News World Marathi© 2024 Newsworld मराठी बाह्य इंटरनेट साइट्सच्या सामग्रीसाठी आम्ही जबाबदार नाही. बाह्य लिंक्सबद्दल आम्हाल काय वाटतं? इथे वाचा. बाह्य लिंक्सबद्दल आम्हाल काय वाटतं? इथे वाचा.

Newsworldmarathi Pune: कृषी उत्पन्न बाजार समितीचे संचालक व भाजपचे जिल्हा उपाध्यक्ष सुदर्शन चौधरी यांनी आपल्या वाढदिवसानिमित्त पुष्पगुच्छ अथवा भेटवस्तू देण्याऐवजी शालेय साहित्य दान करण्याचे आवाहन केले होते. त्यांच्या या सामाजिक उपक्रमाला मित्र परिवाराने भरभरून प्रतिसाद दिला असून, सुमारे १४,००० वह्या व इतर शालेय साहित्य जमा करण्यात आले. या उपक्रमाअंतर्गत, आज सोरतापवाडी येथील जिल्हा परिषदेच्या शाळेत २१० विद्यार्थ्यांना प्रत्येकी पाच वह्या वाटप करण्यात आल्या. एकूण १०५० वह्यांचे वितरण करण्यात आले. विद्यार्थ्यांच्या चेहऱ्यावर आनंद ओसंडून वाहताना दिसून आला. कार्यक्रमात उपस्थित असलेल्या उद्योगपती तानाजीशेठ चोरघे यांनी शाळेसाठी पिण्याच्या पाण्याची सोय व्हावी यासाठी मोठ्या क्षमतेचा वॉटर फिल्टर देण्याची घोषणा केली, ज्यामुळे शाळेतील विद्यार्थ्यांना स्वच्छ पिण्याचे पाणी उपलब्ध होणार आहे. या उपक्रमासाठी गावच्या सरपंच सुप्रियाताई चौधरी, तानाजीशेठ चोरघे, डॉ. नितीन चौधरी, सनी चौधरी, अमित चौधरी, सोनाशेठ कड सुहास चौधरी, राहुल गाढवे तसेच मंडळातील अनेक तरुण सहकारी आणि ग्रामस्थ मोठ्या संख्येने उपस्थित होते. सुदर्शन चौधरी यांच्या या उपक्रमामुळे समाजात सकारात्मक संदेश गेला असून, वाढदिवस साजरा करण्याचा हा अनोखा आणि विधायक मार्ग सर्वांसाठी प्रेरणादायी ठरत आहे.

Newsworldmarathi Pune: आषाढी एकादशीच्या पार्श्वभूमीवर विठूरायाच्या पंढरीत भाविकांना आपत्कालीन वैद्यकीय सेवा देण्यासाठी १०८ रुग्णवाहिका अहोरात्र कार्यरत होती. या वेळी १०९५ भाविकांना आरोग्यसेवा देण्यात महाराष्ट्र आपत्कालीन वैद्यकीय सेवेला यश आले आहे. आषाढी एकादशीच्या पार्श्वभूमीवर लाखो भाविक, वारकरी विठूरायाच्या दर्शनासाठी पंढरपुरात येत असतात. या वेळी पंढरीत तत्काळ आरोग्य सेवा मिळाली पाहीजे अशी सूचना राज्याचे आरोग्यमंत्री डॉ. प्रकाश अबिटकर यांनी केली होती. त्यानुसार राज्याच्या आपत्कालीन वैद्यकीय सेवेने डायल १०८ नावाचा कक्ष उभारण्यात आला होता. विशेष नियंत्रण कक्षाद्वारे भाविकांना आरोग्य सेवा देण्यात आली. राज्यात भारत विकास गृप (बीव्हीजी) द्वारे १०८ रुग्णवाहिका सेवा पुरवली जाते. भाविकांच्या सेवेसाठी १०८ रुग्णवाहिकासेवेद्वारे शहरात २४ रुग्णवाहिका तैनात करण्यात आल्या होत्या. यात १४ रुग्णवाहिका ॲडव्हांस लाईफ सपोर्ट (ALS) तर १० रुग्णवाहिका बेसिक लाईफ (BLS) सपोर्ट या प्रकारातल्या होत्या. विशेषबाब म्हणजे ३५ डॉक्टर,३० चालक, १० प्रशासकीय अधिकारी व नियंत्रण कक्षातील १० कर्मचाऱ्यांनी अरोग्यसेवा देण्यासाठी अहोरात्र मेहनत घेतली. अशी दिली आरोग्य सेवा १) हृदयविकार : ११ २) वैद्यकीय : ९८१ ३) इतर : ८० ४) पॉली ट्रॉमा : २२ ५) हल्ला : १ एकूण : १०९५

Newsworldmarathi Pune: पुण्याचा वैभवशाली गणेशोत्सव केवळ पुण्यापुरता मर्यादित राहिला नसून अवघ्या जगाचे आकर्षण झाला आहे. हा गणेशोत्सव डीजेमुक्त आणि धार्मिक व आपल्या संस्कृती परंपरेप्रमाणे साजरा झाला पाहिजे, यासाठी यंदाच्या गणेशोत्सवात डीजेवर लावणाऱ्या गणेश मंडळांना जाहिरात स्वरूपात आर्थिक साह्य न करण्याची भूमिका ‘पुनीत बालन ग्रुप’चे अध्यक्ष पुनीत बालन यांनी जाहीर केली आहे. ‘समर्थ प्रतिष्ठान’च्या ढोल-ताशा पथकाच्या वाद्य पूजन कार्यक्रमात बालन बोलत होते. खासदार मेधा कुलकर्णी, कसबा मतदार संघाचे आमदार हेमंत रासने आदी पदाधिकारी यावेळी उपस्थित होते. यावेळी बालन म्हणाले, ‘‘पुण्यातील सार्वजनिक गणेशोत्सवाला १३२ वर्षाहून अधिक काळ झाला आहे. स्वातंत्र्याच्या चळवळीत जनतेने एकत्र येऊन लढा देण्यासाठी लोकमान्य टिळक आणि श्रीमंत भाऊसाहेब रंगारी यांनी सार्वजनिक गणेशोत्सव सुरु केला. स्वातंत्र्यप्राप्तीनंतर गणेशोत्सवाच्या माध्यमातून अनेक सांस्कृतिक कार्यक्रमांचे आयोजन केले जात होते. मात्र, अलीकडच्या काळात काही मंडळे मोठमोठ्या स्पीकर्सच्या भिंती उभारून त्यावर अश्लील गाणी लावून गणेशोत्सव साजरा केल्याचे आढळते. यामुळे गणेशोत्सवाला गालबोट लागत आहे, हे आपल्या संस्कृतीला शोभत नाही. त्यामुळे डीजेमुक्त गणेशोत्सव साजरा करण्याची गरज असून त्यासाठी आता पावले उचलण्याची गरज आहे.’’ गणेश मंडळे आर्थिकदृष्ट्या सक्षम होण्यासाठी माणिकचंद ऑक्सिरीच आणि पुनीत बालन ग्रुपच्या माध्यमातून जाहिरातीच्या स्वरुपात गणेश मंडळांना मोठ्या प्रमाणात आर्थिक साह्य केले जाते. परंतु आपल्या गणेशोत्सवाचे वैभव कायम राखण्यासाठी डीजे वर नको ती गाणी लावून आपल्या बाप्पाचे पावित्र्य भंग करणार्या मंडळांना यापुढील आर्थिक साह्य केले जाणार नाही, असे बालन यांनी स्पष्ट करतानाच आपल्या हिंदू देवतांचा उत्सव हा धार्मिक आणि पारंपरिक पद्धतीनेच साजरा झाला पाहिजे अशी ठाम भुमिका मांडली. त्यांच्या या भूमिकेचे समाजातील सर्वच स्तरांतून स्वागत होत आहे.

Newsworldmarathi Pune: हिंजवडीत रविवारी (29 जून) सायंकाळपासून वीजपुरवठा खंडित झाल्याने आयटी कंपन्यांच्या कामकाजावर मोठा परिणाम झाला आहे. महावितरण विभागाने सांगितले की, वीजपुरवठा पूर्ववत होण्यासाठी ३ ते ४ दिवस लागणार आहेत. महापारेषण कंपनीच्या २२० केव्ही इन्फोसिस ते २२० केव्ही पेगासस या अतिउच्चदाब भूमिगत वीज वाहिनीत रविवारी दुपारी २.१० च्या सुमारास बिघाड झाल्यामुळे हा विस्कळीत वीजपुरवठा झाला. या बिघाडामुळे महावितरणच्या एमआयडीसी व आयटी पार्क भागातील ९१ उच्चदाब व सुमारे १२ हजार लघुदाब वीजग्राहकांवर परिणाम झाला आहे. महावितरण विभागाने दिलेल्या माहितीनुसार, तब्बल *६३ मेगावॅटहून अधिक भार इतरत्र मार्गाने वळविण्याचे काम सुरु* असून, *हिंजवडी एमआयडीसी, आयटी पार्क, रायसोनी पार्क, डॉहलर कंपनी परिसर आणि विप्रो सर्कलच्या* आसपासच्या भागांतील वीजग्राहक यामुळे प्रभावित झाले आहेत. या बिघाडामुळे अनेक मोठ्या आयटी कंपन्यांचे कामकाज ठप्प झाले असून, अनेकांना वर्क फ्रॉम होम पर्यायाचा अवलंब करावा लागत आहे. दरम्यान, महावितरणने नागरिकांनी सहकार्य करावे असे आवाहन केले आहे. पुढील काही दिवस वीजपुरवठा असाच विस्कळीत राहण्याची शक्यता असल्याने स्थानिक रहिवाशांसह व्यावसायिकांनी पर्यायी व्यवस्था करून काळजी घ्यावी, असे प्रशासनाकडून सांगण्यात आले आहे. महावितरण आणि महापारेषण विभागाचे कर्मचारी युद्धपातळीवर दुरुस्तीचे काम करत आहेत.

Newsworldmarathi Pune : पंढरीच्या लक्षावधी वारकऱ्यांना कोणत्याही आपत्कालीन समस्येत तत्काळ आरोग्य सेवा उपलबद्ध होण्यासाठी महाराष्ट्र आपत्कालीन वैद्यकीय सेवेच्या १२० रुग्णवाहिका २४ तास वारकऱ्यांना आरोग्य सेवा देत आहेत. राज्यात भारत विकास गृपद्वारे (बीव्हीजी) १०८ रुग्णवाहिका सेवेची अमंलबजावणी केली जाते. आजतागायत ८६४३ वारकऱ्यांनी आरोग्यसेवाचा लाभ घेतला आहे. वारकरी बांधवांना तत्काळ आरोग्यसेवा मिळावी यासाठी आपत्कालीन वैद्यकीय सेवेने पंढरपुर येथे नियंत्रण कक्ष तयार केला आहे. नियंत्रण कक्षाद्वारे पालखी सोहळ्याचे बारकाईने निरिक्षण करुन तत्काळ आरोग्यसेवा देण्याकडे विशेष लक्ष केंद्रीत केले आहे. आषाढी एकादशीच्या पार्श्वभूमीवर लाखो वारकरी विठूरायाच्या दर्शनासाठी पायी वारी करत आहेत. पायी वारी करताना भाविकांना तत्काळ आरोग्य सेवा मिळावी. अशी सूचना राज्याचे आरोग्यमंत्री डॉ. प्रकाश अबिटकर यांनी आपत्कालीन वैद्यकीय सेवेला केली होती. आरोग्यमंत्र्यांच्या सूचनेची अमंलबजावणी करण्यासाठी बीव्हीजीचे चेअरमन हणमंतराव गायकवाड यांनी अवघ्या काही तासातच १२० रुग्णवाहिका पालखी सोहळ्यासाठी तैनात केल्या. रुग्णवाहिकेद्वारे १२० डॉक्टर व १२८ ड्रायवर वारकऱ्यांना २४ तास आरोग्यसेवा अर्पण करत आहेत. ‘भारताचे श्रध्दास्थान असलेल्या पंढरीच्या वारीत भाविकांना आरोग्य सेवा देण्याची संधी आम्हाला मिळतेय, हे मी माझे भाग्य समजतो. माननीय आरोग्यमंत्री अबिटकर साहेबांनी केलेल्या सूचनेनुसार अवघ्या काही तासातच पालखी सोहळ्यासाठी १२० रुग्णवाहिकेचे नियोजन आम्ही केले. वारकऱ्यांना आरोग्यमय वारी अनुभवता यावी, यासाठी २४८ आरोग्यदूत अहोरात्र कार्यरत आहेत. अशी प्रतिक्रिया गायकवाड यांनी व्यक्त केली. १०८ रुग्णवाहिकेचे वारीचे नियोजन मानाच्या १० पालख्यांसाठी आपत्कालीन वैद्यकीय सेवेच्या १२० रुग्णवाहिका तैनात करण्यात आल्या आहेत. यात ९० बेसिक लाईफ सपोर्ट व ३० ॲडव्हांस लाईफ सपोर्ट या प्रकारातल्या रुग्णवाहिका आहेत. पालखींची नावे खालिल प्रमाणे, 1) संत निवृत्ती महाराज (त्र्यंबकेश्वर ) 2) संत ज्ञानेश्वर महाराज ( आळंदी ) 3) संत सोपान काका महाराज ( सासवड ) 4) संत मुक्ताबाई ( मुक्ताईनगर ) 5) संत तुकाराम महाराज ( देहू ) 6) संत नामदेव महाराज ( पंढरपूर ) 7) संत एकनाथ महाराज ( पैठण ) 8) रुक्मिणी माता ( कौडानेपूर -अमरावती ) 9) संत निळोबाराय ( पिंपळनेर – पारनेर अहमदनगर ) 10) संत चांगाटेश्वर महाराज ( सासवड )