित राहावी म्हणून वाहतुकीत बदल करण्यात आल्याचे आदेश प्र. जिल्हाधिकारी तथा जिल्हादंडाधिकारी संतोष पाटील यांनी जारी केले आहेत. वाहतूक कोंडी होऊ नये म्हणून ३० डिसेंबर रोजी पहाटे ५ वाजेपासून ते रात्री १२ वाजेपर्यंत सोमवती अमावस्या यात्रेकरीता येणारी हलकी व इतर वाहने वगळून जड-अवजड वाहतूक बंद करुन अन्य पर्यायी मार्गाने वळविण्यात येणार आहे. जेजुरी पोलीस स्टेशन, पुणे ग्रामीण हद्दीतील वाहतूक बदल: सातारा, फलटण, लोणंद, बारामती येथून पुणे येथे जाण्याकरीता जेजुरी-सासवडकडे येणारी वाहनांची वाहतूक पूर्णपणे बंद करुन त्यावरील वाहने नीरा- मोरगाव- सुपा ते केडगाव चौफुला मार्गे सोलापूर महामार्गाने पुणेकडे वळविण्यात येत आहे. पुण्याकडून बारामतीकडे येणारी वाहतूक बेलसर- कोथळे- नाझरे- सुपे- मोरगाव रोड मार्गे बारामती किंवा फलटण या मार्गे वळविण्यात येत आहे. सुपा पोलीस स्टेशन, पुणे ग्रामीण हद्दीतील वाहतूक बदल: बारामती व नीरा बाजूकडून जेजुरी मार्गे पुणे बाजूकडे जाणारी वाहनांची वाहतूक बंद करुन ती मोरगाव-सुपा-केडगाव चौफुला मार्गे सोलापूर महामार्गाने पुणेकडे वळविण्यात येत आहे. सासवड पोलीस स्टेशन, पुणे ग्रामीण हद्दीतील वाहतूक बदल: पुणे बाजूकडून जेजुरी मार्गे फलटण-सातारा बाजुकडे जाणारी वाहनांची वाहतूक पुर्णपणे बंद करुन सासवड- नारायणपूर-कापूरहोळ मार्गे सातारा-फलटण किंवा सासवड-वीर फाटा-परींचे-वीर-वाठार मार्गे लोणंद या मार्गे वळविण्यात येत आहे. वाहतुकीस लावलेले निर्बंध ३० डिसेंबर रोजीच्या ‘श्री खंडोबा देवाची सोमवती यात्रे’करीता येणाऱ्या हलक्या वाहनांसाठी शिथील राहतील. नागरिकांनी वाहतूकीत केलेल्या बदलाची नोंद घेवून सहकार्य करावे, असे आवाहनही करण्यात आले आहे.

Newsworldmarathi Pune : एक जानेवारी रोजी होणारा भीमाकोरेगाव विजयस्तंभ शौर्य दिन अभिवादन सोहळा अतिशय शांततेत व सौंदार्हपूर्ण वातावरणात पार पडणार असून नागरिकांनी कोणत्याही अफवांवर विश्वास ठेवू नये तसेच सामाजिक तेढ निर्माण करणाऱ्या सोशल मीडिया हँडलवर कठोर कारवाई करण्यात येत आहे. अशी माहिती पुणे पोलीस आयुक्त अमितेश कुमार यांनी आंबेडकरी पक्ष संघटनांच्या संयुक्त बैठकीत दिली. भीमा कोरेगाव शौर्यदिन कार्यक्रम अनुषंगाने आज पुणे शहरातील विविध पक्ष संघटनांमध्ये कार्यरत असलेल्या प्रमुख प्रतिनिधींनी पोलीस आयुक्तांची भेट घेऊन सविस्तर चर्चा केली. यावेळी परभणी व अन्य कोणत्याही ठिकाणच्या घटनांचा तणाव उत्सवाच्या अनुषंगाने नाही. हा उत्सव आंबेडकरी जनता अभिवादनासाठी करत आहे त्यामुळे पोलिसांनी सर्वतोपरी सहकार्य करावी अशी अपेक्षा शिष्टमंडळातील प्रतिनिधींनी केली. ” भीमा कोरेगाव शौर्यदिन अभिवादन सोहळा हा अत्यंत महत्त्वपूर्ण पण तितकाच संवेदनशील कार्यक्रम असला तरी आता या उत्सवात सर्व नागरिकांचे , स्थानिकांचे सहकार्य असल्याने कायदा सुव्यवस्थेचा कोणताही तणाव नाही तसेच सदर उत्सवात सहभागी होणाऱ्या अनुयायांना सुरक्षिततेचे वातावरण निर्माण करून देणे व अभिवादन सोहळा शांततेत पार पाडणे याला आम्ही प्रथम प्राधान्य दिलेले आहे. मागील वर्षी उत्सवामध्ये घडलेल्या चैन चोरीच्या घटनांची गांभीर्याने दखल घेऊन अशा प्रकारच्या घटना घडणार नाहीत याबाबतच्या खबरदारी घेण्याची व त्यासाठी विशेष पथके तयार करण्याच्या सुचना दिल्या आहेत. समाज माध्यमांवर चितावणीखोर व द्वेष मूलक कमेंट करणाऱ्या समाजकंटकांवर कठोर कायदेशीर कारवाई करण्याची सूचना सायबर सेल ला दिलेले आहेत व यासाठी विशेष अधिकाऱ्यांची नियुक्ती करण्यात आलेली आहे. नागरिकांनी कोणत्याही अफवांवर विश्वास न ठेवता शांततेत अभिवादन करावे. असे आवाहन यावेळी पोलीस आयुक्त अमितेश कुमार यांनी केले. सदर बैठकीस समन्वय समितीचे अध्यक्ष सदर बैठकीला राहुल डंबाळे , डॉ. सिद्धार्थ धेंडे ,परशुराम वाडेकर , ॲड. अरविंद तायडे, बाळासाहेब जानराव , सुनीताताई वाडेकर , सुवर्णाताई डंबाळे , बापूसाहेब भोसले , यशवंत नडघम, मिलिंद आहिरे , साईनाथ वाळके पाटील आणि आदी मान्यवर उपस्थित होते

Newsworldmarathi Pune : राष्ट्र सेवा दल संचलित शिक्षण प्रशासक मंडळाची साने गुरुजी प्राथमिक शाळेचे वार्षिक स्नेहसंमेलन नुकतेच संपन्न झाले.स्नेहसंमेलनाचा विषय भारतीय संविधान होता. दरवर्षी एक विषय घेऊन स्नेहसंमेलनासाठी कार्यक्रम बसवले जातात. समाजात संविधानातील मूलभूत तत्वांची रुजवणूक व्हावी, संविधानाच्या कलमांआधारे देशाचा कारभार चालतो. आपली हक्क आणि कर्तव्य यांची जाणीव झाली तरच आदर्श भारताचे स्वप्न आपणास पाहता येईल. बाबासाहेब आंबेडकर, साने गुरुजी, महात्मा गांधींना अभिप्रेत भारत हवा असेल तर संविधान आधी समजून घेतले पाहिजे या उद्देशाने हा विषय ठेवण्यात आला. शासनानेही संविधान वर्ष उपक्रम जाहीर करत संविधान आधारित उपक्रम घेण्यास सुचवले आहे. त्यानुसार विविध नृत्य,नाटीका, मूकनाट्य, समूहगीत, संविधान उद्देशिका नृत्य बसवले गेले.

कार्यक्रमाला प्रमुख पाहुणे म्हणून आप्पी आमची कलेक्टर फेम प्रसिद्ध अभिनेत्री पुष्पा चौधरी,संस्थेचे सचिव शिवाजी खांडेकर, संचालक अलकाताई काळे, संचालक प्रा भगवान कोकणे, संचालक तुषार शिंदे, ॲड संपत कांबळे,प्राचार्या वृंदा हजारे , ऋतुजा जेवे आदी मान्यवर उपस्थित होते. डॉ बाबासाहेब आंबेडकरांप्रमाणे परिस्थिती कशीही असली तरी प्रयत्नपूर्वक शिक्षण घेत स्वावलंबी होणे महत्वाचे आहे असे मार्गदर्शन प्रमुख पाहुण्या अभिनेत्री पुष्पा चौधरी यांनी पालकांना केले. साने गुरुजींची १२५ वी जयंती नुकतीच पार पडली. खरा धर्म कोणता असेल तर तो प्रेम आहे. संविधानाला अभिप्रेत भावी नागरिक शाळेतून निर्माण करणे प्रशासक मंडळाचे कर्तव्य असून त्यासाठी लागेल ती तयारी करण्याचे आश्वासन अध्यक्षीय भाषणात शिवाजी खांडेकर यांनी व्यक्त केले. यावेळी संचालक प्रा भगवान कोकणे, पालक प्रतिनिधी प्रशांत सातपुते, राजेंद्र पोकळे यांनीही आपले विचार मांडले. मुख्याध्यापक मीना काटे यांनी प्रास्ताविकात शालेय प्रगती व भावी वाटचालीबाबत पालकांना सांगितले.पाहुण्यांच्या हस्ते गुणवंत विद्यार्थी व पालकांना बक्षीस वितरण करण्यात आले. कार्यक्रम यशस्वी करण्यासाठी संजय ससे, संगिता गोवळकर, शितल खेडकर,मोनिका पोटे, शितल रुपनवर,लक्ष्मी कांबळे निशा नाईकनवरे यांनी परिश्रम घेतले. सूत्रसंचालन सोपान बंदावणे व तेजस्विनी फुलफगर यांनी केले तर आभार विठ्ठल शेवते यांनी मानले.

Newsworldmarathi Pune : पुणे शहरातील पर्यावरण प्रेमी नागरिकांनी सण-उत्सवांच्या काळात मोठ्या प्रमाणावर बलून सोडण्यामुळे होणाऱ्या पर्यावरणीय हानीबाबत पुणे महानगरपालिका, जिल्हाधिकारी कार्यालय, आणि महाराष्ट्र प्रदूषण नियंत्रण मंडळाकडे तक्रार दाखल केली आहे. पर्यावरणप्रेमी अनंत रामचंद्र घरत, अध्यक्ष- माय अर्थ संस्था आणि सदस्य- एन्वायरनमेंट क्लब ऑफ इंडिया, यांनी एका सविस्तर पत्राद्वारे प्रशासनाकडे ही तक्रार नोंदवली. त्यांनी बलून सोडण्याच्या प्रथेमुळे जलप्रदूषण, वन्यजीवांना धोका, नॉन-बायोडिग्रेडेबल कचरा, हवामान प्रदूषण, आणि कचरा निवारणाच्या समस्या यावर भर दिला आहे. पत्रात नमूद केलेल्या महत्त्वाच्या मुद्द्यांनुसार, बलून हवेत सोडल्यावर अनेकदा जलाशयात किंवा जमिनीवर पडतात. यामुळे जलचर प्राण्यांवर प्रतिकूल परिणाम होतो. बलूनचे तुकडे गिळल्याने मासे, पक्षी, आणि प्राणी मृत्युमुखी पडतात. लॅटेक्स किंवा फॉयल बलूनच्या विघटनास अनेक वर्षे लागतात, त्यामुळे हे कचऱ्याचे प्रमाण वाढवतात. बलून सोडणे हे प्लास्टिक कचरा व्यवस्थापन नियम, २०१६ आणि पर्यावरण संरक्षण कायदा, १९८६ च्या नियमांचे उल्लंघन असल्याचेही या पत्रात नमूद आहे. याशिवाय, वन्यजीव संरक्षण अधिनियम, १९७२ नुसार वन्यजीवांचे संरक्षण करणे आवश्यक आहे, ज्यावरही बलून सोडण्यामुळे विपरित परिणाम होतो. सार्वजनिक सण-उत्सवांमध्ये बलून सोडण्यावर प्रतिबंध. पर्यावरणीय परिणामांविषयी जनजागृती मोहिम. पर्यावरणपूरक पर्यायांचा प्रसार, जसे बायोडिग्रेडेबल सजावट. प्लास्टिक कचरा व्यवस्थापन नियमांची काटेकोर अंमलबजावणी. बलून सोडणाऱ्यांवर दंडात्मक कारवाई करण्यात यावी अशा मागण्या घरत यांनी प्रशासनालाकडे केल्या आहेत. तक्रारीत पुढे नमूद केले आहे की, पुणे महानगरपालिका या समस्येवर तातडीने कार्यवाही न केल्यास राष्ट्रीय हरित न्यायाधिकरणाकडे (NGT) दाद मागण्यात येईल.

Newsworldmarathi Pune : पुण्यातील भाजपचे आमदार योगेश टिळेकर (MLA Yogesh Tilekar) यांचे मामा सतीश वाघ (Satish Wagh Murder Case) यांचं काही नऊ डिसेंबरला अपहरण करुन निर्घृण हत्या करण्यात आली होती. शिवाय हत्या केल्यानंतर त्यांचा मृतदेह शिंदवणे घाटात फेकून देण्यात आला होता. या प्रकरणात पोलिसांचा तपास सुरू होता. काहींना अटक देखील करण्यात आली होती. काल (बुधवारी) पोलीस तपासात (Pune Crime) सर्वात मोठा खुलासा समोर आला. शेजाऱ्यासोबत असलेल्या प्रेम संबंधात अडसर ठरत असलेल्या नवऱ्याची सुपारी देऊन पत्नीनेच काटा काढल्याची धक्कादायक माहिती समोर आली आहे. हॉटेल व्यावसायिक सतीश वाघ (Satish Wagh Murder Case) यांची त्यांच्या पत्नीनेच पैसे देऊन हत्या करायला लावली आहे. मोहिनी वाघ (Mohini Wagh) असं या प्रकरणातील आरोपी पत्नीचे नाव आहे. दरम्यान ही हत्या प्रेमसंबंधातून झाल्याची धक्कादायक माहिती आहे. सतीश वाघ आणि मोहिनी वाघ यांच्या मुलाच्या मित्रासोबत मोहिनी वाघचे असलेल्या अनैतिक संबंधातून पती सतीश वाघ यांची हत्या घडवून आणल्याचं उघड झालं आहे. भाजपचे आमदार योगेश टिळेकर यांचे सख्खे मामा सतीश वाघ यांची नऊ डिसेंबरला अपहरण करून हत्या करण्यात आली होती. मात्र, सतीश वाघ यांची हत्या पैशांसाठी करण्यात आलेल्या अपहरणातून नाही तर अनैतिक संबंधांतून झाल्याचं समोर आल्यानंतर सर्वांनाच धक्का बसला. पुणे पोलिसांनी सतीश वाघ यांची पत्नी मोहिनी वाघ हीला काल (बुधवारी) अटक केली आहे. मोहिनी वाघचे वय सध्या 48 वर्षे असून तिचा प्रियकर अक्षय जावळकर हा 32 वर्षांचा आहे. अक्षय जावळकर हा मोहिनी वाघाच्या मुलाचा मित्र होता. मुलाच्या वयाचा असलेल्या अक्षय आणि मोहिनीचे अनैतिक संबंध असतील अशी शंका सुरुवातीला कोणाला आली नाही. मात्र, सतीश वाघ यांना हे समजताच मोहिनी-सतीश आणि अक्षय यांच्यामध्ये वाद सुरु झाले होते.अनेक वर्षे त्यांच्यातील वाद धुमसत होता आणि त्यातून सतीश वाघ त्यांची हत्या झाल्याची माहिती आहे. सतीश तात्याबा वाघ यांच्याकडे आरोपी अक्षय हरीश जावळकर हा सतीश वाघ यांच्याकडे पूर्वी भाडेकरू म्हणून राहत होता. त्या वेळी मोहिनीसोबत त्याचे प्रेमसंबंध निर्माण झाले. यासंबधीची कुणकुण सतीश वाघ यांना लागल्यामुळे त्यांच्या पत्नीकडूनच खुनाची सुपारी देऊन नवऱ्याचा काटा काढण्याचा डाव आखला. मोहिनी वाघने अक्षयला नवरा सतीश यांचा खून करण्यास सांगितले. त्यासाठी पाच लाख रुपये देण्याची तयारी दाखवली. त्यापैकी दीड लाख रुपये तिने अक्षयकडे दिले होते. त्यानंतर अक्षयने चार महिन्यांपूर्वी सतीश यांना मारण्यासाठी पवनला सुपारी दिली होती. त्यानंतर पवनने त्याचा साथीदार नवनाथ आणि विकासला आपल्यासोबत सहभागी करून घेतले.अक्षयने आरोपींना दीड लाखाची रक्कम दिली असल्याची माहिती समोर आली आहे.